Joŋwana 26

1 Á dànà ká fwa kʋ̀nkʋ̀n yɩa. Á dànà ká zɩgɩ woŋwanan, nə à yə̀ə́ culu kapana. Á dànà ká sà kapana, á ma nyən də wiən, á kə á lʋʋ nii tə wa, á twɩ tə yáá con, á pɩn tə dun. Cɩ́gá, à mʋ̀ nə yɩ Ba-Yígúrə́-Jə-Tiu, à nə yɩ á Yɩɩ. 2 Á mɛ, sə á zìlí à sìə́ dɩan* tə, də à wúlú bwálɩ́ tə. À mʋ̀ nə yɩ Ba-Yígúrə́-Jə-Tiu.»

Yɩɩ wá tʋn zəni Yɩzərayɛlə dwíí tə yɩra, də ba nə zìlí ʋ nimarʋ tə nii

3 Ba-Yígúrə́-Jə-Tiu swɩ̀n, ʋ súrí lá, ʋ wʋ́: «Á nə twá à nii yìə̀n tə nə, á ga tʋŋa yìə̀n tə, à nə bɩrɩ aba, 4 à wá pa dwɛ̀ɛ̀ nà, tə pa aba, tə máŋá wa. Kárɩ́ wiən wá bɩ, yá tɩ̀án tə də ga wá zɩn lənə. 5 Á wá mà mɩna wuuu, kʋ va kʋ yí divɛn tɩ̀án lənə pʋ̀rʋ́ máŋá, yá á wá pʋ̀rɩ́ divɛn tɩ̀án lənə wuuu, kʋ va kʋ yí dùrí máŋá. Á wá na wodiu, kʋ bʋ́rɩ́ aba, á ga wá ya á lʋʋ nii tə wa, də yazurə. 6 À wá kə sìə́ lʋʋ nii tə wa, yá á nə dwɛ̀, lìù mama bá wʋwalɩ aba. À wá pa wojandirən tə jɛ́n, lʋʋ nii tə wa. Yá kʋ̀ʋ̀ bá ya á lʋʋ nii tə wa. 7 Á wá dɩŋa á dʋŋa, á ja á gʋ, də kwatara sɩ̀án. 8 Á lɩ̀à bonu wá dɩŋa dʋŋa bíí, á lɩ̀à bíí ga dɩŋa dʋŋa mʋ̀rʋ̀ fugə. Yá á wá gʋ á dʋŋa tə, də kwatara sɩ̀án. 9 À wá ywàń á yuu, à pa á lɩra bɩ̀á, sə á dwíí pùlì zənzən. Yá à wá ywàń à nimarʋ tə yuu, à nə tún də aba. 10 Á kárɩ́ wiən wá bɩ zənzən, kʋ pa, á də́ wodidwara tə, á nə tanɩ á tún, kʋ dán. Á wá kòrí wodidwara tə tətə, á yá bwálɩ́ nə, á ga kə wodidʋra. 11 À wá kə à wúlú bwálɩ́, á titəŋi wa, yá à waa bá nan aba. 12 À wá ya á Yɩɩ, à ya á titəŋi wa, á də ga wá ya à mʋ̀ lɩ̀à. 13 À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ. À mʋ̀ nə pɩn á nan, á yá Ezwipətə lʋʋ nii tə, sə á kʋ́ʋ̀ dàn ká ya Ezwipətə tɩ̀án ywə́ŋə́. À mʋ̀ ga nə cʋ̀gʋ̀ Ezwipətə dɩ̀àn tə, á yuu wa, à pa, á zɩ̀n á yuu yɩɩ nə, á ma vəli.»

Yɩɩ wá pa càn yí Yɩzərayɛlə dwíí tə, də ba nə wà ʋ nimarʋ tə nii zìlí

14 Yá Ba-Yígúrə́-Jə-Tiu swɩ̀n, ʋ wʋ́: «Yá á nə wà à nii zìlí, á nə vɩga, sə á tʋn yìə̀n tə mama, à nə bɩrɩ aba, 15 á nə vɩga à nii yìə̀n tə, á waa nə nan yìə̀n tə, à nə pɩn aba nii tə yuu wa, kʋ pa, á vɩ, sə á tʋn yìə̀n tə mama, à nə bɩrɩ aba, yá á dàń ga cʋ̀gʋ̀ à nimarʋ tə, 16 á nəŋə kʋ tə, à nə wá ma tʋn aba. À wá kə pucʋnɩ á waa zənzən, kʋ pa á bwànɩ́, á yɩra ga lɩŋɩ. Yá kʋ nətʋ tə wá pa, á yɩ́á fùrì, kʋ ga kə bwànɩ̀ á nə. Á wá dù á wodwiə tʋtʋ. Cɩ́gá, á dʋŋa nə wá də́ tə lənə. 17 À wá viviri, à zɩgɩ á nə, à pa á dʋŋa ta aba, ba də́, ba ga də́ dɩ̀àn, á yuu wa. Á wá dəri, yá lìù wà aba dɩŋɩ.

18 Yá də kʋ nətʋ mɛ, á tə nə ba à nii zìlí, à wá súrí á càn tə, dəkurən barpɛ, á cʋna tə yɩrɩ. 19 À wá pa lanworu tə jì nəkʋrʋ, ndə lugu nə, à ga pa á tɩa tə də jì nəkʋrʋ, ndə cɩnɩan nə. Mə kʋ wá twá nətʋ, à ma cʋ̀gʋ̀ á dɩ̀àn tə, á nə ma fwa fwiə. 20 Á wá gwàrɩ̀ á tɩ̀àn, tʋtʋ. Tɩa tə kʋ́ʋ̀ bá zɩn lənə, yá tɩ̀án tə də kʋ́ʋ̀ bá lənə bɩ̀á. 21 Á zɩɩn tə nə ba nə̀ń, á tə nə vɩ, sə á zìlí à nii, à kʋ́ʋ̀ wá súrí á càn tə, kʋ mɛ də á cʋna tə, dəkurən barpɛ. 22 Yá à dàń wá tʋn gaʋ wojandirən á nə, à pa tə ja á bìsɩ́ná, tə ga cʋ̀gʋ̀ á vàná, tə zwɛ̀. Tə wá cʋ̀gʋ̀ aba, tə ga mancɩn, yá lɩ̀à kʋ́ʋ̀ bá ya á coŋi yuu.

23 Yá də kʋ nətʋ mɛ, á zɩɩn tə nə ba nə̀ń, á tə nə ba sɛ̀, sə à mʋ̀ nə kə aba cwəŋə wa, 24 à də wá zɩgɩ á nə, yá à kʋ́ʋ̀ wá súrí á càn tə, dəkurən barpɛ, á cʋna tə yɩrɩ. 25 Yá à dàń wá dɩ kʋ̀ʋ̀ á nə, à ma kə aba càn wa, á nə cʋ̀gʋ̀ à nimarʋ tə yɩrɩ. Á wá dəri, á səgə á tɩfaran tə wa, yá à wá pa tɩan yayɩpwarʋ tʋ á titəŋi wa, á dʋŋa tə jɩɩn ga wá zʋ aba. 26 Yá máŋá tə, à nə wá pa wodiu mùrì aba, kana fugə wá fwa wodiu, kúrí nədʋ wa, ba kəri, ba ma tara aba, á də́, yá á bá sú.

27 Yá də kʋ nətʋ mɛ, á zɩɩn tə nə ba nə̀ń, á tə nə ba à nii zìlí, 28 à də wá zɩgɩ á nə, də lɩŋa, yá à kʋ́ʋ̀ wá súrí á càn tə, dəkurən barpɛ, á cʋna tə yɩrɩ. 29 Yá á dàń wá də́ á bɩ̀á, də á bwɩ̀ɩ́. 30 À wá cʋ̀gʋ̀ á culən dədwələn tə, à ga mà á jwəŋə bwálá tə, á nə ma sʋ̀rɩ́ wusinə tə, à lwa. À wá dà á tɩga tə, á woŋwanan tə gʋgwɩran tə yuu wa, à waa nə nan aba zənzən yɩrɩ. 31 À wá pa á tɩfaran tə jì dibwərən, à ga cʋ̀gʋ̀ á woŋwanan bwálá tə, à pa tə jì digə. À kʋ́ʋ̀ bá sɛ̀, à pa, á kòrì nə, də á jwəŋə tə, də á zìlə́ wiən tə lwán tə. 32 À tətə nə wá cʋ̀gʋ̀ á lʋʋ nii tə mɩ́ámɩ́án. Yá kʋ wá gwárɩ́ á dʋŋa tə, ba nə wá jon kʋ, ba ya kʋ wa. 33 À wá dɩ kʋ̀ʋ̀ á wa, à pa á laga duən yáá nə, á zʋ dwíə́ nəkaran* tə wa. Á lʋʋ nii tə wá jì kasɔɔ lanworu, á tɩfaran tə ga jì dibwərən. 34 Yá bɩna tə mama, á nə wá fwa á dʋŋa tə lʋʋ nii wa, á lʋʋ nii tə, á nə vìí á yá, dàń wá sìí kʋ sìə́ bɩna tə mama, á nə vɩga, sə á yá kʋ, á pa kʋ sìí. 35 Máŋá təntə mama, lìù mama nə bá ya lʋʋ nii tə wa, tɩa tə dàń wá wànɩ́ ka na sìə́ tə, á nə vɩga, sə á pa ka, sìə́ bɩna tə wa, máŋá tə, á yà nə wulə lʋʋ nii tə wa. 36 Á wa lɩ̀à tə, ba mɩɩ nə wà ya lʋʋ wa, á dʋŋa tə lʋʋ nii wa, à wá pùrì ba bɩcanɩ. Yá tɩ̀ʋ́ vʋʋ tətə nə dwan, ba wá dəri, ndə lìù nə yàá dəri dʋŋʋ kwatara sɩ̀ʋ́ yáá nə. Ba ga wá tʋ, yá lìù wà ba dɩŋɩ. 37 Ba wá bwɩn duən, ndə lɩ̀à nə dəri dʋŋʋ kwatara sɩ̀ʋ́ yáá nə, yá lìù wà ba dɩŋɩ. Á kʋ́ʋ̀ bá wànɩ́ á zɩgɩ, á ta á dʋŋa. 38 Á wá tɩ dwíə́ nəkaran tə wa, yá á dʋŋa tə lʋʋ nii tɩa nə wá də́ aba. 39 Yá á wa lɩ̀à tə, ba nə bá tɩ, wá bwànɩ̀, á dʋŋa tə lʋʋ nii tə wa, ba tətə cʋna tə, də ba nɩbara-ba cʋna tə yɩrɩ.»

Yɩɩ wá pìí ʋ bʋ́n ʋ nimarʋ tə yoo

40 Ba-Yígúrə́-Jə-Tiu swɩ̀n, ʋ súrí lá, ʋ wʋ́: «Máŋá don wa, á wa lɩ̀à tə, ba mɩɩ nə wà ya lʋʋ wa, wá swɩ̀n ba cʋna tə, ba də ba nɩbara-ba nə tʋn à yáá con, ba bɩrɩ. Ba wá lwarɩ də, ba yɩn zɩbanənyɩna, ba nə vɩga, sə ba zìlí à nii yɩrɩ. 41 Yá ba zɩbaniu təntə dàń nə pɩn, à də zɩgɩ ba nə, à ga pa dʋŋa ja ba, ba va ba lʋʋ nii wa. Yá máŋá don wa, ba wá mun ba tɩ̀àn, ba ga swɩ̀n, ba bɩrɩ də, ba tʋn cʋna, kʋ mʋ̀ nə pɩn, à kə ba càn wa. 42 Yá à dàń wá pìí à bʋ́n à nimarʋ tə yoo, à nə tún də Zwakɔbə, à wá bʋ́n kʋ tə yoo, à nə tún də Yɩzakə, à ga wá bʋ́n kʋ tə də yoo, à nə tún də Abərahamə. Yá à wá pìí à bʋ́n lʋʋ nii tə də yoo. 43 Cɩ́gá, ba wá dəri, ba yá lʋʋ nii tə, pucʋnɩ nəfarʋ wa, kʋ ga wá na sìə́ bɩna, kʋ máŋá təntə wa. Yá ba mʋ̀ dàń wá də́ càn, ba cʋna tə yɩrɩ. Cɩ́gá, ba vɩga, sə ba tʋn yìə̀n tə, à nə pɩn ba nii, sə ba tʋn, ba waa ga nan yìə̀n tə, à nə pɩn tə pʋ́pʋ́nɩ́, tə tún, sə ba twá tə nə. 44 Yá máŋá tə, ba nə wá ya ba dʋŋa lʋʋ nii tə wa, à mʋ̀ bá vɩ ba, à dʋgʋ mɩ́ámɩ́án. À waa bá nan ba, kʋ ja lɛ tɩa nə, sə kʋ pa, à gʋ ba dwíí tə, à zwɛ̀. À nə tʋn kʋ, à wá cʋ̀gʋ̀ à nimarʋ tə, à nə tún də ba. Cɩ́gá, à mʋ̀ nə yɩ Ba-Yígúrə́-Jə-Tiu, à nə yɩ ba Yɩɩ. 45 À wá fwa pubwanʋ ba yɩra, yá à wá pìí à bʋ́n à təntən nimarʋ tə yoo, à nə tún də ba nɩbara-ba tə, à nə pɩn ba nan, ba yá Ezwipətə lʋʋ nii tə, dwíə́ nəkaran tə yɩ́á yuu, sə à mʋ̀ nə ya ba Yɩɩ. À mʋ̀ nə yɩ Ba-Yígúrə́-Jə-Tiu.»

46 Mə Ba-Yígúrə́-Jə-Tiu nii yìə̀n tə nə, ʋ nə twá də Moyizə, ʋ ma tún ʋ də Yɩzərayɛlə dwíí tə pwə́rə́ wa, Sinayi paan tə yuu wa. Tə yɩ kwìə̀, də yìə̀n, ʋ nə pɩn ba nii, sə ba twá tə nə, də yìə̀n, ʋ nə pɩn ba nii, sə ba tʋn.