WIƏN TƏ NƏ BA DURƏN JƏ DƏ DURƏN WIƏN YOO
Durən vàná, də vàná tə nə ba durən jə
11
1 Ba-Yígúrə́-Jə-Tiu swɩ̀n Moyizə də Aron con, 2 sə ba swɩ̀n Yɩzərayɛlə dwíí tə con, ʋ wʋ́: «Vàná tə mama wa, tə nə wulə tɩa yuu wa, á nəŋə vàná tə, á nə wàá tə nàŋʋ́ á də́. 3 Vàná tə mama, tə napaŋɩ nə pwɛ̀, tə ga pìí tə gwìń wodirən, tə lɩ tə pùə́ wa, tə də́, á wàá vàná təntə yirə nàŋʋ́ á də́. 4 Yá vàná tə, tə napaŋɩ nə pwɛ̀, yá tə ga ba wodirən pìí tə gwìń, tə lɩ tə pùə́ wa, tə də́, nə à yə̀ə́ tə nə pìí tə gwìń wodirən, tə lɩ tə pùə́ wa, tə də́, tə napaŋɩ ga wà pwɛ̀, á wà mɛ, sə á də́ vàná təntə yirə nàŋʋ́.— Kʋ yɩ nyʋgʋma. Kʋ pìí kʋ gwìń wodirən, kʋ lɩ kʋ pùə́ wa, kʋ də́, yá kʋ napaŋɩ wà pwɛ̀. Á mɛ sə á jələ kʋ ndə durən vànɩ́ nə.
5 — Kʋ tə nə súrí lá, yɩ panyanɩ. Kʋ pìí kʋ gwìń wodirən, kʋ lɩ kʋ pùə́ wa, kʋ də́, yá kʋ ba napaŋɩ jə, tə nə pwɛ̀. Á mɛ sə á jələ kʋ ndə durən vànɩ́ nə.
6 — Kʋ tə nə súrí lá, yɩ zwəŋə. Ka pìí ka gwìń wodirən, ka lɩ ka pùə́ wa, ka də́, yá ka ba napaŋɩ jə, tə nə pwɛ̀. Á mɛ, sə á jələ ka, ndə durən vànɩ́ nə.
7 — Kʋ tə nə súrí lá, yɩ too. Kʋ jə napaŋɩ tə nə pwɛ̀, yá kʋ ba wodirən pìí kʋ gwìń, kʋ lɩ kʋ pùə́ wa, kʋ də́. Á mɛ, sə á jələ kʋ ndə durən vànɩ́ nə. 8 Á dànà ká də́ vàná təntə nàŋʋ́, á dànà ká dwen tə tɩgɩ də tətə yɩra. Á mɛ sə á jələ tə ndə durən vàná nə.
9 Nɩ́á wa wonəŋə tə mama wa, á nəŋə tə tə, á nə wàá á də́: Nɩ́á wa wonəŋə tə mama, tə yɩra nə jə pʋran, də wiən, tə nə ma ye mʋʋ wa, nə à yə̀ə́ buu wa, á wàá tə á də́. 10 Yá nɩ́á wa wonəŋə tə duən tə mʋ̀ mama, tə nə mɩmɩlɩ mʋʋ wa, də buu wa, tə yɩra ga ba pʋran, nə à yə̀ə́ wiən tə nə ma ye jə, mɛ sə tə ya á durə. 11 Á dànà ká də́ tə nàŋʋ́. Á wà mɛ sə á dwen tə tɩgɩ də tətə yɩra. Tə wá ya á durə. 12 Nɩ́á wa wonəŋə tə mama, tə nə ba pʋran, nə à yə̀ə́ wiən tə nə ma ye jə, mɛ sə tə ya á durə.
13 Zuŋi tə wa, á nəŋə zuŋi tə nə mɛ, sə tə ya á durə, á nə wà mɛ sə á də́: Kʋ yɩ dəlu, də kayɩlʋ, də mʋʋ nii kayɩlʋ, 14 də kələjana, də cii də kʋ dwíí yiri mama, 15 də batɩɛnkanʋ də kʋ dwíí yiri mama, 16 də taataa, də kunkoru, də buu bisiu, də twələ də ka dwíí yiri mama, 17 də cirə lwara, də bugwana, də kunkwəbasirə, 18 də buu cə̀rə́, də caŋwara, də bisikwələ, 19 də dwanʋ, də buzuŋu də kʋ dwíí yiri mama, də kadaapurə, də sɩ́sárá.
20 Wopərən tə mama, tə nə vəli nɛɛ banɩa yuu, mɛ sə tə ya á durə. 21 Yá wopərən tə mama wa, tə nə vəli nɛɛ banɩa yuu, á wàá tə tə nə jə nakoli, tə nɛɛ tə yuu con, tə ma faŋa tɩa yuu wa, á də́. 22 Á nəŋə tə tə, á nə wàá á də́. Kʋ yɩ jə̀rə̀n yiri mama. Kayɩra, də cɩ̀rà, də cɩrɩbamʋnbwɛ. 23 Wopərən tə duən tə mʋ̀ mama, tə nə vəli nɛɛ banɩa yuu, mɛ sə tə ya á durə.
24 Á nə dwen tə mʋ̀ wopərən təntə yɩra, tə wá pa, á jì durən lɩ̀à. Lìù tə mama, ʋ nə dwen tə tɩgɩ yɩra, kʋ tíú wá jì durən lìù, kʋ va kʋ yí didəni. 25 Lìù tə mama, ʋ nə tì tə tɩgɩ, ʋ mɛ, sə ʋ sɩ̀n ʋ gànàn, ʋ ga ja ʋ tɩ̀àn, ndə durən lìù nə, kʋ va kʋ yí didəni.
26 Á mɛ, sə á jələ vànɩ́ mama, kʋ napaŋɩ nə wà pwɛ̀, kʋ ga ba wodirən pìí kʋ gwìń, kʋ lɩ kʋ pùə́ wa, kʋ də́, ndə durən vànɩ́ nə. Lìù tə mama, ʋ nə dwen vàná təntə yiri yɩra, kʋ tíú wá jì durən lìù. 27 Á wá jələ vàná tə mama, tə nə vəli nɛɛ banɩa yuu, tə ga ba napaŋɩ jə, ndə durən vàná nə. Lìù tə mama, ʋ nə dwen tə tɩgɩ yɩra, kʋ tíú wá jì durən lìù, kʋ va kʋ yí didəni. 28 Yá lìù tə də mama, ʋ nə tì tə tɩgɩ, kʋ tíú mɛ, sə ʋ sɩ̀n ʋ gànàn, ʋ ga ja ʋ tɩ̀àn, ndə durən lìù nə, kʋ va kʋ yí didəni. Á mɛ, sə á jələ tə, ndə durən vàná nə. 29 wonənən nəmənbii tə wa, tə nə vəli tə pùə́ baan, tɩa yuu wa, á nəŋə tə tə, á nə mɛ, sə á jələ, ndə durən wiən nə. Kʋ yɩ bəyərə, də tatɔɔ, də kabuləbu də kʋ dwíí yiri mama, 30 də basankɩʋ, də navɩnvɩna, də kwɩ́ʋ́, də bʋ̀à, də kʋnbala. 31 Wonənən nəmənbii tə mama wa, mə tə mʋ̀ nə, á mɛ, sə á jələ, ndə durən wiən nə. Yá tə nə tɩga, lìù tə mama, ʋ nə dwen tə yɩra, kʋ tíú wá jì durən lìù, kʋ va kʋ yí didəni. 32 Tə mʋ̀ wonənən təntə tɩgɩ nə tʋa won yiri mama yuu wa, kʋ nə yɩ dàʋ̀ zʋŋa, nə à yə̀ə́ gànʋ̀, nə à yə̀ə́ tànʋ̀, nə à yə̀ə́ lɔ̀ɔ̀, nə à yə̀ə́ won yiri tə mama, ba nə ma tʋŋa, won təntə wá jì durən won. Kʋ mɛ, sə ba swán kʋ nɩ́á wa, yá kʋ wá jì durən won, kʋ va kʋ yí didəni. Kʋ kwa nə, kʋ dàń wá pìí kʋ jì won, durən nə kʋ́ʋ̀ tə̀lə́ kʋ yɩra. 33 Wonənən təntə nədʋ mama nə tʋa daʋ nəkənə wa, də won wulə ka waa, ka waa won təntə wá jì durən won, á ga mà nəkənə tə tətə, á lwa. 34 Nɩ́á tə, ba nə ma sɩ̀n won tə, kʋ nə jìgə̀ durən won, nə lwá tə kə wodiu yiri mama nə, fuən nə, kʋ yà nə wàá kʋ də́, wodiu təntə də dàń wá jì durən won. Yá nɩ́á təntə nə ken wonywɩʋn yiri mama wa, fuən nə, kʋ yà nə wàá kʋ nywɩn, wonywɩʋn təntə dàń wá jì durən won. 35 Wonənən təntə tɩgɩ nə tʋa won mama yuu wa, kʋ won təntə wá jì durən won. Kʋ nə yɩ kúrí, nə à yə̀ə́ kurisaʋ, tə mɛ, sə ba gwɩrɩ tə. Tə jìgə̀ durən wiən, yá á mɛ, sə á jələ tə, ndə durən wiən nə. 36 Yá kʋ dàń nə yɩ nabuliyii wa, nə à yə̀ə́ nɩ́á gwàlʋ́ nəfarʋ wa nə, wonənu təntə don tɩgɩ tʋa, nɩ́á təntə mʋ̀ bá ya durən won. Yá lìù tə mʋ̀, ʋ nə wá lɩ wonənu tə tɩgɩ tə, nɩ́á tə wa, wá jì durən lìù. 37 Wonənu tɩgɩ nə tʋa wodwii wa, ba nə mɛ, sə ba dù, wodwii tə bá jì durən won. 38 Yá kʋ nə yɩ wobɩa wa, ba nə swán nɩ́á wa, sə ba dɩŋa, nə kʋ tʋa, á mɛ, sə á jələ wobɩa təntə, ndə durən won nə. 39 Vàná tə, á nə wàá á də́, wa vànɩ́ nə tɩga, lìù tə, ʋ nə dwen vantɩgʋ tə yɩra, kʋ tíú wá jì durən lìù, kʋ va kʋ yí didəni. 40 Lìù nə dí vantɩgʋ təntə nàŋʋ́, kʋ tíú mɛ, sə ʋ sɩ̀n ʋ gànàn, ʋ ga ja ʋ tɩ̀àn, ndə durən lìù nə, kʋ va kʋ yí didəni. Yá lìù tə də, ʋ nə zɩn vantɩgʋ təntə, kʋ tíú mɛ, sə ʋ sɩ̀n ʋ gànàn, ʋ ga ja ʋ tɩ̀àn, ndə durən lìù nə, kʋ va kʋ yí didəni.
41 Wonənən tə mama, tə nə vəli tə pùə́ baan, tɩa yuu wa, mɛ, sə tə ya á durə. Á wà mɛ, sə á də́ tə. 42 Á wà mɛ, sə á də́ wonənən nəmənbii təntə nədʋ mama, tə nə vəli tə pùə́ baan, nə à yə̀ə́ tə nə vəli nɛɛ banɩa yuu, nə à yə̀ə́ tə nə vəli nɛɛ kapʋpʋ yuu. Cɩ́gá, tə yɩ á durə. 43 Á cɩa á tɩ̀àn nə, wonənən təntə, tə nə vəli tə pùə́ baan, nədʋ mama dàn ká pa, á tətə jì durə lɩ̀à. Á dànà ká pa sə, tə pa á jì durən lɩ̀à. Á dànà ká pa, tə kə aba durən wa. 44 Cɩ́gá, à mʋ̀ nə yɩ Ba-Yígúrə́-Jə-Tiu, à nə yɩ á Yɩɩ. Kʋ mʋ̀ yɩrɩ, á kwɩan á tɩ̀àn, á lɩ durən yìə̀n wa, sə á ya à mʋ̀ Yɩɩ nyiən. Cɩ́gá, à mʋ̀ Yɩɩ yɩ parɩ. Á dànà ká pa wonənən nəmənbii təntə, tə nə vəli tə pùə́ baan, nədʋ mama pa, á jì durən lɩ̀à.
45 Cɩ́gá, à mʋ̀ nə yɩ Ba-Yígúrə́-Jə-Tiu. À mʋ̀ nə lɩ aba, Ezwipətə lʋʋ nii tə wa, sə à ya á Yɩɩ. Yá á dàń mɛ, sə á ya à mʋ̀ Yɩɩ nyiən. Cɩ́gá, à mʋ̀ Yɩɩ yɩ parɩ.»
46 Mə kwìə̀ təntə nə, Ba-Yígúrə́-Jə-Tiu pɩn, vàná yuu wa, də zuŋi yuu wa, də nɩ́á wa wonəŋə tə mama yuu wa, də wonəŋə tə mama yuu wa, tə nə vəli tə pùə́ baan, tɩa yuu wa. 47 Kwìə̀ təntə bɩrɩ durən won, də won tə nə ba durən jə, swɩ́án duən wa. Tə bɩrɩ vànɩ́ tə, kʋ nàŋʋ́ nə wàá kʋ də́, də vànɩ́ tə, kʋ nàŋʋ́ nə wà diŋə mɛ, swɩ́án duən wa.