<<    <     Joŋwana     16     >    >> 
Cʋna kwɩan dɩɩn nəfarʋ tə yoo
16
1 Dɩɩn don nə, Aron bɩ̀á bələ duən twi Ba-Yígúrə́-Jə-Tiu yáá con də yɩdɩʋ, kʋ pa ba tɩ. Ba tɩan tə kwa nə, Ba-Yígúrə́-Jə-Tiu swɩ̀n Moyizə con, 2 ʋ wʋ́: «Swɩ̀ń n nubiu Aron con, sə ʋ dàn ká zʋ à mʋ̀ Yɩɩ cɩcɩ dìyáá* tə wa, máŋá mama. Dìyáá təntə nə wulə patasɩn tə kwa con. Ʋ wà mɛ, sə ʋ zʋ cʋna kwɩan bwálɩ́* tə yáá con, máŋá mama. Cʋna kwɩan bwálɩ́ təntə nə wulə à nimarʋ culu daka tə yuu wa. Kʋ nə tà nətʋ, à nə bɩrɩ à tɩ̀àn bakwan tə wa, cʋna kwɩan bwálɩ́ tə yuu con, ʋ wá tɩ.
3 Nə̀ń kʋ tə, Aron nə mɛ, sə ʋ dí yáá ʋ fwa, sə ʋ dàń ga zɩgɩ lá, ʋ zʋ à wúlú bwálɩ́ tə wa. Ʋ wá ja nabɩa, ʋ ma fwa cʋna kwɩan joŋi, ʋ ga ja pabɩʋ, ʋ ma fwa joŋi, ʋ sʋ̀rɩ́. 4 Kʋ kwa nə, ʋ wá swɛ nɩ́á, ʋ zʋ ganbʋa ganzwɩdarʋ, kʋ nə cúə́ kʋ yí napɩra, də ganbʋa fala. Ʋ wá vwa ganbʋa gantwamɩna, ʋ tàŋá nə, ʋ ga baa ganbʋa yubarʋ, ʋ yuu nə. Ʋ nə swɛ nɩ́á tə, ʋ zwɛ̀ kwa nə, mə Yɩɩ joŋwana culu gànàn təntə nə, ʋ wá zʋ. 5 Yɩzərayɛlə dwíí tə wá pa wá, bʋtʋlan bələ, ʋ ma fwa cʋna kwɩan joŋi, də pabɩʋ, ʋ ma fwa joŋi, ʋ sʋ̀rɩ́.
6 Aron wá ja ʋ nabɩa tə, ʋ ma fwa ʋ tətə cʋna kwɩan joŋi. Yá ʋ dàń wá kwɛn ʋ tətə, də ʋ dìə̀ lɩ̀à cʋna, ʋ lɩ. 7 Ʋ wá ja bʋtʋlan bələ tə, ʋ bà, ʋ zɩgɩ à mʋ̀ Ba-Yígúrə́-Jə-Tiu yáá con, Yɩɩ jə́rə́ gansili tə mimii nə. 8 Ʋ wá pwárɩ́ bʋtʋlan bələ tə yuu wa, ʋ na kʋ tə nə mɛ, sə kʋ ya à mʋ̀ Ba-Yígúrə́-Jə-Tiu nyiən, də kʋ tə nə mɛ, sə kʋ ya Azazɛləa nyiən. 9 Ʋ dàń wá ja bʋtʋlʋ tə, pwárʋ́ tə nə bɩrɩ də, kʋ yɩ à mʋ̀ Ba-Yígúrə́-Jə-Tiu tə, ʋ ma fwa cʋna kwɩan joŋi. 10 Yá bʋtʋlʋ tə mʋ̀, pwárʋ́ tə nə bɩrɩ də, kʋ yɩ Azazɛlə nyiən tə, yɩ ba wá zɩgɩ kʋ wonəŋu, à mʋ̀ Ba-Yígúrə́-Jə-Tiu yáá con. Ba wá tʋn cʋna ka kwɛn ka lɩ culu tə, kʋ yuu wa, ba ga dɩŋa kʋ, ba kə kasɔɔ lanworu tə wa, ba pa Azazɛlə nə. 11 Aron wá ja nabɩa tə, ʋ ma fwa ʋ tətə cʋna kwɩan joŋi. Yá ʋ dàń wá kwɛn ʋ tətə, də ʋ dìə̀ lɩ̀à cʋna, ʋ lɩ. Ʋ nə gʋa ʋ cʋna kwɩan joŋi nabɩa tə kwa nə, 12 ʋ wá tì won, ba nə ma tùŋə̀ mən, ʋ tùn mən cala, Yɩɩ joŋi bwálɩ́ tə yuu wa, kʋ nə wulə à mʋ̀ Ba-Yígúrə́-Jə-Tiu yáá con,b ʋ sú kʋ nii, ʋ ga fwa wusinə mun, jɩguli yíə́ bələ. Yá Aron dàń wá ja tə mama, ʋ zʋ à mʋ̀ Yɩɩ cɩcɩ dìyáá tə wa, ka nə wulə patasɩn tə kwa con. 13 Ʋ wá lwá wusinə tə, mən tə wa, lá nə, à mʋ̀ Ba-Yígúrə́-Jə-Tiu yáá con. Tə ŋwɩn tə wá piri cʋna kwɩan bwálɩ́ tə yuu nə, kʋ nə wulə Yɩɩ nimarʋ dansɩa won daka tə yuu wa, yá Aron bá tɩ. 14 Ʋ wá lòní nabɩa tə jana, ʋ li jɩfʋa tə wa, ʋ lɩ ʋ mɩ́n, ʋ kə cʋna kwɩan bwálɩ́ tə, yɩɩ yipɩan con səpuni tə nə. Ʋ wá mɩ́n jana tə, ʋ kə cʋna kwɩan bwálɩ́ tə yáá con, nɛɛ barpɛ. 15 Kʋ kwa nə, ʋ wá gʋ bʋtʋlʋ tə, ʋ nə wá ma fwa lalʋʋ tə cʋna kwɩan joŋi tə. Ʋ wá lòní kʋ jana tə, ʋ ja zʋ à mʋ̀ Yɩɩ cɩcɩ dìyáá tə wa, patasɩn tə kwa con. Nətʋ tə ʋ nə fwa, də nabɩa tə jana tə, mə nətʋ nə ʋ wá fwa, də bʋtʋlʋ tə jana tə də. Ʋ wá mɩ́n tə, ʋ kə cʋna kwɩan bwálɩ́ tə yuu wa, də kʋ yáá con.
16 Mə nətʋ nə, Aron wá kwɛn durən, ʋ lɩ Yɩɩ wúlú bwálɩ́ tə wa. Durən təntə yɩ tə twá də, Yɩzərayɛlə dwíí tə nə vɩ à mʋ̀ Yɩɩ nii tə, də ba cʋna tə nə, tə ma zʋ Yɩɩ wúlú bwálɩ́ tə wa. Mə nətʋ nə, ʋ wá fwa Yɩɩ jə́rə́ gansili tə də wa, kʋ nə wulə Yɩzərayɛlə dwíí tə durən tə titəŋi wa. 17 Lìù mama wà mɛ, sə ʋ ya Yɩɩ jə́rə́ gansili tə wa, máŋá tə wa, Aron nə wá zʋ Yɩɩ wúlú bwálɩ́ tə wa, ʋ fwa joŋi tə, ʋ ma kwɛn durən, ʋ lɩ kʋ wa. Kʋ wá ya nətʋ, kʋ va kʋ yí máŋá tə, ʋ nə wá pìí ʋ nan. Ʋ wá fwa joŋi tə, ʋ ma kwɛn ʋ tətə cʋna, də ʋ dìə̀ lɩ̀à cʋna, də Yɩzərayɛlə púlí tə mama cʋna, ʋ lɩ.
18 Kʋ kwa nə, Aron wá nan, ʋ bà Yɩɩ joŋi bwálɩ́ tə con, kʋ nə wulə à mʋ̀ Ba-Yígúrə́-Jə-Tiu yáá con,c ʋ kwɛn durən, ʋ lɩ Yɩɩ joŋi bwálɩ́ tə yuu wa. Ʋ wá lòní nabɩa tə jana, də bʋtʋlʋ tə jana, ʋ kə Yɩɩ joŋi bwálɩ́ tə nyʋran tə nə, ʋ kɩkarɩ. 19 Ʋ wá li ʋ jɩfʋa jana tə wa, ʋ lɩ ʋ mɩ́n, ʋ kə Yɩɩ joŋi bwálɩ́ tə nə, nɛɛ barpɛ. Ʋ wá kwɛn Yɩzərayɛlə dwíí tə durən, ʋ lɩ kʋ yuu wa, ʋ ga tún kʋ vàn nə, ʋ pa à mʋ̀ Yɩɩ cɩcɩ nə.
20 Máŋá tə, Aron nə fwa joŋi tə, ʋ ma kwɛn Yɩɩ wúlú bwálɩ́ tə durən, də Yɩɩ jə́rə́ gansili tə durən, də Yɩɩ joŋi bwálɩ́ tə durən, ʋ zwɛ̀, ʋ dàń wá pa, ba ja bʋtʋlʋ tə nə nəŋə tə, ba bà. 21 Ʋ wá tún ʋ jɩ̀àn bələ tə mɛ, bʋtʋlʋ tə yuu wa, ʋ ga swɩ̀n, sə Yɩzərayɛlə dwíí tə yolwana tə mama, də yìə̀n tə mama, ba nə vɩga à mʋ̀ Yɩɩ nii tə yuu wa, də ba cʋna tə mama, tʋ bʋtʋlʋ tə yuu wa. Yá ʋ dàń wá kə tə mama, bʋtʋlʋ tə yuu wa. Kʋ kwa nə, ʋ wá pa bɛɛ dɩŋa kʋ, ʋ kə kasɔɔ lanworu tə wa. 22 Ba nə dɩŋɩ bʋtʋlʋ tə, ba kə kasɔɔ lanworu tə wa, kʋ wá zɩn ba yolwana tə mama, kʋ ja va bwálɩ́ nə, won mama nə tə̀lə́ lá.
23 Kʋ kwa nə, Aron wá pìí ʋ zʋ Yɩɩ jə́rə́ gansili tə wa, ʋ lɩ ganbʋa gànàn tə, ʋ tún lá. Gànàn təntə nə, ʋ yà zʋa, ʋ ja zʋ Yɩɩ cɩcɩ dìyáá tə wa. 24 Ʋ wá swɛ nɩ́á, bwálɩ́ nə, kʋ nə yɩ parɩ, ʋ ga tì ʋ tətə gànàn tə, ʋ zʋ. Yá ʋ dàń wá nan, ʋ fwa ʋ tətə joŋi tə, ʋ sʋ̀rɩ́, ʋ ga fwa lalʋʋ tə də joŋi tə, ʋ sʋ̀rɩ́. Ʋ wá fwa jwəŋə təntə, ʋ ma kwɛn ʋ tətə cʋna, də lalʋʋ tə cʋna, ʋ lɩ. 25 Ʋ wá sʋ̀rɩ́ cʋna kwɩan joŋi vànɩ́ tə nanʋga tə, Yɩɩ joŋi bwálɩ́ tə yuu wa.
26 Bɛɛ tə nə dɩŋɩ Azazɛlə bʋtʋlʋ tə, ʋ ja va, ʋ dʋgʋ kasɔɔ lanworu tə wa, wá sɩ̀n ʋ gànàn, ʋ ga swɛ nɩ́á. Kʋ kwa nə, ʋ wá pìí ʋ bà dəkuu bwálɩ́ tə wa. 27 Aron wá pa, ba tì nabɩa tə, də bʋtʋlʋ tə, ʋ nə ma fwa cʋna kwɩan joŋi, ʋ ga ja tə jana, ʋ zʋ Yɩɩ wúlú bwálɩ́ tə wa, ʋ ma kwɛn durən, ʋ lɩ tə, ba ja nan dəkuu bwálɩ́ tə kwa con, ba sʋ̀rɩ́ tə tànàn tə, də tə nàŋʋ́ tə, də tə waa bàń tə, mən wa. 28 Lìù tə nə sʋ̀rɩ́ vàná tə, wá sɩ̀n ʋ gànàn, ʋ ga swɛ nɩ́á. Kʋ kwa nə, ʋ wá pìí ʋ bà dəkuu bwálɩ́ tə wa.
29 Bɩnɩ mama, cànɩ̀ barpɛ nii cànà tə, dɩan fugə dɩɩn nə, á mʋ̀ lʋʋ nii tə tɩ̀án, də vərə tə mama, ba nə twá ba jə̀ə́ á con, mɛ sə á vwa á nii, yá á wà mɛ, sə á tʋn tʋtʋŋɩ mama. Kʋ nətʋ tə yɩ nii, à mʋ̀ Yɩɩ pɩn, kʋ pʋ́pʋ́nɩ́, kʋ tún, sə á twá kʋ nii nə, máŋá də máŋá mama wuuu. 30 Cɩ́gá, mə kʋ dɩɩn tə nə nə, ba wá fwa á cʋna tə kwɩan joŋi, ba pa aba, sə kʋ kwɛn á cʋna tə mama, kʋ lɩ, á yuu wa. Yá á dàń wá ya lɩ̀à tə, á nə yɩ parɩ, à mʋ̀ Ba-Yígúrə́-Jə-Tiu yáá con. 31 Kʋ wá ya á sìə́ dɩɩn nəfarʋ. Á wá vwa á nii, yá á wà mɛ, sə á tʋn tʋtʋŋɩ mama. Kʋ yɩ nii, à mʋ̀ Yɩɩ pɩn, kʋ pʋ́pʋ́nɩ́, kʋ tún, sə á twá kʋ nii nə, máŋá də máŋá mama wuuu.
32 Yɩɩ joŋwanʋ tə, ba nə twɛ́n nʋga ʋ yuu wa, ba ma tún wá, sə ʋ jon ʋ nyɩna yuu nə, Yɩɩ joŋwanɩ tə wa tə, nə mɛ, sə ʋ fwa cʋna kwɩan joŋi tə, ʋ ma kwɛn cʋna tə, ʋ lɩ. Yɩɩ joŋwana culu gànàn, ba nə sʋa də ganbʋa nə, ʋ mɛ, sə ʋ zʋ. 33 Ʋ wá fwa cʋna kwɩan joŋi, ʋ ma kwɛn durən, ʋ lɩ Yɩɩ wúlú bwálɩ́ tə wa, də Yɩɩ jə́rə́ gansili tə wa, də Yɩɩ joŋi bwálɩ́ tə yuu wa. Yá ʋ wá fwa cʋna kwɩan joŋi, ʋ ma kwɛn Yɩɩ joŋwana tə də cʋna, də lalʋʋ tə púlí tə mama cʋna, ʋ lɩ.
34 Kʋ nətʋ tə yɩ nii, à mʋ̀ Yɩɩ pɩn, kʋ pʋ́pʋ́nɩ́, kʋ tún, sə á tʋn, máŋá də máŋá mama wuuu. Á mɛ, sə á twá kʋ nii nə, sə Yɩzərayɛlə dwíí tə cʋna mama wànɩ́ tə kwɛn, tə lɩ ba yuu wa, naa nədʋ, bɩnɩ mama.» Yá Aron dàń twá kʋ tə mama nii nə, Ba-Yígúrə́-Jə-Tiu nə pɩn nii Moyizə nə, sə kʋ tʋn.