Wiən tə Kore kwa lɩ̀à tə nə ma sʋ̀rɩ́ wusinə yoo
17
1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Swɩ̀n Yɩɩ joŋwanʋ Aron bìú Eleyazarə con, sə ʋ lɩ wiən tə ba nə ma sʋ̀rɩ́ wusinə tə mən tə wa, sə ʋ ga laga mən tə, ʋ pa tə va yiŋʋnɩ. Cɩ́gá, tə yɩ wiən tə nə yɩ Yɩɩ nyiən*. 3 Ba wá ja tə mʋ̀ wiən tə ba nə ma sʋ̀rɩ́ wusinə, tə tɩ̀án nə tɩga ba cʋna yɩrɩ, ba ma lù wopɩpɛɛ, sə ba ma pú joŋi bwálɩ́ tə nə. Cɩ́gá, ba ja tə ba bà à mʋ̀ Ba-Yígúrə́-Jə-Tiu yáá con, yá tə dàń yɩ à mʋ̀ cɩcɩ nyiən. Tə dàń wá ya mɩmɩnʋ tə pa Yɩzərayɛlə lɩ̀à tə nə.» 4 Yɩɩ joŋwanʋ Eleyazarə tì cɩnɩan wiən tə ba nə ma sʋ̀rɩ́ wusinə tə, lɩ̀à tə mən tə nə dí tə gʋ yà nə ja bà Ba-Yígúrə́-Jə-Tiu yáá con. Ʋ ja tə ʋ ma lù wopɩpɛɛ, sə ba ma pú joŋi bwálɩ́ tə nə. 5 Kʋ nətʋ tə wá lìí Yɩzərayɛlə lɩ̀à tə, sə lìù tə mama ʋ nə tà Aron dwíí tə wa lìù dàn ká bólí Ba-Yígúrə́-Jə-Tiu yáá con, ʋ sʋ̀rɩ́ wusinə. Lìù tə ʋ nə tʋn kʋ, yoo tə nə yí Kore də ʋ púlí tə nə wá yí ʋ də, ndə Ba-Yígúrə́-Jə-Tiu yà nə twá də Moyizə, ʋ ma swɩ̀n kʋ nətʋ.Yɩzərayɛlə lalʋʋ tə ŋʋŋwɩn ba zɩga Moyizə də Aron nə
6 Kʋ tɩpʋrɩ nə, Yɩzərayɛlə lalʋʋ tə mama ŋʋŋwɩn ba zɩga Moyizə də Aron nə, ba swɩ̀n, ba wʋ́: «Á mʋ̀ nə pɩn Ba-Yígúrə́-Jə-Tiu lalʋʋ tə tɩ.» 7 Lalʋʋ tə yà kun duən nə, ba zɩga Moyizə də Aron nə. Yá Moyizə də Aron dàń viviri ba yáá ba kə Yɩɩ jə́rə́ gansili tə con, də nə̀ń bakwan tə nə kʋ púə́ Yɩɩ jə́rə́ gansili tə yuu nə, Ba-Yígúrə́-Jə-Tiu ga bɩrɩ ʋ dun tə. 8 Moyizə də Aron vəli ba yí Yɩɩ jə́rə́ gansili tə yáá con, 9 yá Ba-Yígúrə́-Jə-Tiu swɩ̀n Moyizə con, ʋ wʋ́: 10 «Á vələ yiŋʋnɩ á ga yá lalʋʋ kʋ tə, sə à cʋ̀gʋ̀ ba mɩ́ámɩ́án.» Moyizə də Aron tʋa ba pú ba yáá tɩa, 11 Moyizə ga swɩ̀n Aron con, ʋ wʋ́: «Tì n won tə n nə ma sʋ̀rɩ́ wusinə tə, n lɩ mən joŋi bwálɩ́ tə yuu wa n kə kʋ wa, n dà wusinə tə mən tə yuu wa, n ja va Yɩzərayɛlə lalʋʋ tə con lala, n ma tʋn cʋna kwɩan n pa ba. Cɩ́gá, Ba-Yígúrə́-Jə-Tiu lɩŋa zaŋa ba yuu wa zənzən. Yá tɩan yayɩpwarʋ tə manwarɩ kʋ sinti.» 12 Aron tì won tə ʋ nə ma sʋ̀rɩ́ wusinə tə, ndə Moyizə yà nə swɩ̀n ʋ con nətʋ, ʋ ja dəri ʋ va lalʋʋ tə titəŋi wa. Ʋ yí lá də tɩan yayɩpwarʋ tə yà tʋa ba wa. Ʋ sʋ̀rɩ́ wusinə tə ʋ ga kwɛn lalʋʋ tə cʋna ʋ pa ba. 13 Ʋ zɩgɩ yɩɩ nə, lɩ̀à tə nə tɩga də ba tə nə nəŋə pwə́rə́ wa, yá tɩan yayɩpwarʋ tə cən kʋ zɩgɩ. 14 Tɩan yayɩpwarʋ tə yà gʋa lɩ̀à 14 700, ba ga wà ba tə nə tɩga Kore cʋna tə máŋá wa gàlɩ̀ ba kə lá. 15 Aron pìí ʋ bà Moyizə con, Yɩɩ jə́rə́ gansili tə mimii nə, də tɩan yayɩpwarʋ tə zwɛ̀.
Aron daduu tə yoo
16 Ba-Yígúrə́-Jə-Tiu swɩ̀n Moyizə con, ʋ wʋ́: 17 «Swɩ̀n Yɩzərayɛlə lɩ̀à tə con, sə dwíí mama ja daduu nədʋ ba bà ba pa mʋ́. Tə mɛ wá ya daduran fugə də bələ, ba dwíə́ yáá tɩ̀án tə nə wá pa mʋ́. N wá pʋ́pʋ́nɩ́ dwíí yáá tíú mama yɩrɩ ʋ daduu yɩra. 18 N wá pʋ́pʋ́nɩ́ Aron yɩrɩ Levi dwíí daduu tə yɩra. Cɩ́gá, dwíí yáá tíú mama daduu wá ya lá. 19 N wá tún tə Yɩɩ jə́rə́ gansili tə wa, Yɩɩ nimarʋ dansɩa* won tə yáá con, à nə yàá bɩrɩ à tɩ̀àn aba lá. 20 Bɛɛ tə ʋ daduu nə wá twà vʋran, mə ʋ mʋ̀ nə à kúrí. À dàń wá pa Yɩzərayɛlə lɩ̀à ŋʋŋwɩa tə ba nə ŋʋŋwɩn ba ma zɩga á nə, nyʋn lá à yáá con.»
21 Moyizə swɩ̀n Yɩzərayɛlə lɩ̀à tə con, yá dwíí yáá tɩ̀án tə mama pɩn wá daduu nədʋ nədʋ. Dwíí yáá tíú mama pɩn daduu nədʋ ʋ dwíí tə yuu yɩrɩ. Tə mɛ yɩn daduran fugə də bələ. Aron daduu tə nə yɩn ba daduran tə titəŋi wa. 22 Moyizə tún daduran tə Ba-Yígúrə́-Jə-Tiu yáá con, Yɩɩ wúlú dansɩa gansili tə wa. 23 Kʋ tɩpʋrɩ nə, Moyizə nə zʋa Yɩɩ wúlú dansɩa gansili tə wa, ʋ nɩ də Aron daduu tə, kʋ nə yɩ Levi dwíí tə nyiən twə̀ vʋran, kʋ mà pùnə́, kʋ pa bɩlalʋrʋ* lənə bɩ. 24 Moyizə pɛ̀ daduran tə mama Ba-Yígúrə́-Jə-Tiu yáá con, ʋ ja nan ʋ bɩrɩ Yɩzərayɛlə lɩ̀à tə mama nə. Ba nɩ tə, ba lìù mama ga pìí ʋ tì ʋ daduu.
25 Ba-Yígúrə́-Jə-Tiu swɩ̀n Moyizə con, ʋ wʋ́: «Pìí n ja Aron daduu tə n bà n tún Yɩɩ nimarʋ dansɩa won tə yáá con, sə kʋ ya mɩmɩnʋ kʋ pa ba tə nə vɩ nii tə nə, sə kʋ pa n wànɩ́ n pa lɩ̀à tə nə ŋʋŋwɩn pú ba nii, ba dàn ká tɩ.» 26 Moyizə tʋn kʋ nətʋ, ndə Ba-Yígúrə́-Jə-Tiu yà nə pɩn wá nii, sə ʋ tʋn.