Joŋwana 13

Kwìə̀ tə Yɩɩ nə pɩn, dayaan yoo wa

1 Ba-Yígúrə́-Jə-Tiu swɩ̀n Moyizə də Aron con, ʋ wʋ́: 2 «Bəlu, nə à yə̀ə́ sɩsaku, nə à yə̀ə́ pwarɩ cɩcɩlʋ nə wulə lìù yɩra, kʋ ga bà kʋ jì yatana yayɩgʋ, ndə dayaan nə, kʋ mɛ, sə ba ja kʋ tíú, ba va Yɩɩ joŋwanʋ Aron, nə à yə̀ə́ ʋ bìú tə don con. 3 Yɩɩ joŋwanʋ tə wá ywàń kʋ tíú yatana yayɩgʋ tə. Də yayɩgʋ tə bwálɩ́ kʋran tə nə jìgə̀ nəpwənə, kʋ ga yɩ ndə, kʋ ŋʋrɩ kʋ zʋ, kʋ lɛ tànʋ̀ tə nii, kʋ yɩ dayaan nə tʋa lá. Yɩɩ joŋwanʋ tə nə ywàń wá, ʋ zwɛ̀ kwa nə, ʋ wá pa nii də, kʋ tíú jìgə̀ durən lìù. 4 Yá pwarɩ nəpon cɩcɩlʋ nə tʋa lìù yatana yuu wa, kʋ ga yɩ ndə, kʋ wà ŋʋrɩ kʋ zʋ, kʋ lɛ tànʋ̀ tə nii, yá kʋ bwálɩ́ tə kʋran tə də ga wà nəpwənə jì, Yɩɩ joŋwanʋ tə wá lɩ kʋ tíú, ʋ kə ʋ cɩcɩ, dɩan barpɛ. 5 Barpɛ nii dɩɩn tə nə, Yɩɩ joŋwanʋ tə wá kwɛn, ʋ ywàń wá. Ʋ nə nɩ də, pwarɩ tə yɩ ndə, kʋ wà lwàń, kʋ ga wà walɩ, kʋ súrí lá, lìù təntə yatana tə yuu wa, Yɩɩ joŋwanʋ tə tə wá pìí, ʋ kə kʋ tíú, ʋ cɩcɩ, dɩan barpɛ duən. 6 Yá barpɛ nii dɩɩn tə nə, Yɩɩ joŋwanʋ tə kʋ́ʋ̀ wá ywàń wá. Ʋ nə nɩ də, pwarɩ tə ba cɩcɩlɩ, kʋ ga wà walɩ, kʋ súrí lá, lìù təntə yatana tə yuu wa, ʋ wá pa nii də, kʋ tíú tà durən lìù, yá ʋ yatana yayɩgʋ tə yɩ sɩsaku mʋ̀ʋ́. Kʋ tíú dàń mɛ, sə ʋ sɩ̀n ʋ gànàn mʋ̀ʋ́, yá ʋ wá ya parɩ. 7 Yá Yɩɩ joŋwanʋ tə nə ywàń kʋ tíú, ʋ ga pa nii də, ʋ tà durən lìù tə kwa nə, sɩsaku tə nə wàlɩ̀ kʋ súrí lá, lìù təntə yatana tə yuu wa, ʋ mɛ, sə ʋ pìí ʋ va, ʋ bɩrɩ ʋ tɩ̀àn, Yɩɩ joŋwanʋ tə nə. 8 Yɩɩ joŋwanʋ tə wá kwɛn ʋ ywàń wá. Ʋ nə nɩ də, sɩsaku tə dàń walɩ, kʋ súrí lá, lìù təntə yatana tə yuu wa, ʋ wá pa nii də, kʋ tíú jìgə̀ durən lìù. Cɩ́gá, kʋ yɩ dayaan.

9 Dayaan nə tʋa lìù yɩra, ba mɛ, sə ba ja kʋ tíú, ba va Yɩɩ joŋwanʋ tə don con, 10 sə ʋ ywàń wá. Bəlu nəpon nə wulə kʋ tíú yɩra, kʋ nə pɩn, kʋ bwálɩ́ tə kʋran tə pɩ̀rɩ̀, yá nàŋʋ́ ga nwɩn, kʋ nan bəlu tə wa, 11 kʋ yɩ dayaan tə, ka nə zʋa kʋ tíú zənzən. Yá Yɩɩ joŋwanʋ tə dàń wá pa nii də, kʋ tíú jìgə̀ durən lìù. Ʋ kʋ́ʋ̀ bá man tɩa, ʋ lɩ wá, ʋ kə ʋ cɩcɩ, sə ʋ ma də ʋ ywàŋá wá. Cɩ́gá, kʋ tíú jìgə̀ durən lìù. 12 Yá dayaan tə nə pupwin ka pú kʋ tíú yatana tə mama nə, ka nə zɩgɩ ʋ yuu nə, ka cú ka yí ʋ nɛɛ, Yɩɩ joŋwanʋ tə nə nɩ də, kʋ tíú yɩra tə mama yɩ nətʋ, 13 ʋ mɛ, sə ʋ kwɛn, ʋ ywàń wá. Yɩɩ joŋwanʋ tə nə nɩ də, dayaan tə cɩ́gá púə́ kʋ tíú yɩra tə mama nə, ʋ wá pa nii də, kʋ tíú tà durən lìù, dayaan tə nə pɩ̀rɩ̀ ʋ yɩra tə mama yɩrɩ. 14 Yá dɩɩn tə, ba nə nɩ də, nàŋʋ́ nwɩn kʋ nan ʋ yɩra, ʋ wá jì durən lìù. 15 Yɩɩ joŋwanʋ tə nə ywàń bwálɩ́ tə, nàŋʋ́ tə nə nwɩn, kʋ nan tə kwa nə, ʋ wá pa nii də, kʋ tíú jìgə̀ durən lìù. Lìù yatanaŋʋ nə nwɩn, kʋ nan, kʋ yɩ durən won. Kʋ yɩ dayaan. 16 Kʋ tíú yatanaŋʋ tə nə pìí kʋ pɩ̀rɩ̀, lìù təntə mɛ, sə pìí ʋ va Yɩɩ joŋwanʋ tə con, 17 sə ʋ ywàń wá. Yá ʋ nə nɩ də, nʋʋ tə cɩ́gá pìí kʋ pɩ̀rɩ̀, ʋ wá pa nii də, lìù təntə kʋ́ʋ̀ tà durən lìù, ʋ dàń jìgə̀ parɩ.

18 Nʋʋ yà nə yɩn lìù yɩra, kʋ ga zwɛ̀, 19 bəlu nəpon nə fwa cwarɩ tə wa, nə à yə̀ə́ cwarɩ tə nə sɩan, kʋ pɩ̀rɩ̀, kʋ tíú mɛ, sə ʋ va, ʋ bɩrɩ ʋ tɩ̀àn Yɩɩ joŋwanʋ nə. 20 Yɩɩ joŋwanʋ tə wá ywàń wá. Cwarɩ tə nə yɩ ndə, kʋ ŋʋrɩ kʋ zʋ, kʋ lɛ tànʋ̀ tə nii, kʋ bwálɩ́ tə kʋran tə ga jì nəpwənə, Yɩɩ joŋwanʋ tə wá pa nii, də kʋ tíú jìgə̀ durən lìù. Kʋ yɩ dayaan nə tʋa cwarɩ tə wa. 21 Yɩɩ joŋwanʋ tə nə nɩ də, kʋran nəpwənə tə̀lə́ kʋ bwálɩ́ tə wa, yá kʋ ga wà ŋʋrɩ kʋ zʋ, kʋ lɛ tànʋ̀ tə nii, kʋ ga ba cɩcɩlɩ, ʋ mɛ, sə ʋ lɩ kʋ tíú, ʋ kə ʋ cɩcɩ, dɩan barpɛ. 22 Pwarɩ tə nə walɩ, kʋ súrí lá, lìù təntə yatana tə yuu wa, Yɩɩ joŋwanʋ tə wá pa nii, də kʋ tíú jìgə̀ durən lìù. Kʋ yɩ dayaan nə tʋa lá. 23 Yá pwarɩ cɩcɩlʋ tə nə wà walɩ, kʋ súrí lá, kʋ yɩ nʋdwan tə cwarɩ tə nə. Yɩɩ joŋwanʋ tə wá pa nii, də kʋ tíú tà durən lìù.

24 Mən nə dí lìù, kʋ bwálɩ́ tə nə fwa nəpon, nə à yə̀ə́ kʋ nə sɩan, kʋ pɩ̀rɩ̀, 25 Yɩɩ joŋwanʋ mɛ, sə ʋ ywàń kʋ tíú. Yá mən tə pwarɩ cɩcɩlʋ tə wa kʋran tə nə jìgə̀ nəpwənə, kʋ ga yɩ ndə, kʋ ŋʋrɩ kʋ zʋ, kʋ lɛ tànʋ̀ tə nii, kʋ yɩ dayaan nə tʋa lá. Yɩɩ joŋwanʋ tə wá pa nii də, kʋ tíú jìgə̀ durən lìù. Cɩ́gá, kʋ yɩ dayaan nə tʋa lá. 26 Yɩɩ joŋwanʋ tə nə nɩ də, kʋran nəpwənə tə̀lə́ mən tə pwarɩ tə wa, kʋ ga wà ŋʋrɩ kʋ zʋ, kʋ lɛ tànʋ̀ tə nii, pwarɩ tə nə ba cɩcɩlɩ, ʋ mɛ, sə ʋ lɩ kʋ tíú, ʋ kə ʋ cɩcɩ, dɩan barpɛ. 27 Barpɛ nii dɩɩn tə nə, Yɩɩ joŋwanʋ tə kʋ́ʋ̀ wá ywàń wá. Mən tə pwarɩ tə nə walɩ, kʋ súrí lá, lìù təntə yatana tə yuu wa, Yɩɩ joŋwanʋ tə wá pa nii də, kʋ tíú jìgə̀ durən lìù. Kʋ yɩ dayaan nə tʋa lá. 28 Yá mən tə pwarɩ tə nə wà walɩ, kʋ súrí lá, lìù təntə yatana tə yuu wa, kʋ nə ba cɩcɩlɩ, kʋ yɩ mən tə bəlu mʋ̀ʋ́. Yɩɩ joŋwanʋ tə wá pa nii də, kʋ tíú tà durən lìù. Cɩ́gá, kʋ yɩ mən tə cwarɩ.

29 Nʋʋ nə fwa bɛɛ, nə à yə̀ə́ kan yuu nə, nə à yə̀ə́ ʋ tʋntwaŋɩ nə, 30 Yɩɩ joŋwanʋ mɛ, sə ʋ ywàń nʋʋ tə. Nʋʋ tə nə yɩ ndə, kʋ ŋʋrɩ kʋ zʋ, kʋ lɛ tànʋ̀ tə nii, kʋ bwálɩ́ tə kʋran tə nə jìgə̀ sɩ̀sɩ́nán, tə ga ba dáá, Yɩɩ joŋwanʋ tə wá pa nii də, kʋ tíú jìgə̀ durən lìù. Kʋ yɩ sabadɔɔ. Kʋ yɩ yuu, nə à yə̀ə́ tʋntwaŋɩ dayaan. 31 Yɩɩ joŋwanʋ tə nə nɩ də, sabadɔɔ tə bwálɩ́ tə yɩ ndə, kʋ wà ŋʋrɩ kʋ zʋ, kʋ lɛ tànʋ̀ tə nii, yá kʋran nəzonən tə̀lə́ kʋ bwálɩ́ tə wa, ʋ mɛ, sə ʋ lɩ lìù tə, sabadɔɔ tə nə jə tə, ʋ kə ʋ cɩcɩ, dɩan barpɛ. 32 Barpɛ nii dɩɩn tə nə, Yɩɩ joŋwanʋ tə kʋ́ʋ̀ wá ywàń sabadɔɔ tə. Kʋ nə wà walɩ, kʋ súrí lá, kʋran sɩ̀sɩ́nán nə tə̀lə́ kʋ bwálɩ́ tə wa, kʋ bwálɩ́ tə ga yɩ ndə, kʋ wà ŋʋrɩ kʋ zʋ, kʋ lɛ tànʋ̀ tə nii, 33 kʋ tíú wá pàrɩ́ ʋ kʋran tə, ʋ ga yá sabadɔɔ tə bwálɩ́ kʋran tə. Yá Yɩɩ joŋwanʋ tə kʋ́ʋ̀ wá pìí, ʋ kə wá, ʋ cɩcɩ, dɩan barpɛ duən. 34 Barpɛ nii dɩɩn tə nə, Yɩɩ joŋwanʋ tə kʋ́ʋ̀ wá ywàń sabadɔɔ tə. Kʋ nə wà walɩ, kʋ súrí lá, lìù təntə yatana tə yuu wa, kʋ ga yɩ ndə kʋ wà ŋʋrɩ kʋ zʋ, kʋ lɛ tànʋ̀ tə nii, Yɩɩ joŋwanʋ tə wá pa nii də, kʋ tíú tà durən lìù. Lìù təntə wá sɩ̀n ʋ gànàn mʋ̀ʋ́, yá ʋ wá ya parɩ. 35 Yá Yɩɩ joŋwanʋ tə nə pɩn nii də, sabadɔɔ tə tíú tà durən lìù tə kwa nə, sabadɔɔ tə nə walɩ, kʋ súrí lá, lìù təntə yatana tə yuu wa, 36 Yɩɩ joŋwanʋ tə kʋ́ʋ̀ wá pìí, ʋ ywàń wá. Yá sabadɔɔ tə cɩ́gá nə walɩ, kʋ súrí lá, lìù təntə yatana tə yuu wa, Yɩɩ joŋwanʋ tə kʋ́ʋ̀ bá man tɩa, ʋ ywàń, sə ʋ jə́n, də kʋran sɩ̀sɩ́nán nə wulə lá naaa! Kʋ tíú jìgə̀ durən lìù mʋ̀ʋ́. 37 Yá Sabadɔɔ tə nə yɩ ndə, kʋ wà walɩ, kʋ súrí lá, kʋran nəzonən ga pɛ́n kʋ bwálɩ́ tə wa, kʋ nətʋ bɩrɩ də, sabadɔɔ tə zwɛ̀, yá kʋ tíú dàń jìgə̀ parɩ. Yá Yɩɩ joŋwanʋ tə wá pa nii də, kʋ tíú kʋ́ʋ̀ tà durən lìù.

38 Bɛɛ, nə à yə̀ə́ kan yɩra nə jə pwara nəpwənə, 39 Yɩɩ joŋwanʋ mɛ, sə ʋ ywàń kʋ tíú. Ʋ nə nɩ də, pwara tə yɩ pʋ̀pwárán, kʋ yɩ pwana nə fwa kʋ tíú yɩra, ʋ tà durən lìù.

40 Lìù yukʋran nə lwàrɩ̀, kʋ pa, ʋ jì yuu puləpo tíú, ʋ tà durən lìù. 41 Kʋ tíú nə yɩ, ʋ yáá con yukʋran tə nə lwàrɩ̀, ʋ yɩ tílí con yuu puləpo tíú, ʋ tà durən lìù. 42 Yá nʋʋ nə wulə lìù kətu də̀ń yuu puləpo wa, nə à yə̀ə́ ʋ tílí con yuu puləpo wa, kʋ nə sɩan, kʋ pɩ̀rɩ̀, kʋ yɩ dayaan nə tʋa kʋ tíú kətu də̀ń yuu puləpo tə wa, nə à yə̀ə́ ʋ tílí con yuu puləpo tə wa. 43 Yɩɩ joŋwanʋ mɛ, sə ʋ ywàń kʋ tíú. Yayɩgʋ tə nə yɩ bəlu nə fwa kʋ tíú kətu də̀ń yuu puləpo tə wa, nə à yə̀ə́ ʋ tílí con yuu puləpo tə wa, kʋ ga sɩan, kʋ pɩ̀rɩ̀, ndə yatana dayaan nə, 44 kʋ tíú jìgə̀ dayarʋ, yá ʋ yɩ durən lìù. Yɩɩ joŋwanʋ tə dàń wá pa nii də, kʋ tíú jìgə̀ durən lìù, dayaan tə yɩrɩ, ka nə tʋa, ʋ yuu tə nə.

45 Dayaan nə zʋa lìù, ʋ mɛ, sə ʋ zʋ gangwɩran, ʋ ga yá ʋ yuu, ʋ ba kʋ zàŋɩ̀. Ʋ wá kwálɩ́ ʋ nii nə, ʋ ga mà bubwiə, ʋ wʋ́: “Durən! Durən!” 46 Kʋ tíú wá ya durən lìù, máŋá tə mama, yayɩgʋ təntə nə wá ya ʋ yɩra. Kʋ mʋ̀ yɩrɩ, kʋ tíú mɛ, sə ʋ nan, ʋ yá dəkuu bwálɩ́ tə, ʋ ya ʋ cɩcɩ.»

Gànàn dáá yoo

47 Ba-Yígúrə́-Jə-Tiu swɩ̀n, ʋ súrí lá, ʋ wʋ̀: «Dáá pwarɩ nə tʋa gànʋ̀ yɩra, kʋ nə yɩ bɔɔ gànʋ̀, nə à yə̀ə́ ganbʋa gànʋ̀ yɩra, 48 kʋ nə yɩ gantwan, nə à yə̀ə́ ganzwɩbiə yɩra, ba nə sʋa də ganbʋa, nə à yə̀ə́, ba nə sʋa də bɔɔ, kʋ nə kʋ́ʋ̀ yɩ tànʋ̀, nə à yə̀ə́ won yiri mama yɩra, ba nə fwa də tànʋ̀, 49 pwarɩ tə nə jìgə̀ sagʋ nɩ́á, nə à yə̀ə́ sɩ̀sɩ́nʋ́ gànʋ̀ tə yɩra, nə à yə̀ə́ tànʋ̀ tə yɩra, nə à yə̀ə́ gantwan tə yɩra, nə à yə̀ə́ ganzwɩbiə tə yɩra, nə à yə̀ə́ tànʋ̀ won yiri tə mama yɩra, kʋ yɩ dáá nə tʋa lá. Kʋ mɛ, sə ba bɩrɩ kʋ, Yɩɩ joŋwanʋ nə. 50 Yɩɩ joŋwanʋ tə wá ywàń won təntə yɩra pwarɩ tə. Kʋ kwa nə, ʋ wá tún kʋ won tə, kʋ cɩcɩ, dɩan barpɛ. 51 Yá barpɛ nii dɩɩn tə nə, ʋ wá pìí ʋ ywàń kʋ pwarɩ tə. Pwarɩ tə nə walɩ, kʋ súrí lá, gànʋ̀ tə yɩra, nə à yə̀ə́ gantwan tə yɩra, nə à yə̀ə́ ganzwɩbiə tə yɩra, nə à yə̀ə́ tànʋ̀ tə yɩra, nə à yə̀ə́ tànʋ̀ won yiri tə mama yɩra, kʋ yɩ dáá nə tʋa lá, ka ga wàrɩ̀ ka zwɛ̀. Yá won təntə jìgə̀ durən won. 52 Won təntə, pwarɩ tə nə wulə kʋ yɩra, nə yɩ gànʋ̀, nə à yə̀ə́ gantwan, nə à yə̀ə́ ganzwɩbiə, nə à yə̀ə́ tànʋ̀ won yiri mama, Yɩɩ joŋwanʋ tə mɛ, sə ʋ sʋ̀rɩ́ kʋ. Cɩ́gá, kʋ yɩ dáá, ka nə wàrɩ̀ ka zwɛ̀, nə tʋa kʋ nə. Yá kʋ won tə mɛ, sə ba dɩ kʋ, mən wa. 53 Yá Yɩɩ joŋwanʋ tə nə nɩ də, pwarɩ tə wà walɩ, kʋ súrí lá, gànʋ̀ tə, nə à yə̀ə́ gantwan tə, nə à yə̀ə́ ganzwɩbiə tə, nə à yə̀ə́ tànʋ̀ won yiri tə mama yɩra, 54 ʋ wá pa, ba sɩ̀n won təntə, pwarɩ tə nə wulə kʋ yɩra, ʋ ga kʋ́ʋ̀ pìí, ʋ tún kʋ, kʋ cɩcɩ, dɩan barpɛ duən. 55 Ba nə sɩ̀n won tə kwa nə, Yɩɩ joŋwanʋ tə kʋ́ʋ̀ wá ywàń kʋ pwarɩ tə. Pwarɩ tə nə wà yiri don lwàń, kʋ ga wà walɩ, kʋ súrí lá, won təntə jìgə̀ durən won, yá kʋ mɛ, sə ba sʋ̀rɩ́ kʋ, mən wa, kʋ nə swə, kʋ yɩ kʋ yáá, nə à yə̀ə́ kʋ kwa nə, dáá tə dí. 56 Yá ba nə sɩ̀n won tə kwa nə, Yɩɩ joŋwanʋ tə nə nɩ də, pwarɩ tə ba cɩcɩlɩ, ʋ wá goŋə bwálɩ́ təntə, ʋ lɩ gànʋ̀ tə yɩra, nə à yə̀ə́ tànʋ̀ tə yɩra, nə à yə̀ə́ gantwan tə yɩra, nə à yə̀ə́ ganzwɩbiə tə yɩra. 57 Yá máŋá don wa, pwarɩ tə nə pìí kʋ tʋ gànʋ̀ tə, nə à yə̀ə́ gantwan tə, nə à yə̀ə́ ganzwɩbiə tə, nə à yə̀ə́ tànʋ̀ won yiri tə mama yɩra, kʋ bɩrɩ də, dáá tə kʋ́ʋ̀ nə pìí, ka wulə ka də́ won təntə. Yá kʋ dàń mɛ, sə ba sʋ̀rɩ́ kʋ, mən wa. 58 Dáá nə jə gànʋ̀, nə à yə̀ə́ gantwan, nə à yə̀ə́ ganzwɩbiə, nə à yə̀ə́ tànʋ̀ won yiri mama, ba nə sɩ̀n kʋ, kʋ yɩra pwarɩ tə nə jɛ́n, ba tə mɛ, sə ba bwɛ́, ba sɩ̀n won təntə, yá kʋ kʋ́ʋ̀ bá ya durən won.» 59 Mə kwìə̀ təntə nə Yɩɩ pɩn, dáá yuu wa, ka nə də́ bɔɔ gànʋ̀, nə à yə̀ə́ ganbʋa gànʋ̀, nə à yə̀ə́ gantwan, nə à yə̀ə́ ganzwɩbiə, nə à yə̀ə́ tànʋ̀ won yiri mama. Mə kʋ wá twá kwìə̀ təntə nə, ba ma bɩrɩ də, won tə dáá nə jə, nə yɩ durən won, nə à yə̀ə́ kʋ nə tà durən won.