Nimarʋ joŋi
3
1 Ba-Yígúrə́-Jə-Tiu kʋ́ʋ̀ swɩ̀n, Moyizə con, ʋ wʋ́: «Də lìù nə pɩ̀à, sə ʋ ja vanfarʋ, ʋ ma fwa nimarʋ joŋi, ʋ pa à mʋ̀ Ba-Yígúrə́-Jə-Tiu nə, vànɩ́ tə mɛ, sə kʋ ya nabɩa, nə à yə̀ə́ nakan, kʋ yɩra nə zurə, kʋ ga cé. 2 Ʋ wá tún ʋ jɩɩn naʋ tə yuu wa, ʋ ga gʋ kʋ, Yɩɩ jə́rə́ gansili tə mimii tə yáá nə. Yá Aron bɩ̀á, Yɩɩ joŋwana tə wá ja kʋ jana tə, ba ma tà Yɩɩ joŋi bwálɩ́ tə yɩra tə, ba kɩkarɩ. 3 Nə̀ń nimarʋ joŋi naʋ təntə wiən tə, joŋi tə tíú nə wá lɩ, ʋ pa Yɩɩ joŋwanʋ tə don nə, sə ʋ sʋ̀rɩ́, ʋ pa à mʋ̀ Ba-Yígúrə́-Jə-Tiu nə. Ʋ wá lɩ nʋga tə mama, ka nə dà naʋ tə waa wiən tə yɩra, 4 də naʋ tə tanpɩrɩbɩa bələ tə, də nʋga tə nə dà tə yɩra, də nʋga tə nə dà kʋ səpunə tə, də kʋ cɩɩn tə yɩra. Ʋ wá goŋə cɩɩn tə, də tanpɩrɩbɩa tə mɛ, ʋ lɩ. 5 Aron bɩ̀á tə wá tún vànɩ́ tə nàŋʋ́ tə dɛɛ tə yuu, tə nə wulə mən tə wa, Yɩɩ joŋi bwálɩ́ tə yuu wa. Yá ba dàń wá dà vànɩ́ tə waa wiən tə nàŋʋ́ tə yuu wa, ba sʋ̀rɩ́. Kʋ yɩ joŋi, ba nə sʋ̀rɩ́, kʋ lwán ga ywán, kʋ pa à mʋ̀ Ba-Yígúrə́-Jə-Tiu nə.6 Yá kʋ dàń nə yɩ vanmɩna nə, lìù pɩ̀à, ʋ ma fwa nimarʋ joŋi, ʋ pa à mʋ̀ Ba-Yígúrə́-Jə-Tiu nə, vànɩ́ tə mɛ, sə kʋ ya vanbɩa, nə à yə̀ə́ vankan, kʋ yɩra nə zurə, kʋ ga cé. 7 Joŋi vànɩ́ tə nə yɩ pəbiə, joŋi tə tíú mɛ, sə ʋ ja pəbiə tə, ʋ bà à mʋ̀ Ba-Yígúrə́-Jə-Tiu yáá con. 8 Ʋ wá tún ʋ jɩɩn ka yuu wa, ʋ ga gʋ ka, Yɩɩ jə́rə́ gansili tə yáá. Yá Aron bɩ̀á tə dàń wá ja ka jana tə, ba ma tà Yɩɩ joŋi bwálɩ́ tə yɩra tə, ba kɩkarɩ. 9 Nə̀ń nimarʋ joŋi vànɩ́ təntə wiən tə, joŋi tə tíú nə mɛ, sə ʋ lɩ, ʋ pa Yɩɩ joŋwanʋ tə don nə, sə ʋ sʋ̀rɩ́, ʋ pa à mʋ̀ Ba-Yígúrə́-Jə-Tiu nə. Ʋ wá lɩ kʋ nanʋga tə, ʋ ga mɛ vànɩ́ tə dəwurə nə, ʋ goŋə kʋ dəbili sɔɔ tə mama, ʋ lɩ. Ʋ wá lɩ nʋga tə mama, ka nə dà vànɩ́ tə waa wiən tə yɩra, 10 də vànɩ́ tə tanpɩrɩbɩa bələ tə, də nʋga tə nə dà tə yɩra, də nʋga tə nə dà kʋ səpunə tə, də kʋ cɩɩn tə yɩra. Ʋ wá goŋə cɩɩn tə, də tanpɩrɩbɩa tə mɛ, ʋ lɩ. 11 Yá Yɩɩ joŋwanʋ tə don dàń wá sʋ̀rɩ́ vànɩ́ tə wiən təntə, Yɩɩ joŋi bwálɩ́ tə yuu wa. Kʋ yɩ wodiu, ba nə sʋ̀rɩ́, ba pa à mʋ̀ Ba-Yígúrə́-Jə-Tiu nə.
12 Də joŋi tə nə yɩ bʋ̀n nə, lìù pɩ̀à, ʋ ma fwa, kʋ tíú mɛ, sə ʋ ja bʋ̀n tə, ʋ bà à mʋ̀ Ba-Yígúrə́-Jə-Tiu yáá con. 13 Ʋ wá tún ʋ jɩɩn kʋ yuu wa, ʋ ga gʋ kʋ Yɩɩ jə́rə́ gansili tə yáá. Yá Aron bɩ̀á tə dàń wá ja kʋ jana tə, ba ma tà Yɩɩ joŋi bwálɩ́ tə yɩra tə, ba kɩkarɩ. 14 Nə̀ń nimarʋ joŋi bʋ̀n təntə wiən tə, joŋi tə tíú nə mɛ, sə ʋ lɩ, ʋ pa Yɩɩ joŋwanʋ tə don nə, sə ʋ sʋ̀rɩ́, ʋ pa à mʋ̀ Ba-Yígúrə́-Jə-Tiu nə. Ʋ wá lɩ nʋga tə mama, ka nə dà bʋ̀n tə waa wiən tə yɩra, 15 də bʋ̀n tə tanpɩrɩbɩa bələ tə, də nʋga tə nə dà tə yɩra, də nʋga tə nə dà kʋ səpunə tə, də kʋ cɩɩn tə yɩra. Ʋ wá goŋə cɩɩn tə, də tanpɩrɩbɩa tə mɛ, ʋ lɩ. 16 Yá Yɩɩ joŋwanʋ tə don dàń wá sʋ̀rɩ́ vànɩ́ tə waa wiən təntə, Yɩɩ joŋi bwálɩ́ tə yuu wa. Kʋ yɩ wodiu, ba nə sʋ̀rɩ́, kʋ lwán ga ywán, kʋ pa à mʋ̀ Ba-Yígúrə́-Jə-Tiu nə. Vànɩ́ bwálá tə mama nə jə nʋga, yɩ à mʋ̀ Ba-Yígúrə́-Jə-Tiu nyiən. 17 Kʋ mʋ̀ tə yɩrɩ, á wà mɛ, sə á də́ nanʋga, nə à yə̀ə́ jana. Kʋ yɩ nii à pɩn, kʋ pʋ́pʋ́nɩ́, kʋ tún, á dwíə́ tə mama yɩrɩ, máŋá də máŋá mama wuuu, bwálɩ́ tə mama wa, á nə wá ya.»