Wárʋ́ nabwanan bələ tə yoo
10
1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Pa ba ja wárʋ́ tə nə ba durən jə, ba ma lù nabwanan bələ. N wá ja tə n ma bon lalʋʋ tə, n kə duən yáá nə, n ga wá ja tə n ma zɩ̀n ba, sə ba vìí. 3 Máŋá tə ba nə wúrí nabwanan tə, lalʋʋ tə mama wá bà ba kun duən nə, n con, Yɩɩ jə́rə́ gansili tə mimii nə. 4 Yá ba nə wúrí nabwanʋ nədʋ, kʋ yɩ Yɩzərayɛlə dwíə́ yáá tɩ̀án tə, də lɩ̀à mʋ̀rʋ̀ yáá tɩ̀án tə nə wá bà ba kun duən nə, n con. 5 Máŋá tə á nə wúrí nabwanan tə, á pa tə zizigi, lɩ̀à tə nə jə̀ə́ yɩɩ yipɩan con tə wá zàn ba vìí. 6 Máŋá tə á nə kʋ́ʋ̀ wúrí tə, á pa tə zizigi nɛɛ bələ nii nə, lɩ̀à tə nə jə̀ə́ jɩgwiə saparʋ con tə wá zàn ba vìí. Á viru mama wa, á wá wúrí nabwanan tə, á pa tə zizigi. 7 Yá á wá wúrí nabwanan tə, á ma bon lalʋʋ tə də, á kə duən yáá nə. Á dàń nə bá wúrí tə, á pa tə zizigi.8 Aron bɩ̀á tə nə yɩ Yɩɩ joŋwana tə nə wá wúrí nabwanan tə. Kʋ yɩ nii à nə pɩn ba pʋ́pʋ́nɩ́, ba pa á mʋ̀, də á bɩ̀á, də á nɩ̀án nə, máŋá də máŋá mama wuuu.
9 Á lʋʋ nii tə wa, á nə nan sə á ta kʋ̀ʋ̀ də á dʋŋa, ba nə wʋwalɩ aba, á wá wúrí nabwanan tə, á pa tə zizigi. Kʋ nətʋ wá pa à mʋ̀ Ba-Yígúrə́-Jə-Tiu, à nə yɩ á Yɩɩ lìí á yoo, à ga jon aba á dʋŋa tə jɩɩn wa. 10 Á pupwən dɩan nə, də á cànɩ̀ diŋə dɩan nə, də á càndʋra naŋʋ wa, á wá wúrí nabwanan, á ma fwa á jwəŋə tə ba nə sʋ̀rɩ́*, də á nimarʋ* jwəŋə. Kʋ nətʋ wá pa à mʋ̀ á Yɩɩ tə lìí á yoo. À mʋ̀ nə yɩ Ba-Yígúrə́-Jə-Tiu, à nə yɩ á Yɩɩ.»
KƲ NƏ ZƖGƖ SINAYI, KƲ VA KƲ YI MƲABƏ LƲƲ NII SƖSWƖAN
10-21
Yɩzərayɛlə lɩ̀à tə zàn Sinayi nə ba vìí
11 Bələ nii bɩnɩ tə wa, bələ nii cànà tə dɩan sapʋa dɩɩn nə, bakwan kʋ zàn tə yá Yɩɩ wúlú dansɩa gansili tə. 12 Yɩzərayɛlə lɩ̀à tə zàn Sinayi kasɔɔ lanworu tə wa ba vìí, ndə ba nə mɛ sə ba pú duən kwa ba vìí nətʋ. Bakwan tə vəli kʋ zɩgɩ Paran kasɔɔ lanworu tə wa. 13 Mə ba təntən zaŋʋ nə ba nə zàn ba vìí, ndə Ba-Yígúrə́-Jə-Tiu nə pɩn nii Moyizə nə, sə kʋ tʋn nətʋ.
14 Zwida dwíí tə nə yɩn təntən ba zàn ba vìí də ba dɩrapo, də ba kwatara púlə́. Aminadabə bìú Naswon yà nə yɩ ba kwatara púlí tə yáá tíú. 15 Swuarə bìú Netaneyɛlə yà nə yɩ Yɩsakarə dwíí kwatara púlí tə yáá tíú. 16 Helon bìú Eliyabə yà nə yɩ Zabulon dwíí kwatara púlí tə yáá tíú.
17 Ba gwɛrɩ Yɩɩ wúlú gansili tə, Gɛrəswon də Merari bɩ̀á tə ga zɩn kʋ, ba ja vìí.
18 Ribɛn dwíí tə də zàn ba vìí də ba dɩrapo, də ba kwatara púlə́. Swedewurə bìú Eliswurə yà nə yɩ ba kwatara púlí tə yáá tíú. 19 Swuriswadayi bìú Swelumiyɛlə yà nə yɩ Simeyon dwíí kwatara púlí tə yáá tíú. 20 Dewuwɛlə bìú Eliyasafə yà nə yɩ Gadə dwíí kwatara púlí tə yáá tíú.
21 Kehatə dwíí tə zàn ba vìí, ba ga zɩŋa Yɩɩ wúlú bwálɩ́ tə wa zɩla tə. Ba duən tə yà wulə ba kəni Yɩɩ wúlú gansili tə, də ba ma bɩ̀àn.
22 Efərayimə dwíí tə zàn ba vìí də ba dɩrapo, də kwatara púlə́. Amihudə bìú Eliswama yà nə yɩ ba kwatara púlí tə yáá tíú. 23 Pedasurə bìú Gaməliyɛlə yà nə yɩ Manase dwíí kwatara púlí tə yáá tíú. 24 Gidoni bìú Abidan yà nə yɩ Bɛnzwamɛn dwíí kwatara púlí tə yáá tíú.
25 Dan dwíí tə nə yɩn talɩkwa ba zàn ba vìí də ba dɩrapo, də ba kwatara púlə́. Ba mʋ̀ kwatara púlí tə yà nə cɩ̀ kwatara púlə́ tə mama kwa con. Amiswadayi bìú Ahiyezɛrə yà nə yɩ Dan dwíí kwatara púlí tə yáá tíú. 26 Okəran bìú Pagiyɛlə yà nə yɩ Aswɛrə dwíí kwatara púlí tə yáá tíú. 27 Enan bìú Ahɩra yà nə yɩ Nɛfətali dwíí kwatara púlí tə yáá tíú.
28 Mə nətʋ nə Yɩzərayɛlə kwatara púlə́ tə púə́ duən kwa ba vìí. Mə nətʋ nə ba zàn ba vìí.
Moyizə pɩ̀à lìù, sə ʋ kə ba cwəŋə nə
29 Moyizə swɩ̀n Hobabə con, ʋ nə yɩ ʋ tɩnbɛɛ Rewuwɛlə bìú, ʋ ga yɩ Madɩan tíú, ʋ wʋ́: «Nə mʋ̀ zàn nə vələ lʋʋ nii tə wa, Ba-Yígúrə́-Jə-Tiu nə kàn nii sə ʋ pa nəba. Zàn n bà twá nə nə, yá nə wá fwa zəni n yɩra. Cɩ́gá, Ba-Yígúrə́-Jə-Tiu kàn nii sə ʋ fwa zəni Yɩzərayɛlə lɩ̀à yɩra.» 30 Hobabə le, ʋ wʋ́: «À bá twá á nə. À wá pìí à va à dwíí tə con, à lʋʋ nii wa.» 31 Moyizə tə swɩ̀n ʋ con, ʋ wʋ́: «À lòrí mʋ́, sə dàn ká pìí n yá nəba. Cɩ́gá, n mʋ́ nə yə̀ə́ bwálá tə, nə nə wàá lá nə jəni, kasɔɔ lanworu tə wa. N wá san n kə nəba cwəŋə nə. 32 N nə twá nə nə n va, nə wá pa n na tori zəni tə wa Ba-Yígúrə́-Jə-Tiu nə wá fwa nə yɩra.»
33 Ba zàn Ba-Yígúrə́-Jə-Tiu paan tə yuu wa ba vìí. Yá ba vəli dɩan batwa vəlu. Ba-Yígúrə́-Jə-Tiu nimarʋ culu daka tə yɩn ba yáá dɩan batwa vəlu tə wa, ba ma pɩ̀à yijaa bwálɩ́. 34 Tɩa nə pʋrɩ, Ba-Yígúrə́-Jə-Tiu bakwan tə yàá pú ba yuu nə, máŋá tə wa ba nə zàn yijaa bwálɩ́ tə wa ba vìrí. 35 Máŋá tə wa, ba nə zàn də Ba-Yígúrə́-Jə-Tiu nimarʋ culu daka tə ba vìrí, Moyizə yàá swɩ̀n, ʋ wʋ́: «Zàn yɩɩ nə Ba-Yígúrə́-Jə-Tiu, sə n dʋŋa laga duən yáá nə, sə ba tə nə culi mʋ́ ga dəri n yáá nə!» 36 Yá máŋá tə wa, ba nə zɩgɩ də Ba-Yígúrə́-Jə-Tiu nimarʋ culu daka tə, Moyizə yàá swɩ̀n, ʋ wʋ́: «Ba-Yígúrə́-Jə-Tiu, pìí bà Yɩzərayɛlə lalʋʋ mʋ̀rʋ̀ dəkurən mʋ̀rʋ̀ kapʋpʋ* tə titəŋi wa!»