Aron də ʋ bɩ̀á tə təntən joŋi
9
1 Nana nii dɩɩn tə nə, Moyizə bon Aron də ʋ bɩ̀á tə, də Yɩzərayɛlə dwíí nəkwɩna tə. 2 Ʋ swɩ̀n Aron con, ʋ wʋ́: «Ja nabiə, n ma fwa cʋna kwɩan joŋi, n ga ja pabɩʋ, n ma fwa joŋi, ba nə sʋ̀rɩ́. Vàná bələ təntə mɛ, sə tə yɩra ya zuni, tə ga cé. N wá ja tə, n bà Ba-Yígúrə́-Jə-Tiu yáá con. 3 N wá swɩ̀n Yɩzərayɛlə dwíí tə con, sə ba ja bʋtʋlʋ, ba ma fwa cʋna kwɩan joŋi, ba ga ja nabiə, də pəbiə, tə nə jə bɩnɩ nədʋ nədʋ, tə yɩra nə zurə, tə ga cé, ba ma fwa joŋi, ba nə sʋ̀rɩ́. 4 Ba wá ja naʋ, də pabɩʋ, ba ma fwa nimarʋ joŋi, Ba-Yígúrə́-Jə-Tiu yáá con, də zìlə́ won, ba nə wá ywɛ́ də nʋga. Cɩ́gá, zə̀n kʋ tə, Ba-Yígúrə́-Jə-Tiu wá bɩrɩ ʋ tɩ̀àn aba.»5 Tə tə mama Moyizə nə pɩn nii, sə ba ja bà, ba ja tə ba bà Yɩɩ jə́rə́ gansili tə yáá nə. Yɩzərayɛlə púlí tə mama dàń twi, ba zɩga Ba-Yígúrə́-Jə-Tiu yáá con. 6 Moyizə swɩ̀n, ʋ wʋ́: «Á nəŋə kʋ tə, Ba-Yígúrə́-Jə-Tiu nə pɩn nii, sə á tʋn. Á dàń tʋŋa kʋ, yá Ba-Yígúrə́-Jə-Tiu wá bɩrɩ aba, ʋ dun tə.» 7 Moyizə swɩ̀n Aron con, ʋ wʋ́: «Bà n yí Yɩɩ joŋi bwálɩ́ tə yɩra, n fwa n cʋna kwɩan joŋi tə, də n joŋi tə, ba nə sʋ̀rɩ́, n ma kwɛn n tətə cʋna, də lalʋʋ tə cʋna, n lɩ. Kʋ kwa nə, n wá fwa lalʋʋ tə jwəŋə tə, də ba zìlə́ won tə, n pa Yɩɩ nə, n ma kwɛn ba cʋna, n lɩ, ndə Ba-Yígúrə́-Jə-Tiu yà nə pɩn nii, sə kʋ tʋn nətʋ.»
8 Aron twi, ʋ yí Yɩɩ joŋi bwálɩ́ tə yɩra, ʋ gʋ ʋ tətə cʋna kwɩan joŋi nabiə tə. 9 Aron bɩ̀á tə ja ka jana tə, ba bà ʋ yáá con. Ʋ ləgə ʋ jɩfʋa tə wa, ʋ lɩ, ʋ kə Yɩɩ joŋi bwálɩ́ tə nyʋran tə nə, ʋ ga lwá tə gɩganɩ tə, Yɩɩ joŋi bwálɩ́ tə də̀ń nə. 10 Ʋ sʋ̀rɩ́ cʋna kwɩan joŋi vànɩ́ tə nanʋga tə, də kʋ tanpɩrɩbɩa tə, də kʋ cɩɩn tə, Yɩɩ joŋi bwálɩ́ tə yuu wa, ndə Ba-Yígúrə́-Jə-Tiu yà nə pɩn nii Moyizə nə, sə kʋ tʋn nətʋ. 11 Yá ba dàń ja vànɩ́ tə nàŋʋ́ tə, də kʋ tànʋ̀ tə, ba nan kwa con, ba yá ba dəkuu bwálɩ́ tə, ba sʋ̀rɩ́. 12 Kʋ kwa nə, Aron gʋa joŋi tə, ba nə fwa ba sʋ̀rɩ́, vànɩ́ tə. Ʋ bɩ̀á tə pɩn wá vànɩ́ tə jana tə, ʋ ma tà Yɩɩ joŋi bwálɩ́ tə yɩra tə, ʋ kɩkarɩ. 13 Ba cə vànɩ́ tə, nandɛɛ nandɛɛ, ba súrí kʋ yuu tə nə, ba pa Aron nə. Yá ʋ jon tə, ʋ sʋ̀rɩ́ Yɩɩ joŋi bwálɩ́ tə yuu wa. 14 Yá ʋ sɩ̀n vànɩ́ tə lʋran tə, də kʋ nɛɛ tə, ʋ dà kʋ nandɛɛ tə duən tə yuu, ʋ sʋ̀rɩ́ Yɩɩ joŋi bwálɩ́ tə yuu wa.
15 Kʋ kwa nə, Aron fwa lalʋʋ tə jwəŋə tə. Ʋ jon lalʋʋ tə cʋna kwɩan joŋi bʋtʋlʋ tə, ʋ gʋ, ʋ ma fwa ba cʋna kwɩan joŋi, ndə ʋ nə ja təntən vànɩ́ tə, ʋ fwa nətʋ. 16 Ʋ ja nabiə tə, də pəbiə tə, ʋ ma fwa joŋi tə, ba nə sʋ̀rɩ́, ndə kʋ nə mɛ, sə kʋ tʋn nətʋ. 17 Ʋ fwa zìlə́ won tə jɩguli yii, ʋ súrí jɩjʋ joŋi vànɩ́ tə nə, ʋ sʋ̀rɩ́ Yɩɩ joŋi bwálɩ́ tə yuu wa. 18 Aron gʋa lalʋʋ nimarʋ joŋi naʋ tə, də pabɩʋ tə də. Ʋ bɩ̀á tə pɩn wá vàná tə jana tə, ʋ ma tà Yɩɩ joŋi bwálɩ́ tə yɩra tə, ʋ kɩkarɩ. 19 Ʋ bɩ̀á tə pɩn wá naʋ tə də pabɩʋ tə nanwɩɩ tə, də tə dəwurə tə, də tə nʋga tə nə dà tə waa wiən tə yɩra, də tə tanpɩrɩbɩa tə, də tə cɩɩn tə. 20 Ba tún nanwɩɩ tə joŋi vàná tə nyʋna tə yuu, yá Aron dàń sʋ̀rɩ́ tə, Yɩɩ joŋi bwálɩ́ tə yuu wa. 21 Kʋ kwa nə, Aron yɩyarɩ joŋi vàná tə nyʋna tə, də tə jɩzən ciin tə, Ba-Yígúrə́-Jə-Tiu yáá con, ʋ pa Ba-Yígúrə́-Jə-Tiu nə, ndə Moyizə yà nə pɩn nii, sə kʋ tʋn nətʋ. 22 Yá Aron dàń zɩn ʋ jɩ̀àn, ʋ te lalʋʋ tə con, ʋ ga lòrì, sə Yɩɩ fwa zəni ba yɩra. Ʋ nə fwa cʋna kwɩan joŋi tə, də joŋi tə, ba nə fwa, ba sʋ̀rɩ́, də nimarʋ joŋi tə, ʋ zwɛ̀ kwa nə, ʋ nan Yɩɩ joŋi bwálɩ́ tə yuu, ʋ cú. 23 Moyizə də Aron zʋa Yɩɩ jə́rə́ gansili tə wa. Máŋá tə, ba nə pìí ba nan, ba lòrì, sə Yɩɩ fwa zəni lalʋʋ tə yɩra, yá Ba-Yígúrə́-Jə-Tiu dàń bɩrɩ ʋ dun tə, lalʋʋ tə mama nə. 24 Mənvwə nan Ba-Yígúrə́-Jə-Tiu yáá con, ka bà, ka sʋ̀rɩ́ vàná tə, ba nə ma fwa joŋi, sə ba sʋ̀rɩ́, də tə nanʋga tə, Yɩɩ joŋi bwálɩ́ tə yuu wa. Lalʋʋ tə mama nɩ kʋ nətʋ tə, yá ba dàń mà pupwən cə̀rí, ba ga tʋ, ba pú ba yáá tɩa.