Kwìə̀ tə Yɩɩ nə pɩn, kapɛrɩ yoo wa
18
1 Ba-Yígúrə́-Jə-Tiu swɩ̀n Moyizə con, 2 sə ʋ swɩ̀n Yɩzərayɛlə dwíí tə con, ʋ wʋ́: «À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ. 3 Á dànà ká twá, á tʋn yìə̀n tə nə tʋŋa Ezwipətə lʋʋ nii tə wa, á nə yɩn kʋ wa, nə à yə̀ə́ yìə̀n tə nə tʋŋa Kanaan lʋʋ nii tə wa, à nə ja aba à vələ. Á wà mɛ, sə á twá lʋʋ níə́ təntə tɩ̀án yofwamɩnan tə nə. 4 Á mɛ, sə á tʋn yìə̀n tə, à nə pɩn aba nii, sə á tʋn, á ga twá à nii yìə̀n tə nə. À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ.5 Á mɛ, sə á twá à nii yìə̀n tə nə, á ga tʋn yìə̀n tə, à nə pɩn aba nii, sə á tʋn. Lìù tə, ʋ nə zìlí tə nii, tə wá san wá, tə pa ʋ ya mɩɩ wa. À mʋ̀ nə yɩ Ba-Yígúrə́-Jə-Tiu.
6 Á lìù mama wà mɛ, sə ʋ pə̀ń kan tə nə yɩ ʋ dwíí tíú. À mʋ̀ nə yɩ Ba-Yígúrə́-Jə-Tiu.
7 N wà mɛ, sə n pə̀ń n nuu. Kʋ yɩ n nyɩna cavɩra. Yá kʋ yɩ n nuu də cavɩra, ʋ nə yɩ n nuu tə yɩrɩ.
8 N wà mɛ, sə n pə̀ń n nyɩna kan. Kʋ yɩ n nyɩna cavɩra.
9 N wà mɛ, sə n pə̀ń n nakʋa tə, ʋ nə yɩ n nyɩna bʋ̀á, nə à yə̀ə́ n nuu bʋ̀á, ʋ nə yɩ ba lɩrɩ n nyɩna dìə̀ tə wa, nə à yə̀ə́ bwálɩ́ don nə.
10 N wà mɛ, sə n pə̀ń n nàʋ́. Kʋ nə yɩ n bìú bʋ̀á, nə à yə̀ə́ n bʋ̀á bʋ̀á. Cɩ́gá, kʋ yɩ n tətə cavɩra.
11 N wà mɛ, sə n pə̀ń n nyɩna kan bʋ̀á. Ʋ yɩ n nyɩna nə lɩrɩ. Kʋ mʋ̀ yɩrɩ, ʋ yɩ n nakʋa.
12 N wà mɛ, sə n pə̀ń n nyɩna nakʋa. Cɩ́gá, ʋ də n nyɩna tə yɩ dwíí.
13 N wà mɛ, sə n pə̀ń n nuu nyánʋ́, nə à yə̀ə́ ʋ zʋnʋ. Cɩ́gá, ʋ də n nuu tə yɩ dwíí.
14 N wà mɛ, sə ʋ pə̀ń n nyɩna nubiu kan. Kʋ yɩ n nyɩna nubiu tə cavɩra. Cɩ́gá, n nyɩna nubiu kan yɩ n nɩkɩnɩ.
15 N wà mɛ, sə n pə̀ń n bìú kan. Ʋ yɩ n bikɩnɩ, n wà mɛ, sə n na ʋ cavɩra.
16 N wà mɛ, sə n pə̀ń n nubiu kan. Kʋ yɩ n nubiu tə cavɩra.
17 N wà mɛ, sə n pə̀ń kan, də ʋ bʋ̀á mɛ, nə à yə̀ə́ də ʋ nàʋ́ mɛ. Ʋ nàʋ́ tə nə yɩ ʋ bìú bʋ̀á, nə à yə̀ə́ ʋ bʋ̀á bʋ̀á. Cɩ́gá, ba də kan tə yɩ dwíí. Kʋ mʋ̀ yɩrɩ, kʋ yɩ culu nəfarʋ.
18 N wà mɛ, sə n tì n kan nyánʋ́, nə à yə̀ə́ ʋ zʋnʋ, n ma fwa n kan, yá n kan tə mɩɩ tə wulə lʋʋ. Cɩ́gá, kʋ nətʋ wá kə kadoli ba pwə́rə́ wa.
19 N wà mɛ, sə n pə̀ń kan, máŋá tə wa, ʋ tàŋá nə twi. Kan tàŋá nə twi, kʋ yàá pa, ʋ jì durən lìù.
20 N wà mɛ, sə n pə̀ń n don kan. Kʋ wá pa, n jì durən lìù.
21 N wà mɛ, sə n ja n bìú, n ma fwa joŋi, n sʋ̀rɩ́, n pa Mɔlɔkəa nə. Dàn ká cʋ̀gʋ̀ à yɩrɩ nə, à yɩ n Yɩɩ. À mʋ̀ nə yɩ Ba-Yígúrə́-Jə-Tiu.
22 N wà mɛ, sə n pə̀ń bɛɛ, ndə ba nə pə̀ní kan nətʋ. Kʋ yɩ cavɩyoo nəfarʋ.
23 N wà mɛ, sə n pə̀ń vànɩ́ yiri mama, sə kʋ pa, n jì durən lìù. Kan də wà mɛ, sə ʋ pa vànɩ́ dɩ̀ ʋ nə. Kʋ yɩ yoo tə, kʋ nə wà mɛ.
24 Á dànà ká tʋn yìə̀n təntə nədʋ mama, sə kʋ kə aba durən wa. Cɩ́gá, mə yìə̀n təntə mama nə pɩn, dwíə́ tə, à nə wá dɩŋa, à lɩ á yáá nə, jì durən lɩ̀à. 25 Yá yolwana təntə dàń ken durən lʋʋ nii tə wa. Kʋ mʋ̀ nə pɩn, à kə kʋ càn wa, yá kʋ dàń tʋnɩ kʋ ləzwənbɩa tə, kʋ dʋgʋ.
26 Kʋ mʋ̀ yɩrɩ, á mʋ̀ Yɩzərayɛlə dwíí lɩ̀à tə, də vərə tə nə twá ba jə̀ə́ á titəŋi wa, mɛ sə á twá à nii yìə̀n tə nə, á ga tʋn yìə̀n tə, à nə pɩn aba nii, sə á tʋn. Á dànà ká tʋn cavɩyiən təntə nədʋ mama. 27 Cɩ́gá, mə cavɩyiən təntə mama nə, dwíə́ tə duən tə, ba nə dí á yáá, ba ya lʋʋ nii tə wa, tʋn. Yá tə dàń ken durən lʋʋ nii tə wa. 28 Á mʋ̀ dàń cɩa á tɩ̀àn nə, á dànà ká kə durən lʋʋ nii tə wa. Yá kʋ bá tʋnɩ aba, kʋ dʋgʋ, ndə kʋ nə tʋnɩ dwíə́ tə duən tə, ba nə dí á yáá ba ya lá, kʋ dʋgʋ nətʋ. 29 Cɩ́gá, lìù tə mama, ʋ nə tʋn cavɩyiən təntə nədʋ mama, ʋ mɛ, sə ba lɩ wá, Yɩzərayɛlə lɩ̀à dwíí wa.
30 Á zìlə́ á nii, á dànà ká tʋn cavɩyiən təntə nədʋ mama, tə yà nə tʋŋa, də á tə wà twi. Á dànà ká pa, sə tə pa, á jì durən lɩ̀à. À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ.»