Cʋna yìə̀n
5
1 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: «Lìù nə yə̀ə́ cɩ́gá yoo yuu wa, ʋ nə nì də ba boŋə, ba kəni lìù tə mama nə, ʋ nə yə̀ə́ cɩ́gá yoo təntə yuu wa, sə ʋ bà, ʋ swɩ̀n kʋ tə, ʋ nə yə̀ə́, kʋ tíú nə vɩga, sə ʋ va ʋ swɩ̀n cɩ́gá tə, ʋ nə yə̀ə́ yoo tə yuu wa, kʋ yɩ cʋna, ʋ tʋn, yá ʋ cʋna tə yoo zɩŋa wá.2 Lìù nə dwen durən won yiri mama yɩra, də ʋ yəri, kʋ nə yɩ ganaŋʋ tɩgɩ, ganaŋʋ təntə ga yɩ durən vànɩ́, nə à yə̀ə́ sàń vànɩ́ tɩgɩ, sàń vànɩ́ təntə ga yɩ durən vànɩ́, nə à yə̀ə́ durən wiən tə nə vəli tə pùə́ ban, wa won don tɩgɩ, kʋ lìù təntə də wá jì durən lìù. Yá ʋ durən tə yoo zɩŋa wá.
3 Lìù nə dwen ləzwənə durən yiri mama yɩra, də ʋ yəri, yá durən təntə ga pwàrɩ́ lɩ̀à, máŋá tə wa, ʋ nə twi, ʋ lwarɩ də, ʋ dwen ləzwənə durən yɩra, durən təntə yoo wá ya ʋ yuu wa.
4 Lìù nə wà bʋ́n zəni, ʋ ga ja kə bwana, ʋ dù, də ʋ wá tʋn zəni, nə à yə̀ə́ lwanɩ, lìù don yɩra, máŋá tə wa, ʋ nə twi, ʋ lwarɩ kʋ nətʋ tə, ʋ durə tə yoo wá ya ʋ yuu wa.
5 Lìù nə pɩn cʋna twá tə mʋ̀ yìə̀n təntə don nə, tə ma tʋ ʋ yuu wa, ʋ mɛ, sə ʋ swɩ̀n cʋna tə, ʋ nə tʋn, ʋ bɩrɩ. 6 Yá kʋ kwa nə, ʋ wá ja vanmɩna, pəkan, nə à yə̀ə́ bʋkan, ʋ bà, ʋ ma fwa lwɩa joŋi, ʋ pa à mʋ̀ Ba-Yígúrə́-Jə-Tiu nə, ndə cʋna kwɩan joŋi nə, ʋ yolwan tə yɩrɩ, ʋ nə tʋn. Yá Yɩɩ joŋwanʋ tə don dàń wá fwa ʋ cʋna tə kwɩan joŋi, ʋ pa wá.»
zʋra cʋna kwɩan joŋi
7 Ba-Yígúrə́-Jə-Tiu swɩ̀n, ʋ súrí lá, ʋ wʋ̀: «Də lìù jɩɩn nə ba won jə, sə ʋ ma yə̀ vanmɩna nədʋ tətə, ʋ wá pɩ̀à gunponi bələ, nə à yə̀ə́ nasara gunponi bələ, ʋ ja bà, ʋ ma fwa ʋ cʋna tə kwɩan joŋi, ʋ pa à mʋ̀ Ba-Yígúrə́-Jə-Tiu nə. Zuŋə tə don wá ya cʋna kwɩan joŋi, ka don tə ga ya joŋi, ba nə wá sʋ̀rɩ́*. 8 Ʋ wá ja tə, ʋ bà ʋ pa Yɩɩ joŋwanʋ tə don nə. Yá Yɩɩ joŋwanʋ tə dàń wá dí yáá, ʋ pa cʋna kwɩan joŋi zuŋə tə, à mʋ̀ Ba-Yígúrə́-Jə-Tiu nə. Ʋ wá cʋ ka yuu, ʋ goŋə, ʋ dàń nə bá sori kʋ, ʋ lɩ ka bɩan tə yɩra. 9 Yɩɩ joŋwanʋ tə wá gàrɩ̀ cʋna kwɩan joŋi zuŋə tə jana tə vàn don, Yɩɩ joŋi bwálɩ́ tə wa, ʋ ga gàrɩ̀ jana tə gɩganɩ tə, Yɩɩ joŋi bwálɩ́ tə də̀ń nə. Kʋ yɩ cʋna kwɩan joŋi. 10 Yɩɩ joŋwanʋ tə wá ja zuŋə tə don tə, ʋ ma fwa joŋi, ʋ sʋ̀rɩ́, ndə kʋ nə mɛ, sə kʋ ya nətʋ. Mə nətʋ nə, Yɩɩ joŋwanʋ tə wá fwa zʋrʋ cʋna kwɩan joŋi, ʋ pa wá, yá à mʋ̀ Yɩɩ dàń wá sɛ̀, à kwɛn ʋ cʋna tə, à lɩ.
11 Də lìù nə wàrɩ̀ gunponi bələ tə, nə à yə̀ə́ nasara gunponi bələ tə də tətə ʋ nɩ, ʋ wàá mun maŋʋ tiə* pwɩ̀ʋ̀ fugə nii nyiən, ʋ ja twi, ʋ pɩn, sə ba ma fwa ʋ cʋna tə kwɩan joŋi. Ʋ wà mɛ, sə ʋ kə nʋga, nə à yə̀ə́ wusinə mun tə yuu wa. Cɩ́gá, kʋ yɩ cʋna kwɩan joŋi. 12 Ʋ wá ja mun tə, ʋ bà, ʋ pa Yɩɩ joŋwanʋ tə don nə. Yá Yɩɩ joŋwanʋ tə dàń wá fwa tə, ʋ jɩguli yii, ʋ sʋ̀rɩ́ Yɩɩ joŋi bwálɩ́ tə yuu wa, jwəŋə tə duən tə yuu, ba nə sʋ̀rɩ́, ba pa à mʋ̀ Ba-Yígúrə́-Jə-Tiu nə. Yá kʋ nətʋ wá pa, à mʋ̀ Yɩɩ bʋ́n joŋi tə tíú yoo. Kʋ yɩ cʋna kwɩan joŋi. 13 Də zʋrʋ nə cʋ̀gʋ̀ culən təntə wa culu don, mə nətʋ nə, Yɩɩ joŋwanʋ tə wá fwa ʋ cʋna tə kwɩan joŋi, ʋ pa wá. Yá à mʋ̀ Yɩɩ dàń wá sɛ̀, à kwɛn ʋ cʋna tə, à lɩ. Joŋi təntə gɩganɩ tə yɩ Yɩɩ joŋwanʋ tə nə tɩ, ndə zìlə́ won gɩganɩ tə nə.»
Kwìə̀ tə Yɩɩ nə pɩn, lwɩa joŋi fwaŋʋ yoo wa
14 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: 15 «Lìù nə mɛ, sə ʋ pa won tə nə yɩ à mʋ̀ Yɩɩ nyiən, à mʋ̀ Ba-Yígúrə́-Jə-Tiu nə, yá ʋ ga yəri də, ʋ mɛ, sə ʋ tʋn kʋ, kʋ yɩ culu kʋ tíú cʋ̀gʋ̀, yá cʋna wulə ʋ yuu wa. Kʋ mʋ̀ yɩrɩ, kʋ tíú mɛ, sə ʋ ja pabɩʋ, ʋ vanmɩnɩ tə wa, kʋ yɩra nə zurə, kʋ ga cé, ʋ bà, ʋ ma fwa lwɩa joŋi, ʋ pa à mʋ̀ Ba-Yígúrə́-Jə-Tiu nə, culu tə yɩrɩ, ʋ nə cʋ̀gʋ̀. Pabɩʋ tə kwənə wá ya ndə, Yɩɩ wúlú bwálɩ́ tə səkəri bìú tə nə bɩrɩ nətʋ. Kʋ yɩ lwɩa joŋi vànɩ́. 16 Kʋ tə nə súrí lá, Yɩɩ wúlú bwálɩ́ tə won tə, ʋ mʋ̀ lìù təntə yà nə vɩga, sə ʋ pa, ʋ dàń wá pa kʋ Yɩɩ joŋwanʋ tə don nə, ʋ tə ga súrí won təntə pwɩ̀ʋ̀ bonu nii nyiən kʋ nə, ʋ pa wá. Yɩɩ joŋwanʋ tə wá ja pabɩʋ tə, ʋ ma fwa lwɩa joŋi, ʋ pa lìù təntə nə, culu tə yɩrɩ, ʋ nə cʋ̀gʋ̀. Yá à mʋ̀ Yɩɩ dàń wá sɛ̀ lìù təntə lwɩa tə, à ga kwɛn ʋ cʋna tə, à lɩ.
17 Lìù nə cʋ̀gʋ̀ culən tə, à mʋ̀ Ba-Yígúrə́-Jə-Tiu nə pɩn nii tə yuu wa, culu don, də ʋ yəri, kʋ nətʋ tə yɩ cʋna kʋ tíú tʋn, yá ʋ cʋna tə yoo zɩŋa wá. 18 Kʋ mʋ̀ yɩrɩ, kʋ tíú mɛ, sə ʋ ja pabɩʋ, ʋ vanmɩnɩ tə wa, kʋ yɩra nə zurə, kʋ ga cé, ʋ bà, ʋ pa Yɩɩ joŋwanʋ tə don nə, sə ʋ ma fwa lwɩa joŋi, ʋ pa wá. Pabɩʋ tə kwənə mɛ, sə tə yí cʋna kwɩan joŋi vànɩ́ kwənə. Yɩɩ joŋwanʋ tə dàń wá fwa lwɩa joŋi, ʋ pa wá, culu tə yɩrɩ, ʋ nə cʋ̀gʋ̀, də ʋ yəri. Yá à mʋ̀ Yɩɩ dàń wá sɛ̀ lìù təntə lwɩa tə, à ga kwɛn ʋ cʋna tə, à lɩ. 19 Kʋ yɩ lwɩa joŋi. Lìù təntə cɩ́gá yà tʋn yolwan, à mʋ̀ Ba-Yígúrə́-Jə-Tiu yáá con.»
20 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: 21 «Á wa lìù nə kʋ̀nɩ̀ kʋ̀nkʋ̀n ʋ jəndon con, won yuu wa, kʋ yɩ yolwan kʋ tíú tʋn, yá cʋna wulə ʋ yuu wa, à mʋ̀ Ba-Yígúrə́-Jə-Tiu yáá con. Lìù təntə kʋ̀nkʋ̀n tə wàá kʋ yanɩ won yuu wa, ba nə ja bà, ba tún ʋ con, nə à yə̀ə́ won yuu wa, ʋ nə lòrì lìù don con, nə à yə̀ə́ won yuu wa, ʋ nə ŋwʋan, nə à yə̀ə́ won yuu wa, ʋ nə vɩrɩ ʋ jəndon con. 22 Kʋ ma kʋ́ʋ̀ wàá də, kʋ yɩ won nə jɛ́n, lìù təntə na, ʋ tì, ʋ ga kʋna də, ʋ wà kʋ nɩ, nə à yə̀ə́ kʋ̀nkʋ̀n durə, lìù tə nə dùə̀, sə ʋ ma pú cʋna yiri mama yuu nə, ləzwənə nə wàá ʋ tʋŋa. 23 Lìù nə tʋn yolwan təntə yiri, ʋ nə twi, ʋ lwarɩ də, cʋna wulə ʋ yuu wa, won tə, ʋ nə ŋwʋan, nə à yə̀ə́ ʋ nə vɩrɩ, nə à yə̀ə́ won tə, ba nə ja bà, ba tún ʋ con, nə à yə̀ə́ won tə, kʋ nə jɛ́n, ʋ na ʋ tì, 24 nə à yə̀ə́ won tə mama, ʋ nə dùə̀ kʋ̀nkʋ̀n durə, ʋ ma pú kʋ yuu nə, ʋ mɛ, sə ʋ kwàń kʋ, ʋ pa kʋ tíú nə. Ʋ wá kwàń won tə, kʋ nii nə, ʋ tə ga súrí kʋ pwɩ̀ʋ̀ bonu nii nyiən kʋ nə, ʋ pa kʋ tíú nə. Gɩgɩrɩnyiən tə mɛ, sə ʋ kwàń won tə, ʋ pa kʋ tíú nə nətʋ, dɩɩn tə tətə nə, ʋ nə wá lwarɩ də, cʋna wulə ʋ yuu wa. 25 Gɩgɩrɩnyiən tə dàń wá ja pabɩʋ, ʋ vanmɩnɩ tə wa, kʋ yɩra nə zurə, kʋ ga cé, ʋ bà, ʋ pa Yɩɩ joŋwanʋ tə don nə, sə ʋ ma fwa lwɩa joŋi, ʋ pa wá, ʋ cʋna tə yɩrɩ, ʋ nə tʋn, Ba-Yígúrə́-Jə-Tiu yáá con. Pabɩʋ tə kwənə mɛ, sə tə yí cʋna kwɩan joŋi vànɩ́ kwənə. 26 Yá Yɩɩ joŋwanʋ tə dàń wá fwa ʋ cʋna tə kwɩan joŋi, ʋ pa wá, à mʋ̀ Ba-Yígúrə́-Jə-Tiu yáá con. Yá kʋ tíú yolwan tə nə swə, kʋ yɩ yiri mama, à mʋ̀ Yɩɩ wá sɛ̀ ʋ lwɩa tə, à ga kwɛn ʋ cʋna tə, à lɩ.»