23
1 Balamə swɩ̀n Balakə con, ʋ wʋ́: «Lwà joŋi bwálá barpɛ yəbə, n pa nə, sə n ga tanɩ nabɩran barpɛ də pabɩran barpɛ, n pa nə.» 2 Balakə tʋn kʋ tə Balamə nə swɩ̀n ʋ con. Balakə də Balamə jɩn nabɩʋ də pabɩʋ, ba ma fwa joŋi tə nə sʋ̀rɩ́, joŋi bwálɩ́ mama yuu wa. 3 Balamə swɩ̀n Balakə con, ʋ wʋ́: «Zɩgɩ n joŋi tə n nə sʋ̀rɩ́* tə bɩan nə, yá à mʋ̀ wá twən à va yiŋʋnɩ. Kʋ wàá də Ba-Yígúrə́-Jə-Tiu wá bà ʋ jəri nə, yá à dàń wá pa n lwarɩ kʋ tə ʋ nə wá swɩ̀n à con.» Balamə vəli ʋ dɩ̀ Paan don yupara wa, tɩ̀ʋ́ nə tə̀lə́ lá. 4 Yɩɩ twi ʋ jəri Balamə, yá Balamə swɩ̀n ʋ con, ʋ wʋ́: «À pɩn ba lwà joŋi bwálá barpɛ, yá à gʋa nabɩʋ də pabɩʋ à ma fwa joŋi tə nə sʋ̀rɩ́, joŋi bwálɩ́ nədʋ mama yuu wa.»5 Ba-Yígúrə́-Jə-Tiu ken sʋgʋ Balamə nii wa, ʋ ga swɩ̀n ʋ con, ʋ wʋ́: «Pìí n va Balakə con, mə nətʋ nə n wá swɩ̀n ʋ con.» 6 Ʋ pìí ʋ va Balakə con, ʋ yà nə zɩga joŋi tə ʋ nə sʋ̀rɩ́ tə bɩan nə, də Mʋabə tɩ̀án pàbɩ̀á tə mama. 7 Balamə dàń dɩ̀gà sənə, ʋ wʋ́:
«Balakə pɩn à nan Aramə à bà,
Mʋabə pɩ̀ʋ́ pɩn à nan Yɩɩ yipɩan con pɛɛn tə wa à bà.
Ʋ wʋ́ à bà à zɩrɩ à kə Zwakɔbə dwíí tə nə, à pa wa!
Ʋ wʋ́ à bà à cʋ̀gʋ̀ Yɩzərayɛlə lɩ̀à tə də lɩŋa!
8 Nətə nə à wá zɩrɩ à kə lìù tə nə,
Yɩɩ nə wà zɩrɩ ʋ kə ʋ nə?
Nətə nə à wá cʋ̀gʋ̀ lìù də lɩŋa,
də Ba-Yígúrə́-Jə-Tiu lɩŋa nə wà ʋ yuu wa zàn?
9 À zɩga pɩ̀ràn tə yuu wa, à ga na ba.
À zɩga pɛɛn tə yuu wa, à ga balɩ ba.
Kʋ yɩ lalʋʋ kʋ nə yɩ kʋ cɩcɩ.
Kʋ twá kʋ tə̀lə́ dwíə́ nəkaran* tə wa.
10 Wàà nə wàá Zwakɔbə dwíí kapʋpʋ tə ʋ gàlɩ̀,
sə ʋ ga man Yɩzərayɛlə lalʋʋ tə nii?
À swə sə à tɩ ndə lɩ̀à tə nə, ba tʋtʋnɛɛ nə nə tì cwəŋə,
sə à yígúrə́ ya ndə ba ba nyiən nə!»
11 Balakə swɩ̀n Balamə con, ʋ wʋ́: «Bɛ̀ɛ̀ nə n tʋn à yɩra nətən? N yɩ à pɩn n bà sə n zɩrɩ kə à dʋŋa nə, yá n pìí n lòrì Yɩɩ, sə ʋ fwa zəni ba yɩra.» 12 Balamə le, ʋ wʋ́: «Kʋ tà kʋ tə cɩcɩ Ba-Yígúrə́-Jə-Tiu nə ken à nii wa nə à swɩ̀n naaa?»
Balamə lòrì sə Yɩɩ fwa zəni Yɩzərayɛlə lɩ̀à tə yɩra, nɛɛ bələ nii nə
13 Balakə swɩ̀n Balamə con, ʋ wʋ́: «Bà nə va bwálɩ́ don. N nə zɩga yəbə, Yɩzərayɛlə lalʋʋ yɩ kʋ vàn don nə n na, n ba ba mama na. Ba nə va bwálɩ́ don nə, sə n zɩgɩ lá, n zɩrɩ kə ba nə, n pa nə.» 14 Balakə jɩn Balamə ʋ va bwálɩ́ don nə, ba nə yàá zɩga lá ba ma palɩ lɩ̀à, Pisəga paan tə yuu wa. Ʋ lwə̀ joŋi bwálá barpɛ, yá ʋ gʋa nabɩʋ də pabɩʋ ʋ ma fwa joŋi tə nə sʋ̀rɩ́, joŋi bwálɩ́ mama yuu wa. 15 Balamə swɩ̀n Balakə con, ʋ wʋ́: «Zɩgɩ yəbə, n joŋi tə n nə sʋ̀rɩ́ tə bɩan nə, yá à mʋ̀ wá va yáá à dàn Yɩɩ.» 16 Ba-Yígúrə́-Jə-Tiu twi ʋ jəri Balamə, ʋ kə sʋgʋ Balamə nii wa, ʋ ga swɩ̀n ʋ con, ʋ wʋ́: «Pìí n va Balakə con, yá n wá swɩ̀n nətən.» 17 Balamə pìí ʋ va Balakə con, ʋ yà nə zɩga ʋ joŋi tə ʋ nə sʋ̀rɩ́ tə bɩan nə, də Mʋabə tɩ̀án pàbɩ̀á tə. Balakə bwe wá, ʋ wʋ́: «Bɛ̀ɛ̀ nə Ba-Yígúrə́-Jə-Tiu swɩ̀n?» 18 Balamə kʋ́ʋ̀ dɩ̀gà sənə tə tə, ʋ wʋ́:
«Zàn yɩɩ nə Balakə, n cʋgʋ!
Sipɔrə bìú Balakə, guni n zɩɩn n ma cʋgʋ kʋ tə à nə swɩ̀n.
19 Yɩɩ tà ləzwənə, sə ʋ ma kʋ̀nɩ̀ kʋ̀nkʋ̀n,
nə à yə̀ə́ Adamə nàʋ́, ʋ ma pìí ʋ lwànɩ́ pubʋŋa.
Ʋ nə swɩ̀n yoo, ʋ yàá tʋn kʋ.
Ʋ nə kàn nii, ʋ yàá pa kʋ nii sú.
20 À sɛ̀ sə à lòrì Yɩɩ, sə ʋ fwa zəni ba yɩra,
Yɩɩ nə fwa zəni ba yɩra yɩrɩ.
À də bá lwàń kʋ.
21 Yɩɩ ba lwanɩ na Zwakɔbə dwíí tə yuu wa,
ʋ ba kʋ̀nkʋ̀n yoo mama na Yɩzərayələ lɩ̀à tə yɩra.
Ba-Yígúrə́-Jə-Tiu, ʋ nə yɩ ba Yɩɩ wulə də ba.
Ba mà pupwən cə̀rí ba pɩn wá ndə pɩ̀ʋ́.
22 Yɩɩ nə pɩn ba nan Ezwipətə wa,
də dɩ̀àn ndə ganaʋ dɩ̀àn nə.
23 Vʋa tə̀lə́ Zwakɔbə dwíí tə wa,
Yɩzərayɛlə lɩ̀à tə ma ba cɩrɩ yìə̀n tʋŋa.
Yɩɩ nə pɩ̀à ʋ tʋn yoo,
ʋ yàá swɩ̀n kʋ ʋ bɩrɩ Zwakɔbə dwíí tə
də Yɩzərayɛlə lɩ̀à tə nə, kʋ máŋá wa.
24 Kʋ yɩ lalʋʋ tə kʋ nə zàŋá ndə gəkan nə.
Kʋ yàá zàn kʋ zɩga ndə gəru nə.
Kʋ ba tɩa pə̀ní də kʋ nə wà nàŋʋ́ tə kʋ nə dɩŋɩ jɩn kʋ də́,
kʋ ga nyʋn nàŋʋ́ tə jana.»
25 Balakə swɩ̀n Balamə con, ʋ wʋ́: «N nə ba zɩrɩ n kəni ba nə, n kʋ́ʋ̀ dàn ká lòrì, sə Yɩɩ fwa zəni mʋ̀ ba yɩra.» 26 Balamə le Balakə, ʋ wʋ́: «À wà n con swɩ̀n də à wá fwa kʋ tə mama Ba-Yígúrə́-Jə-Tiu nə wá swɩ̀n à con naaa?»
Balamə lòrì sə Yɩɩ fwa zəni Yɩzərayɛlə lɩ̀à tə yɩra, nɛɛ batwa nii nə
27 Balakə swɩ̀n Balamə con, ʋ wʋ́: «À lòrì mʋ́, bà à con, sə à ja mʋ́ à va bwálɩ́ don nə. Kʋ wàá də kʋ wá twá Yɩɩ fɩra nə, sə n zɩgɩ lá n zɩrɩ n kə ba nə, n pa nə.» 28 Balakə jɩn Balamə ʋ va Pewɔrə paan tə yupara wa, ka vàn tə nə daa kasɔɔ lanworu tə con. 29 Balamə swɩ̀n Balakə con, ʋ wʋ́: «Lwà joŋi bwálá barpɛ yəbə, n pa nə, sə n ga tanɩ nabɩran barpɛ də pabɩran barpɛ yəbə, n pa nə.» 30 Balakə tʋn kʋ tə Balamə nə swɩ̀n ʋ con. Ʋ jɩn nabɩʋ də pabɩʋ ʋ ma fwa joŋi tə nə sʋ̀rɩ́, joŋi bwálɩ́ mama yuu wa.