Kárɩ́ sìə́ bɩnɩ
25
1 Ba-Yígúrə́-Jə-Tiu swɩ̀n Moyizə con, Sinayi paan tə yuu wa, 2 sə ʋ swɩ̀n Yɩzərayɛlə dwíí tə con, ʋ wʋ́: «Máŋá tə, á nə zʋa lʋʋ nii tə wa, à nə pɩn aba, á mɛ, sə á yá tɩa tə, á pa ka sìí bɩna duən wa, sə kʋ pa dun à mʋ̀ Ba-Yígúrə́-Jə-Tiu nə. 3 Á wá dù á kárɩ́, á ce tə wiən, á ga goŋi á divɛn tɩ̀án nɛɛ, bɩnɩ mama, kʋ ja va bɩna bardʋ. 4 Yá barpɛ nii bɩnɩ tə wá ya sìə́ bɩnɩ. Á mɛ, sə á yá tɩa tə, á pa ka sìí kʋ bɩnɩ təntə wa, sə kʋ pa dun à mʋ̀ Ba-Yígúrə́-Jə-Tiu nə. Á wà mɛ, sə á dù á kárɩ́, á ga wà mɛ, sə á goŋə á divɛn tɩ̀án nɛɛ də. 5 Á wà mɛ, sə á ca á kárɩ́ wotaran tə də tətə. Yá á wà mɛ, sə á pʋ̀rɩ́ divɛn tɩ̀án lənə tə, divɛn tɩ̀án tə yuu wa, á nə wà tə nɛɛ goŋi. Cɩ́gá, kʋ mɛ, sə kʋ ya tɩa tə sìə́ bɩnɩ. 6 Yá wotaran tə nə wá bɩ tə tɩ̀àn nə, tɩa tə yuu wa, ka sìə́ bɩnɩ tə wa, dàń nə wá ya á nii wodiu. Wotaran təntə nə wá ya á mʋ̀, də á tʋtʋnbɩa, də á tʋtʋnbwɩɩ, də á tʋ̀tʋ̀nà tə nə tʋŋa, sə á ŋwɩ́n ba, də vərə tə nə wulə á yuu, máŋá mancɩn wa, nii wodiu. 7 Wotaran təntə nə wá ya á vàná tə, də á lʋʋ nii tə wa ganaŋa tə də nii wodiu.»Pupoli bɩnɩ
8 Ba-Yígúrə́-Jə-Tiu swɩ̀n, ʋ súrí lá, ʋ wʋ́: «Á mɛ, sə á gàlà sìə́ bɩna barpɛ, nə à yə̀ə́ bɩna barpɛ barpɛ, dəkurən barpɛ. Kʋ nətʋ tə fwa bɩna sapwɩlə də nʋgʋ. 9 Yá barpɛ nii cànà tə dɩan fugə dɩɩn tə yɩ cʋna kwɩan dɩɩn nəfarʋ. Á wá wúrí pupwən nabwanʋ, lʋʋ nii tə mama wa. 10 Mə nətʋ nə, á wá bòrì, á bɩrɩ də finu nii bɩnɩ tə yɩ à mʋ̀ Yɩɩ nyiən. Yá á dàń wá bòrì lʋʋ nii tə mama wa, də lìù mama mɛ, sə ʋ tɩnɩ ʋ tɩ̀àn. Kʋ wá ya pupoli bɩnɩ. Á lìù mama yà nə kwɩ̀n ʋ tɩa nə, ʋ dàń wá pìí ʋ jon ka, ʋ tɩnɩ, kʋ bɩnɩ təntə wa. Yá á lìù mama yà nə jìgə̀ yoŋu, ʋ tʋŋa, sə ʋ ma ŋwɩ́n jɩŋɩ, ʋ dàń wá tɩnɩ ʋ tɩ̀àn, ʋ va ʋ sàń. 11 Finu nii bɩnɩ tə wá ya á pupoli bɩnɩ. Yá á wà mɛ, sə á dù wiən, á ga wà mɛ sə, á ca wotaran tə nə wá bɩ tə tɩ̀àn nə, kárɩ́ tə wa, kʋ bɩnɩ tə nə. Á wà mɛ, sə á pʋ̀rɩ́ divɛn tɩ̀án lənə tə, divɛn tɩ̀án tə yuu wa, á nə wà tə nɛɛ goŋi. 12 Cɩ́gá, kʋ yɩ pupoli bɩnɩ, yá á mɛ, sə á jələ kʋ, də kʋ yɩ à mʋ̀ Yɩɩ nyiən. Yá á wàá wotaran tə mʋ̀, tə nə bɩga tə tɩ̀àn nə, kárɩ́ tə wa, á də́.
13 Pupoli bɩnɩ tə wa, á lìù mama wá pìí ʋ jon ʋ tɩa, ʋ tɩnɩ, də ʋ yà nə kwɩ̀n ka nə. 14 Də á yà nə yoli tɩa, á dwíí lìù yuu wa, nə à yə̀ə́, á nə yə̀ tɩa, ʋ con, á lìù mama dàn ká tʋn gɩgɩra ʋ don yɩra. 15 Á mɛ, sə á jələ bɩna tə nə kɛ̀ń pupoli bɩnɩ tə kwa nə, də woceri bɩna tə nə ga, sə pupoli bɩnɩ don pìí kʋ yí, á ma yoli, nə à yə̀ə́, á ma yə̀ á tɩa, duən yuu wa. 16 Də bɩna tə nə ga, sə pupoli bɩnɩ tə ma yí, nə dáá, tɩa tə də səbiu wá ya dánɩ́. Yá bɩna tə nə ga, sə pupoli bɩnɩ tə ma yí, nə kʋ́ʋ̀ ba dáá, bwálɩ́ tə də səbiu wà mɛ, sə kʋ ya dánɩ́. Cɩ́gá, kʋ yɩ woceri bɩna tə nii nə, á mɛ, sə á jələ, á ma də́ tɩa tə yəə. 17 Á lìù mama wà mɛ, sə ʋ tʋn gɩgɩra ʋ dwíí lìù yɩra. Mə kʋ mʋ̀ nə wá bɩrɩ də, á dəri à mʋ̀, á Yɩɩ tə fən. Cɩ́gá, à mʋ̀ nə yɩ Ba-Yígúrə́-Jə-Tiu, à nə yɩ á Yɩɩ.
18 Á mɛ, sə twá à nii yìə̀n tə nə, á ga tʋn yìə̀n tə, à nə bɩrɩ aba. Yá á wá ya lʋʋ nii tə wa, də yazurə. 19 Tɩa tə wá zɩn lənə, ka pa aba, á də́ á sú, yá á wá ya lʋʋ nii tə wa, də yazurə.
20 Kʋ wàá də, á wá bwe á tɩ̀àn, á wʋ́: “Bɛ̀ɛ̀ nə, nə wá də́, barpɛ nii bɩnɩ tə wa? Cɩ́gá, nə ba cwəŋə jə, sə nə dù nə kárɩ́, nə ga ba cwəŋə jə, sə nə ca tə wiən!” 21 À wá tʋn zəni á yɩra zənzən, bardʋ nii bɩnɩ tə wa. À wá pa á kárɩ́ wiən bɩ, tə yí á diŋə, bɩna batwa. 22 Á wá dù á kárɩ́, nana nii bɩnɩ tə wa, yá kʋ tə yɩ wodidwan nə, á wá də́ bɩnɩ təntə wa, kʋ va kʋ yí nʋgʋ nii bɩnɩ tə woceri.
23 Á wà mɛ, sə á yoli tɩa lìù yuu wa, sə ʋ tɩnɩ ka mɩ́ámɩ́án. Cɩ́gá, lʋʋ nii tə yɩ à mʋ̀ nə tɩ. Á yɩ ndə vərə nə, á nə twá á jə̀ə́ à con, máŋá mancɩn wa. 24 Lʋʋ nii tə mama wa, à nə wá pa aba, sə á tɩnɩ, á mɛ sə á pa cwəŋə, sə lɩ̀à wànɩ́ tɩa, ba pìí ba yə̀ ba jon.
25 Zʋrɩ nə jə á dwíí tə wa lìù, kʋ pa ʋ fʋ́ ʋ tɩa, ʋ yoli, ʋ nubiu tə, ʋ nə jə cwəŋə, sə ʋ pìí ʋ yə̀ ʋ mʋ̀ zʋrʋ tə won, ʋ jon, mɛ, sə ʋ pìí ʋ yə̀ tɩa tə, ʋ jon. 26 Də lìù nə ba nubiu jə, ʋ nə mɛ, sə ʋ pìí ʋ yə̀ ʋ tɩa, ʋ jon, tɩa tə tíú tətə nə twi, ʋ na ka kwənə, sə ʋ ma pìí ʋ yə̀ ka, ʋ jon, 27 ʋ wá jələ bɩna tə nə kɛ̀ń, tɩa tə yolu kwa nə, ʋ ga ŋwɩ́n bɩna tə yà nə ga, sə pupoli bɩnɩ ma yí tə kwənə, ʋ pa lìù tə nə, ʋ yà nə yə̀ tɩa tə. Yá ʋ dàń wá pìí ʋ jon ʋ tɩa tə. 28 Yá ʋ jɩɩn nə ba won jə, sə ʋ ma pìí ʋ yə̀ ʋ tɩa tə, ʋ jon, lìù tə nə yə̀ tɩa tə wá tɩnɩ ka, kʋ va kʋ yí pupoli bɩnɩ tə. Kʋ máŋá təntə wa, tɩa tə tíú dàń wá jon ʋ tɩa.
29 Bɛɛ nə yoli dìə̀ tɩʋ wa, ba nə lwə̀, ba kɩkarɩ də biritaŋʋ, dìə̀ tə yolu kwa nə, ka tíú jə bɩnɩ pə́rɩ́, sə ʋ ma pìí ʋ yə̀ ka, ʋ jon. Dìə̀ tə ka pìí ka yə̀ ka jon tə wà mɛ, sə kʋ kɛ̀ń bɩnɩ yáá, ka yolu tə kwa nə. 30 Dìə̀ təntə yolu tə kwa nə, ka tíú nə wà wànɩ́, ʋ pìí ʋ yə̀ ka, ʋ jon, də kʋ tə wà bɩnɩ yí, dìə̀ tə wá jì lìù tə nə yə̀ ka tə, də ʋ dwíí nyiən mɩ́ámɩ́án. Yá ba kʋ́ʋ̀ bá pa dìə̀ tə ka tíú nə, pupoli bɩnɩ tə wa. 31 Yá dìì tə mʋ̀, tə nə wulə tɩbii tə wa, tə nə wà lwè, tə kɩkarɩ də biritaŋʋ, yolu wá ya ndə tɩa yolu nə. Dìì təntə mʋ̀ tɩ̀án wàá tə, ba pìí ba yə̀, ba joŋə máŋá mama. Yá lɩ̀à tə nə yə̀ tə mɛ, sə ba pìí ba pa tə, tə tɩ̀án nə, pupoli bɩnɩ tə wa.
32 Yá kʋ dàń nə yɩ Levi dwíí tə mʋ̀, ba jə cwəŋə máŋá mama wuuu, sə ba pìí ba yə̀ ba dìì, ba jon, Levi dwíí tɩan tə wa. 33 Yá kʋ nə swə, kʋ yɩ Levi dwíí tə wa lìù nə jon ʋ don dìə̀, ʋ yə̀, Levi tɩʋ tə don wa, ʋ mɛ, sə ʋ pìí ʋ pa dìə̀ tə, ka tíú nə, pupoli bɩnɩ tə wa. Cɩ́gá, Yɩzərayɛlə lʋʋ nii tə wa, Levi dwíí tɩan tə wa dìì tə yɩ Levi dwíí tə nə tɩ, máŋá mama wuuu. 34 Kárɩ́ tə nə wulə Levi dwíí tɩan tə nii nə, wàrɩ̀ tə yoli. Cɩ́gá, tə yɩ Levi dwíí tə nə tɩ, máŋá mama wuuu.»
Zʋra sáŋʋ́ yoo
35 Ba-Yígúrə́-Jə-Tiu swɩ̀n, ʋ súrí lá, ʋ wʋ́: «Á nubɩa tə, ba nə wulə á səpuni nə, wa lìù nə jìgə̀ zʋrʋ, kʋ pa wiən mùrì wá, ʋ nə swə, ʋ yɩ vee, ʋ twá ʋ jə̀ə́ á con, nə à yə̀ə́ vee, ʋ nə wulə á yuu, máŋá mancɩn wa, á mɛ, sə á san wá, sə ʋ wànɩ́, ʋ twá ʋ ya á səpuni nə. 36 Á nə pɩn wá won, á wà mɛ, sə á jon nywarɩ kʋ yuu wa. Mə kʋ mʋ̀ nə wá bɩrɩ də, á dəri à mʋ̀, á Yɩɩ tə fən, yá á nubiu tə dàń wá twá ʋ ya á səpuni nə. 37 Á nə jɩŋɩ wa səbiu, nə à yə̀ə́ wodiu, á wà mɛ, sə á pa, ʋ ŋwɩ́n kʋ, kʋ doni kʋ tə, á nə pɩn wá. 38 À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ. À mʋ̀ nə pɩn á nan, á yá Ezwipətə lʋʋ nii tə, sə à ga pa aba Kanaan lʋʋ nii tə, sə à mʋ̀ nə ya á Yɩɩ.
39 Á nubɩa tə, ba nə wulə á səpuni nə, wa lìù nə jìgə̀ zʋrʋ, kʋ pa, ʋ yoli ʋ tɩ̀àn, á lìù don yuu wa, kʋ tíú wà mɛ, sə ʋ pa, ʋ tʋn yoŋu tʋ̀tʋ̀nán. 40 Lìù tə nə yə̀ wá tə mɛ, sə ʋ ja wá, ndə lìù nə, ʋ nə tʋŋa, sə ba ŋwɩ́n wá, nə à yə̀ə́, ndə vee nə, ʋ nə wulə kʋ tíú yuu, máŋá mancɩn wa. Ʋ wá tʋn, ʋ pa lìù tə nə yə̀ wá tə nə, kʋ va kʋ yí pupoli bɩnɩ tə. 41 Yá ʋ dàń wá nan kʋ tíú con, ʋ mʋ̀ də ʋ bɩ̀á, ʋ pìí ʋ va ʋ sàń, ʋ nyɩna-ba tɩa wa. 42 Cɩ́gá, Yɩzərayɛlə dwíí tə yɩ à mʋ̀ tʋ̀tʋ̀nà. À mʋ̀ nə pɩn ba nan, ba yá Ezwipətə lʋʋ nii tə. Kʋ mʋ̀ yɩrɩ, lìù wàrɩ̀ ba ʋ yoli, ndə ba nə yoli ywə́ŋə́ nətʋ. 43 Á wà mɛ, sə á fɩfɩn ba. Mə kʋ mʋ̀ nə wá bɩrɩ də, á dəri à mʋ̀, á Yɩɩ tə fən.
44 Á nə pɩ̀à ywə́ŋə́, də tʋtʋnbwɩɩ, sə ba ya á nyiən, kʋ yɩ dwíə́ tə nə kɩkarɩ aba wa nə, á mɛ, sə á yə̀ ba. 45 Á wàá ywə́ŋə́ á yə̀, vərə bɩ̀á tə də wa, ba nə twá ba jə̀ə́ á con, máŋá mancɩn wa, nə à yə̀ə́ ba dwíí tə wa, ba nə lɩrɩ á lʋʋ nii tə wa. Yá ba dàń wá ya á mʋ̀ nyiən. 46 Á wá yá ba, á pa á bɩ̀á nə, á tɩan kwa nə, sə ba ya á bɩ̀á tə də nyiən. Ba dàń wá ya á ywə́ŋə́, máŋá də máŋá mama wuuu. Yá á nubɩa Yɩzərayɛlə dwíí lɩ̀à tə mʋ̀, á lìù mama wà mɛ, sə ʋ fɩfɩn ba wa lìù.
47 Vee nə twá ʋ jə̀ə́ á con, nə à yə̀ə́ ʋ nə wulə á yuu, máŋá mancɩn wa, ʋ wàá jɩjə tíú, ʋ twi ʋ jì. Yá á nubiu tə don, ʋ də vee tə nə yɩ jənduən, wàá ʋ twi, ʋ jì zʋrʋ, kʋ pa ʋ yoli ʋ tɩ̀àn vee təntə yuu wa, nə à yə̀ə́ vərə dwíí tíú don yuu wa. 48 Kʋ kwa nə, á nubiu tə jə cwəŋə, sə ʋ pìí ʋ yə̀ ʋ tɩ̀àn, ʋ jon. Ʋ nubiu don wàá wá, ʋ yə̀, ʋ joŋə. 49 Ʋ nə ba nubiu jə, ʋ nyɩna nubiu, nə à yə̀ə́ ʋ nɩbarɩ, nə à yə̀ə́ ʋ nyɩna nubiu bìú, nə à yə̀ə́ ʋ nɩbarɩ bìú, nə à yə̀ə́ ʋ dwíí tíú don wàá wá, ʋ yə̀, ʋ joŋə. Ʋ tətə nə kʋ́ʋ̀ nɩ ʋ ka pìí ka yə̀ ka jon tə dɩ̀àn, ʋ wàá ʋ tɩ̀àn ʋ yə̀, ʋ joŋə. 50 Yá ʋ də lìù tə nə yə̀ wá tə mama dàń wá gàlà bɩna tə nə wulə bɩnɩ tə, ʋ nə yoli ʋ tɩ̀àn tə, də pupoli bɩnɩ tə pwə́rə́ wa. Yá bɩna tə nii, ba nə wá gàlà, ba na, dàń nə wá bɩrɩ kwənə tə, lìù tə nə pɩ̀à, sə ʋ pìí ʋ yə̀ ʋ tɩ̀àn, ʋ jon tə, nə mɛ, sə ʋ ŋwɩ́n. Bɩna təntə kwənə tə yɩ ba wá jələ, ndə tʋtʋnʋ tʋtʋŋɩ ŋwɩ́rán nə. 51 Də bɩna tə nə ga, sə pupoli bɩnɩ tə ma yí, nə dáá, lìù tə nə pɩ̀à, sə ʋ pìí ʋ yə̀ ʋ tɩ̀àn, ʋ jon tə, wá ŋwɩ́n ʋ yolu kwənə tə zʋnɩ, ʋ pa lìù tə nə yə̀ wá tə nə. 52 Yá bɩna tə nə ga, sə pupoli bɩnɩ tə ma yí, nə kʋ́ʋ̀ ba dáá, lìù tə nə pɩ̀à, sə ʋ pìí ʋ yə̀, ʋ tɩ̀àn, ʋ jon tə mɛ, sə ʋ gàlà bɩna təntə, ʋ ga ŋwɩ́n ʋ yolu kwənə tə, kʋ mɛ də bɩna təntə nii, ʋ pa lìù tə nə yə̀ wá tə nə. 53 Máŋá tə mama, á nubiu tə nə wá ya ʋ yuu tíú tə con, ʋ yuu tíú tə mɛ, sə ʋ ja wá, ndə lìù nə, ʋ nə tʋŋa, sə ʋ ga ŋwɩ́n wá, bɩnɩ bɩnɩ. Yá á wà mɛ, sə á sɛ̀, á pa, ʋ yuu tíú tə fɩfɩn wá, á yɩ́á yuu. 54 Yá á nubiu tə nə wà yuywaŋʋ nədʋ mama nɩ, sə ʋ wànɩ́, ʋ pìí ʋ yə̀ ʋ tɩ̀àn, ʋ jon, pupoli bɩnɩ tə nə yí, ʋ mɛ, sə ʋ tɩnɩ ʋ tɩ̀àn, ʋ mʋ̀ də ʋ bɩ̀á.»
Ba-Yígúrə́-Jə-Tiu yɩ Yɩzərayɛlə lɩ̀à Yɩɩ
55 «Yɩzərayɛlə dwíí tə yɩ à mʋ̀ tʋ̀tʋ̀nà. À mʋ̀ nə pɩn ba nan, ba yá Ezwipətə lʋʋ nii tə. À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ.