Ba-Yígúrə́-Jə-Tiu mən tə yoo
11
1 Dɩɩn don nə, lalʋʋ tə zàn ba ŋʋŋwɩn, yá Ba-Yígúrə́-Jə-Tiu wà kʋ nətʋ tə sóní. Ba-Yígúrə́-Jə-Tiu nə nì ba ŋʋŋwɩan tə, ʋ lɩŋa pupwin ba yuu wa ndə mən nə, ʋ ga pa mən kwé ba titəŋi wa, tə də́ ba yijaa bwálɩ́ tə nii don tə cʋ̀gʋ̀. 2 Lalʋʋ tə bubwi ba kə Moyizə nə, yá ʋ lòrì Ba-Yígúrə́-Jə-Tiu, mən tə ga də̀ŋə̀. 3 Ba dɩga bwálɩ́ təntə yɩrɩ Tabera. Kʋ də̀ń nə yɩ “bwálɩ́ tə mən na kwe”, Ba-Yígúrə́-Jə-Tiu mən nə kwe ba titəŋi wa, kʋ bwálɩ́ tə wa yɩrɩ.Lalʋʋ tə ŋʋŋwɩn ba pɩ̀à nàŋʋ́
4 Dɩɩn don nə, naŋwɩncɩrɩ jɩn bakʋkwanyɩna duən, ba nə púə́ Yɩzərayɛlə lɩ̀à tə kwa, də Yɩzərayɛlə lɩ̀à duən, ba ga sinti ba kwi, də ba swɩ̀n, ba wʋ́: «Wàà nə wá pa nəba nàŋʋ́ sə nə də́? 5 Nə lìí nə tɩ̀àn filə tə yoo nə yà nə də́ tʋtʋ Ezwipətə nə, də kɔnkɔnbərə, də pasətɛkə, də gəbuvʋmɩnɩ, də gəbuu, də layɩ. 6 Sɩ́ʋ́n nə, niən dàń jə nəba, nə kʋ́ʋ̀ ba wiən təntə nədʋ mama na, də kʋ nə tà manə.» 7 Manə tə yà yɩ ndə baasɩ nəpon nə, kʋ ga yɩ ndə bɩ̀rʋ́ mala nə. 8 Lalʋʋ tə yàá laga duən yáá nə, ba ma pɛ̀ tə. Ba yàá gà tə nʋŋʋ yuu wa, nə à yə̀ə́ ba zwa tə zɔɔ wa. Ba yàá pʋ̀rɩ̀ tə nəkənə wa, nə à yə̀ə́ ba pʋ̀rɩ̀ tə ndə ŋʋ̀nán nə, tə ga ywán ndə gàtó nə, ba nə pʋ̀rɩ̀ də nʋga. 9 Máŋá tə wa nyʋ̀nʋ̀ nə vwə ba yijaa bwálɩ́ tə nə tɩtɩn nə, manə tə də yàá cú.
10 Moyizə nì Yɩzərayɛlə lalʋʋ tə lìù mama nə kwi ʋ dwíí wa, ʋ gansili mimii nə. Ba-Yígúrə́-Jə-Tiu lɩŋa zàn zənzən, yá kʋ cʋ̀gʋ̀ Moyizə pùə́ nə. 11 Moyizə dàń swɩ̀n Ba-Yígúrə́-Jə-Tiu con, ʋ wʋ́: «Bɛ̀ɛ̀ nə pɩn n ma kə à mʋ̀ n tʋtʋnʋ tə càn wa? Bɛ̀ɛ̀ nə pɩn n wà n wʋwyaŋʋ* tə fwa à yɩra, n ga pìí n pa lalʋʋ kʋ tə mama yoo jì à yuu zɩlɩ? 12 Kʋ yɩ à mʋ̀ yɩra nə lalʋʋ kʋ tə mama nan naaa? Kʋ yɩ à mʋ̀ nə lɩrɩ ba, sə n ma swɩ̀n à con, n wʋ́: “Pa ba yoo dɩŋa n bɩcan nə, ndə kan bìú yoo nə dɩŋɩ ʋ bɩcan nə nətʋ, sə n ga ja ba n va n yí lʋʋ nii tə wa, à nə kàn nii, sə à pa ba nyɩna-ba nə naaa?” 13 Yìə̀n nə nə à wá na nàŋʋ́, sə kʋ yí lalʋʋ kʋ tə mama diŋə, ba nə púə́ à kwa ba kwi, ba ga swɩ̀n sə à pa ba nàŋʋ́ ba də́? 14 À cɩcɩ wàrɩ̀ lalʋʋ kʋ tə mama yuu yìə̀n tə à zɩŋa. Tə dun dáá tə doni nə. 15 Də kʋ nə yɩ nətʋ nə n pɩ̀à sə n fwa nə, sə n zə́n n gʋ nə. N nə kʋ́ʋ̀ wá tʋn n pubwanʋ tə à yɩra, sə n pa à dàn ká na càn.»
16 Ba-Yígúrə́-Jə-Tiu swɩ̀n Moyizə con, ʋ wʋ́: «Bon Yɩzərayɛlə lɩ̀à tə wa nəkwɩna sapwɩtwa də fugə, n kə duən nə, n pa nə. Kúrí lɩ̀à tə n nə yə̀ə́ də ba yɩ sànɩ́ tɩ̀án, ba ga yɩ tʋ̀tʋ̀nà yáá tɩ̀án. N wá ja ba n bà Yɩɩ jə́rə́ gansili tə con, n də ba ga zɩgɩ yɩɩ nə. 17 À wá cú, yá à wá swɩ̀n n con, kʋ bwálɩ́ tə wa. À wá lɩ n siŋu tə mancɩn, à kə ba yuu wa. Yá ba də dàń wá zɩn lalʋʋ tə yuu zɩlɩ ndə n nə, sə kʋ kʋ́ʋ̀ dàn ká ya n cɩcɩ nə zɩŋa kʋ. 18 N wá swɩ̀n lalʋʋ tə con, n wʋ́: “Á kwɩan á tɩ̀àn á lɩ durən yìə̀n wa, jwɩan dɩɩn tə yɩrɩ, yá á wá də́ nàŋʋ́. Cɩ́gá, á kwí á kə Ba-Yígúrə́-Jə-Tiu zɩan wa, á ga swɩ̀n də wàà nə wá pa aba nàŋʋ́ sə á də́. Cɩ́gá, á yà nə̀ń á ywánɩ́ Ezwipətə nə. Ba-Yígúrə́-Jə-Tiu dàń wá pa aba nàŋʋ́, á ga wá də́ kʋ. 19 Á bá də́ nàŋʋ́ tə dɩɩn nədʋ, nə à yə̀ə́ dɩan bələ, nə à yə̀ə́ dɩan bonu, nə à yə̀ə́ dɩan fugə, nə à yə̀ə́ dɩan sapʋa. 20 Á wá də́ nàŋʋ́ tə, kʋ va kʋ yí canpɩrɩ, kʋ kori kʋ twá á mɩa kʋ naŋa, á waa ga wá nan kʋ. Tə mʋ̀ yìə̀n tə mama wá yí aba, á nə wà Ba-Yígúrə́-Jə-Tiu, ʋ nə wulə á titəŋi wa jələ, á ga kwi ʋ yáá con, á swɩ̀n də, bɛ̀ɛ̀ nə pɩn á nan Ezwipətə lʋʋ nii tə wa yɩrɩ.”»
21 Moyizə dàń pìí ʋ le, ʋ wʋ́: «Lalʋʋ tə nə kɩkarɩ nə yí bara mʋ̀rʋ̀ biəyardʋ, ba nə wàá kʋ̀ʋ̀ ba tɛ. Yá n mʋ̀ ga swɩ̀n də n wá pa ba nàŋʋ́ ba də́, kʋ va kʋ yí canpɩrɩ! 22 Nə nə swə nə gʋ nə vanmɩnɩ, də nə vanfaran mɛ də, tə tə bá yí ba. Nə nə kʋ́ʋ̀ swə nə gwàn mʋʋ waa filə tə mama də, tə tə bá yí ba.» 23 Ba-Yígúrə́-Jə-Tiu pìí ʋ le Moyizə, ʋ wʋ́: «À mʋ̀ Ba-Yígúrə́-Jə-Tiu dɩ̀àn wà yí naaa? Sɩ́ʋ́n nə, n wá na də à sʋgʋ tə nii nə wá sú, nə à yə̀ə́ kʋ nii nə bá sú.»
Yɩɩ pɩn ʋ Siŋu tə nəkwɩna sapwɩtwa də fugə tə nə
24 Moyizə pìí ʋ nan Yɩɩ jə́rə́ gansili tə wa, ʋ tún kʋ tə nii Ba-Yígúrə́-Jə-Tiu nə swɩ̀n ʋ con, ʋ bɩrɩ lalʋʋ tə nə. Ʋ kúrí lalʋʋ tə wa nəkwɩna sapwɩtwa də fugə, ʋ zɩgɩ ba ʋ ja kɩkarɩ Yɩɩ jə́rə́ gansili tə. 25 Ba-Yígúrə́-Jə-Tiu cúə́ bakwan tə titəŋi wa, ʋ swɩ̀n Moyizə con, ʋ ga lɩ Moyizə siŋu tə mancɩn, ʋ kə nəkwɩna sapwɩtwa də fugə tə yuu wa. Máŋá tə wa Siŋu tə nə cúə́ ba yuu wa, ba zàn ba swɩ̀n Yɩɩ nii sʋ̀ràn. Yá kʋ dàń nə wà yáá yí.
26 Bara bələ duən, ba yɩra nə yɩ Ɛlədadə də Medadə, yà mɛn yijaa bwálɩ́ tə wa, yá Siŋu tə cúə́ ba də yuu wa. Cɩ́gá, ba də yà wulə nəkwɩna sapwɩtwa də fugə tə wa, yá ba ga wà Yɩɩ jə́rə́ gansili tə con vəli. Ba də wulə ba swɩ̀n Yɩɩ nii sʋ̀ràn, yijaa bwálɩ́ tə wa. 27 Balandʋrʋ don dəri ʋ va ʋ swɩ̀n kʋ Moyizə con, ʋ wʋ́: «Ɛlədadə də Medadə wulə yijaa bwálɩ́ tə wa, ba swɩ̀n Yɩɩ nii sʋ̀ràn!» 28 Nun bìú Zozuwe, ʋ nə yɩ Moyizə tʋtʋnʋ, ʋ zandʋan mama, dàń swɩ̀n Moyizə con, ʋ wʋ́: «À yuu-tiu Moyizə, pa sə ba yá ba sʋgʋ tə.» 29 Moyizə pìí ʋ le wá, ʋ wʋ́: «Kʋ yɩ à mʋ̀ yɩrɩ nə n fwa badoli naaa? Kʋ yà nə wàá, sə Ba-Yígúrə́-Jə-Tiu pa ʋ Siŋu tə cú Yɩzərayɛlə lɩ̀à tə mama yuu wa, sə ba ya ʋ nii sʋ̀sʋ̀nà.» 30 Yá Moyizə dàń pìí ʋ va ba yijaa bwálɩ́ tə nə, ʋ mʋ̀ də Yɩzərayɛlə lɩ̀à nəkwɩna tə.
lwíí tə yoo
31 Ba-Yígúrə́-Jə-Tiu pɩn vʋʋ nan mʋʋ tə con, kʋ pɛ̀ lwíí kʋ ja bà kʋ pú yijaa bwálɩ́ tə nə. Tə yà kɩkarɩ yijaa bwálɩ́ tə mama, tə də kʋ ga yɩ ndə dɩɩn nədʋ vəlu nə. Tə nə larɩ tə pú tɩa duən yuu wa, tə yí jɩvaŋɩ yiə bələ. 32 Yɩzərayɛlə lɩ̀à tə pɛ̀ lwíí tə, kʋ yɩtʋrɩ tə mama, də kʋ tɩtɩn tə mama, də dɩɩn tə nə dà lá. Ba lìù mama pɛ̀ lwíí tə kilo mʋ̀rʋ̀ kapʋpʋ. Ba larɩ tə tɩa mama, ba ja kɩkarɩ ba yijaa bwálɩ́ tə. 33 Máŋá tə ba tə nə wà nàŋʋ́ tə dí ba zwɛ̀, də kʋ yà tə wulə ba yələ wa, Ba-Yígúrə́-Jə-Tiu lɩŋa zàn lalʋʋ tə yuu wa. Yá ʋ dàń pɩn càn nəfarʋ yí ba. 34 Ba dɩga bwálɩ́ təntə yɩrɩ Kibərɔtə-Tava. Kʋ də̀ń nə yɩ “pəŋə libərə”. Cɩ́gá, mə lá nə ba gùrì ba tə naŋwɩan nə jɩn ba.
35 Lalʋʋ tə zàn Kibərɔtə-Tava nə, ba va Haserɔtə. Yá ba ken ba yijaa bwálɩ́ Haserɔtə nə.