Joŋwana 7

Lwɩa joŋi* fwaŋʋ yoo

1 Ba-Yígúrə́-Jə-Tiu swɩ̀n Moyizə con, ʋ wʋ́: «Nə̀ń kwìə̀ tə, à nə pɩn lwɩa joŋi fwaŋʋ yoo wa. Kʋ yɩ won tə, kʋ nə yɩ à mʋ̀ Yɩɩ cɩcɩ nyiən. 2 Bwálɩ́ tə, ba nə gwɩ joŋi tə, ba nə fwa ba sʋ̀rɩ́* vànɩ́ tə wa nə, ba wá gʋ lwɩa joŋi vànɩ́ tə də. Ba wá ja vànɩ́ tə jana tə, ba tà Yɩɩ joŋi bwálɩ́ tə yɩra tə, ba kɩkarɩ. 3 Ba wá lɩ vànɩ́ tə nanʋga tə mama, də kʋ dəwurə tə, də nʋga tə nə dà vànɩ́ tə waa wiən tə yɩra, 4 də kʋ tanpɩrɩbɩa bələ tə, də nʋga tə nə dà tə yɩra, də nʋga tə nə dà kʋ səpunə tə, də kʋ cɩɩn tə yɩra, ba pa à mʋ̀ Yɩɩ nə. Ba wá goŋə cɩɩn tə, də tanpɩrɩbɩa tə mɛ, ba lɩ. 5 Yá Yɩɩ joŋwanʋ tə don dàń wá sʋ̀rɩ́ tə, Yɩɩ joŋi bwálɩ́ tə yuu wa. Kʋ yɩ lwɩa joŋi, ba nə sʋ̀rɩ́, ba pa à mʋ̀ Ba-Yígúrə́-Jə-Tiu nə. 6 Yɩɩ joŋwana tə wa bara tə mama wàá nàŋʋ́ tə ba də́. Yá kʋ dàń nə yɩ bwálɩ́ tə nə yɩ parɩ wa nə, ba wá jə̀ń ba də́ kʋ. Kʋ yɩ won tə, kʋ nə yɩ à mʋ̀ Yɩɩ cɩcɩ nyiən. 7 Lwɩa joŋi yuu wa kwìə̀ tə, də cʋna kwɩan joŋi yuu wa kwìə̀ tə mɛ yɩ won nədʋ. Vànɩ́ tə nàŋʋ́ tə yɩ Yɩɩ joŋwanʋ tə nə fwa lwɩa joŋi tə, nə tɩ.

8 Yɩɩ joŋwanʋ nə fwa lìù joŋi, ʋ sʋ̀rɩ́, ʋ pa wá, vànɩ́ tə tànʋ̀ tə yɩ Yɩɩ joŋwanʋ tə nə tɩ. 9 Zìlə́ won tə mama, kʋ nə yɩ vàrʋ́ càlɩ̀, ba nə wùə̀ mən bwálʋ́ wa, nə à yə̀ə́ ba nə kwàrɩ̀ nagwala wa, nə à yə̀ə́ wopɩpaʋ yuu, yɩ Yɩɩ joŋwanʋ tə nə ja zìlə́ won tə, ʋ va Yɩɩ yáá con tə, nə tɩ. 10 Zìlə́ won mama, kʋ nə yɩ vàrʋ́ càlɩ̀, ba nə ywɛ́ də nʋga, nə à yə̀ə́ kʋ nə yɩ wokʋrʋ, yɩ Aron bɩ̀á tə mama nyiən. Ba wá tara kʋ, ba mɛ duən.»

Kwìə̀ tə Yɩɩ nə pɩn, nimarʋ joŋi fwaŋʋ yoo wa

11 Ba-Yígúrə́-Jə-Tiu swɩ̀n Moyizə con, ʋ súrí lá, ʋ wʋ́: «Nə̀ń kwìə̀ tə, à nə pɩn, nimarʋ joŋi fwaŋʋ yoo wa, lɩ̀à nə wá fwa, ba pa à mʋ̀ Ba-Yígúrə́-Jə-Tiu nə. 12 Lìù wàá jwii joŋi* ʋ fwa, sə ʋ ma bɩrɩ də, ʋ yə̀ə́ jwɩan. Də kʋ nə yɩ nətʋ, wiən tə tə nə, ʋ mɛ, sə ʋ súrí joŋi vànɩ́ tə nə. Kʋ yɩ gàtə́rán tə nə wà sabwarɩ ken, ba nə ywɛ́ də nʋga, də ŋʋ̀nán tə nə wà sabwarɩ ken, ba nə gàrɩ̀ nʋga tə yuu wa, də mun, ba nə ywɛ́ də nʋga, ba ma fwa gàtə́rán. 13 Ʋ tə wá súrí dipɛn tə nə jə sabwarɩ, ʋ zìlə́ wiən tə nə, ʋ ma fwa ʋ jwii kənu, də ʋ nimarʋ joŋi tə. 14 Ʋ wá lɩ gàtó nədʋ, zìlə́ wiən tə nədʋ mama wa, ʋ pa à mʋ̀ Ba-Yígúrə́-Jə-Tiu nə. Kʋ kwa nə, zìlə́ wiən təntə yɩ Yɩɩ joŋwanʋ tə nə ja nimarʋ joŋi vànɩ́ tə jana tə, ʋ tà Yɩɩ joŋi bwálɩ́ tə yɩra tə, nə tɩ. 15 Jwii kənu, də nimarʋ joŋi nàŋʋ́ tə yɩ ba wá də́ kʋ, dɩɩn tə tətə nə, ba nə fwa joŋi tə. Ba wà mɛ, sə ba yá kʋ won mama, ba pa tɩa pʋrɩ, ka dà kʋ nə.

16 Yá joŋi tə nə yɩ nipoli, nə à yə̀ə́ pupwən joŋi, ba wá də́ joŋi nàŋʋ́ tə, joŋi tə fwaŋʋ dɩɩn nə. Yá kʋ nə ga lá, ba tə wàá kʋ ba də́, kʋ tɩpʋrɩ nə. 17 Yá kʋ nə yí dɩan batwa, də nàŋʋ́ tə tə wulə, ba mɛ, sə ba sʋ̀rɩ́ kʋ mən wa. 18 Nimarʋ joŋi nàŋʋ́ nə yí dɩan batwa, lìù nə dí kʋ, à mʋ̀ Yɩɩ bá fwa pubwanʋ joŋi tə tíú yɩra. À mʋ̀ Yɩɩ bá jon kʋ tíú joŋi tə, joŋi nàŋʋ́ tə nə jìgə̀ nànpʋ́pʋ́nʋ́ yɩrɩ. Yá lìù nə dí kʋ, kʋ yɩ cʋna ʋ tʋn, yá ʋ cʋna tə yoo zɩŋa wá. 19 Nàŋʋ́ nə dwen durən won yɩra, kʋ wà mɛ, sə ba də́ kʋ. Ba mɛ, sə ba sʋ̀rɩ́ kʋ mən wa. Yá kʋ dàń nə yɩ nimarʋ joŋi nàŋʋ́ tə mʋ̀, lìù tə mama, ʋ nə tə̀lə́ durən yìə̀n wa, wàá kʋ ʋ də́. 20 Yá lìù tə mama, ʋ nə wulə durən yìə̀n wa, ʋ ga də́ nimarʋ joŋi tə, ba nə fwa ba pa à mʋ̀ Ba-Yígúrə́-Jə-Tiu nə nàŋʋ́, ʋ mɛ, sə ba lɩ wá, Yɩzərayɛlə lɩ̀à dwíí wa. 21 Lìù tə ʋ nə dwen durən won yɩra, kʋ nə yɩ ləzwənə durən, nə à yə̀ə́ durən vànɩ́, nə à yə̀ə́ durən won yiri don mama yɩra, ʋ ga də́ nimarʋ joŋi tə, ba nə fwa ba pa à mʋ̀ Ba-Yígúrə́-Jə-Tiu nə nàŋʋ́, ʋ mɛ, sə ba lɩ wá, Yɩzərayɛlə lɩ̀à dwíí wa.»

22 Ba-Yígúrə́-Jə-Tiu swɩ̀n Moyizə con, 23 sə ʋ swɩ̀n Yɩzərayɛlə dwíí tə con, ʋ wʋ́: «Á wà mɛ, sə á də́ naʋ nʋga, nə à yə̀ə́ piə nʋga, nə à yə̀ə́ bʋ̀n nʋga. 24 Á wàá vantɩgʋ nʋga, nə à yə̀ə́ vànɩ́ tə, wojandirən nə jɩn nʋga, á ma tʋŋa tʋtʋŋɩ yiri don mama, á dàń nə wà mɛ, sə á də́ ka. 25 Cɩ́gá, á lìù tə mama, ʋ nə dí vànɩ́ tə, ba nə ma fwa joŋi, ba sʋ̀rɩ́ ba pa à mʋ̀ Ba-Yígúrə́-Jə-Tiu nə nʋga, ʋ mɛ, sə ba lɩ wá, Yɩzərayɛlə lɩ̀à dwíí wa. 26 Á wà mɛ, sə á də́ jana də mama. Kʋ nə yɩ zuŋə jana, nə à yə̀ə́ vànɩ́ jana, bwálá tə mama wa, á nə wá ya lá, á dànà ká də́ tə. 27 Á lìù tə mama, ʋ nə dí jana yiri mama, ʋ mɛ, sə ba lɩ wá, Yɩzərayɛlə lɩ̀à dwíí wa.»

28 Ba-Yígúrə́-Jə-Tiu kʋ́ʋ̀ swɩ̀n Moyizə con, 29 sə ʋ swɩ̀n Yɩzərayɛlə dwíí tə con, ʋ wʋ́: «Á wa lìù nə fwa ʋ nimarʋ joŋi sə ʋ pa à mʋ̀ Ba-Yígúrə́-Jə-Tiu nə, joŋi tə tíú tətə nə wá lɩ à mʋ̀ Ba-Yígúrə́-Jə-Tiu tori tə, ʋ ja bà, ʋ pa nə. 30 Ʋ tətə nə wá lɩ vànɩ́ tə nanʋga tə, ba nə sʋ̀rɩ́, ba pɩn à mʋ̀ Ba-Yígúrə́-Jə-Tiu nə, də vànɩ́ tə nyʋnɩ tə, də ʋ jɩ̀àn, ʋ ja bà. Ʋ wá yɩyarɩ vànɩ́ tə nyʋnɩ tə, à mʋ̀ Ba-Yígúrə́-Jə-Tiu yáá con, sə kʋ bɩrɩ də, ʋ pɩn kʋ nə. 31 Yɩɩ joŋwanʋ tə don wá sʋ̀rɩ́ nanʋga tə mən wa, Yɩɩ joŋi bwálɩ́ tə yuu wa, yá vànɩ́ tə nyʋnɩ tə mʋ̀ yɩ Aron də ʋ bɩ̀á tə nə tɩ. 32 Á nimarʋ jwəŋə tə wa, á mɛ, sə á lɩ joŋi vànɩ́ tə jɩzən ciin tə də, á pa Yɩɩ joŋwanʋ tə nə. 33 Jɩzən ciin tə yɩ, Aron bɩ̀á tə wa lìù tə, ʋ nə wá jon jana tə, də nanʋga tə, ʋ ma fwa nimarʋ joŋi tə, tori. 34 Cɩ́gá, à lɩ joŋi vànɩ́ nyʋnɩ tə, ba nə yàá yɩyarɩ à yáá con, ba pa nə, də kʋ jɩzən ciin tə, Yɩzərayɛlə dwíí nimarʋ jwəŋə vàná tə wa, à pa Yɩɩ joŋwanʋ Aron də ʋ bɩ̀á tə nə, sə tə ya ba tori. Kʋ yɩ nii à pɩn, kʋ pʋ́pʋ́nɩ́, kʋ tún, sə Yɩzərayɛlə dwíí tə tʋn, máŋá də máŋá mama wuuu. 35 Mə Aron də ʋ bɩ̀á tə tori nə nətʋ, jwəŋə vàná tə wa, ba nə sʋ̀rɩ́, ba pɩn à mʋ̀ Ba-Yígúrə́-Jə-Tiu. Mə kʋ wá ya nətʋ, kʋ nə zɩgɩ dɩɩn tə nə, ba nə twɛ́n dun nʋga* tə ba yuu wa, ba ma tún ba, sə ba tʋn Yɩɩ joŋwanɩ ba pa nə. 36 Mə tori təntə nə, à mʋ̀ Ba-Yígúrə́-Jə-Tiu pɩn nii Yɩzərayɛlə dwíí tə nə, sə ba pa Yɩɩ joŋwana tə nə, dɩɩn tə nə, ba nə twɛ́n dun nʋga ba yuu wa, ba ma tún ba. Nii təntə yɩ à pɩn, kʋ pʋ́pʋ́nɩ́, kʋ tún, máŋá də máŋá mama wuuu, ba də ba dwíə́ tə mama yɩrɩ, ba nə wá kə lʋʋ wa.»

37 Mə kwìə̀ təntə nə, Ba-Yígúrə́-Jə-Tiu pɩn, joŋi tə, ba nə fwa, ba sʋ̀rɩ́ yoo wa, də zìlə́ won tə nə yɩ vàrʋ́ càlɩ̀ fwaŋʋ yoo wa, də cʋna kwɩan joŋi fwaŋʋ yoo wa, də lwɩa joŋi fwaŋʋ yoo wa, də joŋi tə, ba nə fwa, ba ma túŋə́ Yɩɩ joŋwana yoo wa, də nimarʋ joŋi fwaŋʋ yoo wa. 38 Ba-Yígúrə́-Jə-Tiu pɩn kwìə̀ təntə Moyizə nə, Sinayi paan tə yuu wa, dɩɩn tə nə, ʋ nə pɩn nii Yɩzərayɛlə dwíí tə nə, sə ba fwa jwəŋə, ba pa ʋ mʋ̀ Ba-Yígúrə́-Jə-Tiu nə, Sinayi kasɔɔ lanworu.