Kwìə̀ tə Yɩɩ nə pɩn, bɛɛ bárɩ́ durən yoo wa
15
1 Ba-Yígúrə́-Jə-Tiu swɩ̀n Moyizə də Aron con, 2 sə ba pa kwìə̀ tə tə, Yɩzərayɛlə dwíí tə nə. Ʋ swɩ̀n, ʋ wʋ́: «Bɛɛ tə mama, babasʋ nə jə wá, kʋ nɩ́á pàlɩ̀, tə naŋa ʋ bárɩ́ tə wa, yɩ durən lìù. 3 Babasʋ tə nɩ́á tə nə pàlɩ̀ tə naŋa, nə à yə̀ə́ tə ba pàlɩ̀ tə naŋa, kʋ tíú tə yɩ durən lìù. 4 Bɛɛ təntə nə pə̀ń won mama yuu, nə à yə̀ə́ ʋ nə jə̀ń won mama yuu, tə mʋ̀ wiən təntə jìgə̀ durən wiən. 5 Lìù don də mama nə dwen bɛɛ təntə sàrá yɩra, kʋ tíú mɛ, sə ʋ sɩ̀n ʋ gànàn, ʋ ga swɛ nɩ́á. Yá ʋ wá ya durən lìù, kʋ va kʋ yí didəni. 6 Lìù tə mama, ʋ nə jə̀ń won yuu, babasʋ tíú nə dí yáá ʋ jə̀ń lá, kʋ tíú mɛ, sə ʋ sɩ̀n ʋ gànàn, ʋ ga swɛ nɩ́á. Yá ʋ wá ya durən lìù, kʋ va kʋ yí didəni. 7 Lìù tə mama, ʋ nə dwen babasʋ tíú yɩra, kʋ tíú mɛ, sə ʋ sɩ̀n ʋ gànàn, ʋ ga swɛ nɩ́á. Yá ʋ wá ya durən lìù, kʋ va kʋ yí didəni. 8 Babasʋ tíú nə pìì mɩmɩan, ʋ kə lìù nə, ʋ nə yɩ parɩ, lìù təntə mɛ, sə ʋ sɩ̀n ʋ gànàn, ʋ ga swɛ nɩ́á. Yá ʋ wá ya durən lìù, kʋ va kʋ yí didəni. 9 Won tə mama, babasʋ tíú nə wá dɩ̀, ʋ ja va cwəŋə, won təntə jàʋ́ tə wá jì durən won. 10 Lìù tə mama, ʋ nə dwen won yɩra, babasʋ tíú nə dí yáá ʋ jə̀ń kʋ yuu, nə à yə̀ə́ kʋ tíú nə tì won təntə, ʋ mɛ, sə ʋ sɩ̀n ʋ gànàn, ʋ ga swɛ nɩ́á. Yá ʋ wá ya durən lìù, kʋ va kʋ yí didəni. 11 Lìù tə mama, babasʋ tíú nə dwen ʋ yɩra, kʋ tíú nə wà ʋ jɩɩn sɩ̀n də nɩ́á, ʋ mɛ, sə ʋ sɩ̀n ʋ gànàn, ʋ ga swɛ nɩ́á. Yá ʋ wá ya durən lìù, kʋ va kʋ yí didəni. 12 Daʋ nəkənə tə mama, babasʋ tíú nə wá dwen ka yɩra, kʋ mɛ, sə ba lwa ka. Yá kʋ nə yɩ dàʋ̀ zʋŋa yiri mama, kʋ mɛ, sə ba jɩjalɩ ka də nɩ́á.13 “Babasʋ nə jɩn lìù, máŋá tə, kʋ nə zwɛ̀, ʋ wá gàlà dɩan barpɛ, ʋ ma kwɛn ʋ durən tə, ʋ lɩ. Dɩan barpɛ tə nə cé, ʋ wá sɩ̀n ʋ gànàn, ʋ ga swɛ ʋ yɩra də nabuliyii nɩ́á. Yá kʋ kwa nə, ʋ dàń wá ya parɩ. 14 Nana nii dɩɩn tə nə, ʋ wá ja gunponi bələ, nə à yə̀ə́ nasara gunponi bələ, ʋ ja bà à mʋ̀ Ba-Yígúrə́-Jə-Tiu yáá con, Yɩɩ jə́rə́ gansili tə mimii nə, ʋ pa Yɩɩ joŋwanʋ tə don nə. 15 Yɩɩ joŋwanʋ tə wá ja zuŋə tə don, ʋ ma fwa cʋna kwɩan joŋi, ʋ ga ja ka don tə, ʋ ma fwa joŋi, ʋ sʋ̀rɩ́. Mə nətʋ nə, joŋwanʋ tə wá fwa bɛɛ təntə babasʋ tə durən tə kwɩan joŋi, à mʋ̀ Ba-Yígúrə́-Jə-Tiu yáá con, ʋ pa wá.
16 “Bɛɛ bafɩan nə nan tə tɩ̀àn nə, ʋ mɛ, sə swɛ ʋ yɩra tə mama də nɩ́á. Yá ʋ wá ya durən lìù, kʋ va kʋ yí didəni. 17 Gànʋ̀ tə mama, nə à yə̀ə́ tànʋ̀ tə mama, bafɩan nə ken kʋ nə, kʋ mɛ, sə ba sɩ̀n tə nɩ́á wa. Yá wiən təntə wá ya durən wiən, kʋ va kʋ yí didəni.
18 Bɛɛ də kan nə pə̀ń duən, ba mɛ, sə ba swɛ nɩ́á. Yá ba wá ya durən lɩ̀à, kʋ va kʋ yí didəni.»
Kwìə̀ tə Yɩɩ nə pɩn, kan kánɩ́ durən yoo wa
19 «Kan tàŋá nə twi, kʋ pa ʋ jana lwɛ́, ʋ wá ya durən lìù, dɩan barpɛ. Yá dɩan təntə wa, lìù tə mama, ʋ nə dwen kan təntə yɩra, kʋ tíú də wá ya durən lìù, kʋ va kʋ yí didəni. 20 Won tə mama, kan təntə nə wá pə̀ń kʋ yuu, nə à yə̀ə́ won tə mama, ʋ nə wá jə̀ń kʋ yuu, tə mʋ̀ dɩan təntə wa, wiən təntə wá jì durən wiən. 21 Lìù tə mama, ʋ nə dwen kan təntə sàrá yɩra, tə mʋ̀ dɩan təntə wa, kʋ tíú mɛ, sə ʋ sɩ̀n ʋ gànàn, ʋ ga swɛ nɩ́á. Yá ʋ wá ya durən lìù, kʋ va kʋ yí didəni. 22 Lìù tə mama, ʋ nə dwen won yɩra, kan təntə nə dí yáá ʋ jə̀ń kʋ yuu, kʋ tíú mɛ, sə ʋ sɩ̀n ʋ gànàn, ʋ ga swɛ nɩ́á. Yá ʋ wá ya durən lìù, kʋ va kʋ yí didəni. 23 Won nə wulə kan tə sàrá tə wa, nə à yə̀ə́ won tə yuu, ʋ nə jə̀ń, lìù nə dwen kʋ yɩra, kʋ tíú wá ya durən lìù, kʋ va kʋ yí didəni. 24 Bɛɛ nə pə̀ń kan, də kan tə tàŋá twi, ʋ tàŋá durən tə wá pwàrɩ́ bɛɛ təntə, yá ʋ də wá ya durən lìù, dɩan barpɛ. Yá sàrá tə mama, bɛɛ təntə nə wá pə̀ń ka wa, wá ya durən won.
25 Kan jana nə lwɛ́, dɩan kapʋpʋ, yá kʋ tà ʋ tàŋá túrí máŋá wa, nə à yə̀ə́ ʋ tàŋá tə nə twi, ka dɩan lɛ, yá jana tə tə lwɛ́, kan təntə wá ya durən lìù, dɩan təntə mama, ʋ jana tə nə wá lwá, ndə máŋá tə wa, ʋ tàŋá nə twi. 26 Sàrá tə mama, ʋ nə wá pə̀ń ka wa, nə à yə̀ə́ won tə mama, ʋ nə wá jə̀ń kʋ yuu, ʋ jana tə lwɩʋ máŋá wa, tə wiən təntə wá ya durən wiən, ndə kʋ nə yàá ya nətʋ, máŋá tə wa, ʋ tàŋá nə twi. 27 Lìù tə mama, ʋ nə dwen wiən təntə yɩra, ʋ də wá ya durən lìù. Yá ʋ mɛ, sə sɩ̀n ʋ gànàn, ʋ ga swɛ nɩ́á. Yá ʋ wá ya durən lìù, kʋ va kʋ yí didəni.
28 Kan tàŋá nə twi, ka ba zɩga, máŋá tə mama, ka nə zɩgɩ, ʋ tə wá gàlà dɩan barpɛ. Yá kʋ kwa nə, ʋ dàń wá ya parɩ. 29 Nana nii dɩɩn tə nə, ʋ wá ja gunponi bələ, nə à yə̀ə́ nasara gunponi bələ, ʋ bà, ʋ pa Yɩɩ joŋwanʋ tə don nə, Yɩɩ jə́rə́ gansili tə mimii nə. 30 Yɩɩ joŋwanʋ tə wá ja zuŋə tə don, ʋ ma fwa cʋna kwɩan joŋi, ʋ ga ja ka don tə, ʋ ma fwa joŋi, ʋ sʋ̀rɩ́. Mə nətʋ nə, Yɩɩ joŋwanʋ tə wá fwa kan təntə tàŋá durən tə kwɩan joŋi, à mʋ̀ Ba-Yígúrə́-Jə-Tiu yáá con, ʋ pa wá.
31 N mʋ̀ Moyizə də Aron, mə nətʋ nə, á wá pa Yɩzərayɛlə dwíí tə cɩ̀ ba tɩ̀àn nə, də durən. Ba nə cɩ̀gà ba tɩ̀àn nə nətʋ, ba bá pa, à wúlú bwálɩ́ tə, kʋ nə wulə ba titəŋi wa, jì durən won. Yá ba bá tɩ, ba nə yɩ durən lɩ̀à yɩrɩ.»