Joŋwana 8

Moyizə tún Aron də ʋ bɩ̀á tə, sə ba ya Yɩɩ joŋwana

1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Bon Aron də ʋ bɩ̀á tə, n pa ba bà Yɩɩ jə́rə́ gansili tə mimii tə yáá, n ga tì joŋwana gànàn, də dun nʋga* tə, də dipɛn tə nə wà sabwarɩ ken kəpurə tə, n ja cʋna kwɩan joŋi nabɩa tə, də pabɩran bələ tə, n ja bà. 3 N dàń wá bon Yɩzərayɛlə púlí tə mama n kun duən nə, Yɩɩ jə́rə́ gansili tə mimii tə yáá.» 4 Moyizə tʋn kʋ tə, Ba-Yígúrə́-Jə-Tiu nə pɩn wá nii, sə ʋ tʋn. Yɩzərayɛlə púlí tə twi, ba kun duən nə, Yɩɩ jə́rə́ gansili tə mimii tə yáá. 5 Yá Moyizə dàń swɩ̀n Yɩzərayɛlə púlí tə con, ʋ wʋ́: «Kʋ tə, Ba-Yígúrə́-Jə-Tiu nə pɩn nii, sə kʋ tʋn nə, à pɩ̀à, sə à tʋn sɩ́ʋ́n nətən.» 6 Ʋ pɩn Aron də ʋ bɩ̀á tə yí lá, ba swɛ nɩ́á. 7 Kʋ kwa nə, ʋ tì Yɩɩ joŋwana ganzwɩdarʋ, kʋ nə cúə́ kʋ yí napɩra, ʋ ma zʋ Aron, ʋ ga vwa gantwamɩna ʋ tàŋá nə. Ʋ tì Yɩɩ joŋwana ganzwɩdarʋ don, kʋ nə cúə́ kʋ yí nakoli, ʋ ma zʋ wá, ʋ súrí lá. Yá ʋ dàń tì Yɩɩ joŋwana yun tɩ̀án nəkwɩa culu gànʋ̀ tə, ʋ ma zʋ wá, ʋ dà lá, ʋ ja kʋ tàŋá gantwamɩna tə, ʋ vwa. 8 Ʋ tì Yɩɩ joŋwana yun tɩ̀án nəkwɩa nyʋnɩ yuu lwaa pɩpaa tə, ʋ vwa Aron nyʋnɩ nə, ʋ ga kə Yɩɩ joŋwana pwárʋ́ bɩ̀á tə, ba nə boŋə Urimə də Tumimə, ka wa. 9 Ʋ baa Yɩɩ joŋwana yubarʋ, Aron yuu nə, ʋ ga marɩ sɩ́án dun wonanʋ pɩpaa tə nə yɩ Yɩɩ nyiən, yubarʋ tə yáá nə, ndə Ba-Yígúrə́-Jə-Tiu yà nə pɩn wá nii, sə ʋ tʋn nətʋ. 10 Kʋ kwa nə, Moyizə tì dun nʋga tə, ʋ twɛ́n, ʋ kə Yɩɩ wúlú gansili tə, də kʋ waa zɩla tə mama nə, ʋ ma tún tə vàn nə, ʋ pa Yɩɩ cɩcɩ nə. 11 Ʋ twɛ́n dun nʋga tə Yɩɩ joŋi bwálɩ́ tə yuu wa, nɛɛ barpɛ. Yá ʋ dàń tún kʋ də kʋ tʋtʋnzɩla tə mama, də nɩ́á kwarɩ tə, də kʋ də̀ń zɩlʋ tə, ʋ pa Yɩɩ cɩcɩ nə. 12 Ʋ twɛ́n dun nʋga tə Aron yuu wa, ʋ ma tún wá, ʋ pa Yɩɩ cɩcɩ nə. 13 Kʋ kwa nə, Moyizə pɩn Aron bɩ̀á tə bà ba yí lá. Ʋ tì Yɩɩ joŋwana ganzwɩdaran, tə nə cúə́ tə yí napɩra, ʋ ma zʋ ba, ʋ vwa gantwamɩnɩ ba tàŋá nə, ʋ ga pú yupurən ba yuu nə, ndə Ba-Yígúrə́-Jə-Tiu yà nə pɩn wá nii, sə ʋ tʋn nətʋ.

14 Kʋ kwa nə, ʋ pɩn ba ja cʋna kwɩan joŋi nabɩa tə, ba bà. Aron də ʋ bɩ̀á tə tún ba jɩɩn ka yuu wa. 15 Yá Moyizə dàń gʋa ka, ʋ lan ka jana tə də ʋ jɩfʋa, ʋ kə Yɩɩ joŋi bwálɩ́ tə nyʋran tə nə, sə ʋ ma kwɛn durən yìə̀n, ʋ lɩ kʋ yuu wa. Kʋ kwa nə, ʋ lwá jana tə gɩganɩ tə, Yɩɩ joŋi bwálɩ́ tə də̀ń nə. Mə kʋ zɩgɩ nətʋ, ʋ ma tún Yɩɩ joŋi bwálɩ́ tə, ʋ pa Yɩɩ cɩcɩ nə, sə ba fwa cʋna kwɩan jwəŋə kʋ yuu wa. 16 Yá ʋ dàń lɩ nʋga tə mama, ka nə dà nabɩa tə waa wiən tə yɩra, də ka cɩɩn tə, də ka tanpɩrɩbɩa bələ tə, də tə yɩra nʋga tə, ʋ sʋ̀rɩ́ Yɩɩ joŋi bwálɩ́ tə yuu wa. 17 Yá Moyizə ja nabɩa tə gɩganɩ tə, kʋ nə yɩ ka tànʋ̀ tə, də ka nàŋʋ́ tə, də ka waa bàń tə, ʋ nan kwa con, ʋ yá ba dəkuu bwálɩ́ tə, ʋ sʋ̀rɩ́, ndə Ba-Yígúrə́-Jə-Tiu yà nə pɩn wá nii, sə ʋ tʋn nətʋ.

18 Kʋ kwa nə, ʋ pɩn ba ja pabɩʋ tə, ʋ nə wá ma fwa joŋi, ʋ sʋ̀rɩ́ tə, ba bà. Aron də ʋ bɩ̀á tə tún ba jɩɩn kʋ yuu wa. 19 Yá Moyizə dàń gʋa kʋ, ʋ ja kʋ jana tə, ʋ ma tà Yɩɩ joŋi bwálɩ́ tə yɩra tə, ʋ kɩkarɩ. 20 Ba cə pabɩʋ tə, nandɛɛ nandɛɛ, yá Moyizə dàń sʋ̀rɩ́ nandɛɛ tə, də yuu tə, də nanʋga tə. 21 Yá ba sɩ̀n kʋ lʋran tə, də kʋ nɛɛ tə nɩ́á wa. Moyizə dàń sʋ̀rɩ́ pabɩʋ tə mama, Yɩɩ joŋi bwálɩ́ tə yuu wa. Kʋ yɩn joŋi, ba nə sʋ̀rɩ́, ndə Ba-Yígúrə́-Jə-Tiu yà nə pɩn wá nii, sə ʋ tʋn nətʋ. Kʋ yɩn joŋi, ba nə sʋ̀rɩ́, kʋ lwán ga ywán, kʋ pa Ba-Yígúrə́-Jə-Tiu nə.

22 Kʋ kwa nə, Moyizə pɩn ba ja bələ nii pabɩʋ tə, ba bà, sə ʋ ma fwa joŋi tə, ʋ nə wá ma tún Yɩɩ joŋwana tə. Aron də ʋ bɩ̀á tə tún ba jɩɩn kʋ yuu wa. 23 Yá Moyizə dàń gʋa kʋ, ʋ lan kʋ jana tə, ʋ kə Aron jɩzən zɩɩn, də ʋ jɩzən jɩfʋnbɩʋ, də ʋ jɩzən nafʋnbɩʋ nə. 24 Kʋ kwa nə, ʋ pɩn Aron bɩ̀á tə yí lá. Ʋ lan jana tə, ʋ kə ba də jɩzən zɩɩn, də ba jɩzən jɩfʋnbɩʋ, də ba jɩzən nafʋnbɩʋ nə, ʋ ga tì jana tə gɩganɩ tə, ʋ ma tà Yɩɩ joŋi bwálɩ́ tə yɩra tə, ʋ kɩkarɩ. 25 Yá ʋ dàń lɩ pabɩʋ tə nanʋga tə, də kʋ dəwurə tə, də nʋga tə mama, ka nə dà kʋ waa wiən tə yɩra, də kʋ cɩɩn tə, də kʋ tanpɩrɩbɩa bələ tə, də tə yɩra nʋga tə, də kʋ jɩzən ciin tə. 26 Ʋ tə lɩ dipɛn nədʋ, kʋ nə wà sabwarɩ ken, də gàtó nədʋ, ba nə ywɛ́ də nʋga, də ŋʋ̀nʋ́ nədʋ, dipɛn tə nə ba sabwarɩ jə, kəpurə tə wa, ba nə tún Ba-Yígúrə́-Jə-Tiu yáá con. Ʋ dà tə, nanʋga tə, də jɩzən ciin tə yuu wa. 27 Ʋ ken tə mama Aron də ʋ bɩ̀á tə jɩɩn wa, ʋ ga pa, ba yɩyarɩ tə Ba-Yígúrə́-Jə-Tiu yáá con, ba pa Ba-Yígúrə́-Jə-Tiu nə. 28 Kʋ kwa nə, Moyizə pìí ʋ jon tə, ba jɩɩn wa, ʋ dà joŋi vànɩ́ tə yuu, ʋ sʋ̀rɩ́ Yɩɩ joŋi bwálɩ́ tə yuu wa. Kʋ yɩn joŋi, ʋ nə fwa, ʋ ma tún Yɩɩ joŋwana. Kʋ yɩn joŋi, ʋ nə sʋ̀rɩ́, yá kʋ lwán yɩn ywánɩ́, kʋ pa Ba-Yígúrə́-Jə-Tiu nə.

29 Moyizə tì pabɩʋ təntə nyʋnɩ tə, ʋ yɩyarɩ Ba-Yígúrə́-Jə-Tiu yáá con, ʋ pa wá. Mə kʋ mʋ̀ nə yɩn Moyizə tori, ndə Ba-Yígúrə́-Jə-Tiu yà nə pɩn wá nii, sə kʋ tʋn nətʋ.

30 Moyizə tì dun nʋga tə, də jana, tə yà nə wulə Yɩɩ joŋi bwálɩ́ tə yuu wa, ʋ twɛ́n ʋ kə Aron, də ʋ gànàn tə nə, də Aron bɩ̀á tə, də ba gànàn tə nə. Ʋ tún Aron də ʋ gànàn tə, də Aron bɩ̀á tə, də ba gànàn tə, sə ba ya Yɩɩ cɩcɩ nyiən. 31 Moyizə swɩ̀n Aron də ʋ bɩ̀á tə con, ʋ wʋ: «Á sàŋà pabɩʋ tə nàŋʋ́ tə, Yɩɩ jə́rə́ gansili tə mimii tə yáá. Mə lá nə, á wá də́ kʋ, də dipɛn tə nə wulə kəpurə tə wa, ndə à nə pɩn aba nii, sə á tʋn nətʋ. Cɩ́gá, à swɩ̀n də, á mʋ̀ cɩcɩ nə wàá nàŋʋ́ təntə á də́. 32 Nàŋʋ́ tə də dipɛn tə nə ga lá, á mɛ, sə á sʋ̀rɩ́ tə gɩganɩ tə, mən wa. 33 Á wá mɛ, sə á nan Yɩɩ jə́rə́ gansili tə yáá nə, á va bwálɩ́ don, kʋ ja vələ, á túŋú dɩan barpɛ tə nə wá zwɛ̀. Cɩ́gá, á túŋú tə mɛ, sə kʋ tì dɩan barpɛ. 34 Kʋ tə nə tʋn zə̀n nətən, yɩ Ba-Yígúrə́-Jə-Tiu nə pɩn nii, sə kʋ tʋn, sə á cʋna ma kwɛn, tə lɩ á yuu wa. 35 Á wá ya Yɩɩ jə́rə́ gansili tə mimii tə yáá, dɩan barpɛ, yɩcaʋ də tɩtɩn. Yá á dàń nə zìlə́ Ba-Yígúrə́-Jə-Tiu nii, sə á dàn ká tɩ. Cɩ́gá, mə nii təntə nə, Ba-Yígúrə́-Jə-Tiu pɩn nə.» 36 Aron də ʋ bɩ̀á tə tʋn kʋ tə mama, Ba-Yígúrə́-Jə-Tiu nə twá də Moyizə, ʋ pa nii, sə ba tʋn.