Joŋwana 2

Zìlə́ wiən tə nə yɩ vàrʋ́ càlɩ̀

1 Ba-Yígúrə́-Jə-Tiu kʋ́ʋ̀ swɩ̀n, Moyizə con, ʋ wʋ́: «Lìù nə pɩ̀à, sə ʋ pa zìlə́ won à mʋ̀ Ba-Yígúrə́-Jə-Tiu nə, zìlə́ won təntə mɛ, sə kʋ ya wobɩa mun. Ʋ wá lwá nʋga mun tə yuu wa, ʋ ga kə wusinə ʋ súrí tə nə. 2 Ʋ wá ja tə, ʋ bà ʋ pa Aron bɩ̀á, Yɩɩ joŋwana tə nə. Zìlə́ won tə tíú wá fwa mun təntə, ba nə ywɛ́ də nʋga, ʋ jɩguli yii, də tə wusinə tə mama, ʋ pa Yɩɩ joŋwanʋ tə don nə, sə ʋ sʋ̀rɩ́ Yɩɩ joŋi bwálɩ́ tə yuu wa, sə kʋ pa, à mʋ̀ Yɩɩ bʋ́n zìlə́ won tə tíú yoo. Kʋ yɩ zìlə́ won, ba nə sʋ̀rɩ́, kʋ lwán ga ywán, kʋ pa à mʋ̀ Ba-Yígúrə́-Jə-Tiu nə. 3 Zìlə́ won tə gɩganɩ tə yɩ à mʋ̀ Ba-Yígúrə́-Jə-Tiu cɩcɩ nyiən*. Cɩ́gá, kʋ yɩ zìlə́ won, ba nə sʋ̀rɩ́, ba pa à mʋ̀ Ba-Yígúrə́-Jə-Tiu nə, gɩganɩ. Kʋ mʋ̀ yɩrɩ, kʋ gɩganɩ tə yɩ Aron, də ʋ bɩ̀á tə nə tɩ.

4 Də á wa lìù nə pɩ̀à, sə ʋ pa zìlə́ won, kʋ nə yɩ vàrʋ́ càlɩ̀, ba nə wùə̀ mən bwálʋ́ wa, kʋ mɛ, sə kʋ ya wobɩa mun, ba nə ywɛ́ də nʋga, ba ma fwa gàtə́rán, tə wa ga ba sabwarɩ jə. Kʋ wàá ŋʋ̀nán də, kʋ yanɩ, ba nə gàrɩ̀ nʋga tə yuu wa, tə wa ga ba sabwarɩ jə. 5 Də zìlə́ won tə nə yɩ won, ba nə wùə̀ wopɩpaʋ yuu, kʋ mɛ, sə kʋ ya wobɩa mun, ba nə ywɛ́ də nʋga, tə wa ga ba sabwarɩ jə. 6 Zìlə́ won tə tíú wá mumuni kʋ, ʋ gàrɩ̀ nʋga kʋ yuu wa. Kʋ yɩ zìlə́ won, kʋ nə yɩ vàrʋ́ càlɩ̀. 7 Də zìlə́ won tə nə kʋ́ʋ̀ yɩ won, ba nə kwàrɩ̀ nagwala wa, kʋ mɛ, sə kʋ ya wobɩa mun, ba nə ywɛ́ də nʋga. 8 Kʋ tíú dàń wá ja zìlə́ won tə, ʋ nə tanɩ nətʋ, ʋ bà, ʋ pa à mʋ̀ Ba-Yígúrə́-Jə-Tiu nə. Yá ʋ wá pa kʋ, Yɩɩ joŋwanʋ tə don nə, ʋ ja va Yɩɩ joŋi bwálɩ́ tə yuu. 9 Yɩɩ joŋwanʋ tə wá lɩ zìlə́ won təntə vàn don, ʋ sʋ̀rɩ́ Yɩɩ joŋi bwálɩ́ tə yuu wa, sə kʋ pa, à mʋ̀ Yɩɩ bʋ́n zìlə́ won tə tíú yoo. Kʋ yɩ zìlə́ won, ba nə sʋ̀rɩ́, kʋ lwán ga ywán, kʋ pa à mʋ̀ Ba-Yígúrə́-Jə-Tiu nə. 10 Zìlə́ won tə gɩganɩ tə yɩ à mʋ̀ Ba-Yígúrə́-Jə-Tiu cɩcɩ nyiən. Cɩ́gá, kʋ yɩ zìlə́ won, ba nə sʋ̀rɩ́, ba pa Ba-Yígúrə́-Jə-Tiu nə, gɩganɩ. Kʋ mʋ̀ yɩrɩ, kʋ gɩganɩ tə yɩ Aron, də ʋ bɩ̀á tə nə tɩ.

11 Zìlə́ wiən tə mama, tə nə yɩ vàrʋ́ càlɩ̀ wiən, á nə wá pa à mʋ̀ Ba-Yígúrə́-Jə-Tiu nə, wà mɛ, sə tə wa ja sabwarɩ. Cɩ́gá, á wà mɛ, sə á sʋ̀rɩ́ zìlə́ won, á pa à mʋ̀ Ba-Yígúrə́-Jə-Tiu nə, kʋ wa nə jə sabwarɩ, nə à yə̀ə́ tʋ̀ràn. 12 Á wàá tə, á pɩn à mʋ̀ Ba-Yígúrə́-Jə-Tiu nə, ndə kárɩ́ wiən təntən lənə nə. Á dàń nə wà mɛ, sə á tún tə, Yɩɩ joŋi bwálɩ́ tə yuu wa, ndə zìlə́ won nə, ba nə sʋ̀rɩ́, kʋ lwán ga ywán, kʋ pa à mʋ̀ Ba-Yígúrə́-Jə-Tiu nə.

13 Á mɛ, sə á kə nəkuən, á zìlə́ won mama wa, kʋ nə yɩ vàrʋ́ càlɩ̀ won, á nə wá pa. Á dànà ká swɛ̀ɛ́ nəkuən tə yoo. Cɩ́gá, ka yɩ nimarʋ tə nyɩnyɩga, à mʋ̀, á Yɩɩ tə nə tún də aba. Á mɛ, sə á súrí nəkuən, á zìlə́ won mama nə, á pa.

14 Də á wa lìù nə pɩ̀à, sə ʋ pa ʋ kárɩ́ wiən təntən lənə, à mʋ̀ Ba-Yígúrə́-Jə-Tiu nə, ʋ zìlə́ won təntə mɛ, sə kʋ ya mɩndʋra yun, ʋ nə wùə̀ mən wa, ʋ lɩ tə bɩ̀á tə, ʋ gɩrɩ. 15 Kʋ tíú wá lwá nʋga tə yuu wa, ʋ ga kə wusinə tə wa. Kʋ yɩ zìlə́ won, kʋ nə yɩ vàrʋ́ càlɩ̀. 16 Yɩɩ joŋwanʋ tə wá fwa wobɩa tə, ba nə gɩrɩ tə vàn don, də nʋga tə, də wusinə tə mama, ʋ sʋ̀rɩ́. Kʋ nətʋ wá pa, à mʋ̀ Yɩɩ bʋ́n zìlə́ won tə tíú yoo. Kʋ yɩ zìlə́ won, ba nə sʋ̀rɩ́, ba pa à mʋ̀ Ba-Yígúrə́-Jə-Tiu nə.»