Kore, də Datan, də Abɩramə vɩga nii
16
1 Levi dwíí tə lìù don ʋ yɩrɩ nə yɩ Kore, ʋ nə yɩ Yɩsarə bìú, Kehatə dwíí tə wa, jɩn Eliyabə bɩ̀á Datan də Abiramə, də Pelɛtə bìú Onə, ba mɛ batwa nə yɩ Ribɛn dwíí tə wa lɩ̀à, ʋ súrí ʋ tɩ̀àn nə. 2 Ba də bara biələ də finu zàn ba zɩga Moyizə nə. Bara təntə yà yɩ Yɩzərayɛlə lɩ̀à, ba ga yɩ lalʋʋ tə yáá tɩ̀án, ba nə yàá bon jə́rə́ wa, ba nə zìlí ba yɩrɩ. 3 Ba kun duən nə ba zɩga Moyizə də Aron nə, ba ga swɩ̀n, ba wʋ́: «Kʋ dàń mɛ nətʋ! Cɩ́gá, lalʋʋ tə mama yɩ parɩ, Ba-Yígúrə́-Jə-Tiu ga wulə ba titəŋi wa. Bɛ̀ɛ̀ nə pɩn á dàń zɩ̀n á tɩ̀àn Ba-Yígúrə́-Jə-Tiu lɩ̀à tə yuu wa?»4 Máŋá tə Moyizə nə nì tə mʋ̀ sʋ̀ràn təntə, ʋ tʋa ʋ pú ʋ yáá tɩa. 5 Ʋ swɩ̀n Kore də ʋ púlí tə mama con, ʋ wʋ́: «Jwɩan jɩjʋ nə, Ba-Yígúrə́-Jə-Tiu wá bɩrɩ lìù tə nə yɩ ʋ mʋ̀ nyiən, də lìù tə nə yɩ parɩ, yá ʋ wá pa kʋ tíú bólí ʋ yɩra. Ʋ wá pa lìù tə ʋ nə wá kúrí bólí ʋ yɩra. 6 Nə̀ń kʋ tə, n mʋ̀ Kore də n púlí tə mama nə wá tʋn. Á tíə́ wiən tə ba nə ma sʋ̀rɩ́ wusinə, 7 á kə mən də wusinə tə wa jwɩan nə, á tún Ba-Yígúrə́-Jə-Tiu yáá con. Bɛɛ tə Ba-Yígúrə́-Jə-Tiu nə wá kúrí, mə kʋ tíú nə yɩ parɩ. Kʋ dàń mɛ nətʋ, Levi bɩ̀á-ba!»
8 Moyizə kʋ́ʋ̀ swɩ̀n Kore con, ʋ wʋ́: «Á dàń cʋga, Levi bɩ̀á-ba! 9 Yɩzərayɛlə lɩ̀à Yɩɩ tə ken aba vàn nə, Yɩzərayɛlə dwíí tə titəŋi wa, ʋ pa á bólí ʋ yɩra, sə á tʋn Yɩɩ wúlú gansili tə wa tʋ̀tʋ̀nán tə, sə á ga tʋn lalʋʋ tə yuu yɩrɩ, á pa wá. Kʋ nətʋ tə wà aba mɛ naaa? 10 Ʋ pɩn n mʋ̀ də n nubɩa Levi dwíí tə mama bólí ʋ yɩra. Yá á tə pɩ̀à sə á jon Yɩɩ joŋwanɩ tʋtʋŋɩ tə də! 11 Mə kʋ mʋ̀ nə pɩn, n mʋ̀ də n púlí tə mama yɩ á zɩga Ba-Yígúrə́-Jə-Tiu nə. Kʋ nə tà kʋ mʋ̀, Aron nə yɩ wàà, á ma ŋʋŋwɩn á zɩga ʋ nə?»
12 Moyizə tʋn lìù ʋ pa ʋ bon Datan də Abiramə, ba nə yɩ Eliyabə bɩ̀á. Yá ba swɩ̀n, ba wʋ́: «Nə ba lá bɩ̀àn! 13 N lɩ nəba lʋʋ nii tə wa, nayɩla də tʋ̀ràn nə súə́ lá, tə pàlɩ̀, n ja bà sə n gʋ kasɔɔ lanworu tə wa. Kʋ nətʋ tə wà mʋ́ mɛ, n tə ma pɩ̀à sə n də́ parɩ nə yuu wa? 14 Cɩ́gá mama, kʋ tà lʋʋ nii tə nayɩla də tʋ̀ràn nə súə́ lá tə pàlɩ̀ nə n ja nəba n zʋ. N wà nəba kárɩ́ də divɛn tɩ̀án pɩn, sə tə ya nə nyiən. N bʋŋa də nə yɩ lilirən naaa? Nə ba lá bɩ̀àn!» 15 Moyizə lɩŋa zàn zənzən, ʋ ga swɩ̀n Ba-Yígúrə́-Jə-Tiu con, ʋ wʋ́: «Dàn ká sɛ̀ ba zìlə́ won tə. À wà ba bɩ̀nà də tətə jon, à ga wà yolwan tʋn ba lìù nədʋ də tətə yɩra.»
Càn yí Kore də ʋ kwa lɩ̀à tə
16 Moyizə swɩ̀n Kore con, ʋ wʋ́: «Jwɩan nə, sə n mʋ̀ də n púlí tə bà á jəri duən Ba-Yígúrə́-Jə-Tiu yáá con, kʋ súrí Aron nə. 17 Á lìù mama tì ʋ won tə ʋ nə ma sʋ̀rɩ́ wusinə, á kənə wusinə tə wa, á ja bà Ba-Yígúrə́-Jə-Tiu yáá con. Kʋ bɩrɩ də wiən tə ba nə ma sʋ̀rɩ́ wusinə tə wá ya biələ də finu. N mʋ̀ də Aron lìù mama də wá tì ʋ won tə ʋ nə ma sʋ̀rɩ́ wusinə.» 18 Ba lìù mama tì ʋ won tə ʋ nə ma sʋ̀rɩ́ wusinə, ʋ kə mən də wusinə kʋ wa, ba ja bà ba zɩga Yɩɩ jə́rə́ gansili* tə mimii nə, ba də Moyizə də Aron. 19 Yá kore dàń ken ʋ púlí tə duən nə, ʋ ma zɩga ba nə, Yɩɩ jə́rə́ gansili tə mimii nə.
Ba-Yígúrə́-Jə-Tiu dun tə dàń nan lalʋʋ tə mama yáá con. 20 Ba-Yígúrə́-Jə-Tiu swɩ̀n Moyizə də Aron con, ʋ wʋ́: 21 «Á pwɩa á tɩ̀àn á lɩ lalʋʋ kʋ tə wa, sə à ga cʋ̀gʋ̀ ba naa nədʋ.» 22 Ba tʋa ba pú ba yáá tɩa, ba ga swɩ̀n, ba wʋ́: «Nə Tiu Yɩɩ, n mʋ̀ Yɩɩ tə n nə pɩn mɩɩ yatanaŋʋ mama nə, n wá pa n lɩŋa zàn Yɩzərayɛlə lalʋʋ tə mama yuu wa, kʋ ga yɩ ladʋa nə tʋn cʋna naaa?» 23 Ba-Yígúrə́-Jə-Tiu swɩ̀n Moyizə con, 24 sə ʋ swɩ̀n Yɩzərayɛlə lalʋʋ tə con, ʋ wʋ́: «Á twənə á nan kwa, á va yiŋʋnɩ, sapara tə mama wa, á yá Kore, də Datan, də Abiramə sànɩ́ tə nə.»
25 Moyizə zàn ʋ va Datan də Abiramə con, yá Yɩzərayɛlə lɩ̀à nəkwɩna tə zàn ba pú ʋ kwa ba va. 26 Ʋ swɩ̀n Yɩzərayɛlə lalʋʋ tə con, ʋ wʋ́: «Á twənə á va yiŋʋnɩ, á ga yá ləzwənlwana ba tə gansilə tə nə, á dànà ká dwen ba won mama yɩra, kʋ nə tà nətʋ, á də wá tɩ ba cʋna tə yɩrɩ.» 27 Ba twən ba nan kwa, ba va yiŋʋnɩ, sapara tə mama wa, ba ga yá Kore, də Datan, də Abiramə sànɩ́ tə nə.
Datan də Abɩramə nan ba zɩga ba gansilə tə mimii nə, də ba kana, də ba bɩ̀á, də ba nɩ̀án. 28 Moyizə swɩ̀n ba con, ʋ wʋ́: «Sɩ́ʋ́n nə, á wá lwarɩ də kʋ cɩ́gá yɩ Ba-Yígúrə́-Jə-Tiu nə tʋn nə, ʋ pa à tʋŋa yìə̀n tətə mama tə nii swi, yá à ba won tʋŋa à tətə dɩ̀àn. 29 Lɩ̀à ba tə nə tɩga ndə lɩ̀à mɛ nə tɩ nətʋ, kʋ nə yɩ ba mɩɩ tɩan ba tɩga ndə ləzwəni tə mɛ nə, də kʋ tà Ba-Yígúrə́-Jə-Tiu nə tʋn nə. 30 Yá Ba-Yígúrə́-Jə-Tiu nə tʋn yodʋn, ʋ pa tɩa tə súrí ka nii ka ma lìrə̀ ba də wiən tə mama tə nə yɩ ba mʋ̀ nyiən, ba va ciru* də ba tə nəŋə, á dàń wá lwarɩ də lɩ̀à ba tə fʋfʋlɩ Ba-Yígúrə́-Jə-Tiu.» 31 Máŋá tə wa Moyizə nə wulə tə sʋ̀ràn təntə mama ʋ swɩ̀n ʋ zwɛ̀, də tɩa tə lwə ba nɛɛ də̀ń nə. 32 Tɩa tə súrí ka nii ka lìrə̀ ba də ba dìə̀ lɩ̀à tə, də Kore lɩ̀à tə, də ba jɩjə tə mama. 33 Ba vəli ciru də ba nəŋə, ba mʋ̀ də won tə mama nə yɩ ba mʋ̀ nyiən Tɩa tə pìí ka sun ba yuu nə, ba ga jɛ́n Yɩzərayɛlə lalʋʋ tə titəŋi wa. 34 Yɩzərayɛlə lɩ̀à tə mama yà nə kɩkarɩ ba nì ba bubwiə, ba ga dəri də ba swɩ̀n, ba wʋ́: «Nə dərə, sə tɩa tə dàn ká lìrə̀ nə də.» 35 Ba-Yígúrə́-Jə-Tiu pɩn mən pwin tə nan, tə də́ bara biələ də finu tə yà nə jə wusinə tə.