Moyizə tʋn mɩla lɩ̀à Kanaan lʋʋ nii tə wa
13
1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Tʋn bara, sə ba va ba mɩ̀àn Kanaan lʋʋ nii tə, à nə pɩn Yɩzərayɛlə lɩ̀à tə nə. Dwíí mama wa, á wá lɩ bɛɛ nədʋ, ʋ nɩbara-ba dwíí yuu yɩrɩ. Ba lìù mama mɛ sə ʋ ya pabiu.» 3 Moyizə zɩgɩ Paran kasɔɔ lanworu tə wa, ʋ tʋn ba, ndə Ba-Yígúrə́-Jə-Tiu nə pɩn wá nii nətʋ. Ba mʋ̀ bara tə mama yà yɩ Yɩzərayɛlə lɩ̀à tə yáá tɩ̀án. 4 Nə̀ń ba yɩra: Ribɛn dwíí tə wa, kʋ yɩ Zakurə bìú Swamuwa.5 Simeyon dwíí tə wa, kʋ yɩ Hori bìú Swafatə.
6 Zwida dwíí tə wa, kʋ yɩ Yefune bìú Kalɛbə.
7 Yɩsakarə dwíí tə wa, kʋ yɩ Zʋzɛfə bìú Yigalə.
8 Efərayimə dwíí tə wa, kʋ yɩ Nun bìú Hosweya.
9 Bɛnzwamɛn dwíí tə wa, kʋ yɩ Rafu bìú Paləti.
10 Zabulon dwíí tə wa, kʋ yɩ Sodi bìú Gadɩyɛlə.
11 Zʋzɛfə bìú Manase dwíí tə wa, kʋ yɩ Susi bìú Gadi.
12 Dan dwíí tə wa, kʋ yɩ Gemali bìú Amɩyɛlə.
13 Aswɛrə dwíí tə wa, kʋ yɩ Mikayɛlə bìú Seturə.
14 Nɛfətali dwíí tə wa, kʋ yɩ Vofəsi bìú Nabi.
15 Gadə dwíí tə wa, kʋ yɩ Maki bìú Gewuwɛlə.
16 Mə bara tə Moyizə nə tʋn, sə ba va ba mɩ̀àn lʋʋ nii tə, yɩra nə nətʋ. Moyizə dɩga Nun bìú Hosweya yɩrɩ Zozuwe.
17 Moyizə tʋn ba, sə ba va ba mɩ̀àn Kanaan lʋʋ nii tə. Ʋ swɩ̀n ba con, ʋ wʋ́: «Á wá twá Negɛbə* nagwanaa tə wa, á va á dɩ̀ paan tə yuu wa. 18 Á wá na lʋʋ nii tə nə yɩ nətʋ. Á wá na də kʋ wa lɩ̀à tə nə jə dɩ̀àn, nə à yə̀ə́ ba nə ba dɩ̀àn jə. Á tə wá na də ba nə dáá zənzən, nə à yə̀ə́ ba nə ba dáá. 19 Á wá na də lʋʋ nii tə ba nə wulə kʋ wa nə ywán, nə à yə̀ə́ kʋ nə ba ywán. Á wá na də tɩan tə ba nə wulə tə wa, nə yɩ dɩ̀àn dəkuu bwálá, nə à yə̀ə́ ba nə wà biritaŋʋ lwè ba ma kɩkarɩ tə. 20 Á wá na lʋʋ nii tə tɩa nə yɩ nətʋ. Ka nə yɩ tɩa ka nə ywán, nə á yə̀ə́ tɩa ka nə tɩga. Tɩ̀án nə wulə lá, nə à yə̀ə́ tɩ̀án nə tə̀lə́ lá. Á vələ də wʋdɩʋ, á ga kwa lʋʋ nii tə tɩ̀án lənə, á ja bà.» Kʋ yɩn divɛn tɩ̀án təntən lənə máŋá wa.
21 Ba vəli ba mɩ̀àn lʋʋ nii tə mama, kʋ nə zɩgɩ Sin kasɔɔ lanworu tə nə, kʋ va kʋ yí Rehɔbə, kʋ nə wulə Hamatə nii nə. 22 Ba twá Negɛbə nagwanaa tə wa, ba va ba yí Ebəron. Mə lá nə Ahiman, də Sweswayi, də Taləmayi, ba nə yɩ Anakə dwíí yà wulə. Ba yà lwə̀ Ebəron tɩʋ tə bɩna barpɛ, də ba tə wà Sʋan tɩʋ tə lwè Ezwipətə nə. 23 Ba vəli ba yí Ɛswəkɔlə vara tə wa, ba za divɛn tɩ̀ʋ́ naa də ka lənə ziu, ba goli dàʋ̀ nədarʋ nə, ba lɩ̀à bələ san duən nə ba palɩ. Ba kwə gərenadə tɩ̀ʋ́ lənə də kapɩra ba súrí lá. 24 Ba dɩga kʋ bwálɩ́ təntə yɩrɩ Ɛswəkɔlə vara. Kʋ də̀ń nə yɩ “tɩ̀án lənə zirən vara”, Yɩzərayɛlə lɩ̀à tə nə za tɩ̀án lənə ziu kʋ bwálɩ́ tə wa yɩrɩ.
Bara tə Moyizə nə tʋn nii túŋú yoo
25 Bara tə pìí ba nan lʋʋ nii tə ka mɩ̀àn ba bà, dɩan sapwɩlə nii nə. 26 Ba pìí ba bà Moyizə, də Aron, də Yɩzərayɛlə lalʋʋ tə mama con, Kadɛswə nə, Paran kasɔɔ lanworu tə wa. Ba dàń tún ba nii ba də lalʋʋ tə mama con, ba ga bɩrɩ ba lʋʋ nii tə tɩ̀án lənə. 27 Ba swɩ̀n Moyizə con, ba wʋ́: «Nə yí lʋʋ nii tə wa, n nə tʋn nəba. Kʋ cɩ́gá yɩ lʋʋ nii tə nayɩla də tʋ̀ràn nə súə́ lá, tə pàlɩ̀. Nə̀ń kʋ tɩ̀án lənə nə. 28 Yá lalʋʋ tə nə wulə lʋʋ nii tə wa jə dɩ̀àn, tɩan tə lwə̀ tə kɩkarɩ də biritaŋʋ, tə ga yɩ tɩfaran. Nə nɩ Anakə dwíí lɩ̀à də tətə lá. 29 Amalɛkə dwíí tə wulə Negɛbə nagwanaa tə wa. Ɛtə dwíí tə, də Yebusə tɩ̀án, də Amɔrə dwíí tə wulə Paan tə yuu wa. Kanaan tɩ̀án tə wulə mʋʋ tə nii nə, də Zʋrədɛn mʋnaa tə bibiru nə.»
30 Kalɛbə pɩn lalʋʋ tə yà nə ŋʋŋwɩn ba zɩga Moyizə nə, pú ba nii, ʋ ga swɩ̀n, ʋ wʋ́: «Nə vələ nə jon lʋʋ nii tə nə tɩnɩ. Cɩ́gá, nə wá də́ dɩ̀àn!» 31 Yá bara tə, ba də wá nə vəli ba mɩ̀àn lʋʋ nii tə, swɩ̀n ʋ con, ba wʋ́: «Nə wàrɩ̀ nə vəli nə tɛ lalʋʋ təntə. Cɩ́gá, ba dɩ̀àn dwə nəba!» 32 Yá ba dàń wulə ba maŋa nətʋ lʋʋ nii tə, ba nə vəli ba mɩ̀àn tə nə yɩ, ba bɩrɩ Yɩzərayɛlə lɩ̀à tə nə. Ba swɩ̀n ba wʋ́: «Lʋʋ nii tə nə nə jírí kʋ mama nə ma mɩ̀àn kʋ, yɩ lʋʋ nii kʋ nə də́ kʋ wa lɩ̀à tə. Yá lɩ̀à tə mama nə nə nɩ, yɩ bara ba nə dara. 33 Nə nɩ ləzwəndaran təntə ba nə yɩ Anakə dwíí lɩ̀à lá. Cɩ́gá, ba yɩ ləzwəndaran dwíí. Nə yà na nə tɩ̀àn ndə jə̀rə̀n nə, ba də tətə ga na nəba nətʋ, ba yɩ́á wa.»