Nasɩan tʋntʋnan yoo
19
1 Ba-Yígúrə́-Jə-Tiu swɩ̀n Moyizə də Aron con, ʋ wʋ́: 2 «Nə̀ń nii tə à mʋ̀ Ba-Yígúrə́-Jə-Tiu nə pɩn ba pʋ́pʋ́nɩ́ ba tún. Swɩ̀n Yɩzərayɛlə lɩ̀à tə con, sə ba ja nasɩan ba bà ba pa mʋ́, kʋ yɩra nə zurə kʋ ga cé, ba tə nə wà dàʋ̀ kʋ bɩan nə ken mɩ́ámɩ́án. 3 Á wá pa kʋ Yɩɩ joŋwanʋ Eleyazarə nə. Ʋ wá pa ba ja kʋ ba nan yijaa bwálɩ́ tə kwa con, ba gʋ ʋ yáá con. 4 Yɩɩ joŋwanʋ Eleyazarə wá ja ʋ jɩfʋa ʋ ma fwa jana tə ʋ mɩ́n nɛɛ barpɛ, Yɩɩ jə́rə́ gansili tə yáá con. 5 Ba wá sʋ̀rɩ́ nasɩan tə ʋ yɩ́á wa. Ba wá sʋ̀rɩ́ kʋ tànʋ̀ tə, də kʋ nàŋʋ́ tə, də kʋ jana tə, də kʋ lʋran tə. 6 Yɩɩ joŋwanʋ tə wá tì sɩsaban dàʋ̀, də yɩzɔpə vʋʋ, də bɔɔ sɩ̀sɩ́nʋ́, ʋ dɩlɩ mən tə wa ba nə ma sʋ̀rɩ́ naʋ tə. 7 Kʋ kwa nə, Yɩɩ joŋwanʋ tə wá sɩ̀n ʋ gànàn, ʋ swɛ ʋ yɩra nɩ́á wa, ʋ ga zʋ yijaa bwálɩ́ tə wa. Yɩɩ joŋwanʋ tə wá ya durən* lìù, kʋ va kʋ yí didəni. 8 Lìù tə nə sʋ̀rɩ́ naʋ tə də wá sɩ̀n ʋ gànàn, ʋ swɛ ʋ yɩra nɩ́á wa, ʋ də ga wá jì durən lìù, kʋ va kʋ yí didəni. 9 Lìù tə nə tà durən lìù nə wá pɛ̀ naʋ tə tʋntʋnan tə, ʋ tún bwálɩ́ nə kʋ nə yɩ parɩ, yijaa bwálɩ́ tə kwa con. Ba wá tún tə ba pa Yɩzərayɛlə lɩ̀à tə nə, sə ba ma tanɩ durən kwɩan nɩ́á. Kʋ yɩ cʋna kwɩan* joŋi. 10 Lìù tə nə wá pɛ̀ naʋ tə tʋntʋnan tə də wá sɩ̀n ʋ gànàn, ʋ ga wá jì durən lìù, kʋ va kʋ yí didəni. Kʋ yɩ nii kʋ nə pʋ́pʋ́nɩ́ kʋ tún máŋá mama wuuu, Yɩzərayɛlə lɩ̀à tə mama yɩrɩ, də vee mama yɩrɩ ʋ nə wulə də ba.Nii tə Yɩɩ nə pɩn durən* kwɩan yuu wa
11 Lìù nə dwen tɩgɩ yɩra, nə à yə̀ə́ wotɩgʋ yiri mama yɩra, ʋ wá jì durən lìù kʋ ja va dɩan barpɛ. 12 Ʋ wá ja durən kwɩan nɩ́á tə ʋ ma kwɛn ʋ tɩ̀àn ʋ lɩ durən wa, batwa nii dɩɩn tə də barpɛ nii dɩɩn tə nə, yá ʋ wá ya parɩ. Yá ʋ nə wà ʋ durən tə kwɛn ʋ lɩ batwa nii dɩɩn tə də barpɛ nii dɩɩn tə nə, ʋ bá ya parɩ. 13 Lìù tə mama ʋ nə dwen ləzwənə tɩgɩ yɩra, yá ʋ wà ʋ tɩ̀àn kwɛn ʋ lɩ durən yìə̀n wa, kʋ yɩ durən ʋ kəni à mʋ̀ Ba-Yígúrə́-Jə-Tiu wúlú bwálɩ́ tə wa. Á wá lɩ kʋ mʋ̀ lìù təntə Yɩzərayɛlə lɩ̀à tə titəŋi wa. Cɩ́gá, ba wà durən kwɩan nɩ́á tə mɩ́n ʋ yɩra. Ʋ yɩ durən lìù, ʋ durən tə ga wulə də wá.
14 Nə̀ń nii don Yɩɩ nə pɩn. Lìù nə tɩga gansili wa, lìù tə mama ʋ nə zʋa gansili tə wa, nə à yə̀ə́ lìù tə mama ʋ yà nə wulə kʋ wa, wá jì durən lìù, kʋ ja va dɩan barpɛ. 15 Won tə mama kʋ nii nə wè lá, kʋ nə ba nipuə jə ka pwí kʋ nii nə, wá jì durən won. 16 Lìù tə mama ʋ nə dwen lìù yɩra ba nə gʋa də kwatara sɩ̀ʋ́ gaʋ wa, nə à yə̀ə́ lìù tə yɩra ʋ nə tɩga ʋ tɩ̀àn nə, nə à yə̀ə́ ləzwənə kurən yɩra, nə à yə̀ə́ libəri yɩra, ʋ wá jì durən lìù kʋ ja va dɩan barpɛ. 17 Ba wá fwa cʋna kwɩan joŋi vànɩ́ tə ba nə sʋ̀rɩ́ tʋntʋnan tə, ba kə won wa, ba lwá nadʋra tə yuu wa, sə ba ma kwɛn durən lìù tə ba lɩ durən yìə̀n wa. 18 Lìù tə nə tà durən lɩ̀ù wá tì yɩzɔpə vʋʋ, ʋ kə nɩ́á tə wa, ʋ lɩ ʋ mɩ́n gansili tə nə, də zɩla tə mama yuu wa, də lɩ̀à tə yuu wa ba nə wulə lá, də lìù tə yuu wa ʋ nə dwen lìù yɩra ba nə gʋa, nə à yə̀ə́ lìù yɩra ʋ nə tɩga ʋ tɩ̀àn nə, nə à yə̀ə́ ləzwənə kurən yɩra, nə à yə̀ə́ libəri yɩra. 19 Lìù tə ʋ nə tà durən lìù wá mɩ́n nɩ́á tə lìù tə nə yɩ durən lìù tə yɩra, batwa nii dɩɩn tə nə, də barpɛ nii dɩɩn tə nə. Yá barpɛ nii dɩɩn tə nə, lìù tə nə tà durən lìù tə dàń wá kwɛn durən lìù tə cʋna ʋ lɩ. Durən lìù tə dàń wá sɩ̀n ʋ gànàn, ʋ swɛ ʋ yɩra nɩ́á wa, yá didəni nə, ʋ wá ya parɩ. 20 Durən lìù nə ba ʋ durən tə kwɛn ʋ lɩ, kʋ mɛ sə ba dɩŋa wá ba lɩ lalʋʋ tə titəŋi wa. Cɩ́gá, ʋ kəni durən à mʋ̀ Ba-Yígúrə́-Jə-Tiu wúlú bwálɩ́ tə wa. Ba nə wà durən kwɩan nɩ́á mɩ́n ʋ yɩra tə pɩn ʋ yɩ durən lìù. 21 Kʋ yɩ nii kʋ nə pʋ́pʋ́nɩ́ kʋ tún ba yɩrɩ, máŋá mama wuuu. Lìù tə nə wá mɩ́n durən kwɩan nɩ́á tə wá sɩ̀n ʋ gànàn, yá lìù tə ʋ nə dwen durən kwɩan nɩ́á tə yɩra, ʋ wá jì durən lìù kʋ va kʋ yí didəni. 22 Durən lìù nə dwen won mama yɩra, won təntə wá jì durən won. Yá lìù mama də nə dwen durən lìù yɩra, ʋ də wá jì durən lìù kʋ va kʋ yí didəni.