Dayaan kwɩan joŋi fwaŋʋ yoo
14
1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Nə̀ń yìə̀n tə nə mɛ, sə tə tʋn, dɩɩn tə nə, ba nə wá kwɛn dayarʋ dayaan durən, ba lɩ. Ba wá ja wá, ba va Yɩɩ joŋwanʋ tə con. 3 Yɩɩ joŋwanʋ tə dàń wá nan dəkuu bwálɩ́ tə kwa con, ʋ ywàń dayarʋ tə. Ʋ nə nɩ də, dayarʋ tə dayaan tə zwɛ̀, 4 ʋ wá pa, ba ja zuŋi bələ, tə nə nəŋə, tə ga tà durən zuŋi, də sɩsaban dàʋ̀, də bɔɔ sɩ̀sɩ́nʋ́, də yɩzɔpəa vʋʋ, ba bà. 5 Yɩɩ joŋwanʋ tə wá pa, ba gʋ zuŋə tə don, daʋ nəkənə yuu con, ka waa nə jə nabuliyii nɩ́á. 6 Kʋ kwa nə, Yɩɩ joŋwanʋ tə wá tì zuŋə tə nə nəŋə tə, də sɩsaban dàʋ̀ tə, də bɔɔ sɩ̀sɩ́nʋ́ tə, də yɩzɔpə vʋʋ tə, ʋ li zuŋə tə don tə jana tə wa, ba nə gʋa nabuliyii nɩ́á tə yuu con. 7 Ʋ dàń wá lɩ tə, ʋ mɩ́n ʋ kə lìù tə nə, ʋ nə wulə ʋ dayaan durən ʋ kwɛn, ʋ lɩ tə, nɛɛ barpɛ. Kʋ kwa nə, ʋ dàń wá pa nii, də kʋ tíú kʋ́ʋ̀ tà durən lìù, ʋ ga dʋgʋ zuŋə tə nə nəŋə tə, sə ka piri, ka zʋ gaʋ wa.8 Lìù tə nə kwɛn ʋ tɩ̀àn, ʋ lɩ dayaan durən wa tə, wá sɩ̀n ʋ gànàn, ʋ pàrɩ́ ʋ kʋran mama, ʋ ga swɛ nɩ́á. Yá ʋ dàń wá ya parɩ. Kʋ kwa nə, ʋ dàń wàá dəkuu bwálɩ́ tə wa, ʋ zwɩ. Ʋ dàń nə mɛ, sə ʋ fwa dɩan barpɛ kàrá wa, də ʋ wà ʋ gansili wa zwɩ. 9 Barpɛ nii dɩɩn tə nə, ʋ wá pàrɩ́ ʋ yɩra kʋran tə mama. Ʋ wá pàrɩ́ ʋ yukʋran, də ʋ twaŋa, də ʋ yɩzankʋran. Ʋ wá pàrɩ́ ʋ yɩra kʋran yiri mama. Kʋ kwa nə, ʋ wá sɩ̀n ʋ gànàn, ʋ ga swɛ nɩ́á. Yá ʋ dàń wá ya parɩ.
10 Nana nii dɩɩn tə nə, ʋ mʋ̀ lìù təntə wá pɩ̀à pəbibara bələ, də bɩnɩ nədʋ pəbikan, tə yɩra nə zurə, tə ga cé, də mun kilo nʋgʋ, tə nə yɩ zìlə́ won, ba nə ywɛ́ də nʋga, də nʋga litərə faan. 11 Yɩɩ joŋwanʋ tə nə mɛ, sə ʋ kwɛn durən tə, ʋ lɩ tə, wá zɩgɩ lìù tə nə pɩ̀à, sə ʋ kwɛn ʋ tɩ̀àn, ʋ lɩ durən yìə̀n wa tə, də kʋ tíú zìlə́ wiən təntə, à mʋ̀ Ba-Yígúrə́-Jə-Tiu yáá con, Yɩɩ jə́rə́ gansili tə mimii nə. 12 Yɩɩ joŋwanʋ tə wá tì pəbibɛɛ tə don, ʋ súrí nʋga litərə faan tə nə, ʋ ma fwa lwɩa joŋi. Ʋ wá yɩyarɩ tə à mʋ̀ Ba-Yígúrə́-Jə-Tiu yáá con, ʋ pa nə. 13 Ʋ wá gʋ pəbiə tə, bwálɩ́ tə wa, ba nə gwɩ cʋna kwɩan joŋi vànɩ́ tə, də vànɩ́ tə, ba nə ma fwa joŋi, ba sʋ̀rɩ́. Kʋ yɩ bwálɩ́ tə, kʋ nə yɩ parɩ. Yá lwɩa joŋi vànɩ́ tə nàŋʋ́ tə, də cʋna kwɩan joŋi vànɩ́ tə nàŋʋ́ tə yɩ Yɩɩ joŋwanʋ tə nə tɩ. Cɩ́gá, tə yɩ wiən tə, tə nə yɩ à mʋ̀ Ba-Yígúrə́-Jə-Tiu cɩcɩ nyiən. 14 Yɩɩ joŋwanʋ tə wá lan lwɩa joŋi vànɩ́ tə jana, ʋ kə lìù tə nə kwɛn ʋ tɩ̀àn, ʋ lɩ durən yìə̀n wa tə, jɩzən zɩɩn, də ʋ jɩzən jɩfʋnbɩʋ, də ʋ jɩzən nafʋnbɩʋ nə. 15 Kʋ kwa nə, Yɩɩ joŋwanʋ tə wá tì nʋga litərə faan tə, ʋ twɛ́n mancɩn, ʋ kə ʋ jɩgwiə wa. 16 Yá ʋ dàń wá li ʋ jɩzən jɩfʋa nʋga tə wa, ka nə wulə ʋ jɩgwiə tə wa, ʋ lɩ, ʋ mɩ́n à mʋ̀ Ba-Yígúrə́-Jə-Tiu yáá con, nɛɛ barpɛ. 17 Ʋ wá kə ʋ jɩɩn nʋga tə mancɩn, lìù tə nə kwɛn ʋ tɩ̀àn, ʋ lɩ durən yìə̀n wa tə, jɩzən zɩɩn, də ʋ jɩzən jɩfʋnbɩʋ, də ʋ jɩzən nafʋnbɩʋ nə, bwálɩ́ tə tətə nə, ʋ nə dí yáá, ʋ kə lwɩa joŋi vànɩ́ tə jana tə. 18 Kʋ kwa nə, Yɩɩ joŋwanʋ tə wá lwá ʋ jɩɩn nʋga tə gɩganɩ tə mama, lìù tə nə kwɛn ʋ tɩ̀àn, ʋ lɩ durən yìə̀n wa tə, yuu wa. Yá ʋ dàń wá fwa kʋ tíú durən tə kwɩan joŋi, à mʋ̀ Ba-Yígúrə́-Jə-Tiu yáá con, ʋ pa wá. 19 Kʋ kwa nə, Yɩɩ joŋwanʋ tə wá fwa lìù tə nə kwɛn ʋ tɩ̀àn, ʋ lɩ durən yìə̀n wa tə, durən tə kwɩan joŋi, ʋ pa wá. Joŋi təntə yɩ cʋna kwɩan joŋi. Yá kʋ də kwa nə, Yɩɩ joŋwanʋ tə dàń wá gʋ pəbiə tə, ba nə ma fwa joŋi, ba sʋ̀rɩ́ tə. 20 Yɩɩ joŋwanʋ tə wá sʋ̀rɩ́ pəbiə tə, də zìlə́ won tə nə yɩ vàrʋ́ càlɩ̀ tə, Yɩɩ joŋi bwálɩ́ tə yuu wa. Mə nətʋ nə, Yɩɩ joŋwanʋ tə wá fwa lìù təntə durən tə kwɩan joŋi, ʋ pa wá, yá kʋ tíú dàń wá ya parɩ.»
Zʋrʋ dayaan kwɩan joŋi fwaŋʋ yoo
21 Ba-Yígúrə́-Jə-Tiu swɩ̀n, ʋ súrí lá, ʋ wʋ̀: «Də dayarʋ tə nə yɩ zʋrʋ, kʋ pa, ʋ wàrɩ̀ wiən təntə mama nə, ʋ yí, ʋ wá ja pəbiə nədʋ cɩcɩ, ʋ bà, sə ba ma fwa lwɩa joŋi. Ba wá yɩyarɩ pəbiə tə, à mʋ̀ Ba-Yígúrə́-Jə-Tiu yáá con, ba ga ja ka, ba fwa ʋ durən tə kwɩan joŋi, ba pa wá. Ʋ wá súrí zìlə́ won lá. Kʋ yɩ mun kilo batwa, ba nə ywɛ́ də nʋga, də nʋga litərə faan. 22 Ʋ wá ja gunponi bələ də, nə à yə̀ə́ nasara gunponi bələ, ʋ bà. Kʋ yɩ kʋ tə, ʋ dɩ̀àn nə yí. Zuŋə tə don yɩ, ba wá ma fwa cʋna kwɩan joŋi, ba ga ja ka don tə, ba fwa joŋi, ba sʋ̀rɩ́. 23 Nana nii dɩɩn tə nə, ʋ wá ja zìlə́ wiən təntə mama, ʋ bà, ʋ pa Yɩɩ joŋwanʋ tə nə, Yɩɩ jə́rə́ gansili tə mimii nə, à mʋ̀ Ba-Yígúrə́-Jə-Tiu yáá con. Yá Yɩɩ joŋwanʋ tə dàń wá kwɛn wá, ʋ lɩ durən wa. 24 Yɩɩ joŋwanʋ tə wá yɩyarɩ lwɩa joŋi pəbiə tə, də nʋga litərə faan tə, à mʋ̀ Ba-Yígúrə́-Jə-Tiu yáá con. 25 Kʋ kwa nə, ʋ wá gʋ lwɩa joŋi pəbiə tə. Ʋ wá lan ka jana tə, ʋ kə lìù tə ʋ nə kwɛn ʋ tɩ̀àn, ʋ lɩ durən yìə̀n wa tə, jɩzən zɩɩn, də ʋ jɩzən jɩfʋnbɩʋ, də ʋ jɩzən nafʋnbɩʋ nə. 26 Yɩɩ joŋwanʋ tə wá twɛ nʋgʋ tə, ʋ kə ʋ jɩgwiə wa. 27 Yá ʋ dàń wá li ʋ jɩzən jɩfʋa nʋga tə wa, ka nə wulə ʋ jɩgwiə tə wa, ʋ lɩ, ʋ mɩ́n à mʋ̀ Ba-Yígúrə́-Jə-Tiu yáá con, nɛɛ barpɛ. 28 Ʋ wá kə ʋ jɩɩn nʋga tə mancɩn, lìù tə nə kwɛn ʋ tɩ̀àn, ʋ lɩ durən yìə̀n wa tə, jɩzən zɩɩn, də ʋ jɩzən jɩfʋnbɩʋ, də ʋ jɩzən nafʋnbɩʋ nə, bwálɩ́ tə tətə nə, ʋ nə dí yáá, ʋ kə lwɩa joŋi vànɩ́ tə jana tə. 29 Kʋ kwa nə, Yɩɩ joŋwanʋ tə wá lwá ʋ jɩɩn nʋga tə gɩganɩ tə mama, lìù tə nə kwɛn ʋ tɩ̀àn, ʋ lɩ durən yìə̀n wa tə, yuu wa. Mə nətʋ nə, ʋ wá fwa kʋ tíú durən tə kwɩan joŋi, à mʋ̀ Ba-Yígúrə́-Jə-Tiu yáá con, ʋ pa wá. 30 Yá Yɩɩ joŋwanʋ tə dàń wá jon gunpwənə, nə à yə̀ə́ nasara gunpwənə tə don, ʋ gʋ. Kʋ yɩ kʋ tə, joŋi tə tíú dɩ̀àn nə yí. 31 Ndə nətʋ tə nə, joŋi tə tíú dɩ̀àn nə yí, Yɩɩ joŋwanʋ tə wá ja zuŋə tə don, ʋ ma fwa cʋna kwɩan joŋi, ʋ ga súrí ka don tə zìlə́ wiən tə nə, ʋ ma fwa joŋi tə, ba nə sʋ̀rɩ́. Mə nətʋ nə, ʋ wá fwa lìù tə nə kwɛn ʋ tɩ̀àn, ʋ lɩ durən yìə̀n wa tə, durən tə kwɩan joŋi, à mʋ̀ Ba-Yígúrə́-Jə-Tiu yáá con, ʋ pa wá.»
32 Mə kwìə̀ təntə nə, Yɩɩ pɩn lìù yuu wa, dayaan nə jɩn wá, ʋ jɩɩn ga ba won jə, sə ʋ ma kwɛn ʋ tɩ̀àn, ʋ lɩ durən yìə̀n wa.
Dìə̀ bírə́ yɩra sɩ̀ŋà yoo
33 Ba-Yígúrə́-Jə-Tiu swɩ̀n Moyizə də Aron con, ʋ wʋ́: 34 «À pɩn aba Kanaan lʋʋ nii tə, sə á tɩnɩ kʋ. Yá máŋá tə, á nə zʋa kʋ wa, à nə pɩn sɩ̀ŋà pwarɩ tʋ dìə̀ yɩra, lʋʋ nii təntə wa, kʋ nə jìgə̀ á mʋ̀ nyiən, 35 dìə̀ tə tíú mɛ, sə ʋ va, ʋ tún kʋ nii Yɩɩ joŋwanʋ tə con, ʋ swɩ̀n də, ʋ nɩ pwarɩ yiri don, ʋ dìə̀ wa. 36 Yɩɩ joŋwanʋ tə wá pa nii, sə ba dí yáá ba lɩ dìə̀ tə waa zɩla tə mama, sə ʋ tətə dàń ga zɩgɩ lá, ʋ zʋ, ʋ ywàń dìə̀ tə pwarɩ tə. Kʋ nətʋ wá pa, dìə̀ tə waa zɩla tə bá twá tə jì durən wiən. Kʋ kwa nə, Yɩɩ joŋwanʋ tə dàń wá zʋ, ʋ ywàń dìə̀ tə. 37 Ʋ nə ywàń pwarɩ tə, ʋ na də, kʋ fwa bʋran sagʋ nɩ́á, nə à yə̀ə́ sɩ̀sɩ́nán, bírə́ tə yɩra, bʋran təntə ga yɩ ndə, tə ŋʋrɩ tə zʋ bírə́ tə wa, 38 Yɩɩ joŋwanʋ tə wá nan, ʋ mɛ dìə̀ tə mimii nə, ʋ ga pa, ba sun ka nii, dɩan barpɛ. 39 Barpɛ nii dɩɩn tə nə, Yɩɩ joŋwanʋ tə wá pìí, ʋ zʋ ʋ ywàń dìə̀ tə. Ʋ nə nɩ də pwarɩ tə walɩ, kʋ súrí lá dìə̀ tə bírí tə yɩra, 40 ʋ wá pa nii, sə ba lɩ wárá tə, sɩ̀ŋà tə nə wulə tə yɩra, ba ja nan tɩʋ tə kwa con, ba dʋgʋ bwálɩ́ nə, ba nə dʋga durən wiən. 41 Ʋ wá pa, ba pàrɩ̀ dìə̀ tə waa bírí tə yɩra tə mama, ba pɛ̀ tə tɩran tə, ba ja nan tɩʋ tə kwa con, ba va ba lwá bwálɩ́ nə, ba nə dʋga durən wiən. 42 Yá ba dàń wá pɩ̀à wárá duən, ba kə wárá kʋkwɩnan tə bwálɩ́ nə, ba ga pɩ̀à tɩran duən, ba ma tùrì dìə̀ tə waa tə.
43 “Sɩ̀ŋà tə pwarɩ tə nə kʋ́ʋ̀ bwɛ́, kʋ fwa dìə̀ tə wa, ba nə lwàń wárá tə, ba pàrɩ̀ ka waa tə, ba ga pìí ba kwɛn ba tùrì ka tə kwa nə, 44 Yɩɩ joŋwanʋ tə wá pìí ʋ zʋ, ʋ ywàń ka. Ʋ nə nɩ də, pwarɩ tə cɩ́gá pìí kʋ larɩ dìə̀ tə wa, kʋ yɩ sɩ̀ŋà, ka nə wàrɩ̀ ka zwɛ̀. 45 Yá ba dàń wá gwɛrɩ dìə̀ tə, ba pɛ̀ ka wárá tə, də ka dɛɛ tə, də ka tɩran tə mama, ba ja nan tɩʋ tə kwa con, ba lwá bwálɩ́ nə, ba nə dʋga durən wiən. 46 Lìù nə zʋa dìə̀ tə wa, máŋá tə mama, ba yà nə sun ka tə, kʋ tíú wá ya durən lìù, kʋ va kʋ yí didəni. 47 Lìù nə pə̀ń dìə̀ tə wa, nə à yə̀ə́ ʋ nə dí wodiu ka wa, kʋ tíú mɛ, sə ʋ sɩ̀n ʋ gànàn.
48 “Yá Yɩɩ joŋwanʋ tə nə pìí ʋ zʋ, ʋ ywàń dìə̀ tə, ʋ nə nɩ də, pwarɩ tə wà pìí kʋ larɩ dìə̀ tə wa, ba nə pìí ba tùrì ka waa tə kwa nə, ʋ wá pa nii də, dìə̀ tə tà durən won. Cɩ́gá, sɩ̀ŋà tə zwɛ̀.
49 Yɩɩ joŋwanʋ tə wá jon zuŋi bələ, də sɩsaban dàʋ̀, də bɔɔ sɩ̀sɩ́nʋ́, də yɩzɔpə vʋʋ, ʋ ma kwɛn dìə̀ tə durən, ʋ lɩ. 50 Ʋ wá gʋ zuŋə tə don, daʋ nəkənə yuu con, ka waa nə jə nabuliyii nɩ́á. 51 Kʋ kwa nə, ʋ dàń wá tì sɩsaban dàʋ̀ tə, də yɩzɔpə vʋʋ tə, də bɔɔ sɩ̀sɩ́nʋ́ tə, də zuŋə tə nə nəŋə tə, ʋ li zuŋə tə don tə jana tə wa, ʋ nə gʋa, də nabuliyii nɩ́á tə wa, ʋ lɩ, ʋ mɩ́n ʋ kə dìə̀ tə nə, nɛɛ barpɛ. 52 Mə zuŋə tə jana tə, də nabuliyii nɩ́á tə, də zuŋə tə nə nəŋə tə, də sɩsaban dàʋ̀ tə, də yɩzɔpə vʋʋ tə, də bɔɔ sɩ̀sɩ́nʋ́ tə nə, Yɩɩ joŋwanʋ tə wá ma kwɛn dìə̀ tə durən, ʋ lɩ. 53 Kʋ kwa nə, ʋ wá dʋgʋ zuŋə tə nə nəŋə tə, sə ka piri, ka nan tɩʋ tə wa, ka zʋ gaʋ wa. Mə nətʋ nə Yɩɩ joŋwanʋ tə wá fwa dìə̀ tə durən kwɩan joŋi, yá ka dàń wá ya parɩ.»
54 Mə kwìə̀ təntə nə Yɩɩ pɩn, dayaan yiri mama, də sabadɔɔ yuu wa, 55 də gànàn yɩra dáá, də dìì waa sɩ̀ŋà yuu wa, 56 də bələ, də sɩsaku, də pwara cɩcɩlan yuu wa. 57 Kwìə̀ təntə pɩn, ba lwarɩ yayɩgʋ tə nə yɩ durən yayɩgʋ, də kʋ tə nə tà durən yayɩgʋ swán duən wa. Mə kwìə̀ təntə nə Yɩɩ pɩn, dayaan yuu wa.