Yɩɩ jə́rə́ gansili tə canzɩlʋ tə yoo
8
1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Swɩ̀n Aron con də máŋá tə wa, ʋ nə wá sʋ̀rɩ́ tʋntʋnɩ barpɛ tə, ʋ tún canzɩlʋ tə yuu wa, tə poni mɛ sə kʋ pɩ̀rɩ̀ canzɩlʋ tə yáá con.» 3 Aron tún tʋntʋnɩ tə canzɩlʋ tə yuu wa, ʋ pa tə poni pɩ̀rɩ̀ kʋ yáá con, ndə Ba-Yígúrə́-Jə-Tiu nə pɩn nii Moyizə nə, sə ʋ tʋn nətʋ. 4 Nə̀ń nətʋ tə ba yà nə fwa canzɩlʋ tə. Kʋ yɩ sɩ́án tə nə ba durən jə nə ba ma lù kʋ, kʋ nə zɩgɩ kʋ dəkuu nə, kʋ ja dɩ̀ kʋ yí kʋ wiən tə nə nyən ndə pùnə́. Kʋ mama yɩ sɩ́án, ba ma lù kʋ. Ba fwa kʋ ndə kʋ nyɩnyɩga tə nə, Ba-Yígúrə́-Jə-Tiu nə bɩrɩ Moyizə nə.Ba kə Levi dwíí tə vàn nə, ba pa Yɩɩ nə
5 Ba-Yígúrə́-Jə-Tiu swɩ̀n Moyizə con, ʋ wʋ́: 6 «Lɩ Levi dwíí tə Yɩzərayɛlə lɩ̀à tə wa, n kwɛn ba, n lɩ durən yìə̀n wa. 7 Nə̀ń nətʋ tə n nə wá fwa, sə n ma kwɛn ba, n lɩ durən yìə̀n wa. N wá mɩ́n cʋna kwɩan nɩ́á ba yuu wa, ba ga fɩna ba yɩra kʋran tə mɛ, ba sɩ̀n ba gànàn, yá ba dàń wá ya parɩ. 8 Kʋ kwa nə, ba wá ja nabala, də zìlə́ won kʋ nə yɩ munbʋa, ba nə ywɛ́ də nʋga, n də ga ja nabala don, sə n ma fwa cʋna kwɩan joŋi. 9 N wá pa Levi dwíí tə twən ba yí Yɩɩ jə́rə́ gansili tə yáá con, n ga kə Yɩzərayɛlə lalʋʋ tə mama duən yáá nə. 10 N wá pa Levi dwíí tə twən ba yí Ba-Yígúrə́-Jə-Tiu yáá con, yá Yɩzərayɛlə lɩ̀à tə dàń wá tún ba jɩ̀àn Levi dwíí tə yuu wa. 11 Aron wá bà Ba-Yígúrə́-Jə-Tiu yáá con, ʋ tʋn kʋ tə mama, ʋ nə mɛ sə ʋ tʋn, ʋ ma kə Levi dwíí tə vàn nə, ʋ pa Ba-Yígúrə́-Jə-Tiu cɩcɩ nə, Yɩzərayɛlə lɩ̀à tə yɩrɩ. Yá Levi dwíí tə dàń wá tʋn, ba pa Ba-Yígúrə́-Jə-Tiu nə. 12 Kʋ kwa nə, Levi dwíí tə wá tún ba jɩ̀àn nɩan bələ tə yuu wa. Aron dàń wá ja kʋ don, ʋ ma fwa cʋna kwɩan joŋi, ʋ ga ja kʋ don tə də, ʋ ma fwa joŋi ba nə sʋ̀rɩ́, Levi dwíí tə cʋna kwɩan yɩrɩ. 13 N wá pa Levi dwíí tə bà ba zɩgɩ Aron də ʋ bɩ̀á tə yáá con, n ga kə ba vàn nə, n pa à mʋ̀ Ba-Yígúrə́-Jə-Tiu nə. 14 N wá kə Levi dwíí tə vàn nə, Yɩzərayɛlə lɩ̀à tə titəŋi wa. Yá Levi dwíí tə wá ya à mʋ̀ cɩcɩ nyiən. 15 Kʋ kwa nə, Levi dwíí tə dàń wá bà ba tʋn Yɩɩ jə́rə́ gansili tə wa tʋ̀tʋ̀nán tə. Mə nətʋ nə n wá kwɛn ba, n lɩ durən yìə̀n wa, n kə vàn nə, n pa nə. 16 Cɩ́gá, Levi dwíí tə ya à mʋ̀ cɩcɩ nyiən, Yɩzərayɛlə lɩ̀à tə wa. À kúrí ba, sə à tɩnɩ ba, Yɩzərayɛlə lɩ̀à bɩkwɩna təntən bɩ̀á tə mama yuu nə. 17 Cɩ́gá, Yɩzərayɛlə lɩ̀à bikwɩa mama yɩ à mʋ̀ nə tɩ, ləzoni tə də vàná tə mama wa. Kʋ nə zɩgɩ dɩɩn tə nə, à nə mà Ezwipətə tɩ̀án təntən bɩ̀á tə à gʋ, à ken Yɩzərayɛlə lɩ̀à təntən bɩ̀á tə vàn nə, sə ba ya à cɩcɩ nyiən. 18 Yá à kúrí Levi dwíí tə à ma lárí Yɩzərayɛlə lɩ̀à təntən bɩ̀á tə mama yuu nə. 19 À pɩn Levi dwíí tə Aron də ʋ bɩ̀á nə, Yɩzərayɛlə lɩ̀à tə wa, sə ba tʋn Yɩɩ jə́rə́ gansili tə wa tʋ̀tʋ̀nán tə, sə ba fwa cʋna kwɩan joŋi ba pa Yɩzərayɛlə lɩ̀à nə. Kʋ nətʋ wá cɩ̀, sə càn dàn ká yí Yɩzərayɛlə lɩ̀à tə, də ba nə bólí Yɩɩ wúlú bwálɩ́ tə yɩra.»
20 Moyizə, də Aron, də Yɩzərayɛlə lalʋʋ tə mama dàń tʋn kʋ tə, Ba-Yígúrə́-Jə-Tiu nə pɩn nii Moyizə nə, sə ba tʋn Levi dwíí tə yɩra. 21 Levi dwíí tə kwɛn ba tɩ̀àn, ba lɩ durən yìə̀n wa, ba ga sɩ̀n ba gànàn. Aron tʋn kʋ tə mama, ʋ nə mɛ sə ʋ tʋn Ba-Yígúrə́-Jə-Tiu yáá con, sə ʋ ma kwɛn ba cʋna ʋ lɩ, sə ba ya parɩ. 22 Kʋ kwa nə, Levi dwíí tə dàń sinti ba tʋtʋŋɩ tə, Yɩɩ jə́rə́ gansili tə wa, Aron də ʋ bɩ̀á tə yɩ́á yuu, ndə Ba-Yígúrə́-Jə-Tiu nə pɩn nii Moyizə nə, sə ba tʋn nətʋ, Levi dwíí tə yɩra.
23 Ba-Yígúrə́-Jə-Tiu kʋ́ʋ̀ swɩ̀n Moyizə con, ʋ wʋ́: 24 «Nə̀ń kʋ tə n nə wá tʋn Levi dwíí tə yɩra. Kʋ nə zɩgɩ Levi dwíí tə lìù mama bɩna sapʋa də bonu nii nə, ʋ mɛ sə ʋ sinti tʋ̀tʋ̀nán tə, Yɩɩ jə́rə́ gansili tə wa. 25 Ba lìù tə, ʋ nə yí bɩna finu, ʋ wá yá ʋ tʋtʋŋɩ tə, Yɩɩ jə́rə́ gansili tə wa, ʋ kʋ́ʋ̀ bá tʋn. 26 Ʋ wá san ʋ nubɩa tə nə, ʋ ywàń wiən tə yuu nə, ba nə mɛ sə ba ywàń, Yɩɩ jə́rə́ gansili tə wa. Yá ʋ kʋ́ʋ̀ bá tʋn won mama. Mə nətʋ nə n wá tʋn Levi dwíí tə yɩra, ba tʋtʋŋɩ tə yoo wa.»