Cànɩ̀ tə, Yɩzərayɛlə lɩ̀à nə mɛ, sə ba də́
23
1 Ba-Yígúrə́-Jə-Tiu swɩ̀n Moyizə con, 2 sə ʋ swɩ̀n Yɩzərayɛlə dwíí tə con, ʋ wʋ́: «Máŋá tə, á nə pɩ̀à, sə á də́ à mʋ̀ Ba-Yígúrə́-Jə-Tiu cànɩ̀ tə, á mɛ, sə á bon á kə Yɩzərayɛlə lalʋʋ tə mama nə, sə ba kun duən nə, ba pa nə dun. Á nəŋə à cànɩ̀ tə, á nə mɛ, sə á kun duən nə, á pa nə dun. a. Sìə́ dɩɩn tə
3 Á jə dɩan bardʋ, dapanɩ wa, sə á ma tʋn á tʋ̀tʋ̀nán. Yá barpɛ nii dɩɩn tə mʋ̀ yɩ sìə́ dɩɩn nəfarʋ. Sìə́ dɩɩn təntə nə, á mɛ, sə á kun duən nə, á pa nə dun. Kʋ yɩ dɩɩn tə, kʋ nə yɩ Ba-Yígúrə́-Jə-Tiu cɩcɩ nyiən. Yá bwálɩ́ tə mama nə, á nə wá ya, á wà mɛ, sə á tʋn won mama, kʋ dɩɩn nə.
4 Á nəŋə à mʋ̀ Ba-Yígúrə́-Jə-Tiu cànɩ̀ tə duən, á nə mɛ, sə á kun duən nə, á pa nə dun, də tə máŋá nə yí.
b. Pakə cànà tə, də dipɛn tə nə wà sabwarɩ ken cànà tə
5 Təntən cànà tə dɩan fugə də banɩa dɩɩn nə, máŋá tə yɩɩ nə zʋa, sə á də́ Pakə cànà tə, á ma pa dun à mʋ̀ Ba-Yígúrə́-Jə-Tiu nə. 6 Yá cànà təntə tətə dɩan fugə də bonu dɩɩn nə, á mɛ, sə á də́ dipɛn tə nə wà sabwarɩ ken cànà tə, á ma pa dun à mʋ̀ Ba-Yígúrə́-Jə-Tiu nə. Á mɛ, sə á də́ dipɛn, kʋ nə wà sabwarɩ ken, dɩan barpɛ. 7 Cànà təntə diŋə təntən dɩɩn tə nə, á wá kun duən nə, á pa nə dun. Kʋ dɩɩn nə, á wà mɛ, sə á tʋn á tətə tʋtʋŋɩ mama. 8 Á wá fwa jwəŋə, á sʋ̀rɩ́, á pa à mʋ̀ Ba-Yígúrə́-Jə-Tiu nə, dɩan barpɛ. Yá barpɛ nii dɩɩn tə nə, á dàń wá kun duən nə, á pa nə dun. Kʋ dɩɩn tə nə, á wà mɛ, sə á tʋn á tətə tʋtʋŋɩ mama.»
c. wodidʋn cànà
9 Ba-Yígúrə́-Jə-Tiu kʋ́ʋ̀ swɩ̀n Moyizə con, 10 sə ʋ swɩ̀n Yɩzərayɛlə dwíí tə con, ʋ wʋ́: «Máŋá tə, á nə zʋa lʋʋ nii tə wa, à nə pɩn aba, máŋá tə, á nə wulə á ce á kárɩ́ wiən, á mɛ, sə á ja á kárɩ́ wiən təntən lənə tə, á bà, á pa Yɩɩ joŋwanʋ nə. 11 Yá Yɩɩ joŋwanʋ tə wá yɩyarɩ tə, à mʋ̀ Ba-Yígúrə́-Jə-Tiu yáá con, ʋ pa nə, sìə́ dɩɩn tə tɩpʋrɩ nə, à ga wá sɛ̀, à jon tə. 12 Kʋ dɩɩn təntə tətə nə, á wá ja bɩnɩ nədʋ pəbiə, ka yɩra nə zurə, ka ga cé, á ma fwa joŋi, á sʋ̀rɩ́, á pa à mʋ̀ Ba-Yígúrə́-Jə-Tiu nə. 13 Á wá súrí zìlə́ won joŋi təntə nə. Kʋ yɩ mun kilo bardʋ, á nə wá ywɛ́ də nʋga, á sʋ̀rɩ́, yá tə lwán ga wá ya ywánɩ́, kʋ pa à mʋ̀ Ba-Yígúrə́-Jə-Tiu nə. Kʋ dàń súrí divɛn litərə də faan nə. 14 Á wà mɛ, sə á də́ á kárɩ́ wiən təntən lənə dipɛn, nə à yə̀ə́ mɩndʋra yun, ba nə wùə̀, nə à yə̀ə́ wobɩa nədʋra, kʋ va kʋ yí dɩɩn tə, á nə wá fwa wodidʋn joŋi tə, á pa à mʋ̀, á Yɩɩ tə nə. Kʋ yɩ nii à pɩn, kʋ pʋ́pʋ́nɩ́, kʋ tún, máŋá də máŋá mama wuuu, á dwíə́ tə mama yɩrɩ, á nə wá kə lʋʋ wa, bwálɩ́ tə mama nə, á nə wá ya, máŋá də máŋá mama wuuu.
d. Woceri cànà
15 Kʋ nə zɩgɩ sìə́ dɩɩn tə tɩpʋrɩ nə, á nə ja á kárɩ́ wiən təntən lənə tə, á bà, á yɩyarɩ à yáá con, á pa nə tə, á wá gàlà dapana barpɛ pə́rá. 16 Kʋ fwa dɩan finu, á nə wá gàlà, yá finu nii dɩɩn tə wá tʋ barpɛ nii sìə́ dɩɩn tə tɩpʋrɩ nə. Yá kʋ dɩɩn təntə nə, á kʋ́ʋ̀ mɛ, sə á pa wodidʋn zìlə́ won à mʋ̀ Ba-Yígúrə́-Jə-Tiu nə. 17 Á wá ja dipɛn dàlá bələ, á nan á sànɩ́, á bà, á pa ba yɩyarɩ, ba pa nə. Dipɛn dàlɩ́ nədʋ mama yɩ á wá fwa də mun kilo batwa. Á wá kə sabwarɩ tə wa, á ma wà tə. Tə yɩ á kárɩ́ wiən təntən lənə, á pɩn à mʋ̀ Ba-Yígúrə́-Jə-Tiu nə. 18 Kʋ tə nə súrí dipɛn dàlá təntə nə, á wá ja bɩnɩ nədʋ nədʋ pəbii barpɛ, tə yɩra nə zurə, tə ga cé, də nabɩa, də pabɩran bələ, á ma fwa joŋi, á sʋ̀rɩ́, á pa à mʋ̀ Ba-Yígúrə́-Jə-Tiu nə. Á wá súrí zìlə́ wiən, tə nə yɩ vàrʋ́ càlɩ̀, də divɛn, tə nə. Kʋ yɩ wodiu, á nə wá sʋ̀rɩ́, yá kʋ lwán ga ywán, kʋ pa à mʋ̀ Ba-Yígúrə́-Jə-Tiu nə. 19 Á wá ja bʋtʋlʋ, á ma fwa cʋna kwɩan joŋi, á ga ja bɩnɩ nədʋ nədʋ pəbii bələ, á ma fwa nimarʋ joŋi. 20 Yɩɩ joŋwanʋ tə wá súrí kárɩ́ wiən təntən lənə dipɛn tə, pəbii bələ tə nə, ʋ yɩyarɩ à yáá con, ʋ pa nə. Joŋi wiən təntə yɩ à mʋ̀ Ba-Yígúrə́-Jə-Tiu cɩcɩ nyiən. Kʋ mʋ̀ yɩrɩ, tə yɩ Yɩɩ joŋwanʋ tə tori. 21 Kʋ dɩɩn təntə nə, á wá bon, á kə lalʋʋ tə mama nə, sə á bà, á kun duən nə, á pa nə dun. Yá á wà mɛ, sə á tʋn á tətə tʋtʋŋɩ mama. Kʋ yɩ nii, à mʋ̀ Yɩɩ pɩn, kʋ pʋ́pʋ́nɩ́, kʋ tún, máŋá də máŋá mama wuuu, á dwíə́ tə mama yɩrɩ, á nə wá kə lʋʋ wa, bwálɩ́ tə mama nə, á nə wá ya, máŋá də máŋá mama wuuu.
22 Máŋá tə, á nə wulə, á ce á kárɩ́ wiən, á lʋʋ nii tə wa, á mɛ, sə á yá á kárɩ́ nii wiən tə, á ba tə ce. Á wà mɛ, sə á gun wogunə tə də, tə nə wá ga á kárɩ́ wa. Á yágá wiən təntə, á pa labwana, də vərə nə. À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ.»
e. Pupwən nəfarʋ dɩɩn tə yoo
23 Ba-Yígúrə́-Jə-Tiu kʋ́ʋ̀ swɩ̀n Moyizə con, 24 sə ʋ swɩ̀n Yɩzərayɛlə dwíí tə con, ʋ wʋ́: «Barpɛ nii cànà tə təntən dɩɩn tə wá ya á sìə́ dɩɩn nəfarʋ. Á mɛ, sə á kun duən nə, á fwa pupwən, sə à bʋ́n á yoo. 25 Á wà mɛ, sə á tʋn á tətə tʋtʋŋɩ mama. Yá á dàń nə mɛ, sə á fwa jwəŋə, á sʋ̀rɩ́, á pa à mʋ̀ Ba-Yígúrə́-Jə-Tiu nə.»
f. Cʋna kwɩan dɩɩn nəfarʋ tə yoo
26 Ba-Yígúrə́-Jə-Tiu swɩ̀n Moyizə con, ʋ súrí lá, ʋ wʋ́: 27 «Barpɛ nii cànà təntə dɩan fugə dɩɩn tə wá ya cʋna kwɩan dɩɩn nəfarʋ. Yá á mɛ, sə á kun duən nə, á pa nə dun. Á wá vwa á nii, á ga fwa jwəŋə, á sʋ̀rɩ́, á pa à mʋ̀ Ba-Yígúrə́-Jə-Tiu nə. 28 Á wà mɛ, sə á tʋn tʋtʋŋɩ mama, kʋ dɩɩn nə. Cɩ́gá, kʋ yɩ cʋna kwɩan dɩɩn. Yá mə kʋ dɩɩn tə nə nə, á cʋna tə kwɩan joŋi mɛ, sə kʋ fwa, kʋ pa aba, à mʋ̀ Ba-Yígúrə́-Jə-Tiu yáá con, à nə yɩ á Yɩɩ. 29 Lìù tə mama, ʋ nə vɩga, sə ʋ vwa ʋ nii, kʋ dɩɩn nə, ʋ mɛ, sə ba lɩ wá, Yɩzərayɛlə lɩ̀à dwíí wa. 30 Lìù tə mama, ʋ nə tʋn tʋtʋŋɩ yiri mama, kʋ dɩɩn nə, à wá lɩ kʋ tíú mɩɩ, ʋ dwíí tə wa. 31 Á wà mɛ, sə á tʋn tʋtʋŋɩ mama. Kʋ yɩ nii, à mʋ Yɩɩ pɩn, kʋ pʋ́pʋ́nɩ́, kʋ tún, máŋá də máŋá mama wuuu, á dwíə́ tə mama yɩrɩ, á nə wá kə lʋʋ wa, bwálɩ́ tə mama nə, á nə wá ya máŋá də máŋá mama wuuu. 32 Dɩɩn təntə wá ya á sìə́ dɩɩn nəfarʋ, yá á mɛ, sə á vwa á nii. Á mɛ, sə á zìlí sìə́ dɩɩn təntə, kʋ nə zɩgɩ cànà tə dɩan nʋgʋ dɩɩn didəni nii nə, kʋ va kʋ yí kʋ tɩpʋrɩ didəni nii.»
g. Vuunən cànà
33 Ba-Yígúrə́-Jə-Tiu kʋ́ʋ̀ swɩ̀n Moyizə con, 34 sə ʋ swɩ̀n Yɩzərayɛlə dwíí tə con, ʋ wʋ́: «Barpɛ nii cànà təntə dɩan fugə də bonu dɩɩn nə, á mɛ, sə á də́ vuunən cànà, á ma pa dun à mʋ̀ Ba-Yígúrə́-Jə-Tiu nə. Á mɛ, sə á də́ ka, dɩan barpɛ. 35 Təntən dɩɩn tə nə, á wá kun duən nə, á pa nə dun. Á wà mɛ, sə á tʋn á tətə tʋtʋŋɩ mama. 36 Tə dɩan barpɛ təntə mama, á mɛ, sə á fwa jwəŋə, á sʋ̀rɩ́, á pɩn à mʋ̀ Ba-Yígúrə́-Jə-Tiu nə. Yá nana nii dɩɩn tə nə, á mɛ, sə á kun duən nə, á pa nə dun, á ga fwa jwəŋə, á sʋ̀rɩ́, á pa à mʋ̀ Ba-Yígúrə́-Jə-Tiu nə. Talɩkwa jə́rə́ dɩɩn təntə nə, á wà mɛ, sə á tʋn á tətə tʋtʋŋɩ mama.
37 Mə cànɩ̀ təntə nə, á mɛ, sə á kun duən nə, á də́, á ma pa dun à mʋ̀ Ba-Yígúrə́-Jə-Tiu nə. Á wá sʋ̀rɩ́ zìlə́ wiən, á pa nə. Á wá fwa jwəŋə tə, ba nə sʋ̀rɩ́, də zìlə́ wiən, tə nə yɩ vàrʋ́ càlɩ́, nə à yə̀ə́ nimarʋ jwəŋə, də zìlə́ won, kʋ nə yɩ divɛn, á pa à mʋ̀ Ba-Yígúrə́-Jə-Tiu nə, kʋ twá ndə nətʋ nə, cànà mama nə mɛ, sə ka də́. 38 Á wá fwa cànɩ̀ jwəŋə təntə, á súrí jwəŋə tə duən tə nə, á nə yàá fwa, á pɩn à mʋ̀ Ba-Yígúrə́-Jə-Tiu nə, à sìə́ dɩan tə nə. Á wá súrí jwəŋə təntə, á zìlə́ wiən tə də nə, də á nipoli jwəŋə tə nə, də á pupwən jwəŋə tə mama nə, á nə wá fwa, á pa à mʋ̀ Ba-Yígúrə́-Jə-Tiu nə.
39 Barpɛ nii cànà tə dɩan fugə də bonu dɩɩn nə, á nə cə á kárɩ́ wiən lʋʋ nii tə wa, á zwɛ̀ kwa nə, á mɛ, sə á də́ cànà, dɩan barpɛ, á ma pa dun à mʋ̀ Ba-Yígúrə́-Jə-Tiu nə. Təntən dɩɩn tə wá ya sìə́ dɩɩn, nana nii dɩɩn tə də ga wá ya sìə́ dɩɩn. 40 Təntən dɩɩn tə nə, á wá kwa tɩ̀án lənə, tə nə ziən, á pɩrɩ kʋra nɛɛ, á kɛ́n tɩ̀án vʋran, də buu nii tɩ̀án vʋran, á ja á jɩɩn, á ma fwa pupwən, dɩan barpɛ, à mʋ̀ Ba-Yígúrə́-Jə-Tiu yáá con, à nə yɩ á Yɩɩ. 41 Bɩnɩ mama, á mɛ, sə á də́ cànà təntə, á ma pa dun à mʋ̀ Ba-Yígúrə́-Jə-Tiu nə, dɩan barpɛ. Kʋ yɩ nii à pɩn, kʋ pʋ́pʋ́nɩ́, kʋ tún, máŋá də máŋá mama wuuu, á dwíə́ tə mama yɩrɩ, á nə wá kə lʋʋ wa, máŋá də máŋá mama wuuu. Á mɛ, sə á də́ cànà təntə, barpɛ nii cànà tə wa. 42 Cànà təntə máŋá nə yí, á mʋ̀ Yɩzərayɛlə lɩ̀à tə mɛ, sə á ya vuunən də̀ń, dɩan barpɛ. 43 Yá kʋ nətʋ wá pa, á dwíə́ tə mama, á nə wá kə lʋʋ wa lwarɩ, máŋá də máŋá mama wuuu, də à pɩn Yɩzərayɛlə dwíí tə ya vuunən wa, máŋá tə wa, à nə pɩn ba nan, ba yá Ezwipətə lʋʋ nii tə. À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ.»
44 Yá Moyizə dàń pɩn kwìə̀ təntə Yɩzərayɛlə dwíí tə nə, cànɩ̀ tə yoo wa, ba nə mɛ, sə ba kun duən nə, ba də́, ba ma pa dun Ba-Yígúrə́-Jə-Tiu nə.