Zìlə́ wiən tə ba nə pɩn Yɩɩ wúlú gansili tə yɩrɩ
7
1 Dɩɩn tə Moyizə nə púə́ Yɩɩ wúlú gansili tə ʋ zwɛ̀, ʋ twɛ́n dun nʋga* kʋ yuu wa, ʋ ma tún kʋ də kʋ wa zɩla tə mama, də Yɩɩ joŋi bwálɩ́ tə də kʋ wa zɩla tə mama vàn nə, ʋ pa Yɩɩ cɩcɩ nə. Ʋ twɛ́n dun nʋga tə mama yuu wa, ʋ ma tún tə vàn nə, ʋ pa Yɩɩ cɩcɩ nə. 2 Kʋ kwa nə, dìì tɩ̀án tə jɩn ba zìlə́ won ba bà. Ba mʋ̀ nə yɩ Yɩzərayɛlə dwíə́ tə yáá tɩ̀án tə, ba nə san ba ywàń lalʋʋ tə galʋ yoo. 3 Ba jɩn ba zìlə́ wiən tə ba bà, ba pa Ba-Yígúrə́-Jə-Tiu nə. Tə yɩ səsen kòrə̀n bardʋ tə yuu nə púə́, də nɩan fugə də bələ. Səsen kòrù nədʋ mama yɩ dìì tɩ̀án bələ nə pɩn, yá naʋ nədʋ mama yɩ ladʋa nə pɩn. Ba ja tə ba bà Yɩɩ wúlú gansili tə yáá con. 4 Ba-Yígúrə́-Jə-Tiu swɩ̀n Moyizə con, ʋ wʋ́: 5 «Jon ba zìlə́ wiən tə, ba nə ja bà. Tə mʋ̀ nə ba wá ma tʋn Yɩɩ jə́rə́ gansili tə tʋ̀tʋ̀nán tə. N wá pa tə Levi dwíí tə nə, kʋ twá də ba lìù mama tʋtʋŋɩ nə yɩ nətʋ.» 6 Moyizə dàń jon səsen kòrə̀n tə, də nɩan tə, ʋ pa Levi dwíí tə nə. 7 Ʋ pɩn səsen kòrə̀n bələ, də nɩan banɩa Gɛrəswon bɩ̀á tə nə, sə tə san ba, ba tʋ̀tʋ̀nán tə wa. 8 Yá ʋ pɩn səsen kòrə̀n banɩa tə, də nɩan nana tə nə ga, Merari bɩ̀á tə nə, sə tə san ba, ba tʋ̀tʋ̀nán tə wa, Yɩɩ joŋwanʋ Aron bìú Yɩtamarə nə bɩrɩ ba, ʋ pɩn ba tʋŋa. 9 Yá ʋ wà won mama pɩn Kehatə bɩ̀á tə mʋ̀ nə. Cɩ́gá, ba tʋtʋŋɩ yà nə yɩ, sə ba zɩn zɩla tə nə yɩ Yɩɩ nyiən, ba pàrà wa.Zìlə́ wiən tə ba nə pɩn Yɩɩ joŋi bwálɩ́ tə yɩrɩ
10 Dɩɩn tə nə, ba nə twɛ́n dun nʋga* Yɩɩ joŋi bwálɩ́ tə yuu wa, ba ga tún kʋ vàn nə, ba pa Yɩɩ cɩcɩ nə, Yɩzərayɛlə dwíə́ yáá tɩ̀án tə pɩn zìlə́ wiən, sə ba ma fwa Yɩɩ joŋi bwálɩ́ tə cànà. Ba ja ba zìlə́ wiən tə, ba bà Yɩɩ joŋi bwálɩ́ tə yáá con. 11 Yá Ba-Yígúrə́-Jə-Tiu swɩ̀n Moyizə con, ʋ wʋ́: «Dɩɩn mama wa, yáá tɩ̀án tə ladʋa wá ja ʋ zìlə́ won ʋ bà, sə ba ma fwa Yɩɩ joŋi bwálɩ́ cànà tə.» 12-83 Nə̀ń nətʋ tə ba nə púə́ duən kwa, ba bà ba pa ba zìlə́ wiən tə:
Təntən dɩɩn tə nə, kʋ yɩn Aminadabə bìú Naswon, ʋ nə yɩ Zwida dwíí tə yáá tíú.
Bələ nii dɩɩn tə nə, kʋ yɩn Swuarə bìú Netaneyɛlə, ʋ nə yɩ Yɩsakarə dwíí tə yáá tíú.
Batwa nii dɩɩn tə nə, kʋ yɩn Elon bìú Eliyabə, ʋ nə yɩ Zabulon dwíí tə yáá tíú.
Banɩa nii dɩɩn tə nə, kʋ yɩn Swedewurə bìú Elisurə, ʋ nə yɩ Ribɛn dwíí tə yáá tíú.
Bonu nii dɩɩn tə nə, kʋ yɩn Suriswadayi bìú Swelumiyɛlə, ʋ nə yɩ Simeyon dwíí tə yáá tíú.
Bardʋ nii dɩɩn tə nə, kʋ yɩn Dewuwɛlə bìú Eliyasafə, ʋ nə yɩ Gadə dwíí tə yáá tíú.
Barpɛ nii dɩɩn tə nə, kʋ yɩn Amihudə bìú Eliswama, ʋ nə yɩ Efərayimə dwíí tə yáá tíú.
Nana nii dɩɩn tə nə, kʋ yɩn Pedasurə bìú Gaməliyɛlə, ʋ nə yɩ Manase dwíí tə yáá tíú.
Nʋgʋ nii dɩɩn tə nə, kʋ yɩn Gidoni bìú Abidan, ʋ nə yɩ Bɛnzwamɛn dwíí tə yáá tíú.
Fugə nii dɩɩn tə nə, kʋ yɩn Amiswadayi bìú Ahiyezɛrə, ʋ nə yɩ Dan dwíí tə yáá tíú.
Fugə də nədʋ nii dɩɩn tə nə, kʋ yɩn Okəran bìú Pagiyɛlə, ʋ nə yɩ Aswɛrə dwíí tə yáá tíú.
Fugə də bələ nii dɩɩn tə nə, kʋ yɩn Enan bìú Ahɩra, ʋ nə yɩ Nɛfətali dwíí tə yáá tíú.
Ba lìù mama zìlə́ wiən tə yɩn
- wárʋ́ zʋŋa, ka dun nə bwə́lə́ kilo də faan, də wárʋ́ nagwalʋ, kʋ dun bwə́lə́ kilo, ndə Yɩɩ wúlú bwálɩ́ tə səkəri bìú* tə nə bɩrɩ nətʋ. Tə mɛ bələ yà súə́ də munbʋa, ba nə ywɛ́ də nʋga, sə ba ma fwa joŋi tə zìlə́ won joŋi tə.
- Kʋ súrí sɩ́án wùrú zʋŋa nə, ka dun nə yí kilo nədʋ pwɩ̀ʋ̀ fugə nii nyiən, ka nii nə súə́ də wusinə, kʋ súrí nabala, də pabɩʋ, də bɩnɩ nədʋ pəbiə nə, sə ba ma fwa joŋi tə ba nə sʋ̀rɩ́*,
- də bʋtɩlʋ, sə ba ma fwa cʋna kwɩan* joŋi.
- Kʋ súrí nɩan bələ, də pabɩran bonu, də bʋtɩlan bonu, də bɩnɩ nədʋ pəbii bonu nə, sə ba ma fwa nimarʋ joŋi tə. Mə Enan bìú Ahɩra zìlə́ wiən tə nə nətʋ. 84 Mə zìlə́ wiən tə nə, Yɩzərayɛlə dwíə́ yáá tɩ̀án tə nə pɩn Yɩɩ joŋi bwálɩ́ tə cànà tə diŋə yɩrɩ, dɩɩn tə nə ba nə twɛ́n dun nʋga* kʋ yuu wa, ba ga tún kʋ vàn nə, ba pa Yɩɩ cɩcɩ nə. Kʋ yɩn wárʋ́ zwɩɩn fugə də bələ, də wárʋ́ nagwalan fugə də bələ, də sɩ́án wùrú zwɩɩn fugə də bələ. 85 Wárʋ́ zʋŋa nədʋ mama dun yà bwə́lə́ kilo də faan, yá wárʋ́ nagwalʋ nədʋ mama dun yà bwə́lə́ kilo. Tə mʋ̀ wárʋ́ zwɩɩn tə, də wárʋ́ nagwalan tə mɛ nə ken duən nə, tə dun yà yí kilo sapʋa də banɩa, ndə Yɩɩ wúlú bwálɩ́ tə səkəri bìú tə nə bɩrɩ nətʋ. 86 Kʋ súrí sɩ́án wùrú zwɩɩn fugə də bələ tə nə, tə nii nə súə́ də wusinə, ka nədʋ mama dun nə yí kilo nədʋ pwɩ̀ʋ̀ fugə nii nyiən. Síán tə ba nə ma fwa wùrú zwɩɩn tə mɛ nə ken duən nə, tə dun dwə kilo, ndə Yɩɩ wúlú bwálɩ́ tə səkəri bìú tə nə bɩrɩ nətʋ. 87 Joŋi tə ba nə sʋ̀rɩ́ vàná tə mɛ nə ken duən nə, tə yɩ nabɩran fugə də bələ, də pabɩran fugə də bələ, də bɩnɩ nədʋ pəbii fugə də bələ, də zìlə́ wiən tə nə mɛ. Də bʋtɩlan fugə də bələ, sə ba ma fwa cʋna kwɩan joŋi. 88 Nimarʋ joŋi tə vàná tə mɛ nə ken duən nə, tə yɩ nɩan sapʋa də banɩa, də pabɩran sapwɩtwa, də bʋtɩlan sapwɩtwa, də bɩnɩ nədʋ pəbii sapwɩtwa. Mə zìlə́ wiən tə nə, ba nə pɩn Yɩɩ joŋi bwálɩ́ tə cànà diŋə tə yɩrɩ, dɩɩn tə nə, ba nə twɛ́n dun nʋga kʋ yuu wa, ba ma tún kʋ vàn nə, ba pa Yɩɩ cɩcɩ nə.
89 Máŋá mama, Moyizə nə zʋa Yɩɩ jə́rə́ gansili tə wa, sə ʋ swɩ̀n də Ba-Yígúrə́-Jə-Tiu, ʋ yàá nì Ba-Yígúrə́-Jə-Tiu kori, kʋ nə swɩ̀n, ʋ con. Kori tə yɩ kʋ yàá naŋa cʋna kwɩan bwálɩ́* tə yuu con, Yɩɩ sàń wonəŋə* nyɩnyɩga bələ tə titəŋi wa. Mə nətʋ nə Ba-Yígúrə́-Jə-Tiu yàá swɩ̀n, ʋ con.