Aron bɩ̀á Nadabə də Abihu tɩan yoo
10
1 Nadabə də Abihu, Aron bɩ̀á bələ təntə lìù mama tì ʋ won tə, ʋ nə ma tùŋə̀ mən, ba tùn mən cala, ba kə tə wa, ba lwá wusinə tə yuu. Yá ba dàń ja mən təntə, ba nə tùn bwálɩ́ don nə, ba bà Ba-Yígúrə́-Jə-Tiu yáá con. Yá kʋ nətʋ tə yà wà Ba-Yígúrə́-Jə-Tiu kwìə̀ tə nii nə twá. 2 Mən dàń nan Ba-Yígúrə́-Jə-Tiu yáá con, tə sʋ̀rɩ́ ba, yá ba tɩga Ba-Yígúrə́-Jə-Tiu yáá con. 3 Moyizə swɩ̀n Aron con, ʋ wʋ́: «Mə kʋ nə, Ba-Yígúrə́-Jə-Tiu dí yáá, ʋ swɩ̀n á con,də ʋ pɩ̀à, sə lɩ̀à tə mama, ba nə yí ʋ yɩra,
lwarɩ də, ʋ yɩ Yɩɩ tə, ʋ nə yɩ parɩ,
sə ba ga pa wá dun,
lalʋʋ tə mama yáá con.»
Yá Aron wà yoo mama swɩ̀n.
4 Moyizə bon Mikayɛlə də Ɛləsafan, ba nə yɩ Aron nyɩna nyánʋ́ Uziyɛlə bɩ̀á, ʋ swɩ̀n ba con, ʋ wʋ́: «Á bɩ̀án á tì á nubɩa tə tɩga tə, Yɩɩ wúlú bwálɩ́ tə yáá nə, á ja nan kwa con, á ga yá dəkuu bwálɩ́ tə.» 5 Ba twi, ba yí lá, ba tì tɩga tə, ba joŋwana gànàn tə wa, ba ja nan kwa con, ba ga yá dəkuu bwálɩ́ tə, ndə Moyizə nə swɩ̀n ba con nətʋ. 6 Moyizə swɩ̀n Aron, də Eleyazarə, də Aron bìú Yɩtamarə con, ʋ wʋ́: «Á dànà ká yá á yukʋran, á ba tə zàŋɩ̀. Á dànà ká kàrɩ́ á gànàn, sə kʋ bɩrɩ də, á wulə pucʋnɩ wa. Kʋ nə tà nətʋ, á də wá tɩ, yá á wá pa Yɩɩ lɩŋa zàn lalʋʋ tə mama yuu wa. Á yágá, sə Yɩzərayɛlə dwíí tə mama, ba nə yɩ á nubɩa, kwi tɩga tə nə, Ba-Yígúrə́-Jə-Tiu nə pɩn mən də́, tə gʋ. 7 Á mʋ̀ wà mɛ, sə á nan kwa con, á ga yá Yɩɩ jə́rə́ gansili tə mimii yáá tə. Kʋ nə tà nətʋ, á wá tɩ. Cɩ́gá, á yɩ lɩ̀à tə, ba nə twɛ́n Ba-Yígúrə́-Jə-Tiu dun nʋga* á yuu wa, ba ma tún aba, sə á ya Yɩɩ cɩcɩ nyiən.» Yá Aron də ʋ bɩ̀á tə dàń zìlí Moyizə nii.
8 Ba-Yígúrə́-Jə-Tiu swɩ̀n Aron con, ʋ wʋ́: 9 «Máŋá tə wa, n nə zwɩ Yɩɩ jə́rə́ gansili tə wa, n wà mɛ, sə n nyʋn divɛn, nə à yə̀ə́ sabwarɩ sana yiri mama. N bɩ̀á tə də mɛ, sə ba zìlí kʋ yoo təntə nii, sə á dàn ká tɩ. Kʋ yɩ nii à pɩn, kʋ pʋ́pʋ́nɩ́, kʋ tún, n də n dwíí tə mama yɩrɩ, ba nə wá ya lʋʋ wa, máŋá də máŋá mama wuuu. 10 Kʋ nətʋ wá pa, á wànɩ́ á lwarɩ won tə nə yɩ Yɩɩ nyiən, də wovɛɛ* swɩ́án duən wa. Kʋ wá pa, á lwarɩ durən* won, də won tə nə tà durən won swɩ́án duən wa. 11 Yá á dàń wá ja à mʋ̀ Ba-Yígúrə́-Jə-Tiu nii yìə̀n tə mama, á ma kàrɩ̀ Yɩzərayɛlə lɩ̀à tə. À nii yìə̀n təntə, à nə twá də Moyizə, ʋ ma pa ba.»
12 Moyizə swɩ̀n Aron, də ʋ bɩ̀á Eleyazarə də Yɩtamarə con, ba nə ga, ʋ wʋ́: «Á tíé zìlə́ won tə, ba nə fwa, ba sʋ̀rɩ́, ba pa Ba-Yígúrə́-Jə-Tiu nə, ba ga gɩganɩ tə, á jə̀ń Yɩɩ joŋi bwálɩ́ tə vàn nə, á də́. Á dànà ká kə sabwarɩ kʋ wa. Cɩ́gá, kʋ yɩ won tə, kʋ nə yɩ Ba-Yígúrə́-Jə-Tiu cɩcɩ nyiən. 13 Á wá də́ kʋ bwálɩ́ wa, kʋ nə yɩ parɩ. Mə n də n bɩ̀á tə tori nə, zìlə́ wiən tə wa, ba nə sʋ̀rɩ́, ba pɩn Ba-Yígúrə́-Jə-Tiu nə. Kʋ yɩ yoo, Ba-Yígúrə́-Jə-Tiu nə pɩn nə nii kʋ yuu wa. 14 Yá joŋi vàná tə nyʋnɩ tə, ba nə yɩyarɩ Ba-Yígúrə́-Jə-Tiu yáá con, də ciin tə, ba nə lɩ, ba tún vàn nə, ba pa Ba-Yígúrə́-Jə-Tiu nə, n mʋ̀ Aron, də n bɩ̀á, də n bwɩ̀ɩ́, wá də́ tə bwálɩ́ nə, kʋ nə ba durən jə. Cɩ́gá, tə yɩ á mʋ̀ tori, á nə mɛ, sə á tì, Yɩzərayɛlə dwíí tə nimarʋ jwəŋə vàná tə wa. 15 Jwəŋə tə tɩ̀án mɛ, sə ba lɩ ciin tə, ba nə yàá tún vàn nə, də nyʋnɩ tə, ba nə yàá yɩyarɩ, ba súrí nanʋga tə nə, ba nə yàá sʋ̀rɩ́ Yɩɩ joŋi bwálɩ́ tə yuu wa, ba ja bà. Á nə jon ciin tə, də nyʋnɩ tə, á yɩyarɩ Ba-Yígúrə́-Jə-Tiu yáá con, á pa wá, á zwɛ̀ kwa nə, tə dàń wá jì n mʋ̀ Aron, də n bɩ̀á tə tori. Yá kʋ nətʋ tə yɩ nii, Ba-Yígúrə́-Jə-Tiu nə pɩn, kʋ pʋ́pʋ́nɩ́, kʋ tún, sə kʋ tʋn máŋá də máŋá mama wuuu.»
16 Moyizə bwe cʋna kwɩan joŋi bʋtʋlʋ tə yoo, yá ba swɩ̀n ʋ con də, ba sʋ̀rɩ́ kʋ. Kʋ nətʋ tə pɩn, ʋ lɩŋa zàn Eleyazarə, də Yɩtamarə yuu wa, zənzən. Ba mʋ̀ yà nə yɩ Aron bɩ̀á, ba nə ga. Ʋ bwe ba, ʋ wʋ́: 17 «Bɛ̀ɛ̀ nə pɩn, á wà cʋna kwɩan joŋi vànɩ́ tə nàŋʋ́ tə dí, bwálɩ́ tə wa, kʋ nə yɩ parɩ? Kʋ yɩ won tə, kʋ nə yɩ Yɩɩ cɩcɩ nyiən, yá Ba-Yígúrə́-Jə-Tiu pɩn kʋ aba, sə á mʋ̀ nə wànɩ́, á kwɛn lalʋʋ tə cʋna, á lɩ, Ba-Yígúrə́-Jə-Tiu yáá con, á ma jon ba, ba cʋna wa. 18 Vànɩ́ tə jana wà Yɩɩ wúlú bwálɩ́ tə wa zwɩ. Kʋ mʋ́ nə pɩn, á yà mɛ, sə á də́ kʋ nàŋʋ́ tə, Yɩɩ wúlú bwálɩ́ tə wa, ndə à yà nə pɩn aba nii, sə á tʋn nətʋ.» 19 Yá Aron le Moyizə, ʋ wʋ́: «Nə̀ń kʋ nə, zə̀n tətə nə ba fwa ba cʋna kwɩan joŋi, də joŋi tə, ba nə sʋ̀rɩ́, ba pa Ba-Yígúrə́-Jə-Tiu nə. Yá n tətə yə̀ə́ kʋ tə nə yí nə. Yoo təntə kwa nə, à zə̀n yà nə dí cʋna kwɩan joŋi tə nàŋʋ́ tə, n bʋŋa də, kʋ yà wá ya yozəŋu, à tʋn Ba-Yígúrə́-Jə-Tiu yáá con naaa?» 20 Moyizə cʋgʋ Aron sʋgʋ tə, ʋ ga sɛ̀ kʋ.