Joŋwana 4

Cʋna kwɩan joŋi

1 Ba-Yígúrə́-Jə-Tiu swɩ̀n Moyizə con, 2 sə ʋ pa kwìə̀ tə tə Yɩzərayɛlə dwíí tə nə. Ʋ swɩ̀n, ʋ wʋ́: «Də á wa lìù nə cʋ̀gʋ̀ culən tə, à mʋ̀ Ba-Yígúrə́-Jə-Tiu nə pɩn nii tə yuu wa, culu don, də ʋ yəri, yá kʋ nətʋ tə dàń pa, ʋ jì cʋna lìù, nə̀ń kʋ tə, á nə mɛ, sə á pa kʋ tíú fwa.

Yɩɩ joŋwana yun tɩ̀án nəkwɩa cʋna kwɩan joŋi

3 Kʋ nə yɩ Yɩɩ joŋwana yun tɩ̀án nəkwɩa tə, ba nə twɛ́n dun nʋga* tə ʋ yuu wa, nə tʋn cʋna tə, kʋ pa cʋna təntə yoo dàń wulə lalʋʋ tə mama yuu wa, kʋ yɩ nababiə, ka yɩra nə zurə, ka ga cé nə, ʋ wá ja bà, ʋ gʋ, ʋ ma fwa cʋna kwɩan joŋi, ʋ pa à mʋ̀ Ba-Yígúrə́-Jə-Tiu nə, cʋna tə yɩrɩ, ʋ nə tʋn. 4 Ʋ wá ja nabɩa tə, ʋ bà ʋ zɩgɩ Yɩɩ jə́rə́ gansili tə mimii tə yáá, à mʋ̀ Ba-Yígúrə́-Jə-Tiu yáá con. Ʋ wá tún ʋ jɩɩn naʋ tə yuu wa, ʋ ga gʋ kʋ, lá nə, à mʋ̀ Ba-Yígúrə́-Jə-Tiu yáá con. 5 Yɩɩ joŋwanʋ təntə, ba nə twɛ́n dun nʋga tə ʋ yuu wa, dàń wá lòní naʋ tə jana tə, ʋ ja zʋ Yɩɩ jə́rə́ gansili tə kwa con dibiu tə wa. 6 Ʋ wá li ʋ jɩfʋa jana tə wa, ʋ lɩ ʋ mɩ́n, ʋ kə Yɩɩ wúlú bwálɩ́ tə patasɩn tə nə, à mʋ̀ Ba-Yígúrə́-Jə-Tiu yáá con, nɛɛ barpɛ. 7 Ʋ wá kə jana tə Yɩɩ joŋi bwálɩ́ tə, ba nə ma sʋ̀rɩ́ wusinə tə, nyʋran tə nə. Kʋ mʋ̀ Yɩɩ joŋi bwálɩ́ təntə nə wulə à mʋ̀ Ba-Yígúrə́-Jə-Tiu yáá con, Yɩɩ jə́rə́ gansili tə wa. Yá ʋ dàń wá lwá nabɩa tə jana tə gɩganɩ tə mama, Yɩɩ joŋi bwálɩ́ tə, ba nə ma sʋ̀rɩ́ jwəŋə vàná tə, də̀ń nə. Kʋ mʋ̀ Yɩɩ joŋi bwálɩ́ təntə nə wulə Yɩɩ jə́rə́ gansili tə mimii tə yáá. 8 Ʋ wá lɩ cʋna kwɩan joŋi naʋ tə nanʋga tə mama. Ʋ wá lɩ nʋga tə mama, ka nə dà naʋ tə waa wiən tə yɩra, 9 də naʋ tə tanpɩrɩbɩa bələ tə, də nʋga tə nə dà tə yɩra, də nʋga tə nə dà kʋ səpunə tə, də kʋ cɩɩn tə yɩra. Ʋ wá goŋə cɩɩn tə, də tanpɩrɩbɩa tə mɛ, ʋ lɩ. 10 Mə nanwɩɩ təntə nə, ba yàá lɩ nimarʋ joŋi naʋ tə də wa. Yɩɩ joŋwana yun tɩ̀án nəkwɩa tə wá sʋ̀rɩ́ tə, Yɩɩ joŋi bwálɩ́ tə yuu, ba nə ma sʋ̀rɩ́ jwəŋə vàná. 11-12 Yá ʋ dàń wá pa, ba tì nabɩa tə gɩganɩ tə mama, ka tànʋ̀ tə, də ka nàŋʋ́ tə mama, də ka yuu tə, də ka nakoli tə, də ka waa wiən tə, də ka waa bàń tə, ba ja nan kwa con, ba yá Yɩzərayɛlə dwíí dəkuu bwálɩ́ tə, ba va bwálɩ́ nə, kʋ nə ba durən jə, ba nə lwɛ́ nàŋá tʋntʋnan lá. Ʋ wá tún tə dɛɛ yuu, ʋ sʋ̀rɩ́. Kʋ yɩ nàŋá tʋntʋnan pùrí yuu nə, tə mɛ, sə tə sʋ̀rɩ́.

Yɩzərayɛlə dwíí tə mama cʋna kwɩan joŋi

13 Kʋ nə yɩ Yɩzərayɛlə púlí tə mama nə cʋ̀gʋ̀ culən tə, à mʋ̀ Ba-Yígúrə́-Jə-Tiu nə pɩn nii tə yuu wa, culu don, də ba yəri, yá kʋ nətʋ tə dàń pa, ba mama jì cʋna lɩ̀à, 14 máŋá tə, ba nə twi, ba lwarɩ də, ba tʋn cʋna, Yɩzərayɛlə dwíí tə mama wá pa nababiə, sə ba ma fwa cʋna kwɩan joŋi. Ba wá ja naʋ tə, ba bà Yɩɩ jə́rə́ gansili tə yáá. 15 Yɩzərayɛlə púlí nəkwɩna tə wá tún ba jɩɩn naʋ tə yuu wa, yá ba wa lìù don ga gʋ kʋ, lá nə, à mʋ̀ Ba-Yígúrə́-Jə-Tiu yáá con. 16 Yá Yɩɩ joŋwanʋ tə, ba nə twɛ́n dun nʋga* tə ʋ yuu wa, dàń wá ja naʋ tə jana, ʋ zʋ Yɩɩ jə́rə́ gansili kwa con dibiu tə wa. 17 Ʋ wá li ʋ jɩfʋa jana tə wa, ʋ lɩ ʋ mɩ́n, ʋ kə Yɩɩ wúlú bwálɩ́ tə patasɩn tə nə, à mʋ̀ Ba-Yígúrə́-Jə-Tiu yáá con, nɛɛ barpɛ. 18 Ʋ wá kə jana tə Yɩɩ joŋi bwálɩ́ tə, nyʋran tə nə. Kʋ mʋ̀ Yɩɩ joŋi bwálɩ́ təntə nə wulə à mʋ̀ Ba-Yígúrə́-Jə-Tiu yáá con, Yɩɩ jə́rə́ gansili tə wa. Yá ʋ dàń wá lwá jana tə gɩganɩ tə mama, Yɩɩ joŋi bwálɩ́ tə, ba nə ma sʋ̀rɩ́ jwəŋə vàná tə, də̀ń nə. Kʋ mʋ̀ Yɩɩ joŋi bwálɩ́ təntə nə wulə Yɩɩ jə́rə́ gansili tə mimii tə yáá. 19 Ʋ wá lɩ naʋ tə nanʋga tə mama, ʋ sʋ̀rɩ́ Yɩɩ joŋi bwálɩ́ tə yuu wa. 20 Nətʋ tə, Yɩɩ joŋwana yun tɩ̀án nəkwɩa tə nə fwa də ʋ tətə cʋna kwɩan joŋi nabɩa tə, mə nətʋ tətə nə, ʋ wá fwa də nabɩa ka tə də. Mə nətʋ nə, Yɩɩ joŋwana yun tɩ̀án nəkwɩa tə wá fwa Yɩzərayɛlə dwíí tə cʋna kwɩan joŋi, ʋ pa ba, yá à mʋ̀ Yɩɩ dàń wá sɛ̀, à kwɛn ba cʋna tə, à lɩ ba yuu wa. 21 Yá Yɩɩ joŋwana yun tɩ̀án nəkwɩa tə dàń wá pa, ba tì nabɩa tə gɩganɩ tə, ba ja nan kwa con, ba yá Yɩzərayɛlə dwíí dəkuu bwálɩ́ tə. Yá ʋ dàń wá sʋ̀rɩ́ kʋ, ndə ʋ nə sʋ̀rɩ́ təntən nabɩa tə nətʋ. Kʋ yɩ Yɩzərayɛlə dwíí tə mama cʋna kwɩan joŋi.

Pɩ̀ʋ́ cʋna kwɩan joŋi

22 Kʋ nə yɩ pɩ̀ʋ́ nə cʋ̀gʋ̀ culən tə, à mʋ̀ Ba-Yígúrə́-Jə-Tiu nə pɩn nii tə yuu wa, culu don, də ʋ yəri, yá kʋ nətʋ tə dàń pa, ʋ jì cʋna lìù, 23 máŋá tə, ʋ nə twi, ʋ lwarɩ də, ʋ tʋn cʋna, ʋ mɛ, sə ʋ ja bʋtʋlʋ, kʋ yɩra nə zurə, kʋ ga cé, ʋ bà, ʋ ma fwa ʋ cʋna tə kwɩan joŋi. 24 Ʋ wá tún ʋ jɩɩn bʋtʋlʋ tə yuu wa, ʋ ga gʋ kʋ, à mʋ̀ Ba-Yígúrə́-Jə-Tiu yáá con, bwálɩ́ tə nə, ba nə gwɩ vàná tə, ba nə ma fwa jwəŋə, ba sʋ̀rɩ́. Kʋ yɩ cʋna kwɩan joŋi. 25 Yá Yɩɩ joŋwanʋ tə don dàń wá ja ʋ jɩfʋa, ʋ lan cʋna kwɩan joŋi vànɩ́ tə jana tə, ʋ kə Yɩɩ joŋi bwálɩ́ tə, ba nə ma sʋ̀rɩ́ jwəŋə vàná, nyʋran tə nə, ʋ ga lwá jana tə gɩganɩ tə, Yɩɩ joŋi bwálɩ́ təntə də̀ń nə. 26 Ʋ wá sʋ̀rɩ́ nanʋga tə mama, Yɩɩ joŋi bwálɩ́ tə yuu wa, ndə ʋ nə sʋ̀rɩ́ nimarʋ joŋi tə nanʋga tə nətʋ. Mə nətʋ nə, Yɩɩ joŋwanʋ tə wá fwa pɩ̀ʋ́ cʋna kwɩan joŋi, ʋ pa wá, yá à mʋ̀ Yɩɩ dàń wá sɛ̀, à kwɛn ʋ cʋna tə, à lɩ.

Lalʋʋ tə wa lìù cʋna kwɩan joŋi

27 Kʋ nə yɩ lalʋʋ tə wa lìù don nə cʋ̀gʋ̀ culən tə, à mʋ̀ Ba-Yígúrə́-Jə-Tiu nə pɩn nii tə yuu wa, culu don, də ʋ yəri, yá kʋ nətʋ tə dàń pa, ʋ jì cʋna lìù, 28 máŋá tə, ʋ nə twi, ʋ lwarɩ də, ʋ tʋn cʋna, ʋ mɛ, sə ʋ ja bʋkan, kʋ yɩra nə zurə, kʋ ga cé, ʋ bà, ʋ ma fwa ʋ cʋna tə kwɩan joŋi. 29 Ʋ wá tún ʋ jɩɩn cʋna kwɩan joŋi vànɩ́ tə yuu wa, ʋ ga gʋ kʋ, bwálɩ́ tə nə, ba nə gwɩ vàná tə, ba nə ma fwa jwəŋə, ba sʋ̀rɩ́. 30 Yá Yɩɩ joŋwanʋ tə don dàń wá ja ʋ jɩfʋa, ʋ lan vànɩ́ tə jana tə, ʋ kə Yɩɩ joŋi bwálɩ́ tə, ba nə ma sʋ̀rɩ́ jwəŋə vàná, nyʋran tə nə, ʋ ga lwá jana tə gɩganɩ tə mama, Yɩɩ joŋi bwálɩ́ təntə də̀ń nə. 31 Joŋi tə tíú wá lɩ nanʋga tə mama, ndə ba nə lɩ nimarʋ joŋi tə nanʋga tə nətʋ. Yɩɩ joŋwanʋ tə wá sʋ̀rɩ́ nanʋga təntə, Yɩɩ joŋi bwálɩ́ tə yuu wa, yá ka lwán wá ya ywánɩ́, kʋ pa à mʋ̀ Ba-Yígúrə́-Jə-Tiu nə. Mə nətʋ nə, Yɩɩ joŋwanʋ tə wá fwa lalʋʋ tə wa lìù cʋna kwɩan joŋi, ʋ pa wá, yá à mʋ̀ Yɩɩ dàń wá sɛ̀, à kwɛn ʋ cʋna tə, à lɩ.

32 Kʋ nə yɩ piə nə, cʋna lìù tə ja bà, sə ʋ ma fwa ʋ cʋna tə kwɩan joŋi, ka mɛ, sə ka ya pakan, ka yɩra nə zurə, ka ga cé. 33 Ʋ wá tún ʋ jɩɩn cʋna kwɩan joŋi vànɩ́ tə yuu wa, ʋ ga gʋ kʋ, bwálɩ́ tə nə, ba nə gwɩ vàná tə, ba nə ma fwa jwəŋə, ba sʋ̀rɩ́. 34 Yá Yɩɩ joŋwanʋ tə don wá ja ʋ jɩfʋa, ʋ lan vànɩ́ tə jana tə, ʋ kə Yɩɩ joŋi bwálɩ́ tə, ba nə ma sʋ̀rɩ́ jwəŋə vàná, nyʋran tə nə, ʋ ga lwá jana tə gɩganɩ tə mama, Yɩɩ joŋi bwálɩ́ təntə də̀ń nə. 35 Joŋi tə tíú wá lɩ nanʋga tə mama, ndə ba nə lɩ nimarʋ joŋi pəbiə tə nanʋga tə nətʋ. Yá Yɩɩ joŋwanʋ tə dàń wá sʋ̀rɩ́ nanʋga təntə Yɩɩ joŋi bwálɩ́ tə yuu wa, jwəŋə tə duən tə yuu, ba nə sʋ̀rɩ́, ba pa à mʋ̀ Ba-Yígúrə́-Jə-Tiu nə. Mə nətʋ nə, Yɩɩ joŋwanʋ tə wá fwa lìù təntə cʋna kwɩan joŋi, ʋ pa wá, yá à mʋ̀ Yɩɩ dàń wá sɛ̀, à kwɛn ʋ cʋna tə, à lɩ.»