Galʋ 26

1 Ba-Yígúrə́-Jə-Tiu swɩ̀n Moyizə, də Yɩɩ joŋwanʋ Aron bìú Eleyazarə con, ʋ wʋ́: 2 «Á gàlá Yɩzərayɛlə lalʋʋ tə mama, kʋ twá dwíí dwíí, kʋ nə zɩgɩ ba tə nə jə bɩna sapʋa, də ba tə nə dwə nətʋ, ba nə wàá kʋ̀ʋ̀ ba vəli.» 3 Moyizə də Yɩɩ joŋwanʋ Eleyazarə swɩ̀n ba con, Mʋabə tɩ̀án digə tə wa, Zʋrədɛn mʋnaa tə nii nə, ka nə wulə Zweriko tɩʋ tə yáá con, ba wʋ́: 4 «Ba wá gàlà bara tə nə jə bɩna sapʋa, də ba tə nə dwə nətʋ, ndə Ba-Yígúrə́-Jə-Tiu nə pɩn nii Moyizə nə, sə ʋ tʋn nətʋ.» Nə̀ń Yɩzərayɛlə dwíə́ yɩra, ba nə nan Ezwipətə wa:

5 Kʋ yɩ Yɩzərayɛlə bikwɩa Ribɛn. Ribɛn bɩ̀á nə yɩ Enɔkə, ʋ nə yɩ Enɔkə sàń tə nɩbɛɛ, də Palu, ʋ nə yɩ Palu sàń tə nɩbɛɛ, 6 də Esəron, ʋ nə yɩ Esəron sàń tə nɩbɛɛ, də Karəmi, ʋ nə yɩ Karəmi sàń tə nɩbɛɛ. 7 Mə Ribɛn sànɩ́ tə nə nətʋ. Ba mama yà yɩ bara 43 730 nə gàlɩ̀.

8 Palu bìú nə yɩ Eliyabə, 9 ʋ nə lɩrɩ Nemuwɛlə, də Datan, də Abiramə. Mə ba mʋ̀ Datan, də Abɩramə təntə nə lalʋʋ tə bon ba ma zàn ba zɩgɩ Moyizə də Aron nə. Kʋ súrí Kore lɩ̀à tə nə, máŋá tə wa, ba nə zàn ba zɩgɩ Ba-Yígúrə́-Jə-Tiu nə. 10 Tɩa tə súrí ka nii, ka lìrə̀ ba də Kore, máŋá tə wa, ʋ púlí tə lɩ̀à tə nə tɩga, mən ga də́ bara 250 tə. Kʋ yɩn mɩmɩnʋ kʋ pa lalʋʋ tə nə. 11 Yá Kore bɩ̀á tə mʋ̀ wà tɩ, kʋ máŋá təntə wa.

12 Nə̀ń Simeyon bɩ̀á, kʋ twá sàń sàń: Kʋ yɩ Nemuwɛlə, ʋ nə yɩ Nemuwɛlə sàń tə nɩbɛɛ, də Yamɛn, ʋ nə yɩ Yamɛn sàń tə nɩbɛɛ, də Yakɛn, ʋ nə yɩ Yakɛn sàń tə nɩbɛɛ, 13 də Zera, ʋ nə yɩ Zera sàń tə nɩbɛɛ, də Sayulə, ʋ nə yɩ Sayulə sàń tə nɩbɛɛ. 14 Mə Simeyon sànɩ́ tə nə nətʋ. Ba yà yɩ bara 22 200.

15 Nə̀ń Gadə bɩ̀á, kʋ twá sàń sàń: Kʋ yɩ Sefon, ʋ nə yɩ Sefon sàń tə nɩbɛɛ, də Agi, ʋ nə yɩ Agi sàń tə nɩbɛɛ, də Swuni, ʋ nə yɩ Swuni sàń tə nɩbɛɛ, 16 də Ozəni, ʋ nə yɩ Ozəni sàń tə nɩbɛɛ, də Eri, ʋ nə yɩ Eri sàń tə nɩbɛɛ, 17 də Arɔdə, ʋ nə yɩ Arɔdə sàń tə nɩbɛɛ, də Areli, ʋ nə yɩ Areli sàń tə nɩbɛɛ. 18 Mə Gadə bɩ̀á tə sànɩ́ nə nətʋ. Ba yà yɩ bara 40 500 ba nə gàlɩ̀.

19 Zwida bɩ̀á nə yɩ Ɛrə də Onan, yá Ɛrə də Onan tɩga Kanaan lʋʋ nii wa. 20 Nə̀ń Zwida bɩ̀á, kʋ twá sàń sàń: Kʋ yɩ Swela, ʋ nə yɩ Swela sàń tə nɩbɛɛ, də Perɛsə, ʋ nə yɩ Perɛsə sàń tə nɩbɛɛ, də Zera, ʋ nə yɩ Zera sàń tə nɩbɛɛ. 21 Perɛsə bɩ̀á nə yɩ Esəron, ʋ nə yɩ Esəron sàń tə nɩbɛɛ, də Hamulə, ʋ nə yɩ Hamulə sàń tə nɩbɛɛ. 22 Mə Zwida sànɩ́ tə nə nətʋ. Ba yà yɩ bara 76 500 ba nə gàlɩ̀. 23 Nə̀ń Yɩsakarə bɩ̀á, kʋ twá sàń sàń: Kʋ yɩ Tola, ʋ nə yɩ Tola sàń tə nɩbɛɛ, də Puva, ʋ nə yɩ Puva sàń tə nɩbɛɛ, 24 də Yaswubə, ʋ nə yɩ Yaswubə sàń tə nɩbɛɛ, də Swiməron, ʋ nə yɩ Swiməron sàń tə nɩbɛɛ. 25 Mə Yɩsakarə sànɩ́ tə nə nətʋ. Ba yà yɩ bara 64 300 ba nə gàlɩ̀.

26 Nə̀ń Zabulon bɩ̀á, kʋ twá sàń sàń: Kʋ yɩ Serɛdə, ʋ nə yɩ Serɛdə sàń tə nɩbɛɛ, də Elon, ʋ nə yɩ Elon sàń tə nɩbɛɛ, də Yaleyɛlə, ʋ nə yɩ Yaleyɛlə sàń tə nɩbɛɛ. 27 Mə Zabulon sànɩ́ tə nə nətʋ. Ba yà yɩ bara 60 500 ba nə gàlɩ̀.

28 Nə̀ń Zʋzɛfə bɩ̀á, kʋ twá sàń sàń: Kʋ yɩ Manase də Efərayimə. 29 Manase bɩ̀á nə yɩ Makirə, ʋ nə yɩ Makirə sàń tə nɩbɛɛ. Makirə lɩrɩ Galadə, ʋ nə yɩ Galadə sàń tə nɩbɛɛ. 30 Nə̀ń Galadə bɩ̀á tə: Kʋ yɩ Yezɛrə, ʋ nə yɩ Yezɛrə sàń tə nɩbɛɛ, də Elɛkə, ʋ nə yɩ Elɛkə sàń tə nɩbɛɛ, 31 də Asəriyɛlə, ʋ nə yɩ Asəriyɛlə sàń tə nɩbɛɛ, də Siswɛmə, nə yɩ Siswɛmə sàń tə nɩbɛɛ, 32 də Swemida, ʋ nə yɩ Swemida sàń tə nɩbɛɛ, də Efɛrə, ʋ nə yɩ Efɛrə sàń tə nɩbɛɛ. 33 Efɛrə bìú Selofadə mʋ̀ wà bìú lɩrɩ, ʋ yɩ bwɩ̀ɩ́ cɩcɩ nə ʋ lɩrɩ. Nə̀ń Selofadə bwɩ̀ɩ́ tə yɩra. Kʋ yɩ Mahəla, də Nʋa, də Ogəla, də Miləka, də Tirəsa. 34 Mə Manase sànɩ́ tə nə nətʋ. Ba yà yɩ bara 52 700 ba nə gàlɩ̀.

35 Nə̀ń Efərayimə bɩ̀á, kʋ twá sàń sàń: Kʋ yɩ Sutela, ʋ nə yɩ Sutela sàń tə nɩbɛɛ, də Bekɛrə, ʋ nə yɩ Bekɛrə sàń tə nɩbɛɛ, də Tahan ʋ nə yɩ Tahan sàń tə nɩbɛɛ. 36 Nə̀ń Sutela bɩ̀á: Kʋ yɩ Eran, ʋ nə yɩ Eran sàń tə nɩbɛɛ. 37 Mə Efərayimə bɩ̀á tə sànɩ́ nə nətʋ. Ba yà yɩ bara 32 500 ba nə gàlɩ̀. Mə Zʋzɛfə bɩ̀á tə nə nətʋ, kʋ twá sàń sàń.

38 Nə̀ń Bɛnzwamɛn bɩ̀á, kʋ twá sàń sàń: Kʋ yɩ Bela, ʋ nə yɩ Bela sàń tə nɩbɛɛ, də Aswəbɛlə, ʋ nə yɩ Aswəbɛlə sàń tə nɩbɛɛ, də Ahiramə, ʋ nə yɩ Ahiramə sàń tə nɩbɛɛ, 39 də Sufamə, ʋ nə yɩ Sufamə sàń tə nɩbɛɛ, də Hufamə, ʋ nə yɩ Hufamə sàń tə nɩbɛɛ. 40 Bela bɩ̀á nə yɩ Arədə də Naman. Arədə yà nə yɩ Arədə sàń tə nɩbɛɛ, Naman də ga yɩ Naman sàń tə nɩbɛɛ. 41 Mə Bɛnzwamɛn bɩ̀á tə nə nətʋ, kʋ twá sàń sàń. Ba yà yɩ bara 45 600 ba nə gàlɩ̀.

42 Nə̀ń Dan bɩ̀á, kʋ twá sàń sàń: Kʋ yɩ Swuhamə, ʋ nə yɩ Swuhamə sàń tə nɩbɛɛ. Mə Dan sànɩ́ tə nə nətʋ, kʋ twá sàń sàń. 43 Swuhamə dwíə́ tə mama, nə ken duən nə, ba yɩ bara 64 400 ba nə gàlɩ̀.

44 Nə̀ń Aswɛrə bɩ̀á, kʋ twá sàń sàń: Kʋ yɩ Yɩməna, ʋ nə yɩ Yɩməna sàń tə nɩbɛɛ, də Yiswəvi, ʋ nə yɩ Yiswəvi sàń tə nɩbɛɛ, də Beriya, ʋ nə yɩ Beriya sàń tə nɩbɛɛ. 45 Beriya bɩ̀á nə yɩ Ebɛrə, ʋ nə yɩ Ebɛrə sàń tə nɩbɛɛ, də Maləkɩyɛlə, ʋ nə yɩ Maləkɩyɛlə sàń tə nɩbɛɛ. 46 Aswɛrə bʋ̀á yɩrɩ yà nə yɩ Sera. 47 Mə Aswɛrə bɩ̀á tə sànɩ́ nə nətʋ. Ba yà yɩ bara 53 400 ba nə gàlɩ̀.

48 Nə̀ń Nɛfətali bɩ̀á, kʋ twá sàń sàń: Kʋ yɩ Yasɩyɛlə, ʋ nə yɩ Yasɩyɛlə sàń tə nɩbɛɛ, də Guni, ʋ nə yɩ Guni sàń tə nɩbɛɛ, 49 də Yesɛrə, ʋ nə yɩ Yesɛrə sàń tə nɩbɛɛ, də Swilɛmə, ʋ nə yɩ Swilɛmə sàń tə nɩbɛɛ. 50 Mə Nɛfətali sànɩ́ tə nə nətʋ, kʋ twá sàń sàń. Ba yà yɩ bara 45 400 ba nə gàlɩ̀.

51 Mə ba tə ba nə gàlɩ̀ Yɩzərayɛlə lɩ̀à tə wa nə nətʋ. Ba yà yɩ bara 601 730 nə gàlɩ̀.

52 Ba-Yígúrə́-Jə-Tiu swɩ̀n Moyizə con, ʋ wʋ́: 53 «N wá tara lʋʋ nii tə n pa dwíə́ təntə nə, sə kʋ ya ba tori, kʋ tʋ kʋ mɛ də lɩ̀à tə nii. 54 N wá pa ba tori kʋ nə dáá sàń tə nə kʋ lɩ̀à nə dáá, n ga pa tori nəmaa sàń tə nə kʋ lɩ̀à nə ba dáá. N wá pa tori sànɩ́ tə mama nə, kʋ mɛ də ba lɩ̀à tə nii, ba nə gàlɩ̀. 55 Yá lʋʋ nii tə yɩ ba wá pwárɩ́, ba ma tara kʋ. Ba wá twá ba nɩbara dwíə́ tə yɩra nə, ba ma jon ba tori. 56 Kʋ wá twá pwárʋ́ nə, ba ma pa tori sàń tə nə kʋ lɩ̀à nə dáá, də sàń tə nə kʋ lɩ̀à nə ba dáá.

Levi dwíí tə bələ nii galʋ

57 Nə̀ń Levi dwíí tə lɩ̀à ba nə gàlɩ̀, kʋ twá sàń sàń. Kʋ yɩ Gɛrəswon, ʋ nə yɩ Gɛrəswon sàń tə nɩbɛɛ, də Kehatə, ʋ nə yɩ Kehatə sàń tə nɩbɛɛ, də Merari, ʋ nə yɩ Merari sàń tə nɩbɛɛ. 58 Nə̀ń Levi dwíí tə sànɩ́ tə: Kʋ yɩ Liban sàń tə, də Ebəron sàń tə, də Mali sàń tə, də Muswi sàń tə, də Kore sànɩ́ tə. Kehatə nə lɩrɩ Aməramə. 59 Aməramə kan yɩrɩ nə yɩ Yɔkebɛdə. Ʋ yɩ Levi bʋ̀á, ʋ nə lɩrɩ Ezwipətə lʋʋ nii wa. Ʋ lɩrɩ Aron, də Moyizə, də ba nakʋa Miriyamə, ʋ pa Aməramə nə. 60 Aron lɩrɩ Nadabə, də Abihu, də Eleyazarə, də Yɩtamarə. 61 Nadabə də Abihu tɩga máŋá tə wa, ba nə ja mən nəkaʋ ba va Ba-Yígúrə́-Jə-Tiu yáá con. 62 Ba wa bara tə mama ba nə gàlɩ̀, kʋ nə zɩgɩ cànà nədʋ, də ba tə nə dwə nətʋ, yà yɩ bara 23 000. Ba wà ba gàlɩ̀ Yɩzərayɛlə lɩ̀à tə titəŋi wa, ba nə wà ba tori pɩn Yɩzərayɛlə lɩ̀à tə wa yɩrɩ. 63 Mə ba tə Moyizə də Yɩɩ joŋwanʋ Eleyazarə nə gàlɩ̀ nə nətʋ, Mʋabə tɩ̀án digə tə wa, ka nə bwə́lə́ Zʋrədɛn mʋnaa tə, ka nə wulə Zweriko tɩʋ tə yáá con. 64 Lìù yà tə̀lə́ lɩ̀à tə wa ba nə gàlɩ̀, Moyizə də Yɩɩ joŋwanʋ Aron nə dí yáá ba gàlà kʋ tíú, Sinayi kasɔɔ lanworu tə wa. 65 Cɩ́gá, Ba-Yígúrə́-Jə-Tiu yà swɩ̀n də ba wá tɩ kasɔɔ lanworu tə wa, ba lìù nədʋ tətə bà ga, də kʋ nə tà Yefune bìú Kalɛbə, də Nun bìú Zozuwe.