Kwìə̀ tə Yɩɩ nə pɩn, jwəŋə tə ba nə sʋ̀rɩ́* fwaŋʋ yoo wa
6
1 Ba-Yígúrə́-Jə-Tiu swɩ̀n Moyizə con, 2 sə ʋ pa nii Aron, də ʋ bɩ̀á tə nə, yìə̀n tə tə yuu wa, ʋ wʋ́: «Á nəŋə nətʋ tə, á nə mɛ, sə á fwa joŋi, ba nə sʋ̀rɩ́. Joŋi vànɩ́ tə mɛ, sə kʋ ya mən tə wa, Yɩɩ joŋi bwálɩ́ tə yuu, tɩtɩn tə mama, tɩa kori ka pʋrɩ. Yá Yɩɩ joŋi bwálɩ́ tə yuu mən tə mɛ, sə tə ja wuuu. 3 Kʋ tɩpʋrɩ jɩjʋ nə, Yɩɩ joŋwanʋ tə wá zʋ ganbʋa falɩ, ʋ ma pú ʋ cavɩra nə, ʋ ga tì ʋ ganbʋa ganzwɩʋ tə, ʋ zʋ. Yá ʋ dàń wá lɩ joŋi vànɩ́ tə tʋntʋnan tə, mən tə wa, Yɩɩ joŋi bwálɩ́ tə yuu wa, ʋ tún Yɩɩ joŋi bwálɩ́ tə səpuni nə. 4 Kʋ kwa nə, ʋ wá lwàń ʋ gànàn tə, ʋ ga tì tʋntʋnan tə, ʋ ja nan ʋ yá ba dəkuu bwálɩ́ tə, ʋ va ʋ lwá bwálɩ́ nə, kʋ nə ba durən jə. 5 Mən mɛ, sə tə ja Yɩɩ joŋi bwálɩ́ tə yuu wa wuuu, tə wà mɛ, sə tə də̀ŋə̀. Jɩjʋ mama, Yɩɩ joŋwanʋ tə wá kə dɛɛ mən tə wa, ʋ dà joŋi vànɩ́ tə dɛɛ tə yuu. Kʋ kwa nə, ʋ dàń wá sʋ̀rɩ́ nimarʋ jwəŋə vàná tə nanʋga tə. 6 Mən mɛ, sə tə ja Yɩɩ joŋi bwálɩ́ tə yuu wa, máŋá mama wuuu, tə wà mɛ, sə tə də̀ŋə̀.»Kwìə̀ tə Yɩɩ nə pɩn, zìlə́ wiən tə nə yɩ vàrʋ́ càlɩ̀ yoo wa
7 Ba-Yígúrə́-Jə-Tiu swɩ̀n, ʋ súrí lá, ʋ wʋ́: «Yá kʋ dàń nə yɩ zìlə́ won, kʋ nə yɩ vàrʋ́ càlɩ̀ nə, á pɩ̀à, sə á pa à mʋ̀ Ba-Yígúrə́-Jə-Tiu nə, nə̀ń nətʋ tə, á nə mɛ, sə á fwa. Aron bɩ̀á tə nə mɛ, sə ba zɩgɩ Yɩɩ joŋi bwálɩ́ tə yáá, ba pa zìlə́ wiən, à mʋ̀ Ba-Yígúrə́-Jə-Tiu nə. 8 Yɩɩ joŋwanʋ tə don wá fwa zìlə́ won təntə jɩguli yii. Kʋ yɩ mun, ba nə lwá nʋga tə yuu wa, jɩguli yii, kʋ súrí wusinə tə mama nə. Ʋ wá sʋ̀rɩ́ tə, Yɩɩ joŋi bwálɩ́ tə yuu wa, sə kʋ pa, à mʋ̀ Yɩɩ bʋ́n zìlə́ won tə tíú yoo. Yá kʋ lwán ywán, kʋ pa à mʋ̀ Ba-Yígúrə́-Jə-Tiu nə. 9 Aron də ʋ bɩ̀á tə wá də́ zìlə́ won tə gɩganɩ tə. Ba dàń nə wà mɛ, sə ba kə sabwarɩ kʋ wa, ba ma də́ kʋ. Ba mɛ, sə ba jə̀ń Yɩɩ jə́rə́ gansili tə dəwoo tə wa, kʋ nə yɩ parɩ, ba də́ kʋ. 10 Ba wà mɛ, sə ba kə sabwarɩ won kʋ yɩra, ba ma wà kʋ. Mə ba tori nə, à nə pɩn ba, à zìlə́ wiən tə wa, ba nə sʋ̀rɩ́, ba pɩn nə. Kʋ yɩ won tə, kʋ nə yɩ à mʋ̀ Ba-Yígúrə́-Jə-Tiu cɩcɩ nyiən. Kʋ yɩ ndə cʋna kwɩan joŋi, nə à yə̀ə́ lwɩa joŋi won nə. 11 Aron dwíí tə wa bara tə mama, wàá à zìlə́ wiən gɩganɩ tə, ba də́. Zìlə́ wiən tə, ba nə sʋ̀rɩ́, ba pa à mʋ̀ Ba-Yígúrə́-Jə-Tiu nə, ba ga tə gɩganɩ tə, yɩ Aron bɩ̀á tə, də ba dwíə́ tə mama, ba nə wá kə lʋʋ wa tori, máŋá də máŋá mama wuuu. Yá lìù don mama nə dwen zìlə́ wiən gɩganɩ təntə yɩra, kʋ yɩ culu nəfarʋ, kʋ tíú cʋ̀gʋ̀.»
12 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: 13 «Nə̀ń zìlə́ won tə, Aron də ʋ bɩ̀á tə nə wá pa à mʋ̀ Ba-Yígúrə́-Jə-Tiu nə, dɩɩn tə nə, ba nə wá twɛ́n dun nʋga* ba yuu wa, ba ma tún ba, sə ba ya à mʋ̀ nyiən. Kʋ yɩ mun maŋʋ tiə* pwɩ̀ʋ̀ fugə nii nyiən. Kʋ yɩ zìlə́ won, ba nə mɛ, sə ba pa nə, máŋá də máŋá mama wuuu. Ba wá pa nə zìlə́ won təntə faan, jɩjʋ nə, ba ga pa nə faan tə don tə, didəni nə. 14 Tə yɩ ba wá ywɛ́ də nʋga, ba wà wopɩpaʋ yuu. Yá n dàń wá mumuni tə, n pa à mʋ̀ Ba-Yígúrə́-Jə-Tiu nə. Kʋ yɩ zìlə́ won, kʋ nə yɩ vàrʋ́ càlɩ̀, ba nə wùə̀, kʋ lwán ga ywán, kʋ pa à mʋ̀ Ba-Yígúrə́-Jə-Tiu nə.
15 Aron bɩ̀á tə wa, Yɩɩ joŋwanʋ tə, ba nə wá twɛ́n dun nʋga ʋ yuu wa, ba ma kúrí wá, sə ʋ jon Aron yuu nə tə, də mɛ, sə ʋ tʋn nətʋ. Kʋ yɩ nii à pɩn, kʋ pʋ́pʋ́nɩ́, kʋ tún, sə Yɩɩ joŋwana tə fwa, ba pa à mʋ̀ Ba-Yígúrə́-Jə-Tiu nə, máŋá də máŋá mama wuuu. Zìlə́ won təntə mama yɩ, ba wá sʋ̀rɩ́. 16 Yɩɩ joŋwanʋ nə pɩn, zìlə́ won tə nə yɩ vàrʋ́ càlɩ̀, à mʋ̀ Ba-Yígúrə́-Jə-Tiu nə, kʋ wà mɛ, sə ba də́ kʋ. Kʋ mama yɩ ba wá sʋ̀rɩ́.»
Kwìə̀ tə Yɩɩ nə pɩn, cʋna kwɩan joŋi fwaŋʋ yoo wa
17 Ba-Yígúrə́-Jə-Tiu swɩ̀n Moyizə con, 18 sə ʋ swɩ̀n Aron də ʋ bɩ̀á tə con, ʋ wʋ́: «Á nəŋə nii tə à nə pɩn, cʋna kwɩan joŋi* fwaŋʋ yoo wa. Bwálɩ́ tə, ba nə gwɩ joŋi tə, ba nə fwa ba sʋ̀rɩ́* vànɩ́ tə wa nə, ba wá gʋ cʋna kwɩan joŋi* vànɩ́ tə də, à mʋ̀ Ba-Yígúrə́-Jə-Tiu yáá con. Kʋ yɩ won tə, kʋ nə yɩ à mʋ̀ Ba-Yígúrə́-Jə-Tiu cɩcɩ nyiən. 19 Yɩɩ joŋwanʋ tə, ʋ nə fwa cʋna kwɩan joŋi tə cɩcɩ nə wàá joŋi təntə vànɩ́ tə nàŋʋ́, ʋ də́. Ʋ mɛ, sə ʋ jə̀ń Yɩɩ jə́rə́ gansili tə dəwoo tə wa, kʋ nə yɩ parɩ, ʋ də́ kʋ. 20 Won tə mama, kʋ nə dwen nàŋʋ́ tə yɩra, kʋ won təntə də wá jì à mʋ̀ Ba-Yígúrə́-Jə-Tiu nyiən. Vànɩ́ tə jana nə fan tə kə gànʋ̀ nə, ba wá sɩ̀n gànʋ̀ tə bwálɩ́ tə, jana tə nə ken lá, bwálɩ́ nə, kʋ nə yɩ parɩ. 21 Nàŋʋ́ tə nə yɩ ba sàn daʋ nəkənə wa, kʋ kwa nə, ba mɛ, sə ba mà ka, ba lwa. Yá kʋ dàń nə yɩ ba sàn cɩnɩan nəkənə wa, kʋ kwa nə, ba mɛ, sə ba wìə̀ ka, ba jɩjalɩ də nɩ́á. 22 Yɩɩ joŋwana tə wa bara tə mama wàá nàŋʋ́ təntə ba də́. Kʋ yɩ won tə, kʋ nə yɩ à mʋ̀ Ba-Yígúrə́-Jə-Tiu cɩcɩ nyiən. 23 Yá cʋna kwɩan jwəŋə vàná tə mʋ̀, ba nə yàá ja tə jana, ba zʋ Yɩɩ jə́rə́ gansili tə wa, ba ma kwɛn cʋna Yɩɩ wúlú bwálɩ́ tə wa, ba wà mɛ, sə ba də́ kʋ nədʋ mama nàŋʋ́. Nàŋá təntə mʋ̀ yɩ ba wá sʋ̀rɩ́.»