kwìə̀ tə Yɩɩ nə pɩn, kasʋn yoo wa
12
1 Ba-Yígúrə́-Jə-Tiu swɩ̀n Moyizə con, 2 sə ʋ swɩ̀n Yɩzərayɛlə dwíí tə con, ʋ wʋ́: «Kan nə jɩn pùə́, ʋ lɩra bibɛɛ, kasʋn təntə wá jì durən lìù, dɩan barpɛ, ndə ʋ nə yɩn nətʋ, máŋá tə wa, ʋ yàá nə sɩ̀n ʋ tàŋá. 3 Nana nii dɩɩn tə nə, ba wá goŋə bisɩmaa tə. 4 Kʋ kwa nə, kasʋn tə tə wá fwa dɩan fɩtwa də batwa, ʋ ma kwɛn ʋ tɩ̀àn, ʋ lɩ ʋ lɩra jana tə durən tə wa. Yá kʋ máŋá təntə mama, ʋ wà mɛ, sə ʋ dwen won mama yɩra, ba nə tún vàn nə, ba pa Yɩɩ nə. Ʋ wà mɛ, sə ʋ va Yɩɩ wúlú bwálɩ́ tə də wa, dɩan tə ʋ nə mɛ, sə ʋ ma kwɛn ʋ tɩ̀àn, ʋ lɩ durən yìə̀n wa tə, kori tə cé. 5 Yá kʋ dàń nə yɩ bikan nə, kan tə lɩrɩ, kasʋn təntə wá jì durən lìù, dɩan fugə də banɩa, ndə ʋ nə yɩn nətʋ, máŋá tə wa, ʋ yàá nə sɩ̀n ʋ tàŋá. Kʋ kwa nə, kasʋn tə tə wá fwa dɩan sapwɩtwa də bardʋ, ʋ ma kwɛn ʋ tɩ̀àn, ʋ lɩ ʋ lɩra jana tə durən tə wa. 6 Dɩan tə, kasʋn tə nə mɛ, sə ʋ ma kwɛn ʋ tɩ̀àn, ʋ lɩ lɩra durən wa tə, nə cé, kʋ nə yɩ bibɛɛ, nə à yə̀ə́ bikan nə ʋ lɩrɩ, ʋ mɛ, sə ʋ ja bɩnɩ nədʋ pəbiə, də gunpwənə, nə à yə̀ə́ nasara gunpwənə, ʋ va ʋ pa Yɩɩ joŋwanʋ tə don nə, Yɩɩ jə́rə́ gansili tə mimii tə yáá. Yɩɩ joŋwanʋ tə wá ja pəbiə tə, ʋ fwa joŋi tə, ba nə sʋ̀rɩ́, ʋ ga ja gunpwənə tə, nə à yə̀ə́ nasara gunpwənə tə, ʋ fwa cʋna kwɩan joŋi. 7 Yɩɩ joŋwanʋ tə wá kə joŋi wiən təntə à mʋ̀ Ba-Yígúrə́-Jə-Tiu yáá con, ʋ ga ja tə ʋ fwa joŋi, ʋ ma kwɛn kasʋn tə durən, ʋ lɩ. Yá kʋ kwa nə, ʋ lɩra jana tə durən tə dàń wá nan tə yá wá.»Mə kwìə̀ təntə nə Yɩɩ pɩn, kan tə nə lɩrɩ bibɛɛ, nə à yə̀ə́ bikan yuu wa. 8 Ba-Yígúrə́-Jə-Tiu swɩ̀n, ʋ súrí lá, ʋ wʋ́: «Də kasʋn tə nə ba won jə, sə ʋ ma yə̀ pəbiə, ʋ wá pɩ̀à gunponi bələ, nə à yə̀ə́ nasara gunponi bələ. Ba wá ja zuŋə tə don, ba ma fwa joŋi tə, ba nə sʋ̀rɩ́, ba ga ja ka don tə, ba ma fwa cʋna kwɩan joŋi tə. Yɩɩ joŋwanʋ tə wá fwa joŋi tə, ʋ ma kwɛn kasʋn tə cʋna, ʋ lɩ, yá ʋ dàń wá ya lìù tə, ʋ nə kʋ́ʋ̀ ba durən jə.»