Joŋwana 21

Kwìə̀ tə Yɩɩ nə pɩn joŋwana ka ya parɩ yoo wa

1 Ba-Yígúrə́-Jə-Tiu swɩ̀n Moyizə con, ʋ wʋ́: «Swɩ̀n Aron bɩ̀á tə con, ba nə yɩ à joŋwana, də kʋ culi, Yɩɩ joŋwanʋ wà mɛ, sə ʋ dwen ʋ dwíí tə wa lìù tɩgɩ yɩra, sə kʋ pa, ʋ jì durən lìù. 2 Yá tɩgɩ tə nə yɩ ʋ tətə dìə̀ lìù, kʋ nə yɩ ʋ nuu, nə à yə̀ə́ ʋ nyɩna, nə à yə̀ə́ ʋ bìú, nə à yə̀ə́ ʋ bʋ̀á, nə à yə̀ə́ ʋ nubiu, ʋ wàá ʋ sɛ̀, ʋ jì durən lìù, ba tɩgɩ yɩrɩ. 3 Kʋ nə yɩ ʋ nakʋa, ʋ tə nə wà swe, yá ʋ ga yəri bɛɛ, Yɩɩ joŋwanʋ tə wàá ʋ sɛ̀, ʋ jì durən lìù, ʋ də tɩgɩ yɩrɩ. 4 Yɩɩ joŋwanʋ yɩ ndə pɩ̀ʋ́ nə, ʋ dwíí tə wa. Kʋ mʋ̀ yɩrɩ, ʋ wà mɛ, sə ʋ kə ʋ tɩ̀àn durən wa, ʋ ma cʋ̀gʋ̀ ʋ yɩrɩ nə.

5 Yɩɩ joŋwana wà mɛ sə ba gan ba yukʋran nii, ba kəkəli, nə à yə̀ə́ ba fɩna ba twanjərən, nə à yə̀ə́ ba la gwɛɛn ba yɩra, ba lìù nə tɩga yɩrɩ. 6 Ba mɛ, sə ba ya à mʋ̀ Yɩɩ cɩcɩ nyiən, ba tʋn, ba pa nə. Ba wà mɛ, sə ba cʋ̀gʋ̀ à yɩrɩ nə. Cɩ́gá, ba mʋ̀ nə fwa jwəŋə tə, tə nə yɩ à mʋ̀ Ba-Yígúrə́-Jə-Tiu wodiu, ba sʋ̀rɩ́, ba pɩn nə. Kʋ mʋ̀ nə pɩn, ba mɛ, sə ba lɩ ba tɩ̀àn durən yìə̀n wa, ba ga ya à mʋ̀ Yɩɩ cɩcɩ nyiən.

7 Ba wà mɛ, sə ba swe kacwarʋ, nə à yə̀ə́ kan, bɛɛ nə cʋ̀gʋ̀, ʋ dʋgʋ, nə à yə̀ə́ kan, ʋ barɩ nə dʋgʋ wá. Cɩ́gá, Yɩɩ joŋwanʋ mɛ, sə ʋ ya à mʋ̀ Yɩɩ cɩcɩ nyiən. 8 Á lìù mama mɛ, sə ʋ jələ Yɩɩ joŋwanʋ, ndə lìù tə nə, ʋ nə yɩ à mʋ̀ Yɩɩ nyiən. Cɩ́gá, ʋ mʋ̀ nə pɩn wodiu, à mʋ̀, á Yɩɩ tə nə. Kʋ mʋ̀ yɩrɩ, á mɛ, sə á jələ wá, ndə lìù tə nə, ʋ nə yɩ Yɩɩ nyiən. Cɩ́gá, à mʋ̀ Ba-Yígúrə́-Jə-Tiu yɩ parɩ. Á mʋ̀ ga nə kúrí aba, sə á ya à mʋ̀ lɩ̀à.

9 Yɩɩ joŋwanʋ bʋ̀á nə cwàrɩ̀, ʋ ma yàlà ʋ tɩ̀àn, kʋ yɩ ʋ nyɩna yɩrɩ nə nə, ʋ cʋ̀gà. Yá kʋ mɛ, sə ba sʋ̀rɩ́ bʋ̀á təntə.

10 Yɩɩ joŋwana yun tɩ̀án nəkwɩa tə, ba nə twɛ́n dun nʋga* ʋ yuu wa, ba ga zʋ wá Yɩɩ joŋwana culu gànàn, ba ma tún wá Yɩɩ joŋwanɩ tʋtʋŋɩ tə wa, nə yɩ ʋ nubɩa tə yáá tíú. Kʋ mʋ̀ yɩrɩ, ʋ wà mɛ, sə ʋ yá ʋ yukʋran, ʋ ba tə zàŋɩ̀, ʋ ga wà mɛ, sə ʋ kàrɩ́ ʋ gànàn. 11 Yɩɩ joŋwana yun tɩ̀án nəkwɩa wà mɛ, sə ʋ yí tɩgɩ mama yɩra. Kʋ nə swə kʋ yɩ ʋ nyɩna tɩgɩ, nə à yə̀ə́ ʋ nuu tɩgɩ, ʋ wà mɛ, sə ʋ yí ʋ yɩra, sə kʋ pa, ʋ jì durən lìù. 12 Ʋ wà mɛ, sə ʋ nan Yɩɩ wúlú bwálɩ́ tə wa, ʋ va bwálɩ́ don mama, sə kʋ dàn ká pa, ʋ kə durən à mʋ̀, ʋ Yɩɩ tə wúlú bwálɩ́ tə wa. Cɩ́gá, kʋ yɩ à mʋ̀, ʋ Yɩɩ tə dun nʋga tə nə, ba twɛ́n ʋ yuu wa, ba ma tún wá, sə ʋ tʋn, ʋ pa nə. À mʋ̀ nə yɩ Ba-Yígúrə́-Jə-Tiu.

13 Yɩɩ joŋwana yun tɩ̀án nəkwɩa yɩ kacɩɩn tə, ʋ tə nə yəri bɛɛ nə, ʋ mɛ, sə ʋ swe. 14 Ʋ wà mɛ, sə ʋ swe kadənu, nə à yə̀ə́ kan, ʋ barɩ nə dʋgʋ wá, nə à yə̀ə́ kacwarʋ, nə à yə̀ə́ kan, ʋ nə yàlà ʋ tɩ̀àn. Yɩɩ joŋwana yun tɩ̀án nəkwɩa mɛ, sə ʋ pɩ̀à kacɩɩn, ʋ tə nə yəri bɛɛ, Yɩɩ joŋwana dwíí tə wa, ʋ swe, ʋ ma fwa ʋ kan. 15 Mə kʋ wá twá nətʋ, sə ʋ dàn ká pa, dwíí kʋkwɩʋn zʋ ʋ dwíí tə wa. Cɩ́gá, à mʋ̀ Ba-Yígúrə́-Jə-Tiu nə kúrí wá, à tún, sə ʋ ya à mʋ̀ nyiən.»

Yìə̀n tə nə wàá tə cɩ̀, tə pɩn lìù wàrɩ̀ Yɩɩ joŋwanʋ, ʋ yanɩ

16 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: 17 «Swɩ̀n Aron con də, máŋá də máŋá mama wuuu, bɛɛ nə wulə ʋ dwíí tə wa, ʋ nə yɩ kwaŋʋ, bɛɛ təntə wà mɛ, sə ʋ tʋn Yɩɩ joŋwanɩ tʋtʋŋɩ tə, sə ʋ ma pɩn wodiu, à mʋ̀, ʋ Yɩɩ tə nə. 18 Cɩ́gá, bɛɛ tə mama, ʋ nə yɩ kwaŋʋ, ʋ wà mɛ, sə ʋ tʋn Yɩɩ joŋwanɩ tʋtʋŋɩ tə. Kʋ nə yɩ liliu, nə à yə̀ə́ gwànʋ́, nə à yə̀ə́ bɛɛ, yayɩgʋ nə cʋ̀gʋ̀ ʋ mɩɩ, ʋ yáá wa, nə à yə̀ə́ ʋ nandɛɛ danɩ nə dwə duən, 19 nə à yə̀ə́ ʋ naa nə kɛ́n, nə à yə̀ə́ ʋ vàn nə kɛ́n, 20 nə à yə̀ə́ ʋ nə yɩ gʋlʋ, nə à yə̀ə́ ʋ nə yɩ ləzwənmunə dwíí, nə à yə̀ə́ ʋ nə yɩ yipolu tíú, nə à yə̀ə́ dáá nə jə wá, nə à yə̀ə́ sɩsaku nə jə wá, nə à yə̀ə́ ʋ nə yɩ batana. 21 Yɩɩ joŋwanʋ Aron dwíí tə wa, bɛɛ tə mama, ʋ nə yɩ kwaŋʋ, ʋ wà mɛ, sə ʋ fwa jwəŋə, ʋ sʋ̀rɩ́, ʋ pa à mʋ̀ Ba-Yígúrə́-Jə-Tiu nə. Ʋ nə yɩ kwaŋʋ tə yɩrɩ, ʋ wà mɛ, sə ʋ tʋn Yɩɩ joŋwanɩ tʋtʋŋɩ tə, sə ʋ ma pɩn wodiu, à mʋ̀, ʋ Yɩɩ tə nə. 22 Ʋ wàá wodirən tə nə yɩ ʋ Yɩɩ tə nyiən, də tə tə nə yɩ ʋ Yɩɩ tə cɩcɩ nyiən, ʋ də́. 23 Yá ʋ dàń nə wà mɛ, sə ʋ va Yɩɩ wúlú bwálɩ́ tə patasɩn tə con, ʋ ga wà mɛ, sə ʋ bólí Yɩɩ joŋi bwálɩ́ tə də yɩra, ʋ nə yɩ kwaŋʋ tə yɩrɩ. Ʋ wà mɛ, sə ʋ kə durən à wúlú bwálɩ́ tə, də kʋ waa wiən tə yɩra, tə nə yɩ parɩ. Cɩ́gá, à mʋ̀ Ba-Yígúrə́-Jə-Tiu nə kúrí à joŋwana tə, à tún, sə ba tʋn, ba pa nə.» 24 Yá Moyizə dàń swɩ̀n sʋ̀ràn təntə, Aron, də ʋ bɩ̀á tə, də Yɩzərayɛlə dwíí tə mama con.