Yɩɩ joŋwana tə də Levi dwíí tə tʋtʋŋɩ yoo
18
1 Ba-Yígúrə́-Jə-Tiu swɩ̀n Aron con, ʋ wʋ́: «N mʋ́ də n bɩ̀á, də n dìə̀ lɩ̀à nə wá zɩn cʋna tə mama, ba nə wá tʋn Yɩɩ wúlú bwálɩ́ tə wa. Yá n mʋ̀ də n bɩ̀á tə nə wá zɩn cʋna tə mama, á nə wá tʋn á Yɩɩ joŋwanɩ tʋtʋŋɩ tə wa. 2 N wá pa Levi dwíí tə də, ba nə yɩ n nubɩa, ba ga yɩ n nyɩna dìə̀ lɩ̀à bà ba vwa ba tɩ̀àn n nə, ba san mʋ́ máŋá tə wa, n mʋ̀ də n bɩ̀á tə nə wulə Yɩɩ wúlú dansɩa gansili tə yáá con. 3 Ba wá tʋn kʋ tə mama n nə wá bɩrɩ ba sə ba tʋn, ba ga ywàń gansili tə mama yuu nə. Yá ba nə bá bólí zɩla tə nə yɩ Yɩɩ nyiən* tə yɩra, nə à yə̀ə́ Yɩɩ joŋi bwálɩ́ tə yɩra, sə á mʋ̀ də ba mɛ dàn ká tɩ. 4 Ba wá san n nə, ba tʋn Yɩɩ jə́rə́ gansili* tə wa tʋ̀tʋ̀nán tə mama. Vee mama wà mɛ sə ʋ bólí á yɩra. 5 Á wá tʋn Yɩɩ wúlú bwálɩ́ tə tʋ̀tʋ̀nán tə, də Yɩɩ joŋi bwálɩ́ tə tʋ̀tʋ̀nán tə. Kʋ nətʋ wá pa à mʋ̀ Ba-Yígúrə́-Jə-Tiu lɩŋa kʋ́ʋ̀ bá zàn Yɩzərayɛlə lɩ̀à tə yuu wa. 6 À mʋ̀ nə kúrí á nubiu Levi dwíí tə Yɩzərayɛlə lɩ̀à tə titəŋi wa, à pa à mʋ̀ Ba-Yígúrə́-Jə-Tiu nə. À pɩn ba aba ndə zìlə́ won nə, sə ba tʋn Yɩɩ jə́rə́ gansili tə wa tʋ̀tʋ̀nán tə. 7 N mʋ̀ Aron də n bɩ̀á tə nə wá tʋn Yɩɩ joŋwanɩ tʋtʋŋɩ tə Yɩɩ joŋi bwálɩ́ tə yuu wa, də patasɩn tə kwa con dibiu tə wa, kʋ nə Yɩɩ nyiən. Mə á tʋtʋŋɩ nə nətʋ. Yɩɩ joŋwanɩ tʋtʋŋɩ tə yɩ à mʋ̀ nə pɩn kʋ aba. Vee nə bólí kʋ yɩra, kʋ mɛ sə ba gʋ wá.»Yɩɩ joŋwana tori yoo
8 Ba-Yígúrə́-Jə-Tiu swɩ̀n Aron con, ʋ wʋ́: «Nə̀ń, à mʋ̀ ken zìlə́ wiən tə, ba nə lɩ ba pa nə yuu ywàŋʋ́ n jɩɩn. À pɩn tə də won tə mama Yɩzərayɛlə lɩ̀à tə nə ken vàn nə ba pa nə ndə tori nə n mʋ̀ də n bɩ̀á nə. Kʋ yɩ nii kʋ nə pʋ́pʋ́nɩ́ kʋ tún máŋá də máŋá mama wuuu. 9 Nə̀ń kʋ tə nə wá ya n tori wiən tə wa tə nə yɩ Yɩɩ cɩcɩ nyiən, mən nə bá də́ tə: Kʋ yɩ zìlə́ wiən tə mama, də vàrʋ́ càlɩ̀ jwəŋə tə mama, də jwəŋə tə mama ba nə fwa cʋna yɩrɩ, də cʋna kwɩan jwəŋə tə mama, ba nə fwa ba pɩn nə. Tə wiəbbn təntə nə yɩ Yɩɩ cɩcɩ nyiən wá ya n mʋ̀ də n bɩ̀á tori. 10 N wá də́ tə ndə wiən tə nə, tə nə yɩ Yɩɩ cɩcɩ nyiən. Bɛɛ mama wàá tə ʋ də́. N wá jələ tə ndə wiən nə, tə nə yɩ Yɩɩ nyiən.
11 Nə̀ń tori don kʋ nə wá ya n mʋ̀ Aron nyiən. Kʋ yɩ zìlə́ wiən tə Yɩzərayɛlə lɩ̀à tə nə lɩ ba pa nə, n ga yɩyarɩ tə à yáá con, n ma pa tə nə. À pɩn tə də n mʋ̀ də n bɩ̀á, də n bwɩ̀ɩ́ nə, ba nə wulə də mʋ́. Kʋ wá ya nii kʋ nə pʋ́pʋ́nɩ́ kʋ tún máŋá mama wuuu. Lìù tə mama nə yɩ parɩ n dìə̀ tə wa, wàá tə ʋ də́. 12 À tə wá pa mʋ́ ba kárɩ́ wiən təntən lənə tə, ba nə wá pa à mʋ̀ Ba-Yígúrə́-Jə-Tiu nə. Tə mʋ̀ nə yɩ kʋ tə mama nə jə fɩra, kʋ nə yɩ nʋga, də Divɛn nədʋn, də mɩndʋra. 13 Təntən lənə tə nə nan tɩa, ba nə wá ja bà ba pa à mʋ̀ Ba-Yígúrə́-Jə-Tiu nə, wá ya n mʋ̀ tori. Lìù tə mama nə yɩ parɩ n dìə̀ tə wa, wàá tə ʋ də́. 14 Won tə mama lìù nə wá dù də ʋ pɩn kʋ Yɩɩ nə mɩ́ámɩ́án Yɩzərayɛlə wa, wá ya n mʋ̀ tori. 15 Təntən bìú mama ba nə wá pa à mʋ̀ Ba-Yígúrə́-Jə-Tiu nə, ləzwəni də vàná wa, wá ya n mʋ̀ tori. Yá kʋ dàń nə yɩ kwənə n wá jon ləzwənə təntən bìú yuu nə, də vànɩ́ tə nə yɩ durən vànɩ́ təntən bìú yuu nə. 16 Kwənə tə n nə wá jon bibɛɛ yɩrɩ, ʋ nə jə cànà nədʋ, wá ya səbilurən bonu. N wá jələ kʋ, kʋ twá Yɩɩ wúlú bwálɩ́ tə səkəri bìú* tə nə bɩrɩ nətʋ. Səbilugu nədʋ dun yɩ səbipwənə bələ. 17 Yá n bá pa ba ŋwɩ́n kwənə, sə ba ma yə̀ naʋ təntən bìú, nə à yə̀ə́ piə təntən bìú, nə à yə̀ə́ bʋ̀n təntən bìú ba jon. Tə mʋ̀ yɩ vàná tə nə yɩ parɩ. N wá gàrɩ̀ tə jana Yɩɩ joŋi bwálɩ́ tə yuu wa, n ga sʋ̀rɩ́ tə nʋga tə, sə kʋ ya joŋi ba nə sʋ̀rɩ́ mən wa, kʋ lwán ga ywán kʋ pa à mʋ̀ Ba-Yígúrə́-Jə-Tiu nə. 18 Tə nàŋʋ́ tə wá ya n mʋ̀ Aron nyiən, kʋ súrí nyʋnɩ tə də jɩzən ciin tə nə, ba nə yàá yɩyarɩ à yáá con, sə kʋ bɩrɩ də tə yɩ ba pɩn nə. 19 À pɩn tə n mʋ̀ də n bɩ̀á, də n bwɩ̀ɩ́ nə, ba nə wulə də mʋ́. Kʋ wá ya nii kʋ nə pʋ́pʋ́nɩ́ kʋ tún máŋá mama wuuu. À pɩn mʋ́ wiən tə mama Yɩzərayɛlə lɩ̀à tə nə wá lɩ ba pa, à mʋ̀ Ba-Yígúrə́-Jə-Tiu nə, ndə Yɩɩ joŋi wiən nə. Kʋ yɩ à mʋ̀ də n mʋ̀, də n dwíí tə nimarʋ, kʋ nə wàrɩ̀ kʋ cʋ̀gà à mʋ̀ Ba-Yígúrə́-Jə-Tiu yáá con, máŋá mama wuuu.»
20 Ba-Yígúrə́-Jə-Tiu swɩ̀n Aron con, ʋ wʋ́: «N bá ja tori ba lʋʋ nii tə wa, yá n bá twá n ja tori ba titəŋi wa. À mʋ̀ nə yɩ n tori, yá à mʋ̀ nə yɩ n tori Yɩzərayɛlə lɩ̀à tə titəŋi wa.»
Levi dwíí tə tori yoo
21 «À pɩn won mama fugə nii nyiən Yɩzərayɛlə wa, Levi dwíí tə nə, sə kʋ ya ba tori, tʋtʋŋɩ tə yɩrɩ ba nə tʋŋa Yɩɩ jə́rə́ gansili tə wa. 22 Yɩzərayɛlə lɩ̀à tə kʋ́ʋ̀ ba bólí Yɩɩ jə́rə́ gansili tə yɩra, sə ba dàn ká tʋn cʋna tə nə wá pa ba tɩ. 23 Levi dwíí tə nə wá tʋn Yɩɩ jə́rə́ gansili tə wa tʋ̀tʋ̀nán tə, yá ba cʋna yoo wá pìí tə zɩn ba tətə yuu wa. Kʋ wá ya nii kʋ nə pʋ́pʋ́nɩ́ kʋ tún máŋá də máŋá mama wuuu, á mama yɩrɩ, də á dwíə́ tə mama yɩrɩ á nə wá kə lʋʋ wa. Levi dwíí tə bá na tori Yɩzərayɛlə lɩ̀à tə wa. 24 À pɩn won mama fugə nii nyiən Yɩzərayɛlə lɩ̀à tə nə wá lɩ ba pa à mʋ̀ Ba-Yígúrə́-Jə-Tiu nə, Levi dwíí tə nə, sə kʋ ya ba tori. Kʋ mʋ̀ nə pɩn à swɩ̀n ba con, də ba bá na tori Yɩzərayɛlə lɩ̀à tə wa.»
25 Ba-Yígúrə́-Jə-Tiu swɩ̀n Moyizə con, 26 sə ʋ swɩ̀n Levi dwíí tə con, ʋ wʋ́: «Máŋá tə wa Yɩzərayɛlə lɩ̀à tə nə pɩn aba fugə nii nyiən tə à nə pɩn aba ba yuu yɩrɩ, sə kʋ ya á tori, á wá lɩ fugə nii nyiən fugə nii nyiən təntə yuu wa, á pa à mʋ̀ Ba-Yígúrə́-Jə-Tiu nə. 27 Kʋ fugə nii nyiən təntə wá ya á də tori á nə pɩn nə, ndə Yɩzərayɛlə lɩ̀à tə duən nə lɩ ba tʋa wa mɩna, də ba divɛn gwàlán wa divɛn ba pɩn nə nətʋ. 28 Mə nətʋ nə, á də wá lɩ tori á pa à mʋ̀ Ba-Yígúrə́-Jə-Tiu nə, fugə nii nyiən tə mama wa, á nə wá jon Yɩzərayɛlə lɩ̀à tə con. Á wá lɩ tori təntə á pa Yɩɩ jaŋwanʋ Aron nə, sə kʋ ya à mʋ̀ Ba-Yígúrə́-Jə-Tiu nyiən. 29 Á wá lɩ Ba-Yígúrə́-Jə-Tiu tori zìlə́ wiən tə mama wa, ba nə pɩn aba. Á wá lɩ Yɩɩ tori təntə wiən tə mama wa tə nə jə fɩra.
30 N tə wá swɩ̀n Levi dwíí tə con, də máŋá tə ba nə lɩ fugə nii nyiən tə nə jə fɩra, kʋ gɩganɩ tə wá ya ba mʋ̀ tori, yá ba wá jələ fugə kʋ ndə tʋa wa mɩna nə, də divɛn gwàlán wa divɛn nə. 31 Á wàá kʋ á də́ bwálɩ́ mama wa, á mʋ̀ də á dɩ̀ə̀ lɩ̀à. Cɩ́gá, kʋ mʋ̀ nə yɩ á ŋwɩ́rán, tʋtʋŋɩ tə yɩrɩ á nə tʋŋa Yɩɩ jə́rə́ gansili tə wa. 32 Á nə lɩ wiən tə wa wiən tə nə jə fɩra á pa nə, cʋna kʋ́ʋ̀ bá ya á yuu wa, də á nə dí tə gɩganɩ tə. Yá á bá tʋn durən yìə̀n də wiən tə Yɩzərayɛlə lɩ̀à nə ken vàn nə ba pa nə, sə á dàn ká tɩ.»