Lalʋʋ tə vɩga nii
14
1 Yɩzərayɛlə lalʋʋ tə mama zɩ̀n ba kori ba kə yɩɩ nə ba bubwi, ba ga kwi kʋ tɩtɩn təntə mama wa. 2 Yɩzərayɛlə lɩ̀à tə mama swɩ̀n ba zɩgɩ Moyizə də Aron nə. Púlí tə mama swɩ̀n ba con, ba wʋ́: «Kʋ nə yɩ nə yà zə́n nə tɩ Ezwipətə nə, nə à yə̀ə́ kasɔɔ lanworu kʋ tə wa, kʋ yà kʋkwa! 3 Bɛ̀ɛ̀ dàń nə pɩn Ba-Yígúrə́-Jə-Tiu ma ja nəba ʋ vələ lʋʋ nii kʋ tə wa, sə ba gʋ nəba də kwatara sɩ̀ʋ́, ba ga vɩrɩ nə kana də nə bɩ̀á? Nə nə pìí nə va Ezwipətə kʋ ba kʋkwa?» 4 Yá ba swɩ̀n duən con, ba wʋ́: «Nə túŋə́ nə pɩ̀ʋ́, nə ga pìí nə va Ezwipətə!»5 Moyizə də Aron tʋa ba pú ba yáá tɩa, Yɩzərayɛlə lɩ̀à tə mama yáá con, ba nə kun duən nə. 6 Nun bìú Zozuwe də Yefune bìú Kalɛbə yɩn lɩ̀à tə wa, ba nə vəli ba mɩ̀àn lʋʋ nii tə. Pucʋnɩ zʋa ba zənzən, ba ga van ba gànàn ba kàrɩ́. 7 Ba swɩ̀n Yɩzərayɛlə púlí tə mama con, ba wʋ́: «Lʋʋ nii təntə nə nə jírí kʋ wa nə ma mɩ̀àn kʋ, yɩ lʋʋ nii kʋ nə ziən zənzən. 8 Ba-Yígúrə́-Jə-Tiu nə fwa wʋywaŋʋ* nə yɩra, ʋ wá pa nə zʋ lʋʋ nii təntə wa, ʋ ga wá pa kʋ nəba. Kʋ yɩ lʋʋ nii tə, nayɩla də tʋ̀ràn nə súə́ lá, tə pàlɩ̀. 9 Á dànà ká vɩ Ba-Yígúrə́-Jə-Tiu nii. Á dànà ká dəri lʋʋ nii təntə tɩ̀án fən. Nə wá ta ba nə də́ lala. Ba yɩa tə vɩga ba tə dʋgʋ, Ba-Yígúrə́-Jə-Tiu ga wulə də nə mʋ̀. Á dànà ká pa ba fən ja aba.»
10 Yɩzərayɛlə púlí tə mama yà swɩ̀n, sə ba dɩlɩ Zozuwe də Kalɛbə də kapana. Kʋ máŋá tə wa, Ba-Yígúrə́-Jə-Tiu dun tə pɛ́n tə nan Yɩɩ jə́rə́ gansili tə yuu con, Yɩzərayɛlə lɩ̀à tə mama yáá con.
Moyizə jɩn Yɩɩ taŋa nə Yɩzərayɛlə púlí tə yɩrɩ
11 Ba-Yígúrə́-Jə-Tiu swɩ̀n Moyizə con, ʋ wʋ́: «Lalʋʋ kʋ tə wá fʋfʋlɩ nə, kʋ ja va kʋ yí máŋá kwà wa? Lalʋʋ kʋ tə wá vɩ sə ba kə ba waa à nə, kʋ ja va kʋ yí máŋá kwà wa, à ga tʋn dɩ̀àn mɩmɩnan tə tə mama ba titəŋi wa? 12 À wá pa tɩan yayɩpwaran gʋ ba, à ga cʋ̀gʋ̀ ba. Kʋ kwa nə, à dàń wá pa n jì dwíí nəfarʋ, kʋ nə jə dɩ̀àn kʋ doni dwíí kʋ tə.» 13 Moyizə swɩ̀n Ba-Yígúrə́-Jə-Tiu con, ʋ wʋ́: «Ezwipətə tɩ̀án nɩ də kʋ yɩ dɩ̀àn n tʋn ba yɩra, n ma lɩ lalʋʋ kʋ tə, ba titəŋi wa. 14 Yá ba swɩ̀n kʋ lʋʋ nii kʋ tə lɩ̀à tə con. Ba nì də n mʋ̀ Ba-Yígúrə́-Jə-Tiu nə wulə lalʋʋ kʋ tə titəŋi wa, n ga naŋa n bɩrɩ n tɩ̀àn ba nəpon nəpon. N mʋ̀ Ba-Yígúrə́-Jə-Tiu bakwan kùlì nə yàá zɩga ba yuu con. Yɩcaʋ wa, n tətə yàá wulə ba yáá n vəli bakwan kùlì wa, yá tɩtɩn nə, n yàá wulə ba yáá mənvwə wa. 15 N nə pɩn lalʋʋ kʋ tə tɩ ndə ləzwəndʋa nə, dwíə́ nəkaran* tə nə nì n yoo, wá swɩ̀n, ba wʋ́: 16 “Ba-Yígúrə́-Jə-Tiu yà wàrɩ̀ ʋ pɩn lalʋʋ kʋ tə zwɩ lʋʋ nii tə wa, ʋ nə kan nii sə ʋ pa ba. Kʋ mʋ̀ nə pɩn, ʋ ma gʋ ba kasɔɔ lanworu tə wa.” 17 Sɩ́ʋ́n nə, à Yuu-Tiu, n dàń tʋn n dɩ̀àn tə n bɩrɩ. Cɩ́gá, n swɩ̀n, n wʋ́: 18 “À mʋ̀ Ba-Yígúrə́-Jə-Tiu lɩŋa ba lala zaŋa. À yɩ wʋywanyiən, à sɛ̀ lwɩa, à yá yolwan də cʋna à pɩn tə kɛ̀ń, yá à dàń nə ba yolwafwanʋ jələ ndə lìù nə, ʋ nə wà yoo cʋ̀gʋ̀. À ŋwɩ́n nyɩna-ba cʋna ŋwɩ́rán ba bɩ̀á də ba nɩ̀án yɩra, kʋ va kʋ yí ba dwíí tə dəkurən batwa də banɩa nii nyiən”. 19 À lòrì mʋ́ sə n kwɛn lalʋʋ kʋ tə cʋna n lɩ n də ba pwə́rə́ wa, n wʋywaŋʋ* tə nə dáá yɩrɩ, ndə n nə kwɛn ba cʋna n lɩ n də ba pwə́rə́ wa, kʋ nə zɩgɩ Ezwipətə lʋʋ nii tə wa, kʋ bà kʋ yí yəbə.»
20 Yá Ba-Yígúrə́-Jə-Tiu swɩ̀n, ʋ wʋ́: «À wá kwɛn ba cʋna à lɩ à də ba pwə́rə́ wa, ndə n nə lòrì nətʋ. 21 Cɩ́gá, à mʋ̀ Ba-Yígúrə́-Jə-Tiu wulə, à dun tə ga sú tɩa yuu mama. 22 Ba tə mama ba nə nɩ à dun tə, də dɩ̀àn mɩmɩnan tə à nə tʋn Ezwipətə lʋʋ nii tə wa, də kasɔɔ lanworu tə wa, ba manwarɩ ba dídə́n nə nɛɛ fugə, ba ga wà à sʋgʋ cʋgʋ. 23 À dùə̀ də ba mʋ̀ lɩ̀à təntə mama bá zʋ lʋʋ nii tə wa, à nə kàn nii sə à pa ba nyɩna-ba nə. Ba mʋ̀ lɩ̀à tə mama nə fʋfʋlɩ nə bá zʋ lʋʋ nii tə wa. 24 Yá à tʋtʋnʋ Kalɛbə mʋ̀ yà jə pubʋŋa don. Ʋ wà bɛ̀ɛ́ ʋ ma zìlí à nii. À wá pa ʋ zʋ lʋʋ nii tə wa ʋ nə vəli, yá ʋ dwíí tə wá tɩnɩ kʋ. 25 Amalɛkə dwíí tə də Kanaan tɩ̀án tə jə̀ə́ vara tə wa. Jwɩan nə, sə á viviri á twá kasɔɔ lanworu tə wa, á va Mɩncanɩ mʋʋ tə con.»
Ba-Yígúrə́-Jə-Tiu zɩga ʋ lalʋʋ tə nə
26 Ba-Yígúrə́-Jə-Tiu swɩ̀n Moyizə də Aron con, ʋ wʋ́: 27 «Máŋá kwà wa nə lalʋʋ kʋ tə nə yɩ wʋlʋnyɩna wá yá ba ŋʋŋwɩa tə nə, à yuu wa? À nì Yɩzərayɛlə lɩ̀à ŋʋŋwɩan tə, ba nə ŋʋŋwɩn ba zɩga à nə. 28 Swɩ̀n ba con də à mʋ̀ Ba-Yígúrə́-Jə-Tiu wulə! À mʋ̀ Ba-Yígúrə́-Jə-Tiu nii sʋgʋ nə. À wá tʋn kʋ tə à nə nì də á ŋʋŋwɩn tə á yɩra. 29 Á wá tɩ kasɔɔ lanworu kʋ tə wa. Á mʋ̀ lɩ̀à tə mama ba nə gàlɩ̀ aba, kʋ nə zɩgɩ á lɩ̀à tə nə jə bɩna sapʋa, də ba tə nə dwə nətʋ, á ga ŋʋŋwɩn á zɩgɩ à nə. 30 À dùə̀ də á kʋ́ʋ̀ bá zʋ lʋʋ nii tə wa, à nə kàn nii sə à pa á ya kʋ wa. Yefune bìú Kalɛbə də Nun bìú Zozuwe cɩcɩ nə wá zʋ kʋ wa. 31 Á bɩ̀á tə, á nə swɩ̀n də Kanaan tɩ̀án wá vɩrɩ, mə ba mʋ̀ nə à wá pa ba zʋ lʋʋ nii tə wa, yá ba wá yəni kʋ lʋʋ nii tə á nə wà jələ. 32 Yá á mʋ̀ wá tɩ kasɔɔ lanworu kʋ tə wa. 33 Á bɩ̀á tə wá ywan bɩna sapwɩlə kasɔɔ lanworu tə wa, ba ga də́ càn á nə wà təgətəgə yɩn à yáá con yɩrɩ, kʋ ja va kʋ yí máŋá tə, á mʋ̀ mama nə wá tɩ á zwɛ̀ kasɔɔ lanworu tə wa. 34 Á fwa dɩan sapwɩlə, á ma mɩ̀àn lʋʋ nii tə. Kʋ pɩ̀à kʋ bɩrɩ də á cʋna tə wá zɩn á yuu wa bɩna sapwɩlə. Bɩnɩ mama yɩ dɩɩn nədʋ. Yá kʋ nətʋ dàń wá pa á lwarɩ də á nə vɩga nə tə nə cà nətʋ. 35 À mʋ̀ Ba-Yígúrə́-Jə-Tiu nə swɩ̀n kʋ, yá mə nətʋ nə à wá tʋn lalʋʋ kʋ tə yɩra, ba nə yɩ wʋlʋnyɩna. Ba ken nimarʋ ba ma zɩga à nə. Ba mama wá tɩ ba zwɛ̀ kasɔɔ lanworu tə wa.»
36 Bara tə Moyizə nə tʋn ba va ba mɩ̀àn lʋʋ nii tə nə pìí ba bà, ba pɩn lalʋʋ tə mama ŋʋŋwɩn ba zɩgɩ Moyizə nə, ba ga man nətʋ tə mama, lʋʋ nii tə nə lwara. 37 Ba mʋ̀ bara təntə kɛ́n ba tʋ Ba-Yígúrə́-Jə-Tiu yáá con. Ʋ pɩn ba tɩ, ba nə man nətʋ tə mama lʋʋ nii tə nə lwara yɩrɩ. 38 Nun bìú zozuwe də Yefune bìú Kalɛbə cɩcɩ nə ga, ba wà tɩ, bara tə nə vəli ba mɩ̀àn lʋʋ nii tə wa.
Lalʋʋ tə kʋ́ʋ̀ vɩga nii
39 Moyizə pìí ʋ bà ʋ swɩ̀n sʋ̀ràn təntə Yɩzərayɛlə lɩ̀à tə mama con, yá lalʋʋ tə yɩn pucʋnɩ nəfarʋ wa. 40 Lalʋʋ tə zàn jɩjʋ fuən fuən, ba dɩ̀ paan tə yupara wa, ba ga swɩ̀n, ba wʋ́: «Cɩ́gá, nə tʋn cʋna! Sɩ́ʋ́n nə, nə dàń wá va bwálɩ́ tə nə, Ba-Yígúrə́-Jə-Tiu nə bɩrɩ nəba.» 41 Moyizə swɩ̀n, ʋ wʋ́: «Kʋ nətʋ tə bá jì! Bɛ̀ɛ̀ nə pɩn á ma tə vɩ Ba-Yígúrə́-Jə-Tiu nii? 42 Á dànà ká va lá! Cɩ́gá, Ba-Yígúrə́-Jə-Tiu tə̀lə́ á titəŋi wa. Á dànà ká pa á dʋŋa ta aba ba də́. 43 Cɩ́gá, Amalɛkə dwíí tə də Kanaan tɩ̀án tə wulə yəbə, á yáá con. Yá ba wá gʋ aba də kwatara sɩ̀ʋ́. Á nə viviri á kwa á ma sà Ba-Yígúrə́-Jə-Tiu tə pɩn ʋ də bá ya də aba.»
44 Yá ba vɩga, ba ga va ba dɩ̀ paan tə yupara wa. Yá Ba-Yígúrə́-Jə-Tiu nimarʋ culu daka tə də Moyizə mʋ̀ wà ba naa zɩ̀n yijaa bwálɩ́ tə wa. 45 Amalɛkə dwíí tə də kanan tɩ̀án tə nə wulə paan tə yuu wa dàń cúə́ ba ta Yɩzərayɛlə. Ba ta Yɩzərayɛlə lɩ̀à tə ba də́, ba ga pú ba kwa ba tɩtaga ba, ba ja va ba yí Ɔrəma.