Joŋwana 22

Kwìə̀ tə Yɩɩ nə pɩn, Yɩɩ joŋi nàŋʋ́ diŋə yoo wa

1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Bɩrɩ Aron də ʋ bɩ̀á tə nə, máŋá tə də máŋá tə, ba nə wà mɛ, sə ba də́ Yɩɩ joŋi wiən tə, Yɩzərayɛlə dwíí tə nə tún vàn nə, ba pa nə. Yá kʋ nətʋ wá pa, ba bá cʋ̀gʋ̀ à yɩrɩ tə nə, kʋ nə yɩ parɩ. À mʋ̀ nə yɩ Ba-Yígúrə́-Jə-Tiu. 3 Swɩ̀ń ba con də, máŋá də máŋá mama wuuu, ba dwíí tə wa bɛɛ nə tʋn durən yoo, ʋ ga yí Yɩɩ joŋi wiən tə yɩra, Yɩzərayɛlə dwíí nə tún vàn nə, ba pa à mʋ̀ Ba-Yígúrə́-Jə-Tiu nə, kʋ mɛ, sə ba lɩ ku tíú, à tʋtʋŋɩ tə wa. À mʋ̀ nə yɩ Ba-Yígúrə́-Jə-Tiu.

4 Aron dwíí tə wa lìù tə mama, Dayaan, nə à yə̀ə́ babasʋ nə jə wá, ʋ wà mɛ, sə ʋ də́ Yɩɩ joŋi wiən, kʋ ja va máŋá tə, ʋ yayɩgʋ tə nə wá zwɛ̀, ʋ ga pìí ʋ jì lìù tə, ʋ nə ba durən jə. Mə kʋ yɩ nətʋ, kʋ pa lìù tə də nə, ʋ nə dwen lìù yɩra kʋ tíú nə dwen tɩgɩ yɩra, kʋ pa, ʋ jì durən lìù, də lìù tə, ʋ bafɩan nə naŋa tə tɩ̀àn nə. 5 Kʋ yɩ nətʋ, kʋ pa lìù tə də nə, ʋ nə dwen wonənu yɩra, kʋ nə yɩ durən won, də lìù tə, ʋ nə dwen durən lìù yiri mama yɩra, kʋ pa, ʋ də twá ʋ jì durən lìù. 6 Lìù tə, yìə̀n təntə yiri nə yí wá, ʋ wá ya durən lìù, kʋ va kʋ yí didəni. Yá ʋ wá mɛ, sə ʋ də́ Yɩɩ joŋi wiən tə, də ʋ nə wà dí yáá, ʋ swɛ nɩ́á. 7 Máŋá tə yɩɩ nə zʋa, ʋ kʋ́ʋ̀ bá ya durən lìù. Yá ʋ dàń wàá Yɩɩ joŋi wiən tə, ʋ də́. Cɩ́gá, tə yɩ ʋ nii wodiu. 8 Yɩɩ joŋwanʋ wà mɛ, sə ʋ də́ vantɩgʋ nàŋʋ́, nə à yə̀ə́ vànɩ́, wojandirən nə jɩn, nàŋʋ́, sə kʋ dàn ká pa, ʋ jì durən lìù. À mʋ̀ nə yɩ Ba-Yígúrə́-Jə-Tiu.

9 Yɩɩ joŋwana tə mɛ, sə ba zìlí kʋ tə nii, à nə bɩrɩ ba. Kʋ nə tà nətʋ, ba wá kə cʋna ba yuu wa, ba nə pɩn Yɩɩ joŋi wodiu tə jì durən won yɩrɩ, yá ba wá tɩ. À mʋ̀ Ba-Yígúrə́-Jə-Tiu nə kúrí ba, à tún, sə ba ya à mʋ̀ nyiən.

10 Vee mama wà mɛ, sə ʋ də́ Yɩɩ joŋi won. Yɩɩ joŋwanʋ dìə̀ vee, nə à yə̀ə́ ʋ tʋtʋnʋ tə, ʋ nə jə ŋwɩ́rán, də tətə wà mɛ, sə ba də́ Yɩɩ joŋi won. 11 Yá kʋ dàń nə yɩ yoŋu, Yɩɩ joŋwanʋ nə yə̀ də ʋ səbiu, nə à yə̀ə́ yoŋu, ba nə lɩrɩ Yɩɩ joŋwanʋ tə dìə̀, ba mʋ̀ wàá ʋ Yɩɩ joŋi wodiu tə, ba də́. 12 Yɩɩ joŋwanʋ bʋ̀á nə swe bɛɛ nə, ʋ nə tà Yɩɩ joŋwana dwíí tə wa lìù, bʋ̀á təntə kʋ́ʋ̀ wàrɩ̀ tori tə, ba nə yàá lɩ Yɩɩ joŋi wiən tə wa, ʋ də́. 13 Yá Yɩɩ joŋwanʋ bʋ̀á nə jìgə̀ kadənu, nə à yə̀ə́ ʋ barɩ nə dʋgʋ wá, də ʋ wà bìú lɩrɩ, ʋ ga pìí ʋ bà, ʋ jə̀ə́ ʋ nyɩna dìə̀, ndə máŋá tə wa, ʋ yà nə yɩ kacɩɩn, ʋ də wàá ʋ nyɩna tə wodiu tə, ʋ twá ʋ də́. Lìù don mama wà mɛ, sə ʋ də́ wodiu təntə, də ʋ nə tà Yɩɩ joŋwanʋ.

14 Lìù nə dí Yɩɩ joŋi won, də ʋ yəri, ʋ mɛ, sə ʋ ŋwɩ́n won tə, ba nə ma fwa joŋi tə kwənə, ʋ pa Yɩɩ joŋwanʋ tə nə, ʋ tə ga súrí kʋ kwənə tə pwɩ̀ʋ̀ bonu nii nyiən kʋ nə.

15 Yɩɩ joŋwana tə wà mɛ, sə ba kə durən, Yɩɩ joŋi wiən tə wa, Yɩzərayɛlə dwíí tə nə yàá lɩ, ba tún vàn nə, ba pa à mʋ̀ Ba-Yígúrə́-Jə-Tiu nə. 16 Yɩɩ joŋwana tə nə jìgə̀ durən lɩ̀à, yá ba ga də́ Yɩɩ joŋi wiən tə, kʋ yɩ yolwan ba kəni Yɩzərayɛlə dwíí tə yuu wa, yá kʋ yolwan tə mɛ, sə ba kwɛn kʋ. Cɩ́gá, à mʋ̀ Ba-Yígúrə́-Jə-Tiu nə kúrí ba, à tún, sə ba ya à mʋ̀ nyiən.»

Vànɩ́ tə, ba nə wàá ba ma fwa joŋi, ba pɩn Yɩɩ nə

17 Ba-Yígúrə́-Jə-Tiu swɩ̀n Moyizə con, ʋ wʋ́: 18 «Swɩ̀n Aron, də ʋ bɩ̀á tə, də Yɩzərayɛlə dwíí tə mama con də, Yɩzərayɛlə dwíí tə wa lìù, nə à yə̀ə́ vee, ʋ nə twá ʋ jə̀ə́ Yɩzərayɛlə lʋʋ nii tə wa, wàá ʋ pɩn, ba fwa joŋi tə, ba nə sʋ̀rɩ́*, ʋ pɩn à mʋ̀ Ba-Yígúrə́-Jə-Tiu nə. Kʋ wàá nipoli joŋi, nə à yə̀ə́ pupwən joŋi, kʋ yanɩ. 19 Kʋ tíú nə pɩ̀à, sə à sɛ̀, à jon ʋ joŋi tə, ʋ mɛ, sə ʋ ja vanbɩa, kʋ yɩra nə zurə, kʋ ga cé, ʋ bà. Kʋ wàá naʋ, nə à yə̀ə́ pəbiə, nə à yə̀ə́ bʋbiə kʋ yanɩ. 20 Á wà mɛ, sə á ja vànɩ́, won nə mùrì kʋ yɩra, à ma fwa joŋi. Á nə fwa kʋ, à bá sɛ̀, à jon á joŋi tə. 21 Lìù nə pɩ̀à, sə ʋ ja vanfarʋ, nə à yə̀ə́ vanmɩna, ʋ ma fwa nimarʋ joŋi, nə à yə̀ə́ nipoli joŋi, nə à yə̀ə́ pupwən joŋi, ʋ pa à mʋ̀ Ba-Yígúrə́-Jə-Tiu nə, ʋ nə pɩ̀à, sə à sɛ̀, à jon ʋ joŋi tə, kʋ mɛ, sə kʋ ya vànɩ́, kʋ yɩra nə zurə, kʋ ga cé. Won mama wà mɛ, sə kʋ mùrì vànɩ́ tə yɩra. 22 Á wà mɛ, sə á ja vànɩ́, kʋ nə yɩ liliu, nə à yə̀ə́ kʋ naa nə kɛ́n, nə à yə̀ə́ ka nə goŋi, nə à yə̀ə́ kʋ yɩra nə jə nʋran, nə à yə̀ə́ dáá, nə à yə̀ə́ sabadɔɔ, á ma fwa joŋi, á sʋ̀rɩ́ Yɩɩ joŋi bwálɩ́ tə yuu wa, á pa à mʋ̀ Ba-Yígúrə́-Jə-Tiu nə. 23 Á wàá naʋ, kʋ nɛɛ danɩ nə dwə duən, nə à yə̀ə́ pəbiə, ka nɛɛ danɩ nə dwə duən, á ma fwa pupwən joŋi. Yá á dàń nə ja vànɩ́ təntə yiri, á ma fwa nipoli joŋi, à mʋ̀ Yɩɩ bá sɛ̀, à jon kʋ. 24 Ba nə mà vànɩ́ mancabɩa, ba lwa, nə à yə̀ə́ ba nə mà tə, ba tɩtaga, nə à yə̀ə́ ba nə la tə, ba lɩ, nə à yə̀ə́ ba nə goŋi tə, á wà mɛ, sə á ja vànɩ́ təntə, á ma fwa joŋi, á pa à mʋ̀ Ba-Yígúrə́-Jə-Tiu nə. Á dànà ká tʋn yoo təntə vàná yɩra, á lʋʋ nii tə wa. 25 Yá á wà mɛ, sə á jon vàná təntə yiri, dwíə́ nəkaran* tə con, á ma fwa joŋi, á pa à mʋ̀, á Yɩɩ tə nə. Cɩ́gá, ba tàń tə, kʋ pa won mùrì tə yɩra. Kʋ mʋ̀ yɩrɩ, à bá sɛ̀, à jon tə.»

26 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: 27 «Nabiə, nə à yə̀ə́ pəbiə, nə à yə̀ə́ bʋbiə lɩrʋ kwa nə, ka mɛ, sə ka ya də ka nuu, dɩan barpɛ. Yá kʋ nə zɩgɩ ka lɩrʋ dɩan nana dɩɩn tə nə, kʋ dàń jə vələ, ba nə ja vànɩ́ bìú təntə, ba ma fwa joŋi, ba sʋ̀rɩ́, ba pa à mʋ̀ Ba-Yígúrə́-Jə-Tiu nə, à wá sɛ̀, à jon ka. 28 Yá á dàń nə wà mɛ, sə á gʋ naʋ də kʋ bìú mɛ, nə à yə̀ə́ piə də ka bìú mɛ, nə à yə̀ə́ bʋ̀n də kʋ bìú mɛ, dɩɩn nədʋ.

29 Á nə fwa jwii kənu joŋi*, á pa à mʋ̀ Ba-Yígúrə́-Jə-Tiu nə, sə á ma bɩrɩ də, á yə̀ə́ jwɩan, á mɛ, sə á fwa kʋ zəni, sə à sɛ̀, à jon kʋ. 30 Yá á mɛ, sə á də́ joŋi nàŋʋ́ tə, joŋi tə fwaŋʋ dɩɩn tətə nə. Á wà mɛ, sə á yá kʋ won mama, á pa tɩa pʋrɩ, ka dà kʋ nə. À mʋ̀ nə yɩ Ba-Yígúrə́-Jə-Tiu.

31 Á mɛ, sə á zìlí à nii, á ga tʋn yìə̀n tə, à nə bɩrɩ aba. À mʋ̀ nə yɩ Ba-Yígúrə́-Jə-Tiu. 32 Á dànà ká cʋ̀gʋ̀ à yɩrɩ tə nə, kʋ nə yɩ parɩ. Yá Yɩzərayɛlə dwíí tə wá zìlí nə, à nə yɩ parɩ tə yɩrɩ. À mʋ̀ Ba-Yígúrə́-Jə-Tiu nə kúrí aba, à pa, á jì à mʋ̀ lɩ̀à. 33 Yá à mʋ̀ nə pɩn á nan, á yá Ezwipətə lʋʋ nii tə, sə à mʋ̀ nə ya á Yɩɩ. À mʋ̀ nə yɩ Ba-Yígúrə́-Jə-Tiu.»