Miriyamə də Aron swɩ̀n ba zɩgɩ Moyizə nə
12
1 Miriyamə də Aron swɩ̀n ba zɩgɩ Moyizə nə, ʋ nə tì Kuswə tɩ̀án bʋ̀á yɩrɩ. Cɩ́gá, Moyizə yà tì Kuswə tɩ̀án bʋ̀á ʋ ma fwa ʋ kan. 2 Ba swɩ̀n, ba wʋ́: «Ba-Yígúrə́-Jə-Tiu yɩ Moyizə cɩcɩ nə, ʋ twá ʋ ma swɩ̀n naaa? Ʋ bá nə də nə twá ʋ ma swɩ̀n naaa?» Yá Ba-Yígúrə́-Jə-Tiu dàń nì kʋ. 3 Yá Moyizə yà yɩ lìù tə ʋ nə muŋə ʋ tɩ̀àn zənzən. Lìù yà tə̀lə́ tɩa yuu wa ndə ʋ nə. 4 Naa nədʋ də Ba-Yígúrə́-Jə-Tiu swɩ̀n Moyizə, də Aron, də Miriyamə con, ʋ wʋ́: «Á mɛ batwa bɩ̀àn Yɩɩ jə́rə́ gansili tə wa.» Ba mɛ batwa ma va ba yí lá. 5 Ba-Yígúrə́-Jə-Tiu dàń twá bakwan kùlì nə ʋ cú, ʋ zɩga Yɩɩ jə́rə́ gansili tə mimii nə. Ʋ bon Aron də Miriyamə, ba bələ tə ga twən ba yí lá. 6 Ʋ swɩ̀n, ʋ wʋ́: «Á cʋga à sʋ̀ràn tə zəni! Yɩɩ nii sʋ̀sʋ̀nʋ̀ nə wulə á titəŋi wa, kʋ yɩ kʋ wá twá də nɩʋn, à mʋ̀ Ba-Yígúrə́-Jə-Tiu ma bɩrɩ à tɩ̀àn wá. Kʋ yɩ kʋ wá twá də pandwɩa, à ma swɩ̀n ʋ con. 7 Yá kʋ tà nətʋ kʋ pa à tʋtʋnʋ Moyizə mʋ̀ nə. Ʋ yɩ bɛɛ tə ʋ nə yɩ pùə́ nədʋ tíú, à dìə̀ tə mama wa. 8 À swɩ̀n də wá nəpon nəpon, à pɩn ʋ na won tə à nə nyən də kʋ. À ba səgə à ma swɩ̀n ʋ con. Bɛ̀ɛ̀ dàń nə pɩn fən wà aba jɩn, sə á swɩ̀n á zɩgɩ à tʋtʋnʋ Moyizə nə?» 9 Ba-Yígúrə́-Jə-Tiu lɩŋa zàn ba yuu wa zənzən, ʋ ga kɛ̀ń ʋ vìí. 10 Máŋá tə bakwan tə nə zàn kʋ yá Yɩɩ jə́rə́ gansili tə, də nə̀ń dayaan nə ka tʋa Miriyamə nə. Ʋ yɩra pɩrɩ nəpon ndə gunmuən nə. Aron viviri ʋ ywàń Miriyamə con, yá ʋ nɩ də Miriyamə jìgə̀ dayarʋ. 11 Aron dàń swɩ̀n Moyizə con, ʋ wʋ́: «À yuu tíú, à lòrì sə n kə yìə́n lá! À lòrì mʋ́, dàn ká pa càn yí nəba nə cʋna tə yɩrɩ, nə nə tʋn də ləyiri. 12 À lòrì mʋ́, dàn ká pa Miriyamə jì ndə bìsɩ̀ná nə tɩga ʋ nuu pùə́ wa, ʋ nuu ga lɩrɩ wá də ʋ yɩra vuri nʋran!»13 Moyizə bubwi ʋ kə Ba-Yígúrə́-Jə-Tiu nə, ʋ wʋ́: «À tíú Yɩɩ, à lòrì mʋ́ sə n pa yazurə Miriyamə nə!» 14 Ba-Yígúrə́-Jə-Tiu dàń swɩ̀n Moyizə con, ʋ wʋ́: «Ʋ nyɩna nə pìì mɩmɩan ʋ kə ʋ yáá wa, cavɩra bá ja wá, kʋ yí dɩan barpɛ naaa? Á kənə wá á yijaa bwálɩ́ tə kwa con, kʋ ja va dɩan barpɛ. Kʋ kwa nə, ʋ wá pìí ʋ bà yijaa bwálɩ́ tə wa.» 15 Ba dɩŋɩ Miriyamə ba lɩ ba yijaa bwálɩ́ tə wa, dɩan barpɛ. Lalʋʋ tə wà vìí, kʋ va kʋ yí Miriyamə nə pìí ʋ bà lalʋʋ tə wa. 16 Kʋ kwa nə, lalʋʋ tə zàn Haserɔtə nə ba vìí. Yá ba vəli ba kə ba yijaa bwálɩ́ Paran kasɔɔ lanworu tə wa.