Kwìə̀ tə Yɩɩ nə pɩn, ʋ wúlú bwálɩ́ tə canzɩlʋ tə yoo wa
24
1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Pa nii Yɩzərayɛlə dwíí tə nə, sə ba ja olivə* tɩ̀án lənə nʋga, ka nə ba durən jə, ba nə kàŋɩ̀, ba lɩ, ba bà, sə ba ma də ba sʋ̀rɩ́ tʋntʋnɩ tə, didəni mama. 3 Aron wá tanɩ tʋntʋnɩ tə, ʋ tún Yɩɩ jə́rə́ gansili tə kwa con dibiu tə wa, dansɩa patasɩn tə yáá con. Ʋ wá sʋ̀rɩ́ tə, ʋ tún lá nə, sə tə kə poni à mʋ̀ Ba-Yígúrə́-Jə-Tiu yáá con, máŋá mama, kʋ nə zɩgɩ didəni, kʋ va kʋ yí jɩjʋ. Kʋ yɩ nii à pɩn, kʋ pʋ́pʋ́nɩ́, kʋ tún, máŋá də máŋá mama wuuu, á dwíə́ tə mama yɩrɩ, á nə wá kə lʋʋ wa, máŋá də máŋá mama wuuu. 4 Aron wá tanɩ tʋntʋnɩ tə, ʋ tún canzɩlʋ tə yuu wa, ba nə fwa də sɩ́án tə nə ba durən jə, sə tə kə poni à mʋ̀ Ba-Yígúrə́-Jə-Tiu yáá con, tɩtɩn mama.»Kwìə̀ tə Yɩɩ nə pɩn, dipɛn tə yoo wa, ba nə túŋə́, ba pɩn wá
5 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ súrí lá, ʋ wʋ́: «Fwa mun, n ma wà dipɛn dàlá fugə də bələ. Dipɛn dàlɩ́ mama yɩ mun kilo bardʋ, n wá ma fwa. 6 N wá pwɛ̀ tə, n tún púlə́ bələ, à mʋ̀ Ba-Yígúrə́-Jə-Tiu yáá con, tabɩlʋ tə yuu wa, ba nə fwa də sɩ́án tə nə ba durən jə. Púlí mama wá ja dipɛn dàlá bardʋ. 7 N wá lwá wusinə tə nə ba durən jə, n tún púlí mama yuu wa. Yá kʋ kwa nə, n dàń wá sʋ̀rɩ́ wusinə tə, dipɛn tə bʋʋ wa, ndə won nə, ba nə sʋ̀rɩ́, ba pa à mʋ̀ Ba-Yígúrə́-Jə-Tiu nə, sə kʋ pa, à bʋ́n á yoo.
8 Sìə́ dɩɩn mama nə, á mɛ, sə á tanɩ dipɛn təntə, á tún à mʋ̀ Ba-Yígúrə́-Jə-Tiu yáá con, máŋá mama wuuu. Kʋ yɩ yoo tə, Yɩzərayɛlə dwíí tə nə mɛ, sə ba zìlí kʋ nii, máŋá də máŋá mama wuuu. 9 Dipɛn təntə dɩan nə cé, tə yɩ Aron də ʋ dwíí tə nə tɩ. Ba mɛ, sə ba də́ tə, bwálɩ́ wa, kʋ nə yɩ parɩ. Cɩ́gá, zìlə́ wiən tə mama wa, ba nə sʋ̀rɩ́, ba pɩn à mʋ̀ Ba-Yígúrə́-Jə-Tiu nə, dipɛn təntə yɩ wiən, tə nə yɩ à mʋ̀ Yɩɩ cɩcɩ nyiən. Kʋ yɩ nii á pɩn, kʋ pʋ́pʋ́nɩ́, kʋ tún, sə dipɛn təntə ya Aron də ʋ dwíí tə tori, máŋá də máŋá mama wuuu.»
Càn tə ba nə mɛ, sə ba kə lìù tə nə, ʋ nə twɩn Yɩɩ
10 Dɩɩn don nə, bɛɛ don, ʋ nuu nə yɩ Yɩzərayɛlə dwíí, ʋ nyɩna ga yɩ Ezwipətə tíú, zɩ̀n jara də Yɩzərayɛlə lìù don, Yɩzərayɛlə lɩ̀à dəkuu bwálɩ́ tə wa. 11 Yá bɛɛ tə, ʋ nuu nə yɩ Yɩzərayɛlə dwíí tə dàń swɩ̀n, ʋ twɩn Yɩrɩ tə nə yɩ parɩ tə, ʋ ga zɩrɩ ʋ kə kʋ nə. Ba ma ja wá, ba bà Moyizə con. Ʋ nuu tə yɩrɩ nə yɩ Swelomitə. Ʋ yɩ Dibəri bʋ̀á, Dan dwíí tə wa. 12 Yá ba dàń cɩ̀gà ʋ nə zəni, ba ma cʋga Ba-Yígúrə́-Jə-Tiu kori nə, bɛɛ təntə yoo wa.
13 Ba-Yígúrə́-Jə-Tiu ma swɩ̀n Moyizə con, ʋ wʋ́: 14 «Pa ba ja bɛɛ təntə, ʋ nə twɩn nə, ba ja nan kwa con, ba yá dəkuu bwálɩ́ tə. Lɩ̀à tə mama, ba nə nì də, ʋ twɩn nə tə, wá tún ba jɩ̀àn, ʋ yuu wa, yá Yɩzərayɛlə lalʋʋ tə mama dàń wá dɩlɩ wá də kapana, ba gʋ. 15 Kʋ kwa nə, n dàń wá pa nii Yɩzərayɛlə dwíí tə nə, də lìù tə mama, ʋ nə twɩn à mʋ̀, ʋ Yɩɩ tə, kʋ yɩ cʋna ʋ tʋn, yá ʋ cʋna tə yoo zɩŋa wá. 16 Yá lìù tə də mama, ʋ nə zɩrɩ ʋ kə à mʋ̀ Ba-Yígúrə́-Jə-Tiu yɩrɩ tə nə, kʋ tíú mɛ, sə ba gʋ wá. Yɩzərayɛlə lalʋʋ tə mama nə wá dɩlɩ wá də kapana, ba gʋ. Kʋ tíú nə yɩ vee, ʋ twá ʋ jə̀ə́, nə à yə̀ə́, ʋ yɩ Yɩzərayɛlə dwíí, ʋ mɛ, sə ba gʋ wá, ʋ nə zɩrɩ ʋ kə Yɩrɩ tə nə yɩ parɩ tə nə yɩrɩ.
17 Lìù nə mà ləzwənə, ʋ gʋ, kʋ tíú də mɛ, sə ba gʋ wá. 18 Lìù nə mà ʋ don vànɩ́, ʋ gʋ, ʋ mɛ, sə ʋ ja vànɩ́ don, ʋ ma ŋwɩ́n kʋ, ʋ pa kʋ tíú nə. Mɩɩ nə ŋwɩ́n mɩɩ.
19 Lìù nə mà ʋ don, ʋ cʋ̀gʋ̀, ʋ də mɛ, sə ba mà wá, ba cʋ̀gʋ̀, ndə nətʋ tə nə, ʋ nə cʋ̀gʋ̀ ʋ don tə. 20 Nandɔɔ tə nə kɛ́n, nə ŋwɩ́n nandɔɔ tə nə kɛ́n, yii nə ŋwɩ́n yii, yeli nə ŋwɩ́n yeli. Won tə, ʋ nə mà, ʋ cʋ̀gʋ̀ ʋ don tə yɩra, mə kʋ nə, ba wá mà, ba cʋ̀gʋ̀ ʋ də yɩra.
21 Lìù nə mà ʋ don vànɩ́, ʋ gʋ, ʋ mɛ, sə ʋ ja vànɩ́ don, ʋ ma ŋwɩ́n kʋ, ʋ pa kʋ tíú nə. Yá lìù nə mà ləzwənə ʋ gʋ, kʋ tíú mɛ, sə ba gʋ wá.
22 Á mɛ, sə á bʋ̀rɩ̀ vərə tə nə twá ba jə̀ə́, də Yɩzərayɛlə dwíí lɩ̀à tə mɛ bʋra, á pa kʋ twá cɩ́gá nə, ndə kʋ nə mɛ nətʋ. Cɩ́gá, à mʋ̀ nə yɩ Ba-Yígúrə́-Jə-Tiu, à nə yɩ á Yɩɩ.»
23 Yá Moyizə dàń swɩ̀n yìə̀n təntə, Yɩzərayɛlə dwíí tə con. Ba ja bɛɛ tə nə twɩn Yɩɩ tə, ba nan kwa con, ba yá ba dəkuu bwálɩ́ tə. Yá ba dàń dɩlɩ wá də kapana, ba gʋ. Yɩzərayɛlə dwíí tə tʋn kʋ, ndə nətʋ tə nə, Ba-Yígúrə́-Jə-Tiu yà nə pɩn nii Moyizə nə, sə ba tʋn.