Yɩzərayɛlə lɩ̀à tə ken ba tɩ̀àn woŋwanan yoo wa
25
1 Yɩzərayɛlə lɩ̀à tə jə̀ń Switimə nə, yá lalʋʋ tə sinti ba cwàrɩ̀ də Mʋabə tɩ̀án bwɩ̀ɩ́ tə. 2 Bwɩ̀ɩ́ təntə bon Yɩzərayɛlə lɩ̀à tə, sə ba twá ba fwa ba woŋwanan tə jwəŋə tə. Yá lalʋʋ tə twá ba də́ ba wodirən tə, ba ga tʋ ba nadwana yuu, ba woŋwanan tə yáá. 3 Yɩzərayɛlə lɩ̀à tə vwə ba tɩ̀àn Baalə-Pewɔrə woŋwanʋ tə nə, yá Ba-Yígúrə́-Jə-Tiu lɩŋa dàń zàn ba yuu wa.4 Ba-Yígúrə́-Jə-Tiu swɩ̀n Moyizə con, ʋ wʋ́: «Ja lalʋʋ tə pàbɩ̀á tə mɛ, n pa ba kùrí ba, à yáá con, yɩcaʋ tə yáá con. Kʋ nətʋ wá pa à lɩŋa tə nə pupwin Yɩzərayɛlə lɩ̀à tə yuu wa tʋ, tə yá ba.» 5 Moyizə swɩ̀n Yɩzərayɛlə lɩ̀à tə nə bʋ̀rɩ̀ bʋra tə con, ʋ wʋ́: «Á lìù mama mɛ sə ʋ gʋ bara tə wa lɩ̀à tə, ba nə vwə ba tɩ̀àn Baalə-Pewɔrə woŋwanʋ tə nə.
6 Kʋ máŋá tə wa, də nə̀ń Yɩzərayɛlə bɛɛ don nə, ʋ ja Madɩan tɩ̀án bʋ̀á ʋ bà ʋ nubɩa tə wa, Moyizə də Yɩzərayɛlə lalʋʋ tə mama yɩ́á wa, máŋá tə wa, ba yà tə nə wulə ba kwi Yɩɩ jə́rə́ gansili tə mimii nə. 7 Máŋá tə wa, Eleyazarə bìú Fineyasə, ʋ nə yɩ Yɩɩ joŋwanʋ Aron nàʋ́ nə nɩ kʋ nətʋ, ʋ zàn lalʋʋ tə titəŋi wa, ʋ tì cwiin ʋ ja ʋ jɩɩn wa. 8 Ʋ púə́ Yɩzərayɛlə bɛɛ tə kwa, ʋ zʋ ʋ gansili tə wa, ʋ zwa ba mɛ bələ də cwiin tə. Ʋ zwə Yɩzərayɛlə bɛɛ tə, də Madɩan tɩ̀án bʋ̀á tə kwíə́ də̀ń nə. Yá càn tə yà nə jə Yɩzərayɛlə lɩ̀à tə dàń cən tə zɩgɩ. 9 Tɩan yayɩpwarʋ təntə yà gʋa lɩ̀à 24 000.
10 Ba-Yígúrə́-Jə-Tiu swɩ̀n Moyizə con, ʋ wʋ́: 11 «Eleyazarə bìú Fineyasə, ʋ nə yɩ Yɩɩ joŋwanʋ Aron nàʋ́ pɩn à lɩŋa tə yà nə zaŋa Yɩzərayɛlə lɩ̀à tə yuu wa pìí tə tʋ. Cɩ́gá ʋ tʋn badoli ba titəŋi wa, à yuu yɩrɩ, yá kʋ pɩn à kʋ́ʋ̀ wà Yɩzərayɛlə lɩ̀à tə cʋ̀gʋ̀ mɩ́ámɩ́án. 12 Kʋ mʋ̀ yɩrɩ nə, swɩ̀n ʋ con də à wá tún nimarʋ də wá, kʋ nə wá ja sìə́ kʋ bà. 13 Kʋ wá ya ʋ mʋ̀ də ʋ dwíí tə ʋ nə wá kə lʋʋ wa nyiən. Kʋ nimarʋ tə pɩn nii, sə ba ya Yɩɩ joŋwana, máŋá də máŋá mama wuuu. Cɩ́gá, ʋ tʋn badoli à mʋ̀ ʋ Yɩɩ tə yuu yɩrɩ, ʋ ga kwɛn Yɩzərayɛlə lɩ̀à tə cʋna ʋ lɩ.»
14 Yɩzərayɛlə bɛɛ tə ba nə gʋa də Madɩan tɩ̀án bʋ̀á tə, yɩrɩ nə yɩ Ziməri. Ʋ yà yɩ Salu bìú, ʋ ga yɩ Simeyon dwíí tə wa pabiu don. 15 Madɩan tɩ̀án bʋ̀á tə ba nə gʋa də Yɩzərayɛlə bɛɛ tə, yɩrɩ nə yɩ Kozəbi. Ʋ yà yɩ Swurə bʋ̀á. Swurə yà yɩ Madɩan tɩ̀án dwíí don dìə̀ tíú. 16 Ba-Yígúrə́-Jə-Tiu swɩ̀n Moyizə con, ʋ wʋ́: 17 «Á tɛga Madɩan tɩ̀án tə, á gʋ. 18 Cɩ́gá, ba yɩn á jarɩduən, kʋ twá də swɩan tə ba nə tʋn á yɩra, woŋwanʋ Pewɔrə də ba nakʋa Kozəbi yoo tə wa. Kozəbi yɩ Madɩan tɩ̀án dìə̀ tíú don bʋ̀á, ba nə gʋa tɩan yayɩpwarʋ tə dɩɩn nə, woŋwanʋ Pewɔrə yoo tə wa.»
Yɩzərayɛlə lɩ̀à tə nɛɛ bələ nii galʋ
19 Tɩan yayɩpwarʋ tə kwa nə,