YIƏN DUƏN YUU WA KWIƏ
Nipoli jwəŋə kwənə
27
1 Ba-Yígúrə́-Jə-Tiu swɩ̀n Moyizə con, 2 sə ʋ swɩ̀n Yɩzərayɛlə dwíí tə con, ʋ wʋ́: «Lìù nə poli nii də, ʋ wá pa ləzwənə Ba-Yígúrə́-Jə-Tiu nə, kʋ tíú wàá səbiu, ʋ pɩn ləzwənə tə bʋʋ wa, sə ʋ ma tì ʋ nii tə.3 Ləzwənə tə nə yí bɩna sapʋa, kʋ ja vələ bɩna sapwɩtwa, lìù tə nə kàn nii tə wá pa wárʋ́ səbilurən* finu, də ʋ ləzwənə tə nə yɩ bɛɛ, ndə Yɩɩ wúlú bwálɩ́ tə səkəri bìú tə nə bɩrɩ nətʋ. 4 Yá ʋ nə yɩ kan, ʋ kwənə yɩ səbilurən fɩtwa.
5 Ləzwənə tə nə yí bɩna bonu, kʋ ja va bɩna sapʋa, ʋ kwənə yɩ səbilurən sapʋa, də ʋ nə yɩ bisɩmabara. Yá ʋ nə yɩ bisɩmakana, ʋ kwənə yɩ səbilurən fugə.
6 Ləzwənə tə nə yɩ cànà nədʋ, kʋ ja va bɩna bonu ləzwənə, ʋ kwənə yɩ wárʋ́ səbilurən bonu, də ʋ nə yɩ bibɛɛ. Yá ʋ nə yɩ bʋ̀á, ʋ kwənə yɩ wárʋ́ səbilurən batwa.
7 Ləzwənə tə nə yí bɩna sapwɩtwa, kʋ dàń ja vələ, ʋ kwənə yɩ səbilurən fugə də bonu, də ʋ nə yɩ bɛɛ. Yá ʋ nə yɩ kan, ʋ kwənə yɩ səbilurən fugə.
8 Lìù tə nə poli nii tə nə yɩ zʋrʋ zənzən, kʋ pa ʋ wàrɩ̀ kwənə tə, ʋ ŋwɩ́n, ʋ mɛ, sə ʋ ja ʋ ləzwənə tə, ʋ bà Yɩɩ joŋwanʋ tə yáá con. Yá Yɩɩ joŋwanʋ tə dàń wá ywàń kʋ tə, lìù tə nə poli nii tə dɩ̀àn nə yí, ʋ ma bɩrɩ wá kwənə tə, ʋ nə mɛ, sə ʋ ŋwɩ́n.
9 Kʋ nə yɩ vànɩ́, ba nə wàá ba ma fwa joŋi, ba pɩn à mʋ̀ Ba-Yígúrə́-Jə-Tiu nə, vànɩ́ təntə wá ya à mʋ̀ Yɩɩ nyiən. 10 Kʋ wà mɛ, sə ba lwàń kʋ. Kʋ wà mɛ, sə ba lárɩ́ kʋ yuu nə, də vànɩ́ don, kʋ nə ziən kʋ doni kʋ, nə à yə̀ə́ kʋ zəni nə wà kʋ yí. Ba nə ja vànɩ́, ba lárɩ́ kʋ don yuu nə, vàná bələ təntə mɛ dàń wá jì à mʋ̀ Yɩɩ nyiən.
11 Kʋ nə yɩ durən vànɩ́, ba wàrɩ̀ kʋ, ba ma fwa joŋi, ba pɩn à mʋ̀ Ba-Yígúrə́-Jə-Tiu nə. Vànɩ́ təntə tíú wá ja kʋ, ʋ bà Yɩɩ joŋwanʋ tə yáá con. 12 Yɩɩ joŋwanʋ tə wá ywàń kʋ, ʋ jə́n, də kʋ nə ziən, nə à yə̀ə́ kʋ nə ba ziən, ʋ ma bɩrɩ kʋ kwənə. Yá ba mɛ, sə ba sɛ̀ kwənə tə, Yɩɩ joŋwanʋ tə nə wá man. 13 Yá vànɩ́ tə tíú nə pɩ̀à, sə ʋ pìí ʋ yə̀ kʋ, ʋ jon, ʋ mɛ, sə ʋ súrí kʋ kwənə tə pwɩ̀ʋ̀ bonu nii nyiən kʋ kwənə tə nə, ʋ pa.
14 Lìù nə tún ʋ dìə̀ vàn nə, ʋ pa à mʋ̀ Ba-Yígúrə́-Jə-Tiu nə, Yɩɩ joŋwanʋ tə wá ywàń ka, ʋ jə́n də ka nə ziən, nə à yə̀ə́ ka nə ba ziən, ʋ ma bɩrɩ ka kwənə. Yá ba mɛ, sə ba sɛ̀ kwənə tə, Yɩɩ joŋwanʋ tə nə wá man. 15 Yá dìə̀ tə tíú nə pɩ̀à, sə ʋ pìí ʋ yə̀ ka, ʋ jon, ʋ mɛ, sə ʋ súrí ka kwənə tə pwɩ̀ʋ̀ bonu nii nyiən, ka kwənə tə nə, ʋ pa. Yá ʋ dàń wá pìí ʋ tɩnɩ ʋ dìə̀.
16 Lìù nə lɩ kárá ʋ tɩa wa, ʋ tún vàn nə, ʋ pa à mʋ̀ Ba-Yígúrə́-Jə-Tiu nə, wodwii tə dánɩ́, ba nə wàá ka wa ba dwì nə, ba wá jələ, ba ma bɩrɩ ka kwənə. Dipɛn mɩna yiri don kilo biətwa bwálɩ́ kwənə wá ya wárʋ́ səbilurən finu. 17 Kárá tə nə yɩ, kʋ nə zɩgɩ pupoli bɩnɩ tə nə, nə ka tíú tún ka vàn nə, ʋ pa à mʋ̀ Yɩɩ nə, mə ka kwənə nə, ka tíú nə mɛ, sə ʋ ŋwɩ́n. 18 Yá kʋ dàń nə yɩ pupoli bɩnɩ tə kwa nə, nə kárá tə tíú tún ka vàn nə, ʋ pa à mʋ̀ Ba-Yígúrə́-Jə-Tiu nə, Yɩɩ joŋwanʋ tə wá jələ bɩna tə nə ga, sə pupoli bɩnɩ tə yí, ʋ ma bɩrɩ kárá tə kwənə. Yá ʋ dàń wá cú ka kwənə tə, tə mɛ də bɩna tə nii, tə nə ga.
19 Yá kárá tə tíú nə pɩ̀à, sə ʋ pìí ʋ yə̀ ka, ʋ jon, ʋ mɛ, sə ʋ súrí ka kwənə tə pwɩ̀ʋ̀ bonu nii nyiən, ka kwənə tə nə, ʋ pa. Yá ʋ dàń wá pìí ʋ tɩnɩ ʋ kárá.
20 Kárá tə tíú nə wà ʋ kárá tə pìí ʋ yə̀, ʋ jon, ba nə yoli ka lìù don yuu wa, ʋ kʋ́ʋ̀ wàrɩ̀ ka ʋ pìí ʋ yə̀, ʋ joŋə də mama. 21 Yá pupoli bɩnɩ tə nə yí, kárá təntə wá jì à mʋ̀ Ba-Yígúrə́-Jə -Tiu nyiən, ndə kárá nə, ba nə dùə̀ də, ba pɩn Yɩɩ nə mɩ́ámɩ́án. Yá Yɩɩ joŋwana tə dàń nə wá tɩnɩ ka.
22 Lìù nə jon kárá, ka nii nə ba ʋ tɩa wa də́, ʋ yə̀, ʋ nə tún ka vàn nə, ʋ pa à mʋ̀ Ba-Yígúrə́-Jə-Tiu nə, 23 Yɩɩ joŋwanʋ tə mɛ, sə ʋ jələ bɩna tə nə ga, sə pupoli bɩnɩ tə yí, ʋ ma bɩrɩ ka kwənə. Yá lìù tə nə pɩn kárá tə mɛ, sə ʋ ŋwɩ́n ka kwənə tə, ʋ pa, ka pɩʋn dɩɩn tətə nə. Yá ka səbiu tə yɩ, ba wá tún vàn nə, ba pa à mʋ̀ Ba-Yígúrə́-Jə-Tiu nə. 24 Yá pupoli bɩnɩ tə nə yí, lìù tə, ba nə dí yáá ba yə̀ kárá tə ʋ con, ka nii ga də́ ʋ tɩa wa tə, nə wá tɩnɩ ka. 25 Kwənə mama mɛ, sə tə twá də nətʋ tə, Yɩɩ wúlú bwálɩ́ tə səkəri bɩ̀á tə nə wá bɩrɩ. Kʋ səbilugu nədʋ dun yí sibipwənə bələ.
26 Lìù mama ba cwəŋə jə, sə ʋ kàn nii, də ʋ tún ʋ vàná təntən bɩ̀á vàn nə, ʋ pa à mʋ̀ Ba-Yígúrə́-Jə-Tiu nə. Cɩ́gá, naʋ təntən bìú mama, nə à yə̀ə́ piə təntən bìú mama, nə à yə̀ə́ bʋ̀n təntən bìú mama, dí yáá tə yɩ à mʋ̀ Ba-Yígúrə́-Jə-Tiu nə tɩ. 27 Kʋ nə yɩ durən vànɩ́ təntən bìú, kʋ tíú mɛ, sə ʋ pìí ʋ yə̀ kʋ, ʋ jon, ʋ ga súrí kʋ kwənə tə pwɩ̀ʋ̀ bonu nii nyiən, kʋ kwənə tə nə, ʋ pa. Vànɩ́ tə tíú nə wà kʋ pìí ʋ yə̀, ʋ jon, Yɩɩ joŋwanʋ tə wá bɩrɩ kʋ kwənə, ba ga yoli kʋ.
28 Kʋ tə nə súrí lá, won tə mama, lìù nə wá lɩ ʋ jɩjə wiən wa, ʋ ga dù də, ʋ pɩn kʋ à mʋ̀ Ba-Yígúrə́-Jə-Tiu nə mɩ́ámɩ́án, ba kʋ́ʋ̀ wàrɩ̀ kʋ won təntə ba yoli, yá lìù də wàrɩ̀ kʋ, ʋ pìí ʋ yə̀ ʋ joŋə. Kʋ nə yɩ ləzwənə, nə à yə̀ə́ vànɩ́, nə à yə̀ə́ kárá, won tə mama, lìù nə wá dù də, ʋ pɩn kʋ Yɩɩ nə mɩ́ámɩ́án, yɩ à mʋ̀ Ba-Yígúrə́-Jə-Tiu cɩcɩ nyiən. 29 Yá kʋ nə swə, kʋ yɩ ləzwənə də tətə, ba kʋ́ʋ̀ wàrɩ̀ wá, ba pìí ba yə̀, ba joŋə. Ʋ mɛ, sə ba gʋ wá.
30 Kʋ mɛ, sə ba lɩ tɩa yuu wiən tə mama lənə fugə nii nyiən, kárɩ́ wodwii fugə nii nyiən, də tɩ̀án lənə fugə nii nyiən, ba tún vàn nə, ba pa à mʋ̀ Ba-Yígúrə́-Jə-Tiu nə. Tə yɩ à mʋ̀ Ba-Yígúrə́-Jə-Tiu cɩcɩ nyiən. 31 Lìù nə pɩ̀à, sə ʋ pìí ʋ yə̀ ʋ wiən fugə nii nyiən, ʋ jon, ʋ mɛ, sə ʋ súrí tə kwənə tə pwɩ̀ʋ̀ bonu nii nyiən, tə kwənə tə nə, ʋ pa. 32 Kʋ nə yɩ vanfaran tə, də vanmɩnɩ tə, tə mʋ̀ vàná tə mama, ba nə gàlɩ̀ də daduu, tə fugə nii nyiən yɩ à mʋ̀ Ba-Yígúrə́-Jə-Tiu nə tɩ. 33 Vàná tə tíú wà mɛ, sə ʋ kúrí vàná tə nə ziən, nə à yə̀ə́ vàná tə nə ba ziən. Ʋ wà mɛ, sə ʋ ja vànɩ́, ʋ ma lárɩ́ kʋ don yuu nə. Ʋ nə fwa kʋ, vàná bələ tə mɛ dàń wá jì à mʋ̀ Yɩɩ nyiən, yá ʋ kʋ́ʋ̀ wàrɩ̀ tə nədʋ mama, ʋ pìí ʋ yə̀, ʋ joŋə.»
34 Mə yìə̀n təntə yuu wa nə, Ba-Yígúrə́-Jə-Tiu pɩn kwìə̀ Moyizə nə, sə ʋ bɩrɩ Yɩzərayɛlə dwíí tə nə, Sinayi paan tə yuu.