Cʋna ŋwɩ́rán
20
1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Swɩ̀n Yɩzərayɛlə dwíí tə con də, ba dwíí tə wa lìù, nə à yə̀ə́ vərə tə nə twá ba jə̀ə́ Yɩzərayɛlə lʋʋ nii tə wa lìù nə ja ʋ bìú, ʋ ma fwa joŋi, ʋ pa Mɔlɔkəa nə, kʋ mɛ, sə ba gʋ kʋ tíú. Lʋʋ nii tə tɩ̀án mɛ, sə ba dɩlɩ wá də kapana, ba gʋ. 3 Yá à də wá zɩgɩ ʋ mʋ̀ bɛɛ təntə nə, à ga wá dɩŋa wá, à lɩ Yɩzərayɛlə lɩ̀à púlí wa, ʋ nə jɩn ʋ bìú, ʋ ma fwa joŋi, ʋ pa Mɔlɔkə nə yɩrɩ. Kʋ nətʋ tə yɩ durən nə, ʋ ken à wúlú bwálɩ́ tə wa, yá ʋ cʋ̀gʋ̀ à yɩrɩ tə nə, kʋ nə yɩ parɩ. 4 Lʋʋ nii tə lɩ̀à tə nə púə́ ba yɩ́á bɛɛ tə yuu wa, ʋ nə jɩn ʋ bìú, ʋ ma fwa joŋi, ʋ pa Mɔlɔkə nə, ba nə wà bɛɛ təntə gwɩ, 5 à mʋ̀ tətə nə wá zɩgɩ bɛɛ təntə, də ʋ dwíí nə. Yá à wá lɩ ʋ də ʋ dwíí tə, Yɩzərayɛlə lɩ̀à dwíí wa. Á wá lɩ ʋ mʋ̀ də lɩ̀à tə mama, ba nə twá ʋ nə, ba cwàrɩ̀, ba ma pɩn dun Mɔlɔkə nə.6 Lìù nə viviri ʋ yáá, ʋ kə lɩ̀à tə con, ba nə boŋə tɩga nii, də vʋra con, ʋ cwàrɩ̀ də ba, ʋ ma pɩn ba dun, à wá zɩgɩ kʋ tíú nə, yá à wá lɩ wá, Yɩzərayɛlə lɩ̀à dwíí wa.
7 Á kwɩan à tɩ̀àn, á lɩ durən yìə̀n wa, sə á ya à mʋ̀ Yɩɩ lɩ̀à. Cɩ́gá, à mʋ̀ nə yɩ Ba-Yígúrə́-Jə-Tiu, à nə yɩ á Yɩɩ.»
8 Á sɩa à nii yìə̀n tə, á ga twá tə nə. À mʋ̀ Ba-Yígúrə́-Jə-Tiu nə kúrí aba, à pa, á jì à mʋ̀ lɩ̀à.
9 Lìù tə mama, ʋ nə zɩrɩ, ʋ kə ʋ nyɩna, nə à yə̀ə́ ʋ nuu nə, kʋ mɛ, sə ba gʋ wá, yá ʋ tɩan tə yoo zɩŋa wa. Cɩ́gá, ʋ mʋ̀ nə zɩrɩ, ʋ kə ʋ nyɩna, nə à yə̀ə́ ʋ nuu nə.
10 Bɛɛ nə tʋn bacwaan də ʋ jəndon kan, kʋ mɛ, sə ba gʋ bacwarʋ tə, də kacwarʋ tə mɛ.
11 Bɛɛ nə pə̀ń ʋ nyɩna kan, kʋ yɩ ʋ nyɩna tə cavɩra. Kʋ mɛ, sə ba gʋ bɛɛ təntə, də kan tə mɛ, yá ba tɩan tə yoo zɩŋa ba tətə.
12 Bɛɛ nə pə̀ń ʋ bìú kan nə, kʋ mɛ, sə ba gʋ cʋna lɩ̀à bələ tə mɛ. Ba cʋ̀gʋ̀ culu, yá ba tɩan tə yoo zɩŋa ba tətə.
13 Bɛɛ nə pə̀ń ʋ don bɛɛ, ndə bɛɛ nə pə̀ní kan nətʋ, kʋ yɩ cavɩyoo, ba bələ tə mɛ tʋn. Kʋ mɛ, sə ba gʋ ba, yá ba tɩan tə yoo zɩŋa ba tətə.
14 Bɛɛ nə tì bʋ̀á də ʋ nuu mɛ, ʋ ma fwa ʋ kana, kʋ yɩ culu nəfarʋ. Kʋ mɛ, sə ba sʋ̀rɩ́ bɛɛ təntə, də kana bələ tə, sə culu nəfarʋ təntə yiri dàn ká pìí kʋ tʋn á titəŋi wa.
15 Bɛɛ nə dɩ̀gà vànɩ́ nə, kʋ mɛ, sə ba gʋ wá, á ga gʋ vànɩ́ tə də.
16 Kan də nə pɩn vànɩ́ dɩ̀ ʋ nə, á mɛ, sə á gʋ kan tə, də vànɩ́ tə mɛ. Yá kan tə tɩan tə, də vànɩ́ tə tɩan tə yoo zɩŋa kan tə, də vànɩ́ tə tətə.
17 Bɛɛ nə tì ʋ nakʋa, kʋ nə yɩ ʋ nyɩna bʋ̀á, nə à yə̀ə́ ʋ nuu bʋ̀á, ʋ ma fwa ʋ kan, ba nə pə̀ń duən, kʋ yɩ cavɩyoo. Kʋ mɛ, sə ba lɩ ba, Yɩzərayɛlə lɩ̀à dwíí wa, ba dwíí tɩ̀án yɩ́á yuu. Bɛɛ təntə pə̀ń ʋ nakʋa, yá ʋ cʋna tə yoo zɩŋa ʋ tətə.
18 Kan tàŋá nə twi, bɛɛ ga pə̀ń wá, kʋ yɩ cavɩra. Yá kʋ mɛ, sə ba lɩ ba mɛ bələ, Yɩzərayɛlə lɩ̀à dwíí wa. Cɩ́gá, ba pə̀ń duən, máŋá tə wa, kan tə tàŋá jana nə lwɛ́.
19 N wà mɛ, sə n pə̀ń n nuu nyánʋ́, nə à yə̀ə́ ʋ zʋnʋ, nə à yə̀ə́ n nyɩna nakʋa. Cɩ́gá, kʋ yɩ n dwíí tíú tə cavɩra. Lɩ̀à tə, ba nə tʋn yoo təntə yiri, ba cʋna tə yoo zɩŋa ba.
20 Bɛɛ nə pə̀ń ʋ nɩbarɩ kan, nə à yə̀ə́ ʋ nyɩna nubiu kan, kʋ yɩ ʋ nɩbarɩ tə, nə à yə̀ə́ ʋ nyɩna nubiu tə cavɩra. Bɛɛ təntə də kan tə cʋna tə yoo zɩŋa ba tətə, yá ba wá tɩ, də ba wà bìú lɩrɩ.
21 Bɛɛ nə dí ʋ nubiu kan, ʋ jon, kʋ yɩ durən ʋ tʋn. Kʋ yɩ ʋ nubiu tə cavɩra. Yá bɛɛ təntə də kan tə wá tɩ, də ba wà bìú lɩrɩ.
22 Á mɛ, sə á twá à nii yìə̀n tə mama nə, á ga tʋn yìə̀n tə, à nə pɩn aba nii, sə á tʋn. Yá lʋʋ nii tə, à nə ja aba, à vələ, sə à jə̀ń kʋ wa, bá tʋnɩ aba, kʋ dʋgʋ. 23 Á wà mɛ, sə á twá dwíə́ tə, à nə wá dɩŋa, à lɩ á yáá con, yofwamɩnan nə. Cɩ́gá, mə tʋtʋnkʋkwɩnan təntə mama nə pɩn, à waa nan ba. 24 Yá à dàń swɩ̀n á mʋ̀ con də,
á mʋ̀ nə wá tɩnɩ ba tɩa tə.
À mʋ̀ nə pɩn ka aba, sə á tɩnɩ ka.
Kʋ yɩ lʋʋ nii tə, nayɩla də tʋ̀ràn nə súə́ lá, tə pàlɩ̀.
À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ. À mʋ̀ nə pwɛ̀ aba, à lɩ dwíə́ nəkaran* tə wa. 25 Yá á mɛ, sə á kə pwɩa vàná tə nə jə durən, də vàná tə nə ba durən jə pwə́rə́ wa, də zuŋi tə nə jə durən, də tə tə nə ba durən jə pwə́rə́ wa. Kʋ nətʋ wá pa, á bá sɛ̀, á pa á tətə jì durən lɩ̀à, kʋ twá də vàná təntə, də zuŋi təntə, də wiən təntə mama, tə nə vəli tə pùə́ baan, tɩa yuu wa, à nə bɩrɩ aba, də tə yɩ durən wiən.
26 Á yana à mʋ̀ Yɩɩ lɩ̀à. Cɩ́gá, à mʋ̀ Ba-Yígúrə́-Jə-Tiu, à nə yɩ á Yɩɩ, à yɩ parɩ. À pwɛ̀ aba, à lɩ dwíə́ nəkaran tə wa, sə á ya à mʋ̀ lɩ̀à.
27 Bɛɛ, nə à yə̀ə́ kan nə boŋə tɩga nii, nə à yə̀ə́ ba nə vwɩ, kʋ mɛ, sə ba dɩlɩ ba də kapana, ba gʋ. Yá ba tɩan tə yoo zɩŋa ba tətə.