24
1 Balamə nɩ də kʋ ywàń kʋ pa Ba-Yígúrə́-Jə-Tiu nə, sə ʋ fwa zəni Yɩzərayɛlə lɩ̀à tə yɩra, yá ʋ kʋ́ʋ̀ wà vəli sə ʋ pɩ̀à mɩmɩnʋ, ndə dí yáá tə nə. Ʋ viviri ʋ yáá ʋ te kasɔɔ lanworu tə con. 2 Balamə zɩ̀n ʋ yáá yɩɩ nə, yá ʋ nɩ Yɩzərayɛlə lɩ̀à tə, də ba jə̀ə́ dwíí dwíí. Yɩɩ Siŋu tə dàń cúə́ ʋ yuu wa, 3 yá Balamə dàń dɩga sənə, ʋ wʋ́:«Á nəŋə à mʋ̀ Bewɔrə bìú Balamə nii sʋgʋ!
À mʋ̀ bɛɛ tə nə na yìə̀n tə nə nan Yɩɩ con nii sʋgʋ!
4 À yɩ lìù tə à nə nə̀ń Yɩɩ nii sʋ̀ràn!
À yɩ lìù tə à nə na kʋ tə, Yɩɩ tə ʋ nə wulə tə mɛ yuu wa nə bɩrɩ nə.
À yɩ lìù tə à nə yàá na Yɩɩ,
də à nə tʋa à nadwana yuu à jʋn wá.
5 N gansilə tə ziən tà mʋ̀, ooo Zwakɔbə!
N wúlú bwálɩ́ tə ziən tà mʋ̀, Yɩzərayɛlə!
6 Tə tɩɩn ndə nacorən nə,
ndə dwavʋran kadwii nə wulə mʋnaa nii nə,
ndə alʋwɛsə nə, Ba-Yígúrə́-Jə-Tiu nə cwɛn,
ndə sɩsaban tɩ̀án nə zɩga nɩ́á nii nə.
7 Tə yɩ ndə vɩlɩ nɩ́á nə pàlɩ̀,
tə dəri tɩ̀án kárɩ́ wa.
Ʋ pɩ̀ʋ́ tə dí dɩ̀àn Agagə yuu wa,
yá ʋ payuu tə wá ja dɩ̀àn kʋ doni.
8 Yɩɩ pɩn ʋ nan Ezwipətə wa.
Ʋ jə dɩ̀àn ndə ganaʋ nə.
Ʋ liri dwíə́ nəkaran* tə nə yɩ ʋ dʋŋa tə.
Ʋ kɛ́n ba kurən, ʋ ga cɛn ba də cɩan.
9 Ʋ yàá kwá, ʋ tígə́ ndə gəru nə,
ndə gəkan nə.
Wàà nə wá dídə́n sə ʋ zɩ̀n wá?
Yɩɩ wá fwa zəni lìù tə yɩra, ʋ nə lòrì, sə Yɩɩ fwa zəni n yɩra,
Yá zɩra wá ja lìù tə mama, ʋ nə wá zɩrɩ ʋ kə n nə.»
10 Balakə lɩŋa zàn Balamə yuu wa. Ʋ sʋ̀rɩ́ ʋ jɩfwa Balamə nii nə, ʋ ga swɩ̀n, ʋ wʋ́: «N yɩ à bon mʋ́, sə n bà n zɩrɩ n kə à dʋŋa nə, yá nə̀ń kʋ nə, n yɩ n pìí n lòrì Yɩɩ nɛɛ batwa mama, sə ʋ fwa zəni ba yɩra. 11 Sɩ́ʋ́n nə, n dàń vəli n lʋʋ nii wa. À yà swɩ̀n n con də à wá pa n na dun zənzən, yá Ba-Yígúrə́-Jə-Tiu vɩga sə n na dun təntə.»
Balamə man Yɩzərayɛlə nə wá ja dun nətʋ
12 Balamə le Balakə, ʋ wʋ́: «À yà swɩ̀n tʋtʋnbɩa tə con, n nə tʋn à con, 13 də Balakə nə swə ʋ pa nə ʋ dìə̀ tə wa səbiu tə mama, də sɩ́án tə mama, à wàrɩ̀ Ba-Yígúrə́-Jə-Tiu nii tə à galɩ à tʋŋa yozəŋu, nə à yə̀ə́ yolwan. Kʋ tə Ba-Yígúrə́-Jə-Tiu nə wá swɩ̀n à con nə, à wá swɩ̀n n con. 14 Sɩ́ʋ́n nə, à dàń vələ à lʋʋ lɩ̀à con. Bà sə à dí yáá à swɩ̀n kʋ tə Yɩzərayɛlə lɩ̀à nə wá tʋn n lʋʋ lɩ̀à tə yɩra, máŋá tə wa ka nə bɩ̀àn.»
15 Balamə dàń dɩga sənə, ʋ wʋ́:
« Nəŋə à mʋ̀ Bewɔrə bìú Balamə nii sʋgʋ!
À mʋ̀ bɛɛ tə nə na yìə̀n tə nan Yɩɩ con nii sʋgʋ!
16 À mʋ̀ lìù tə à nə nə̀ń Yɩɩ nii sʋ̀ràn, sʋgʋ nə!
À yɩ lìù tə à nə jə Baan Yɩɩ yìə̀n tə yənu!
À yɩ lìù tə à nə na kʋ tə, Yɩɩ tə ʋ nə wulə tə mɛ yuu wa nə bɩrɩ nə.
À yɩ lìù tə à nə yàá na Yɩɩ,
də à nə tʋa à nadwana yuu à jʋn wá.
17 À na kʋ tə nə bɩ̀àn, yá kʋ tà sɩ́ʋ́n,
À lwarɩ yoo tə nə wá tʋn, yá kʋ bá ya zə̀n.
Kacɩlacɔɔ pɛ́n Zwakɔbə dwíí tə wa.
Pɩ̀ʋ́ wulə ʋ zàŋá Yɩzərayɛlə lalʋʋ tə wa.
Ʋ wá ja pɛ̀gá dadɩlʋ ʋ ma nyʋnyʋgʋ Mʋabə tɩ̀án zɩwurən,
ʋ ga wá lwa Sɛtə dwíí tə mama yuu.
18 Ʋ wá jon Edomə lʋʋ nii tə ʋ tɩnɩ.
Ʋ wá jon Seyirə, kʋ nə yɩ ba dʋŋa lʋʋ nii tə ʋ tɩnɩ.
Yɩzərayɛlə lɩ̀à wá bɩrɩ ba dɩ̀àn.
19 Lìù tə nə naŋa Zwakɔbə dwíí tə wa, wá də́ pàrɩ̀.
Ʋ pɩn ba tə nə dəri ba jon ba tɩ̀àn tɩan tə wa tɩ, ba nyʋn lá.
Balamə swɩ̀n Yɩzərayɛlə dʋŋa tə nə wá cʋ̀gʋ̀ yoo
20 Kʋ kwa nə, Balamə nɩ Amalɛkə dwíí tə, ʋ ga dɩ sənə, ʋ wʋ́:
«Amalɛkə dwíí lʋʋ nii tə nə wulə lʋʋ níə́ tə mama yuu wa,
yá kʋ yígúrə́ wa, kʋ wá cʋ̀gʋ̀ mɩ́ámɩ́án.»
21 Ʋ nɩ Kayɛn dwíí tə də,
ʋ ga dɩ ʋ gwaran, ʋ wʋ́:
«N lʋʋ sànɩ́ tə dəkuu jə dɩ̀àn,
ndə zəŋu nə fwa kʋ pwalʋ pɩ̀ʋ̀ yuu wa.
22 Yá mən wá də́ Kayɛn dwíí dìì tə,
máŋá tə wa Asiiri tɩ̀án nə wá ja aba ba va yongaʋ.»
23 Ʋ dɩga sənə, ʋ wʋ́:
«Kʋ yɩ pucʋnɩ!
Wàà mɩɩ nə wá ya lʋʋ wa, máŋá tə wa
Yɩɩ nə wá tʋn kʋ?
24 Yá nɩ́á yuu bwərə wá nan Kitimə tə bà.
Ba wá fʋfʋlɩ Asiiri tɩ̀án,
ba ga fʋfʋlɩ Ebɛrə dwíí tə,
yá ʋ də dwíí tə wá cʋ̀gʋ̀ mɩ́ámɩ́án.»
25 Kʋ kwa nə, Balamə pìí ʋ va ʋ lʋʋ nii wa, yá Balakə də vəli ʋ sàń.