Galʋ 15

Nii tə ba nə tún vàrʋ́ càlɩ̀ jwəŋə yuu wa

1 Ba-Yígúrə́-Jə-Tiu swɩ̀n Moyizə con, 2 sə ʋ swɩ̀n Yɩzərayɛlə lɩ̀à tə con, ʋ wʋ́: «Máŋá tə á nə zʋa lʋʋ nii tə wa à nə pɩn aba, sə á ya kʋ wa, 3 á wá fwa jwəŋə á sʋ̀rɩ́ á pa à mʋ̀ Ba-Yígúrə́-Jə-Tiu nə. Tə wà ya jwəŋə ba nə sʋ̀rɩ́*, nə à yə̀ə́ nipoli* jwəŋə, nə à yə̀ə́ pupwən* jwəŋə, nə à yə̀ə́ á cànɩ̀ diŋə jwəŋə. Á wá ja vanfaran, nə à yə̀ə́ vanmɩnɩ á ma fwa jwəŋə tə lwán nə ywán, á pa à mʋ̀ Ba-Yígúrə́-Jə-Tiu nə. 4 Lìù tə ʋ nə wá fwa ʋ joŋi ʋ pa à mʋ̀ Ba-Yígúrə́-Jə-Tiu nə, ʋ wá ja zìlə́ won ʋ bà, kʋ nə yɩ munbʋa kilo batwa, ba nə ywɛ́ də nʋga litərə də faan. 5 Ʋ tə wá súrí divɛn litərə də faan, də ʋ joŋi tə nə yɩ pəbiə ba nə sʋ̀rɩ́, nə à yə̀ə́ pəbiə nimarʋ joŋi. 6 Kʋ nə yɩ pabɩʋ nə ʋ ma fwa joŋi tə, zìlə́ won tə nə wá súrí kʋ nə yɩ munbʋa kilo bardʋ, ba nə ywɛ́ də nʋga litərə bələ, 7 də divɛn litərə bələ. N wá fwa tə jwəŋə təntə tə lwán nə ywán, n pa à mʋ̀ Ba-Yígúrə́-Jə-Tiu nə. 8 N nə fwa nabiə joŋi ba nə sʋ̀rɩ́, nə à yə̀ə́ nipoli joŋi, nə à yə̀ə́ nimarʋ joŋi n pa à mʋ̀ Ba-Yígúrə́-Jə-Tiu nə, 9 n wá súrí zìlə́ won kʋ nə yɩ munbʋa kilo nʋgʋ, ba nə ywɛ́ də nʋga litərə batwa, 10 kʋ súrí divɛn litərə batwa nə. Tə wá ya joŋi ba nə sʋ̀rɩ́, tə lwán ga ywán tə pa à mʋ̀ Ba-Yígúrə́-Jə-Tiu nə.

11 Mə nətʋ nə ba wá fwa naʋ joŋi mama, də pabɩʋ joŋi mama, də pəbiə joŋi mama, də bʋbiə joŋi mama. 12 Á wá fwa nətʋ vàná tə mama yɩra, á nə pɩ̀à á ma fwa jwəŋə tə, də tə nə swə tə dáá nətʋ mama. 13 Mə nətʋ Yɩzərayɛlə lìù mama wá fwa jwəŋə təntə, máŋá tə wa ʋ nə wá fwa joŋi kʋ nə sʋ̀rɩ́, kʋ lwán ga ywán kʋ pa à mʋ̀ Ba-Yígúrə́-Jə-Tiu nə. 14 Vee nə twá ʋ jə̀ə́ á lʋʋ nii tə wa, kʋ tə nə wà dán, nə à yə̀ə́ kʋ nə jə bɩna kapʋpʋ, ʋ də nə pɩ̀à ʋ fwa joŋi ba nə sʋ̀rɩ́, kʋ lwán ga ywán ʋ pa à mʋ̀ Ba-Yígúrə́-Jə-Tiu nə, ʋ mɛ sə ʋ fwa kʋ ndə á də nə. 15 Kʋ wá ya yoo nədʋ à nə pɩn kʋ pʋ́pʋ́nɩ́ lalʋʋ tə mama yɩrɩ, də vee tə nə twá ʋ jə̀ə́ á con yɩrɩ. Kʋ wá ya yoo à nə pɩn kʋ pʋ́pʋ́nɩ́, kʋ nə wulə máŋá də máŋá mama wuuu, á dwíə́ tə mama yɩrɩ. Kʋ wá ya nətʋ vee yɩrɩ, də á tətə yɩrɩ, Ba-Yígúrə́-Jə-Tiu yáá con. 16 Kʋ wá ya nii* nədʋ, də yìə̀n yiri nədʋ à nə bɩrɩ sə tə tʋn, sə á mʋ̀ də vee tə nə twá ʋ jə̀ə́ á con mɛ twá tə nə.»

Təntən dipɛn pupwən* joŋi yoo

17 Ba-Yígúrə́-Jə-Tiu swɩ̀n Moyizə con, 18 sə ʋ swɩ̀n Yɩzərayɛlə lɩ̀à tə con, ʋ wʋ́: «Máŋá tə á nə zʋa lʋʋ nii tə wa, à nə wá pa á zʋ lá, 19 á nə pɩ̀à sə á də́ lʋʋ nii tə dipɛn, á wá dí yáá á lɩ zìlə́ won á pa à mʋ̀ Ba-Yígúrə́-Jə-Tiu nə. 20 Á wá fʋ á dipɛn mun tə á nə bùə̀, á ma dí yáá á fwa gàtó nədʋ á pa nə, ndə ba nə lɩ təntən wobɩa tʋa wa ba pɩn nə nətʋ. 21 Á wá twá nətʋ á ma pa á təntən dipɛn mun tə á nə bùə̀ zìlə́ won, à mʋ̀ Ba-Yígúrə́-Jə-Tiu nə. Kʋ wá ya nətʋ á dwíə́ tə mama wa, á nə wá kə lʋʋ wa.»

Cʋna tə lìù nə tʋn də ʋ yəri joŋi

22 «Dɩɩn don, kʋ nə twi kʋ yí də á cʋ̀gʋ̀ culu yìə̀n tə wa, à mʋ̀ Ba-Yígúrə́-Jə-Tiu nə twá Moyizə nə, ʋ ma pa nii tə yuu wa, 23 kʋ wàá də kʋ yɩ yìə̀n tə mama à nə twá də Moyizə à ma bɩrɩ aba sə á tʋn, kʋ nə zɩgɩ dɩɩn tə nə, à nə pɩn nii yìə̀n təntə yuu wa, kʋ va kʋ yí á dwíə́ tə á nə wá kə lʋʋ wa. 24 Lalʋʋ tə nə wà cʋna tə nii nə lwarɩ, ba mama wá ja nabala ba ma fwa joŋi tə ba nə sʋ̀rɩ́, kʋ lwán ga ywán, ba pa à mʋ̀ Ba-Yígúrə́-Jə-Tiu nə. Ba wá súrí zìlə́ wiən joŋi tə yɩra, tə nə yɩ mun də divɛn, ndə kʋ nə mɛ nətʋ. Ba wá ja bʋtɩlʋ ba ma fwa cʋna kwɩan* joŋi. 25 Yɩɩ joŋwanʋ tə wá fwa cʋna kwɩan joŋi ʋ pa Yɩzərayɛlə lalʋʋ tə mama nə, yá à wá kwɛn ba cʋna tə à lɩ à mʋ̀ də ba pwə́rə́ wa. Cɩ́gá, kʋ yɩ ba cʋ̀gʋ̀ də ba yəri, yá ba fwa joŋi tə nə sʋ̀rɩ́ ba pa à mʋ̀ Ba-Yígúrə́-Jə-Tiu nə, ba ga súrí vànɩ́ kʋ nə, sə ba ma kwɛn culu tə ba nə cʋ̀gʋ̀ də ba yəri. 26 À wá kwɛn Yɩzərayɛlə lalʋʋ tə mama, də vee tə nə twá ʋ jə̀ə́ ba con cʋna à lɩ à mʋ̀ də ba pwə́rə́ wa. Cɩ́gá, kʋ yɩ lalʋʋ tə mama nə cʋ̀gʋ̀ də ba yəri.

27 «Kʋ nə yɩ lìù nədʋ nə cʋ̀gʋ̀ də ʋ yəri, ʋ wá ja bɩnɩ nədʋ bʋ̀n ʋ ma fwa cʋna kwɩan joŋi. 28 Yɩɩ joŋwanʋ tə wá fwa cʋna kwɩan joŋi ʋ pa wá, ʋ nə tʋn cʋna də ʋ yəri à mʋ̀ Ba-Yígúrə́-Jə-Tiu yáá con yɩrɩ. Máŋá tə ʋ nə fwa cʋna kwɩan joŋi tə ʋ pa wá, à wá kwɛn ʋ cʋna tə à lɩ à mʋ̀ də wá pwə́rə́ wa. 29 Yɩzərayɛlə lìù, nə à yə̀ə́ vee ʋ nə twá ʋ jə̀ə́ ba lʋʋ nii tə wa nə tʋn cʋna də á yəri, cwəŋə nədʋ nə wulə ba mama yɩrɩ.

30 «Yá tɩʋ tɩ̀án tə wa lìù, nə à yə̀ə́ vərə tə wa lìù nə sɩnɩ ʋ tʋn cʋna, kʋ yɩ à mʋ̀ Ba-Yígúrə́-Jə-Tiu ʋ twɩn. Á wá dɩŋa kʋ mʋ̀ lìù təntə á lɩ ʋ dwíí wa. 31 Ʋ fʋfʋlɩ à mʋ̀ Ba-Yígúrə́-Jə-Tiu nii sʋgʋ tə, ʋ ga vɩ nii tə à mʋ̀ Ba-Yígúrə́-Jə-Tiu nə pɩn. Á wá dɩŋa kʋ mʋ̀ lìù təntə á lɩ, yá ʋ yolwan tə wá zɩn ʋ tətə yuu wa.»

Càn tə nə wá yí lìù tə nə wà sìə́ dɩɩn tə zìlí

32 Máŋá tə Yɩzərayɛlə lɩ̀à tə yà nə wulə kasɔɔ lanworu tə wa, ba nɩ bɛɛ don də ʋ wulə ʋ pɛ̀ dɛɛ sìə́ dɩɩn nə. 33 Lɩ̀à tə nə nɩ wá də ʋ wulə ʋ pɛ̀ dɛɛ tə jɩn wá ba ja bà Moyizə də Aron, də lalʋʋ tə mama con. 34 Ba ken wá bwálɩ́ nə, ba ywàń ʋ yuu nə zəni. Cɩ́gá, ba yà tə wà yoo tə ba nə mɛ sə ba ma fwa wá bɩrɩ. 35 Ba-Yígúrə́-Jə-Tiu swɩ̀n Moyizə con, ʋ wʋ́: «Bɛɛ təntə yɩ á wá gʋ. Lalʋʋ tə mama wá dɩlɩ wá də kapana ba gʋ, yijaa bwálɩ́ tə kwa con.» 36 Lalʋʋ tə mama cɩ́gá lɩ wá, ba ja nan yijaa bwálɩ́ tə kwa, ba dɩlɩ ba gʋ ndə Ba-Yígúrə́-Jə-Tiu yà nə pɩn nii Moyizə nə, sə ba tʋn nətʋ.

Gànàn nii zwala yoo

37 Ba-Yígúrə́-Jə-Tiu swɩ̀n Moyizə con, ʋ wʋ́: 38 «Swɩ̀n Yɩzərayɛlə lɩ̀à tə con, də ba dwíə́ tə mama con ba nə wá kə lʋʋ wa, sə ba kə zwala ba gànàn níə́ nə, ba ga kə ŋwənə nəlinu zwala tə nii nə, kʋ nə wulə ba gànàn tə yɩra. 39 Tə mʋ̀ zwala tə wá ya də aba, á wá ywàń tə, á ga lìí à mʋ̀ Ba-Yígúrə́-Jə-Tiu yìə̀n tə mama yoo, à nə pɩn nii tə yuu wa Moyizə nə, sə á twá tə nə. Kʋ nətʋ wá pa á kʋ́ʋ̀ bá twá á pùə́ fɩra yìə̀n tə, də á yɩ́á fɩra yìə̀n tə nə, tə nə pɩn á tà pùə́ nədʋ tɩ̀án də nə. 40 Kʋ wá pa á lìí yìə̀n tə mama à nə pɩn nii sə tə tʋn, á ga zìlí tə nii. Á dàń wá ya parɩ á pa à mʋ̀ á Yɩɩ tə nə. 41 À mʋ̀ nə yɩ Ba-Yígúrə́-Jə-Tiu à nə yɩ á Yɩɩ tə, à nə lɩ aba Ezwipətə lʋʋ nii tə wa, sə à ya á Yɩɩ. À mʋ̀ nə yɩ Ba-Yígúrə́-Jə-Tiu à nə yɩ á Yɩɩ.»