Meriba nɩ́á tə yoo
20
1 Yɩzərayɛlə dwíə́ tə mama yí Sin kasɔɔ lanworu tə wa, təntən cànà tə wa, yá lalʋʋ tə vəli ba jə̀ə́ Kadɛswə nə. Mə lá nə Miriyamə tɩga, yá ba gùrì wá lá nə.2 Lalʋʋ tə yà wà nɩ́á nɩ, kʋ pa ba kun duən nə, ba zɩga Moyizə də Aron nə. 3 Lalʋʋ tə pɩ̀à jara Moyizə nii nə, ba swɩ̀n, ba wʋ́: «Nə yà nə zə́n nə tɩ, máŋá tə wa nə nubɩa tə nə tɩga Ba-Yígúrə́-Jə-Tiu yáá con, kʋ yà kʋ́kwà! 4 Bɛ̀ɛ̀ nə pɩn á ma ja nə mʋ̀ Ba-Yígúrə́-Jə-Tiu lalʋʋ tə á bà kasɔɔ lanworu tə wa, sə nə tɩ də nə vàná tə mɛ? 5 Bɛ̀ɛ̀ nə pɩn á ma lɩ nəba Ezwipətə nə, á ja bà bwálɩ́ kʋkwɩʋn kʋ tə wa? Kʋ tà bwálɩ́ lìù nə wàá won lá ʋ dwì. Kapɩrʋ, nə à yə̀ə́ divɛn tɩ̀ʋ́, nə à yə̀ə́ gərenadə tɩ̀ʋ́ tə̀lə́ lá. Nɩ́á də tətə tə̀lə́ lá tə nywɩn.» 6 Moyizə də Aron yá lalʋʋ tə, ba ga va Yɩɩ jə́rə́* gansili tə mimii nə. Ba tʋa ba pú ba yáá tɩa, yá Ba-Yígúrə́-Jə-Tiu bɩrɩ ba ʋ dun tə.
7 Ba-Yígúrə́-Jə-Tiu swɩ̀n Moyizə con, ʋ wʋ́: 8 «Tì n daduu tə, n mʋ̀ də n nubiu Aron ga kə lalʋʋ tə duən yáá nə. Á wá swɩ̀n pɩ̀ʋ̀ tə con ba yɩ́á wa, yá kʋ wá pa nɩ́á nan. N wá pa nɩ́á nan pɩ̀ʋ̀ tə wa, n pa lalʋʋ tə də ba vàná tə nyʋn.» 9 Moyizə tì daduu tə kʋ yà nə wulə Ba-Yígúrə́-Jə-Tiu yáá con, ndə ʋ yà nə pɩn wá nii nətʋ. 10 Moyizə də Aron ken lalʋʋ tə duən yáá nə, pɩ̀ʋ̀ tə yáá con. Moyizə swɩ̀n ba con, ʋ wʋ́: «À lòrì aba sə á cʋgʋ à con, á mʋ̀ lɩ̀à tə nə vɩ nii. Kʋ yɩ pɩ̀ʋ̀ kʋ tə wa nə, nə wá pa nɩ́á nan tə pa aba naaa?» 11 Yá Moyizə zɩ̀n ʋ jɩɩn yɩɩ nə, ʋ mà pɩ̀ʋ̀ tə nɛɛ bələ də daduu tə. Naa nədʋ də nɩ́á pwin tə nan pɩ̀ʋ̀ tə wa zənzən. Lalʋʋ tə nyʋan, ba vàná də ga nyʋn.
12 Ba-Yígúrə́-Jə-Tiu dàń swɩ̀n Moyizə də Aron con, ʋ wʋ́: «Á nə wà á waa à nə ken, sə á pa à na dun Yɩzərayɛlə lɩ̀à tə yáá con yɩrɩ, á bá ja lalʋʋ kʋ tə á zʋ lʋʋ nii tə wa, à nə pɩn ba. 13 Mə kʋ twá nətʋ, ba ma swɩ̀n Meriba nɩ́á tə yoo. Meriba də̀ń nə yɩ “jara.” Mə bwálɩ́ təntə wa nə Yɩzərayɛlə lɩ̀à tə pɩ̀à jara Ba-Yígúrə́-Jə-Tiu nii nə. Yá mə lá nə ʋ twá kʋ nə, ʋ bɩrɩ də ʋ cɩ́gá yɩ Yɩɩ.
Edomə pɩ̀ʋ́ cɩ̀gà Yɩzərayɛlə lɩ̀à yáá nə
14 Moyizə zɩgɩ Kadɛswə nə, ʋ tʋn lɩ̀à Edomə pɩ̀ʋ́ con, ʋ wʋ́: «Nə̀ń kʋ tə n nubiu Yɩzərayɛlə nə swɩ̀n. N yə̀ə́ càn tə mama nə yí nəba. 15 Nə nyɩna-ba vəli Ezwipətə, yá nə dwíí tə dàń yɩn lá kʋ dán. Ezwipətə tɩ̀án fɩfɩn nə mʋ̀ də nə nyɩna-ba. 16 Nə bubwi nə kə Ba-Yígúrə́-Jə-Tiu nə, yá ʋ nì nə kori. Ʋ tʋn Malɩka ʋ pa ka lɩ nəba Ezwipətə wa. Sɩ́ʋ́n nə, nə dàń wulə Kadɛswə nə, kʋ nə yɩ tɩʋ kʋ wulə n lʋʋ nii tə sɩswɩan wa. 17 À lòrì mʋ́ sə n yá nəba, sə nə twá n lʋʋ nii tə wa nə kɛ̀ń. Nə bá twá kárɩ́ wa, nə à yə̀ə́ divɛn tɩ̀án kárɩ́ wa. Nə bá nyʋn á vɩla tə nɩ́á. Nə wá tì cwəfarʋ tə, nə bá gugoli nə va jɩzən, nə à yə̀ə́ jɩgwiə, nə kori nə va nə kɛ̀ń n lʋʋ nii tə.» 18 Edomə pɩ̀ʋ́ ma swɩ̀n ʋ con, ʋ wʋ́: «N ba à lʋʋ nii tə wa twá n kɛ̀ń, kʋ nə tà nətʋ, à wá nan n nə də kwatara sɩ̀ʋ́.» 19 Yɩzərayɛlə lɩ̀à tə swɩ̀n ʋ con, ba wʋ́: «Nə wá twá cwəŋə tə nə kɛ̀ń, yá nə mʋ̀ də nə vàná tə nə nyʋan n nɩ́á, nə wá ŋwɩ́n tə kwənə nə pa mʋ́. Kʋ tà yoo mɩ́ámɩ́án, nə yɩ nə pɩ̀à nə va də nɛɛ nə kɛ̀ń, nə bá zɩgɩ.» 20 Edomə pɩ̀ʋ́ pìí ʋ le, ʋ wʋ́: «Á bá twá à lʋʋ nii tə wa á kɛ̀ń.» Yá Edomə pɩ̀ʋ́ dàń nan ʋ jəri Yɩzərayɛlə lɩ̀à tə, sə ʋ ta ba də kwatara púlí nəfarʋ, kʋ nə jə dɩ̀àn. 21 Mə nətʋ Edomə pɩ̀ʋ́ vɩga sə ʋ yá Yɩzərayɛlə lɩ̀à tə, sə ba twá ʋ lʋʋ nii tə wa ba kɛ̀ń. Yɩzərayɛlə lɩ̀à tə dàń twá cwəŋə don, ba ga yá wá.
Aron tɩan yoo
22 Yɩzərayɛlə dwíí tə mama zàn Kadɛswə nə, ba va ba yí Hɔrə paan tə. 23 Ba-Yígúrə́-Jə-Tiu swɩ̀n Moyizə də Aron con, Hɔrə paan tə yuu wa, kʋ nə yɩ Edomə lʋʋ nii tə sɩswɩan, ʋ wʋ́: 24 «Aron wá tɩ, ʋ va ʋ nɩbara-ba con, ba nə dí yáá ba tɩ. Ʋ ba zʋ lʋʋ nii tə wa, à nə pɩn Yɩzərayɛlə lɩ̀à nə. Cɩ́gá, á vɩga nii tə à nə pɩn aba, Meriba nɩ́á tə nii nə. 25 N dàń ja Aron də ʋ bìú Eleyazarə, n ja dɩ̀ Hɔrə paan tə yuu wa. 26 N wá lɩ Aron gànàn tə n ma zʋ ʋ bìú Eleyazarə. Mə yəbə nə Aron wá tɩ, ʋ va ʋ nɩbara-ba con, ba nə dí yáá ba tɩ.» 27 Moyizə tʋn kʋ tə mama Ba-Yígúrə́-Jə-Tiu nə pɩn wá nii sə ʋ tʋn. Ba dɩ̀gà Hɔrə paan tə yuu wa, lalʋʋ tə mama yɩ́á wa. 28 Moyizə lɩ Aron gànàn tə ʋ ma zʋ ʋ bìú Eleyazarə, yá Aron dàń tɩga paan tə yuu wa lá. Moyizə də Eleyazarə pìí ba nan paan tə yuu wa ba cú. 29 Lalʋʋ tə mama nɩ də Aron tɩga, yá Yɩzərayɛlə lɩ̀à tə mama dàń kwi Aron lúə́ dɩan fɩtwa.