YƖZƏRAYƐLƏ LƖA TƏ WULƏ MƲABƏ DIGƏ TƏ WA
22—36
Pɩ̀ʋ́ Balakə bon ʋ kə Balamə nə
22
1 Yɩzərayɛlə lɩ̀à tə zàn ba va ba kə ba yijaa bwálɩ́ Mʋabə digə tə wa, Zʋrədɛn mʋnaa tə vàn don nə, Zweriko tɩʋ tə yáá con. 2 Sipɔrə bìú Balakə nɩ kʋ tə mama Yɩzərayɛlə lɩ̀à tə nə tʋn Amɔrə dwíí tə yɩra. 3 Yá fən zʋa Mʋabə tɩ̀án zənzən, Yɩzərayɛlə lɩ̀à tə nə dáá zənzən yɩrɩ. Fən zʋa ba zənzən Yɩzərayɛlə lɩ̀à tə yáá con. 4 Mʋabə tɩ̀án dàń swɩ̀n Madɩan tɩ̀án nəkwɩna tə con, ba wʋ́: «Lalʋʋ kʋ tə wá də́ nə sapara tə mama, kʋ kɩkarɩ ndə nɩan nə də́ gaʋ kasɔɔ wa nətʋ.» Sipɔrə bìú Balakə yà nə yɩ Mʋabə tɩ̀án pɩ̀ʋ́, kʋ máŋá tə wa. 5 Ʋ tʋn tʋntʋna Bewɔrə bìú Balamə con, ʋ nə wulə Petɔrə nə, mʋnaa tə nii nə, ʋ lʋʋ nii tə wa, sə ba bon wá ba swɩ̀n ʋ con, ba wʋ́: «Nə̀ń lalʋʋ don nan Ezwipətə, ba larɩ ba sú tɩa tə yuu mama, yá ba jə̀ə́ à tɩʋ yáá con. 6 À lòrì mʋ́ sə n bà, n zɩrɩ n kə kʋ mʋ̀ lalʋʋ təntə nə. Cɩ́gá, ba dɩ̀àn dwə nə. Kʋ wàá də à wá wànɩ́ à ta ba à də́, à ga dɩŋa ba à lɩ lʋʋ nii tə wa. Cɩ́gá, à yə̀ə́ də n nə lòrì sə Yɩɩ fwa zəni lìù yɩra, Yɩɩ cɩ́gá yàá fwa zəni kʋ tíú yɩra. Yá n nə zɩrɩ n kə lìù nə, zɩra tə cɩ́gá yàá ja wá.»7 Mʋabə tɩ̀án nəkwɩna tə də Madɩan tɩ̀án nəkwɩna tə dàń ja zìlə́ wiən ba va ba pa vʋrʋ tə nə. Ba vəli ba yí Balamə, ba tún nii tə Balakə nə pɩn ba ʋ con. 8 Balamə swɩ̀n ba con, ʋ wʋ́: «Á jwɩa yəbə, yá à wá le aba, kʋ twá kʋ tə nə Ba-Yígúrə́-Jə-Tiu nə wá swɩ̀n à con.» Mʋabə tɩ̀án pàbɩ̀á tə jʋa Balamə con.
9 Yɩɩ twi Balamə con ʋ swɩ̀n, ʋ bwe wá, ʋ wʋ́: «Bə̀rə́ nə yɩ bara ba tə nə wulə n dìə̀ wa?» 10 Balamə le Yɩɩ, ʋ wʋ́: «Sipɔrə bìú Balakə ʋ nə yɩ Mʋabə pɩ̀ʋ́ nə tʋn ba, sə ba swɩ̀n à con, ba wʋ́: 11 «Nə̀ń lalʋʋ don nan Ezwipətə, ba larɩ ba sú tɩa tə yuu mama. N dàń bà n zɩrɩ n kə ba nə n pa nə. Kʋ wàá də à wá wànɩ́ ba à ta, à ga dɩŋa ba.» 12 Yɩɩ swɩ̀n Balamə con, ʋ wʋ́: «N bá twá ba nə n va lá, yá n bá zɩrɩ n kə lalʋʋ təntə nə. Cɩ́gá, à fwa zəni ba yɩra.» 13 Balamə zàn jɩjʋ nə, ʋ swɩ̀n Balakə pàbɩ̀á tə con, ʋ wʋ́: «Á pìrə́ á va á lʋʋ nii wa. Cɩ́gá, Ba-Yígúrə́-Jə-Tiu vɩga sə à twá á nə à va.» 14 Mʋabə tɩ̀án pàbɩ̀á tə pìí ba bà ba yí Balakə, ba swɩ̀n ʋ con, ba wʋ́: «Balamə vɩga sə ʋ twá nə nə ʋ bà.»
15 Balakə kʋ́ʋ̀ pìí ʋ tʋn Mʋabə tɩ̀án pàbɩ̀á, ba nə dáá ba doni təntən lɩ̀à tə, ba ga jə dun ba doni təntən lɩ̀à tə. 16 Ba twi ba na Balamə ba swɩ̀n ʋ con, ba wʋ́: «Nə̀ń kʋ tə Sipɔrə bìú Balakə nə swɩ̀n: À lòri mʋ́, dàn ká vɩ sə n bà n na nə. 17 À wá pa mʋ́ dun zənzən, à ga wá fwa kʋ tə mama n nə wá swɩ̀n à con. À lòrì mʋ́ sə n bà, n zɩrɩ n kə lalʋʋ kʋ tə nə, n pa nə.» 18 Balamə le Balakə lɩ̀à tə, ʋ wʋ́: «Balakə nə swə ʋ pa nə ʋ dìə̀ tə wa səbiu tə də sɩ́án tə mama də, à tə wàrɩ̀ yobiə nə à yə̀ə́ yofarʋ à fwa, kʋ nə zɩga Ba-Yígúrə́-Jə-Tiu ʋ nə yɩ à Yɩɩ, nii tə nə. 19 Sɩ́ʋ́n nə, à dàń lòrì aba, á də jwɩa yəbə, sə à lwarɩ kʋ tə Ba-Yígúrə́-Jə-Tiu nə kʋ́ʋ̀ wá swɩ̀n à con.» 20 Yɩɩ twi Balamə con tɩtɩn nə, ʋ swɩ̀n ʋ con, ʋ wʋ́: «Bara ba tə nə yɩ ba twi sə ba bon mʋ́, sə n twá ba nə n va. Yá n dàń nə bá fwa won mama, də kʋ nə tà kʋ tə à nə wá swɩ̀n n con.»
Balamə bɩnakan tə yoo
21 Balamə zàn jɩjʋ nə, ʋ tanɩ ʋ bɩnakan, ʋ ga twá Mʋabə tɩ̀án pàbɩ̀á tə nə ʋ vìí. 22 Yɩɩ lɩŋa zàn, ʋ nə twá ba nə ʋ vìí tə yɩrɩ. Yá Ba-Yígúrə́-Jə-Tiu malɩka nan ka zɩga cwəŋə tə yuu, sə ka cɩ̀, Balamə dàn ká kɛ̀ń. Balamə yà dɩ̀gà ʋ bɩnakan, yá ʋ tʋtʋnbɩa bələ yà wulə də wá. 23 Bɩnakan tə nɩ Ba-Yígúrə́-Jə-Tiu malɩka tə, ka zɩga cwəŋə tə yuu də ka kwatara sɩ̀ʋ́ ka jɩɩn wa. Bɩnakan tə yori ka zʋ kasɔɔ wa, ka ga yá cwəŋə tə. Balamə mà bɩnakan tə, sə ka pìí ka bà cwəŋə tə wa. 24 Ba-Yígúrə́-Jə-Tiu malɩka tə vəli ka zɩga cwəmɩna wa, ka nə wulə divɛn tɩ̀án kárɩ́ tə wa. Ba yà lwə̀ bə́rí ba ma kɩkarɩ divɛn tɩ̀án kárɩ́ tə nə wulə cwəŋə tə jɩzən də jɩgwiə nə. 25 Máŋá tə bɩnakan tə nə nɩ Ba-Yígúrə́-Jə-Tiu malɩka tə, ka vəli ka marɩ bírə́ tə yɩra, ka gà Balamə naa bírə́ tə yɩra. Ya Balamə kʋ́ʋ̀ mà ka. 26 Ba-Yígúrə́-Jə-Tiu malɩka tə kʋ́ʋ̀ vəli ka zɩga yiŋʋnɩ bwálɩ́ pɩpɩan nə, bwálɩ́ yà nə tə̀lə́ jɩzən, nə à yə̀ə́ jɩgwiə, ba nə wàá ba yori ba twá. 27 Máŋá tə wa bɩnakan tə nə nɩ Ba-Yígúrə́-Jə-Tiu malɩka tə, ka tʋa tɩa Balamə nɛɛ də̀ń nə. Balamə lɩŋa dàń zàn zənzən, ʋ ga mà bɩnakan tə də ʋ daduu tə. 28 Ba-Yígúrə́-Jə-Tiu dàń súrí bɩnakan tə nii, ka ga swɩ̀n Balamə con, ka wʋ́: «Bɛ̀ɛ̀ nə à ma fwa mʋ́, n ma mà nə nɛɛ batwa nətən?» 29 Balamə le bɩnakan tə, ʋ wʋ́: «N dí bɩyɩrɩ à yɩra! À yà nə jə kwatara sɩ̀ʋ́ à jɩɩn wa, də à gʋa mʋ́ sɩ́ʋ́n nə.» 30 Bɩnakan tə swɩ̀n Balamə con, ka wʋ́: «À mʋ̀ nə tà n bɩnakan tə n nə dɩ̀ à yuu máŋá mama, kʋ bà kʋ yí zə̀n naaa? Kʋ yɩ à yofwamɩʋn sə à də à tʋŋa nətʋ n yɩra naaa?» Ʋ le, ʋ wʋ́: «ɔn ɔn.»
31 Ba-Yígúrə́-Jə-Tiu dàń súrí Balamə yɩ́á. Ʋ nɩ Ba-Yígúrə́-Jə-Tiu malɩka tə ka zɩga cwəŋə tə yuu wa, də ka kwatara sɩ̀ʋ́ ka jɩɩn wa. Ʋ kwá tɩa, ʋ tʋ ʋ nadwana yuu, ʋ pú ʋ yáá tɩa. 32 Ba-Yígúrə́-Jə-Tiu malɩka tə swɩ̀n ʋ con, ka wʋ́: «Bɛ̀ɛ̀ nə pɩn n ma mà n bɩnakan tə nɛɛ batwa? À yɩ à nan sə à zɩgɩ n nə. Cɩ́gá, à nɩ də n cwəŋə ka tə vəlu tə wá cʋ̀gʋ̀ mʋ́. 33 Bɩnakan tə nɩ nə, ka ga yori à yáá nə nɛɛ batwa. Ka yà nə wà à yáá nə yori kʋ yà yɩ n mʋ̀ nə à wá gʋ, à ga yá ka mʋ̀ mɩɩ lʋʋ wa.» 34 Balamə swɩ̀n Ba-Yígúrə́-Jə-Tiu malɩka tə con, ʋ wʋ́: «À tʋn cʋna, à yà yəri də n mʋ̀ nə zɩga à yáá nə, cwəŋə tə yuu wa. Sɩ́ʋ́n nə, à cwəŋə tə vəlu nə ba ywán də mʋ́, à wá pìí.» 35 Ba-Yígúrə́-Jə-Tiu malɩka tə swɩ̀n Balamə con, ka wʋ́: «Twá bara ba tə nə n va, yá n dàń nə yɩ sʋ̀ràn tə, à nə wá swɩ̀n n con cɩcɩ nə n wá swɩ̀n.» Balamə dàń twá pàbɩ̀á tə nə Balakə nə tʋn, ʋ vìí.
Balamə də Balakə jəri duən
36 Balakə nə nì də Balamə yí, ʋ nan ʋ va ʋ jəri wá Mʋabə tɩʋ tə nii nə, Arənon nacoru máŋá nə, kʋ nə yɩ ʋ lʋʋ nii tə sɩswɩan. 37 Balakə swɩ̀n Balamə con, ʋ wʋ́: «À yà wà lɩ̀à tʋn à pa ba bon mʋ́ naaa? Bɛ̀ɛ̀ nə pɩn n ma wà à con twi fuən? Cɩ́gá mama, à wàrɩ̀ à pɩn n nɩ dun naaa?» 38 Balamə swɩ̀n Balakə con, ʋ wʋ́: «Sɩ́ʋ́n nə, à dàń nə twi n con, bɛ̀ɛ̀ nə à wàá à swɩ̀n? À wá swɩ̀n sʋgʋ tə Yɩɩ nə wá kə à nii wa.» 39 Balamə twá Balakə nə, ba va ba yí Kiriyatə-Husɔtə. 40 Balakə fwa vanfaran də vanmɩnɩ joŋi, ʋ lɩ tə vàn don ʋ pa Balamə də pàbɩ̀á tə nə, ba yà nə wulə də wá.
Balamə lòrì sə Yɩɩ fwa zəni Yɩzərayɛlə lɩ̀à tə yɩra
41 Jɩjʋ nə, Balakə jɩn Balamə ʋ ja va ʋ dɩ̀ Bamɔtə-Baalə paan tə yuu wa. Balamə zɩgɩ kʋ bwálɩ́ təntə nə, ʋ na Yɩzərayɛlə lalʋʋ tə vàn don.