Yɩzərayɛlə lɩ̀à dí dɩ̀àn Kanaan tɩ̀án yuu wa
21
1 Aradə pɩ̀ʋ́ tə ʋ nə yɩ Kanaan tíú, ʋ nə wulə Negɛbə nagwanaa tə wa, nì də Yɩzərayɛlə lɩ̀à tə twá Atarimə cwəŋə tə ba bɩ̀àn. Ʋ ta Yɩzərayɛlə lɩ̀à tə, ʋ ja ba duən ʋ kə bandiə wa. 2 Yɩzərayɛlə lɩ̀à tə dàń poli nii Ba-Yígúrə́-Jə-Tiu con, ba swɩ̀n, ba wʋ́: «Də n nə ken lʋʋ nii kʋ tə lɩ̀à tə nə jɩɩn wa, nə wá gʋ ba, nə ga cʋ̀gʋ̀ ba tɩan tə mama mɩ́ámɩ́án*.» 3 Ba-Yígúrə́-Jə-Tiu cʋgʋ Yɩzərayɛlə lɩ̀à tə kori, ʋ ga kə Kanaan tɩ̀án tə ba jɩɩn wa. Ba gʋa Kanaan tɩ̀án tə, ba ga cʋ̀gʋ̀ ba tɩan tə mama mɩ́ámɩ́án. Ba dɩga bwálɩ́ təntə yɩrɩ Ɔrəma, kʋ də̀ń nə yɩ “cʋcʋran”.Cɩnɩan dən tə yoo
4 Yɩzərayɛlə lɩ̀à tə zàn Hɔrə paan tə yuu wa ba vìí. Ba tì Mɩncanɩ mʋʋ cwəŋə tə, sə ba kɩkarɩ ba twá Edomə lʋʋ nii tə kwa con. Lalʋʋ tə jɩ̀àn gwàrɩ̀ máŋá tə wa ba nə wulə kasɔɔ lanworu tə wa ba vəli. 5 Lalʋʋ tə swɩ̀n ba zɩgɩ Yɩɩ də Moyizə nə, ba wʋ́: «Bɛ̀ɛ̀ nə pɩn á ma pa nə nan Ezwipətə wa? Kʋ yɩ sə nə bà nə tɩ kasɔɔ lanworu kʋ tə wa naaa? Cɩ́gá, wodiu tə̀lə́ lá, yá nɩ́á də tə̀lə́ lá. Yá nə waa dàń nan yinənyɩna wodiu kʋ tə.» 6 Ba-Yígúrə́-Jə-Tiu dàń tʋn dəŋa, tə cwan nə wiri, tə bà tə dɩŋa lalʋʋ tə, yá tə gʋa lɩ̀à zənzən Yɩzərayɛlə lɩ̀à tə wa. 7 Lalʋʋ tə twi ba swɩ̀n Moyizə con, ba wʋ́: «Nə tʋn cʋna! Cɩ́gá, nə swɩ̀n nə zɩgɩ Ba-Yígúrə́-Jə-Tiu nə, nə ga swɩ̀n nə zɩgɩ n də nə. Bon n kə Ba-Yígúrə́-Jə-Tiu nə, sə ʋ pa dəŋa tə va yiŋʋnɩ tə yá nəba.» Moyizə lòrì Yɩɩ ʋ pa lalʋʋ tə nə, 8 yá Ba-Yígúrə́-Jə-Tiu swɩ̀n Moyizə con, ʋ wʋ́: «Fwa dən kʋ cwan nə gwɩ nyɩnyɩga, n goli dàʋ̀ nə, kʋ nə dara yɩɩ nə. Lìù tə mama dən nə dɩŋɩ wá, ʋ nə ywàń kʋ, kʋ wá jon ʋ mɩɩ kʋ kə lʋʋ wa.» 9 Moyizə dàń fwa cɩnɩan dən, ʋ goli dàʋ̀ nə, kʋ nə dara yɩɩ nə. Yá lìù tə mama dən nə dɩŋɩ wá, ʋ nə ywàń cɩnɩan dən tə, kʋ yàá jon ʋ mɩɩ kʋ kə lʋʋ wa.
Bwálá tə Yɩzərayɛlə lɩ̀à tə nə twá lá ba lɛ, ba va ba yí Pisəga
10 Yɩzərayɛlə lɩ̀à tə vəli ba kə ba yijaa bwálɩ́ Obɔtə nə. 11 Ba nə zàn Obɔtə nə, ba vəli ba kə ba yijaa bwálɩ́ Yiye-Abarimə nə, kasɔɔ lanworu tə wa, Mʋabə lʋʋ nii tə yɩɩ yipɩan con. 12 Ba nə zàn lá nə, ba vəli ba kə ba yijaa bwálɩ́ Zerɛdə nacoru tə nii nə. 13 Ba nə zàn lá nə, ba vəli ba kə ba yijaa bwálɩ́ Arənon nacoru tə vàn tə don nə. Nacoru təntə nɩ́á yà palɩ tə naŋa Amɔrə dwíí lʋʋ nii tə wa, tə twá kasɔɔ lanworu tə wa tə kɛ̀ń. Cɩ́gá, Arənon nacoru tə nə yɩ Mʋabə də Amɔrə lʋʋ níə́ tə sɩswɩan. 14 Kʋ mʋ̀ nə pɩn kʋ swɩ̀n Ba-Yígúrə́-Jə-Tiu kʋ̀ʋ̀ sagɩ tə wa, kʋ wʋ́: «Wahɛbə tɩʋ tə wulə Sufa nagwanaa tə wa, kʋ nacoru ga nə yɩ Arənon 15 də kʋ nacoŋi tə nə twá Arə tɩʋ tə con, tə va tə yí Mʋabə lʋʋ nii tə sɩswɩan.»
16 Ba zɩgɩ lá nə ba va Bɛrə, kʋ də̀ń nə yɩ “vɩlɩ”. Mə Bɛrə nə nə Ba-Yígúrə́-Jə-Tiu swɩ̀n Moyizə con, ʋ wʋ́: «Kə Yɩzərayɛlə lɩ̀à tə duən yáá nə, yá à wá pa ba nɩ́á.» 17 Yɩzərayɛlə lɩ̀à tə dàń dɩga nuŋə ka tə, ba wʋ́:
«Vɩlɩ, pa n nɩ́á pwin tə nan!
Á maga pupwən cə̀rí!
18 Pabɩa nə kʋa kʋ,
Yɩzərayɛlə lɩ̀à yáá tɩ̀án nə kʋa kʋ,
də ba dadurən tə ba nə ma pɩn nii,
də ba yáá tɩ̀án dafɩlɩ tə.»
Ba zàn kasɔɔ lanworu tə wa, ba va Matana.
19 Ba zɩgɩ Matana, ba va Nahaliyɛlə, ba zɩgɩ Nahaliyɛlə, ba va Bamɔtə, 20 ba zɩgɩ Bamɔtə, ba va varɩnaa tə wa, ka nə wulə Mʋabə lʋʋ nii tə wa, Pisəga paan tə yupara wa, kʋ nə daa kasɔɔ lanworu tə con.
Yɩzərayɛlə lɩ̀à dí dɩ̀àn pɩ̀ʋ́ Sihon də pɩ̀ʋ́ Ogə yuu wa
21 Yɩzərayɛlə lɩ̀à tə tʋn lɩ̀à Sihon con, ʋ nə yɩ Amɔrə dwíí tə pɩ̀ʋ́, sə ba swɩ̀n ʋ con, ba wʋ́: 22 «Nə pɩ̀à nə twá n lʋʋ nii tə wa nə kɛ̀ń. Nə bá twá kárɩ́ wa, nə à yə̀ə́ divɛn tɩan kárɩ́ wa, nə ga bá nyʋn á vɩla tə nɩ́á. Nə wá tì cwəfarʋ tə, nə kori nə va nə kɛ̀ń n lʋʋ nii tə.» 23 Yá Sihon wà cwəŋə pɩn Yɩzərayɛlə lɩ̀à tə nə, sə ba twá ʋ lʋʋ nii tə wa ba kɛ̀ń. Sihon ken ʋ lʋʋ lɩ̀à tə mama duən yáá, ʋ ja nan ʋ va ʋ jəri Yɩzərayɛlə lɩ̀à tə, kasɔɔ lanworu tə wa. Ʋ twi ʋ ta Yɩzərayɛlə lɩ̀à tə Yahasə nə. 24 Yɩzərayɛlə lɩ̀à tə gʋa ba də kwatara sɩ̀ʋ́, ba ga jon ba lʋʋ nii tə, kʋ nə zɩgɩ Arənon nacoru tə nə, jɩgwiə saparʋ con, kʋ va kʋ yí Yabɔkə nacoru tə, jɩzən saparʋ con, kʋ lɛ kʋ va kʋ yí Amon dwíí tə lʋʋ nii sɩswɩan, yɩɩ yipɩan con. Cɩ́gá, Amon dwíí lʋʋ nii sɩswɩan tə yà jə bəritagʋ. 25 Yɩzərayɛlə lɩ̀à tə jon Amɔrə dwíí tɩan təntə mama. Yɩzərayɛlə lɩ̀à tə jə̀ń tɩan təntə mama wa, də Ɛswəbon də kʋ nii tɩbii tə mama wa. 26 Cɩ́gá, Ɛswəbon yà yɩ Amɔrə dwíí tə pɩ̀ʋ́ Sihon patɩʋ. Ʋ yà ta kʋ̀ʋ̀ də Mʋabə pɩ̀ʋ́ tə nə yɩn lá kʋ máŋá tə wa, ʋ ga jon ʋ lʋʋ nii tə mama, kʋ va kʋ yí Arənon nacoru tə. 27 Kʋ mʋ̀ nə pɩn gwàgá swɩ̀n, ba wʋ́:
«Bɩ̀àn Ɛswəbon nə!
Á pìrə́ á lwà Sihon tɩʋ tə á zɩgɩ kʋ bwálɩ́ nə!
28 Mən nan Ɛswəbon wa,
Mənvwə nan Sihon tɩʋ tə wa,
tə dí Arə tɩʋ tə nə wulə Mʋabə lʋʋ nii wa,
də Arənon pɛɛn tə yun tɩ̀án tə.
29 Mʋabə tɩ̀án-ba, lɛɛ yí aba!
Á jɛ́n, á mʋ̀ lalʋʋ tə nə bwɩ woŋwanʋ Kemoswə nə!
Kʋ pɩn á bɩ̀á dəri,
kʋ ga pa Amɔrə dwíí pɩ̀ʋ́ Sihon ja á bwɩ̀ɩ́ ʋ kə bandiə wa.
30 Nə ta nə cɩan Amɔrə dwíí tə yɩra.
Ɛswəbon cʋ̀gʋ̀ kʋ va kʋ yí Dibon.
Nə dɩga mən kʋ nə, kʋ nə zɩgɩ Nofa nə,
kʋ va kʋ yí Medeba.»
31 Yɩzərayɛlə lɩ̀à tə dàń jə̀ń Amɔrə dwíí lʋʋ nii tə wa. 32 Moyizə tʋn lɩ̀à ba va ba mɩ̀àn Yazɛrə tɩʋ tə, yá ba ta kʋ ba jon kʋ tɩbii tə, ba ga dɩŋa Amɔrə dwíí tə yà nə wulə lá ba lɩ.
33 Ba kʋ́ʋ̀ lwàń cwəŋə, ba twá Baswan cwəŋə tə ba vìí. Baswan pɩ̀ʋ́ Ogə nan ʋ jəri ba, də ʋ lʋʋ lɩ̀à tə mama, sə ʋ ta ba Edəreyi nə. 34 Ba-Yígúrə́-Jə-Tiu swɩ̀n Moyizə con, ʋ wʋ́: «Dàn ká pa ʋ fən ja mʋ́! Cɩ́gá, à wá kə wá n jɩɩn wa, ʋ mʋ̀ də ʋ lɩ̀à tə mama, də ʋ lʋʋ nii tə. Yoo tə n nə ma tʋn Amɔrə dwíí pɩ̀ʋ́ Sihon, ʋ yà nə wulə Ɛswəbon nə, mə kʋ nə n wá ma tʋn Ogə də.» 35 Yɩzərayɛlə lɩ̀à ta Ogə, ba də́ dɩ̀àn ʋ mʋ̀ də ʋ bɩ̀á tə, də ʋ lʋʋ lɩ̀à tə mama yuu wa. Ba wà yá ba pa ladʋa tətə jɛ́n, yá ba jon ba lʋʋ nii tə ba tɩnɩ.