KA YA PARƖ YUU WA KWIƏ
Bwálɩ́ tə, ba nə mɛ, sə ba fwa jwəŋə
17
1 Ba-Yígúrə́-Jə-Tiu swɩ̀n Moyizə con, 2 sə ʋ swɩ̀n Aron, də ʋ bɩ̀á tə, də Yɩzərayɛlə dwíí tə mama con, ʋ wʋ́: «Á nəŋə kʋ tə, à mʋ̀ Ba-Yígúrə́-Jə-Tiu nə pɩn nii, sə kʋ tʋn. 3 Yɩzərayɛlə dwíí tə wa bɛɛ nə gʋa naʋ, nə à yə̀ə́ pəbiə, nə à yə̀ə́ bʋ̀n, dəkuu bwálɩ́ tə wa, nə à yə̀ə́ kwa con, 4 ʋ ga wà dí yáá, ʋ ja kʋ ʋ bà, Yɩɩ jə́rə́ gansili tə mimii nə, ʋ pa à mʋ̀ Ba-Yígúrə́-Jə-Tiu nə, ndə zìlə́ won nə, à wúlú gansili tə mimii nə, à wá bwe bɛɛ təntə, vànɩ́ tə jana tə bwiə, ʋ nə lwá. Yá bɛɛ təntə mɛ, sə ba lɩ wá, Yɩzərayɛlə lɩ̀à dwíí wa. 5 Kʋ yɩ nətʋ, sə Yɩzərəyɛlə lɩ̀à dàn ká fwa ba jwəŋə kasɔɔ con. Ba mɛ, sə ba ja tə, ba bà Yɩɩ joŋwanʋ tə con, à mʋ̀ Ba-Yígúrə́-Jə-Tiu yáá con, Yɩɩ jə́rə́ gansili tə mimii nə. Yá Yɩɩ joŋwanʋ tə wá ja tə, ʋ fwa nimarʋ jwəŋə, ʋ pa à mʋ̀ Ba-Yígúrə́-Jə-Tiu nə. 6 Yɩɩ joŋwanʋ tə wá lwá jana tə, à mʋ̀ Ba-Yígúrə́-Jə-Tiu joŋi bwálɩ́ tə nə, kʋ nə wulə Yɩɩ jə́rə́ gansili tə mimii tə yáá. Yá ʋ wá sʋ̀rɩ́ nanʋga tə, ka lwán ga wá ya ywánɩ́, kʋ pa à mʋ̀ Ba-Yígúrə́-Jə-Tiu nə. 7 Yɩzərayɛlə dwíí tə kʋ́ʋ̀ bá fwa jwəŋə, ba pa woŋwanan nə, tə nə nyən ndə bʋtʋlan nə, ba nə twá tə kwa, ba cwàrɩ̀. Kʋ yɩ nii, à mʋ̀ Yɩɩ pɩn, kʋ pʋ́pʋ́nɩ́, kʋ tún, máŋá də máŋá mama wuuu, ba mʋ̀, də ba dwíə́ tə mama yɩrɩ, ba nə wá kə lʋʋ wa, máŋá də máŋá mama wuuu.8 N tə wá swɩ̀n ba con, n súrí lá də, Yɩzərayɛlə dwíí tə wa lìù, nə à yə̀ə́ vərə tə nə twá ba jə̀ə́ ba titəŋi wa, ba wa lìù nə fwa joŋi tə, ba nə sʋ̀rɩ́, nə à yə̀ə́ joŋi yiri don mama, 9 ʋ ga wà kʋ ja bà Yɩɩ jə́rə́ gansili tə mimii nə, ʋ ma fwa joŋi, ʋ pa à mʋ̀ Ba-Yígúrə́-Jə-Tiu nə, kʋ tíú mɛ, sə ba lɩ wá, Yɩzərayɛlə lɩ̀à dwíí wa.»
Jana diŋə yuu wa culu
10 Ba-Yígúrə́-Jə-Tiu swɩ̀n, ʋ súrí lá, ʋ wʋ́: «Yɩzərayɛlə dwíí tə wa lìù, nə à yə̀ə́ vərə tə nə twá ba jə̀ə́ ba titəŋi wa, ba wa lìù nə dí jana yiri mama, à wá zɩgɩ kʋ tíú nə, yá à wá lɩ wá, Yɩzərayɛlə lɩ̀à dwíí wa. 11 Cɩ́gá, wonəŋu mama mɩɩ yɩ kʋ wulə kʋ jana wa. Yá à pɩn aba nii, sə á lwá jana tə, Yɩɩ joŋi bwálɩ́ tə yuu wa, sə tə kwɛn á cʋna, tə lɩ á yuu wa. Cɩ́gá, mɩɩ wulə jana wa, kʋ mʋ̀ nə pɩn, tə wàá cʋna tə kwɛn, tə lɩ. 12 Kʋ mʋ̀ nə pɩn, à swɩ̀n Yɩzərayɛlə dwíí tə con, də ba lìù mama wà mɛ, sə ʋ də́ jana. Yá ba wa vee də mama wà mɛ, sə ʋ də́ jana.
13 Yɩzərayɛlə dwíí tə wa lìù, nə à yə̀ə́ vərə tə nə twá ba jə̀ə́ ba titəŋi wa, ba wa lìù nə vəli twanɩ, ʋ nə gʋa ganaŋʋ, ba nə də́, nə à yə̀ə́ zuŋə, ba nə də́, ʋ mɛ, sə ʋ yá jana tə, tə lwá tɩa, ʋ ga cori pùrə́n, ʋ ma pú tə yuu nə. 14 Cɩ́gá, wonəŋu mama mɩɩ yɩ kʋ wulə kʋ yɩra jana wa. Kʋ mʋ̀ nə pɩn, à swɩ̀n Yɩzərayɛlə dwíí tə con, də ba wà mɛ, sə ba də́ wonəŋu mama jana. Cɩ́gá, wonəŋu mama mɩɩ yɩ kʋ wulə kʋ jana wa. Lìù tə mama ʋ nə dí jana, ʋ mɛ, sə ba lɩ wá, Yɩzərayɛlə lɩ̀à dwíí wa.»
Wotɩgʋ diŋə yuu wa culu
15 Ba-Yígúrə́-Jə-Tiu tə swɩ̀n, ʋ súrí lá, ʋ wʋ́: «Tɩʋ tɩ̀án tə, nə à yə̀ə́ vərə tə wa lìù mama nə dí vantɩgʋ nàŋʋ́, nə à yə̀ə́ vànɩ́ tə, wojandirən nə jɩn nàŋʋ́, kʋ tíú wá sɩ̀n ʋ gànàn, ʋ ga swɛ nɩ́á. Yá ʋ wá ya durən lìù, kʋ va kʋ yí didəni. Kʋ kwa nə, ʋ dàń wá ya parɩ. 16 Lìù təntə nə wà ʋ gànàn sɩ̀n, ʋ ga wà nɩ́á swɛ, kʋ yɩ cʋna ʋ tʋn, yá ʋ cʋna tə yoo zɩŋa wá.»