Pakə* cànà diŋə máŋá
9
1 Ba-Yígúrə́-Jə-Tiu swɩ̀n Moyizə con, Sinayi kasɔɔ lanworu tə wa, bələ nii bɩnɩ tə təntən cànà tə wa, ba nə nan Ezwipətə lʋʋ nii tə wa kwa nə, ʋ wʋ́: 2 «Yɩzərayɛlə lɩ̀à tə wá də́ Pakə cànà tə máŋá tə wa, à nə lɩ à tún, à pa ba. 3 Á wá də́ Pakə cànà tə máŋá tə wa, à nə lɩ à tún, à pa aba, təntən cànà tə dɩan fugə də banɩa dɩɩn nə, máŋá tə yɩɩ nə zʋa. Á wá zìlí nii tə mama à nə pɩn ba pʋ́pʋ́nɩ́, sə á ma də́ Pakə cànà tə.» 4 Moyizə swɩ̀n Yɩzərayɛlə lɩ̀à tə con, sə ba də́ Pakə cànà tə. 5 Yá ba dàń dí Pakə cànà tə, Sinayi kasɔɔ lanworu tə wa, təntən cànà tə dɩan fugə də banɩa dɩɩn nə, máŋá tə yɩɩ nə zʋa. Yɩzərayɛlə lɩ̀à tə tʋn kʋ tə mama, Ba-Yígúrə́-Jə-Tiu yà nə pɩn nii Moyizə nə, sə kʋ tʋn.6 Bara duən yɩn lá, ba nə dwen tɩgɩ yɩra, kʋ pa ba jì durən lɩ̀à. Kʋ nətʋ pɩn ba yà kʋ́ʋ̀ wàrɩ̀ Pakə cànà tə ba də́, ka dɩɩn tə nə. Ba dàń zàn ba va ba na Moyizə də Aron kʋ dɩɩn tə mama, 7 ba swɩ̀n Moyizə con, ba wʋ́: «Nə dwen tɩgɩ yɩra, kʋ pa nə jì durən lɩ̀à. Bɛ̀ɛ̀ nə pɩn nə ma wà mɛ sə nə ja nə zìlə́ won nə bà nə pa Ba-Yígúrə́-Jə-Tiu nə, máŋá tə wa ʋ nə lɩ ʋ tún, ndə Yɩzərayɛlə lɩ̀à tə duən nə?» 8 Moyizə le ba, ʋ wʋ́: «Á dànà sə à nì kʋ tə Ba-Yígúrə́-Jə-Tiu nə wá pa nii sə kʋ tʋn, á yoo tə yɩrɩ.»
9 Yá Ba-Yígúrə́-Jə-Tiu swɩ̀n Moyizə con, ʋ wʋ́: 10 «Swɩ̀n Yɩzərayɛlə lɩ̀à tə con, də kʋ wàá kʋ yí də ba wa lìù, nə à yə̀ə́ ba dwíə́ tə ba nə wá kə lʋʋ wa, lìù don dwen tɩgɩ yɩra, kʋ pa ʋ jì durən lìù, nə à yə̀ə́ ʋ vəli cwəŋə ka nə ŋʋna. Ʋ tə mɛ sə ʋ də́ pakə cànà tə, ʋ ma pa dun Ba-Yígúrə́-Jə-Tiu nə. 11 Kʋ yɩ bələ nii cànà tə, dɩan fugə də banɩa nii dɩɩn tə didəni nii nə, nə ba wá də́ ka mʋ̀ cànà tə, də dipɛn kʋ nə wà sabwarɩ ken, də davʋran tə nə cà. 12 Pakə cànà tə wodiu mama wà mɛ, sə kʋ pʋrɩ tɩa. Yá kʋ wà mɛ sə nàŋʋ́ tə kuu nədʋ mama kɛ́n. Ba wá də́ ka, kʋ twá nii tə nə, à nə pɩn ba pʋ́pʋ́nɩ́ pakə cànà diŋə yuu wa. 13 Də lìù nə wulə á wa, ʋ nə wà durən yìə̀n tʋn, yá ʋ wà cwəŋə də vəli, ʋ ga vɩ sə ʋ də́ pakə cànà tə, á wá lɩ kʋ tíú ʋ dwíí wa. Cɩ́gá, ʋ vɩga sə ʋ ja ʋ zìlə́ won ʋ bà ʋ pa à mʋ̀ Ba-Yígúrə́-Jə-Tiu nə, máŋá tə wa à nə lɩ à tún. Yá kʋ tíú cʋna tə yoo wá zɩn ʋ tətə. 14 Də vee nə wulə á wa, ʋ nə twá ʋ də́ pakə cànà tə, sə ʋ ma pa dun à mʋ̀ Ba-Yígúrə́-Jə-Tiu nə, ʋ də wá twá nii tə nə, à nə pɩn ba pʋ́pʋ́nɩ́, də yìə̀n tə nə, à nə pɩn nii sə tə tʋn, pakə cànà diŋə yuu wa. Tɩbiu də vee mama mɛ sə ba twá nii nədʋ tə nə, à nə pɩn ba pʋ́pʋ́nɩ́.»
Bakwan púə́ Yɩɩ wúlú gansili tə yuu nə
15 Dɩɩn tə nə, ba nə púə́ Yɩɩ wúlú gansili tə ba zwɛ̀, bakwan púə́ kʋ yuu nə, kʋ nə zɩgɩ didəni nii nə, kʋ va kʋ yí jɩjʋ. Kʋ yà nyən ndə mən nə, Yɩɩ wúlú gansili tə yuu con. 16 Mə bakwan tə yɩn Yɩɩ wúlú gansili tə yuu con nətʋ máŋá mama, yá tɩtɩn nə, kʋ nyən ndə mən nə. 17 Máŋá mama bakwan tə nə zàn kʋ yá Yɩɩ wúlú gansili tə, Yɩzərayɛlə lɩ̀à tə yàá zàn ba zʋ cwəŋə. Yá bakwan tə nə zɩgɩ bwálɩ́ nə, Yɩzərayɛlə lɩ̀à tə yàá kə ba yijaa bwálɩ́ lá. 18 Ba-Yígúrə́-Jə-Tiu nə yàá pa nii, Yɩzərayɛlə lɩ̀à tə ma zàn ba vìí, ʋ mʋ̀ ga nə yàá pa nii, ba ma jəni bwálɩ́ nə. Ba yàá jə̀ń bwálɩ́ nə ba dán kʋ mɛ ndə nətʋ tə nə, bakwan tə nə dán Yɩɩ wúlú gansili tə yuu con. 19 Máŋá tə bakwan tə nə zɩgɩ Yɩɩ wúlú gansili tə yuu con kʋ dán, Yɩzərayɛlə lɩ̀à tə yàá tʋn kʋ tə Ba-Yígúrə́-Jə-Tiu nə pɩn nii sə ba tʋn. Yá ba ba zaŋa ba vìrí. 20 Máŋá don wa, bakwan tə yàá zɩgɩ dɩan bagalɩ cɩcɩ, Yɩɩ wúlú gansili tə yuu con. Ba-Yígúrə́-Jə-Tiu nə yàá pa nii, sə ba jə̀ń bwálɩ́ nə, ʋ mʋ̀ ga nə yàá pa nii, sə ba zàn ba vìí. 21 Bakwan tə nə yɩ kʋ zɩgɩ Yɩɩ wúlú gansili tə yuu con didəni nii nə, kʋ va kʋ yí jɩjʋ, kʋ nə zàn jɩjʋ təntə nə, ba də yàá zàn ba vìí. Bakwan tə nə kʋ́ʋ̀ yɩ kʋ zɩgɩ Yɩɩ wúlú gansili tə yuu con dɩɩn nədʋ də tɩtɩn nədʋ, máŋá tə kʋ nə zàn, ba də yàá zàn ba vìí. 22 Bakwan tə nə kʋ́ʋ̀ yɩ kʋ zɩgɩ Yɩɩ wúlú gansili tə yuu con dɩan bələ, nə à yə̀ə́ cànà nədʋ, nə à yə̀ə́ bɩnɩ nədʋ, Yɩzərayɛlə lɩ̀à tə yàá jə̀ń kʋ bwálɩ́ tə wa, ba ba zaŋa. Yá máŋá tə bakwan tə nə zàn, ba də yàá zàn ba vìí. 23 Ba-Yígúrə́-Jə-Tiu nə yàá pa nii, ba ma jəni bwálɩ́ nə, ʋ mʋ̀ ga nə yàá pa nii, ba ma zaŋa ba vìrí. Ba yà tʋŋa kʋ tə Ba-Yígúrə́-Jə-Tiu nə pɩn nii Moyizə nə, sə ba tʋn.