Joŋwana 19

Nətʋ tə, Yɩɩ nə pɩ̀à, sə ʋ lɩ̀à ya

1 Ba-Yígúrə́-Jə-Tiu swɩ̀n Moyizə con, 2 sə ʋ swɩ̀n Yɩzərayɛlə púlí tə mama con, ʋ wʋ́: «Á yana à mʋ̀ Yɩɩ lɩ̀à. Cɩ́gá, à mʋ̀ Ba-Yígúrə́-Jə-Tiu, à nə yɩ á Yɩɩ, à yɩ parɩ. 3 Á lìù mama mɛ, sə ʋ zìlí ʋ nuu də ʋ nyɩna, ʋ ga zìlí à sìə́ dɩan tə. À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ.

4 Á dànà ká viviri á yáá, á kə woŋwanan con. Á dànà ká nyɩan lugu, á ma fwa woŋwanan. À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ.

5 Máŋá tə, á nə pɩ̀à, sə á fwa nimarʋ joŋi, á pa à mʋ̀ Ba-Yígúrə́-Jə-Tiu nə, á mɛ, sə á twá kʋ coŋi nə, á fwa kʋ zəni, sə à wànɩ́, à sɛ̀, à jon kʋ. 6 Joŋi nàŋʋ́ tə mɛ, sə ba də́ kʋ, joŋi tə fwaŋʋ dɩɩn tətə nə, nə à yə̀ə́ kʋ tɩpʋrɩ nə. Yá kʋ nə yí dɩan batwa, də nàŋʋ́ tə gɩganɩ tə wulə, kʋ mɛ, sə ba sʋ̀rɩ́ kʋ mən wa. 7 Nimarʋ joŋi nàŋʋ́ nə yí dɩan batwa, yá lìù tə ga də́ kʋ, kʋ yɩ won tə, kʋ nə wà mɛ. Yá à bá sɛ̀, à jon joŋi tə, nàŋʋ́ tə nə jìgə̀ nànpʋ́pʋ́nʋ́ yɩrɩ. 8 Lìù tə, ʋ nə dí kʋ, kʋ yɩ cʋna ʋ tʋn, yá ʋ cʋna tə yoo zɩŋa wá. Cɩ́gá, ʋ cʋ̀gʋ̀ won tə yɩrɩ nə, ba nə tún vàn nə, ba pa à mʋ̀ Ba-Yígúrə́-Jə-Tiu nə. Yá ʋ mɛ, sə ba lɩ wá, Yɩzərayɛlə lɩ̀à dwíí wa.

9 Máŋá tə, á nə wulə, á ce á kárɩ́ wiən, á lʋʋ nii tə wa, á mɛ, sə á yá á kárɩ́ nii wiən tə, á ba tə ce. Á wà mɛ, sə á gun wogunə tə də, tə nə ga á kárɩ́ wa. 10 Á wà mɛ, sə á pìí, á bà á divɛn tɩ̀án kárɩ́ wa, á pʋ̀rɩ́ divɛn tɩ̀án lənə tə nə ga lá. Á wà mɛ, sə á twɩn lənə tə nə tʋa tɩa də. Á yágá wiən təntə, á pa labwana, də vərə nə. À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ.

11 Á dànà ká ŋʋ. Á dànà ká gɩgɩrɩ á jəndon, nə à yə̀ə́ á kʋna kʋ̀nkʋ̀n, á kə ʋ nii nə. 12 Á dànà ká dù də à yɩrɩ tə, kʋ̀nkʋ̀n yoo yuu wa. Cɩ́gá, á nə tʋn kʋ, kʋ yɩ à yɩrɩ nə nə, á cʋ̀gà. À mʋ̀ nə yɩ Ba-Yígúrə́-Jə-Tiu.

13 Á dànà ká kalɩ á jəndon, á pa ʋ tʋn, ʋ pa aba tʋtʋ. Á dànà ká gɩgɩrɩ ʋ won mama. Á dànà ká cɩ̀ tʋtʋnʋ ŋwɩ́rán nə, á pa kʋ yí dɩan bələ, də á wà wá ŋwɩ́n. 14 Á dànà ká twɩn zɩbʋŋʋ. Á dànà ká tún won mama liliu yáá nə, á pa, ʋ mà ʋ naa kʋ nə. Mə kʋ mʋ̀ nə wá bɩrɩ də, á dəri à mʋ̀, á Yɩɩ tə fən. À mʋ̀ nə yɩ Ba-Yígúrə́-Jə-Tiu. 15 Á dànà ká bʋ̀rɩ̀ kʋ̀nkʋ̀n bʋra, yoo wa. Á dànà ká ywàń lìù nə yɩ zʋrʋ yɩrɩ, á ma pa wá bʋra. Á ma wà mɛ, sə á jələ lìù nə yɩ ləzwənfarʋ yɩrɩ, á ma pa wá bʋra. Á dàń nə mɛ, sə á bʋ̀rɩ̀ á jənduən tə bʋra, kʋ twá cɩ́gá nə. 16 Á dànà ká twá lá, á də́ tɩjaŋa, á dwíí tɩ̀án tə də̀ń nə. Á dànà ká kʋna kʋ̀nkʋ̀n, á kə á jəndon nii nə, sə ba gʋ wá. À mʋ̀ nə yɩ Ba-Yígúrə́-Jə-Tiu.

17 Á dànà ká dʋn á nubiu, á bɩcan wa. Á jəndon nə tʋn yolwan, kʋ ziən, sə á caga ʋ nii nə. Yá cʋna bá zɩn aba, ʋ yoo yɩrɩ. 18 Á dànà ká fwi á lɩŋa lìù yuu wa. Á dànà ká ja pubʋla, də á dwíí tɩ̀án. Yá á mɛ, sə á sóní á jəndon, ndə á tətə nə. À mʋ̀ nə yɩ Ba-Yígúrə́-Jə-Tiu.

19 Á mɛ, sə á twá à nii yìə̀n tə tə, də nə. Á dànà ká pa, á vàná tə nə tà yiri nədʋ, dɩ̀ duən nə. Á dànà ká dù wobagulə, á kárɩ́ wa. Á dànà ká zʋ gànʋ̀, ba nə sʋa də gaŋoni bagulə.

20 Bɛɛ nə pə̀ń yonkan, ʋ nə yɩ bɛɛ don bwàlʋ́, ʋ nə pɩ̀à, sə ʋ swe, yá ba yà tə wà yonkan tə yə̀, ba jon, ʋ yuu tíú də ga wà wá nii pɩn, sə ʋ tɩnɩ ʋ tɩ̀àn, bɛɛ tə nə pə̀ń wá tə mɛ, sə ʋ yoli bwaan. Yá kʋ dàń nə wà mɛ, sə ba gʋ ba. Cɩ́gá, yonkan tə yà ba ʋ tɩ̀àn tɩ. 21 Bɛɛ tə mɛ, sə ʋ ja pabɩʋ, ʋ bà Yɩɩ jə́rə́ gansili tə mimii nə, sə ba ma fwa ʋ cʋna tə lwɩa joŋi, à mʋ̀ Ba-Yígúrə́-Jə-Tiu yáá con. 22 Yá Yɩɩ joŋwanʋ tə dàń wá ja pabɩʋ tə, ʋ fwa bɛɛ təntə cʋna tə kwɩan joŋi, ʋ pa wá, à mʋ̀ Ba-Yígúrə́-Jə-Tiu yáá con. Yá à wá sɛ̀ ʋ lwɩa tə, à ga kwɛn ʋ cʋna tə, à lɩ.

23 Máŋá tə, á nə zʋa lʋʋ nii tə wa, á nə cwɛn tɩ̀án yirə yirə, tə nə ləni bɩ̀á, təntən bɩna batwa tə wa, á mɛ, sə á jələ tə lənə tə, ndə durən wiən nə. Á wà mɛ, sə á də́ tə. 24 Yá banɩa nii bɩnɩ tə wa, á wá ja tɩ̀án lənə tə mama, á ma bʋ à mʋ̀ Ba-Yígúrə́-Jə-Tiu nə. 25 Yá bonu nii bɩnɩ tə wa, á dàń wàá tɩ̀án tə lənə tə, á də́. Á wá pʋ̀rɩ́ tə, sə tə ya á tətə nyiən. À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ.

26 Á dànà ká də́ nàŋʋ́ də kʋ jana. Á dànà ká tʋn cɩrɩ. À dànà ká vʋ. 27 Á dànà ká gan á yukʋran nii, á kəkəli. Á dànà ká fɩna á twanjərən. 28 Á dànà ká bɩ̀rɩ̀ gwɛɛn á yɩra, lìù nə tɩga yɩrɩ. Á dànà ká pʋ́pʋ́nɩ́ wiən, á tún á yɩra. À mʋ̀ nə yɩ Ba-Yígúrə́-Jə-Tiu.

29 Á dànà ká pa, á bwɩ̀ɩ́ tʋn kacwaan, sə kʋ cʋ̀gʋ̀ ba yɩrɩ nə. Kʋ nə tà nətʋ, lʋʋ nii tə lɩ̀à tə wá cwàrɩ̀, yá ba wá cʋ̀gʋ̀ culən nəfaran, ba sú lʋʋ nii tə. 30 Á mɛ, sə á zìlí à sìə́ dɩan tə, də á wúlú bwálɩ́ tə. À mʋ̀ nə yɩ Ba-Yígúrə́-Jə-Tiu.

31 Á dànà ká viviri á yáá, á kə lɩ̀à tə con, ba nə boŋə tɩga nii, nə à yə̀ə́ vʋra con. Á dànà ká danɩ ba yɩra də tətə. Kʋ nə tà nətʋ, ba wá pa, á jì durən lɩ̀à. À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ.

32 Á mɛ, sə á zàn, á zɩgɩ yɩɩ nə, nəkwɩa yáá con, á zìlí wá, ʋ yuu nə pɩ̀rɩ̀ yɩrɩ. Mə kʋ mʋ̀ nə wá bɩrɩ də, á dəri à mʋ̀, á Yɩɩ tə fən. À mʋ̀ nə yɩ Ba-Yígúrə́-Jə-Tiu.

33 Vee nə twi, ʋ twá ʋ jə̀ə́ á con, á lʋʋ nii tə wa, á wà mɛ, sə á kalɩ wá á pa ʋ tʋn, ʋ pa aba tʋtʋ. 34 Yá á dàń nə mɛ, sə á ja wá zəni, ndə á dwíí tə wa lìù nə. Á mɛ, sə á sóní wá, ndə á tətə nə. Cɩ́gá, á də tətə yɩn vərə, á twá á jə̀ń Ezwipətə lʋʋ nii tə wa. À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ.

35 Á wà mɛ, sə á tʋn gɩgɩra, bʋra wa, nə à yə̀ə́ wiən danɩ maŋʋ wa, nə à yə̀ə́ wiən dun kəru wa, nə à yə̀ə́ zʋŋa wa wiən maŋʋ wa. 36 Á mɛ, sə á ja səkəri kʋ nə kəri zəni, də səkəri bɩ̀á, tə dun nə yɩ cɩ́gá, də wiən maŋʋ zwɩɩn, nə à yə̀ə́ butelə, tə maŋʋ nə yɩ cɩ́gá. À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ. Á mʋ̀ nə pɩn á nan, á yá Ezwipətə lʋʋ nii tə. 37 Á mɛ, sə á twá à nii yìə̀n tə mama nə, á ga tʋn yìə̀n tə mama, à nə pɩn aba nii, sə á tʋn. À mʋ̀ nə yɩ Ba-Yígúrə́-Jə-Tiu.»