Selofadə bwɩ̀ɩ́ tə, tori yoo
27
1 Mala, də Nʋa, də Ogəla, də Miləka, də Tirəsa yɩ Selofadə bwɩ̀ɩ́. Selofadə yɩ Efɛrə bìú, ʋ nə yɩ Galadə bìú, ʋ nə yɩ Makirə bìú, ʋ nə yɩ Manase bìú, ba nə nan Zʋzɛfə bìú Manase dwíí tə wa. 2 Bwɩ̀ɩ́ bonu təntə twi ba bɩrɩ ba tɩ̀àn Moyizə də Yɩɩ joŋwanʋ Eleyazarə yáá con, də lalʋʋ tə yáá tɩ̀án tə yáá con, Yɩɩ jə́rə́ gansili tə mimii nə, ba swɩ̀n, ba wʋ́: 3 «Nə nyɩna tɩga kasɔɔ lanworu tə wa. Ʋ yà twá ʋ tə̀lə́ Kore Púlí tə wa, kʋ nə ŋʋŋwɩn kʋ zɩgɩ Ba-Yígúrə́-Jə-Tiu nə. Ʋ yɩ ʋ tɩga ʋ tətə cʋna yɩrɩ, yá ʋ yà bà bibɛɛ jə. 4 Kʋ mʋ̀ yɩrɩ nə, nə nyɩna yɩrɩ tə mɛ sə kʋ jɛ́n ʋ sàń tə wa, ʋ nə bà bibɛɛ jə yɩrɩ naaa? Pa nəba tori nə nyɩna nubɩa tə wa.»5 Moyizə jɩn ba yoo tə ʋ va Ba-Yígúrə́-Jə-Tiu yáá con,
6 Yá Ba-Yígúrə́-Jə-Tiu swɩ̀n Moyizə con, ʋ wʋ́: 7 «Selofadə bwɩ̀ɩ́ tə jə cɩ́gá. N wá pa ba tɩa, sə ka ya ba tori, ba nyɩna tə nubɩa tə titəŋi wa. Yá ba mʋ̀ nə nə n wá pa ba nyɩna tori tə. 8 Kʋ kwa nə, n wá swɩ̀n Yɩzərayɛlə lɩ̀à tə con, də bɛɛ nə tɩga də ʋ ba bibɛɛ jə, á wá pa ʋ tori tə ʋ bʋ̀á nə. 9 Ʋ nə ba bʋ̀á jə, á wá pa ʋ tori tə ʋ nubiu nə. 10 Ʋ nə ba nubiu jə, á wá pa ʋ tori tə, ʋ nyɩna nubiu nə. 11 Ʋ nyɩna nə ba nubiu jə, á wá pa ʋ tori tə ba sàń tə wa lìù nə, ba nə yɩ dwíí, sə ʋ mʋ̀ nə tɩnɩ kʋ. Kʋ wá ya nii kʋ nə pʋ́pʋ́nɩ́ kʋ pa Yɩzərayɛlə lɩ̀à tə nə, tarʋ yoo wa, ndə Ba-Yígúrə́-Jə-Tiu nə pɩn nii Moyizə nə, sə ʋ tʋn nətʋ.»
Zozuwe jon Moyizə yuu nə
12 Ba-Yígúrə́-Jə-Tiu swɩ̀n Moyizə con, ʋ wʋ́: «Dɩ̀ Abarimə pɛɛn tə wa paan ka tə yuu, n ywàń lʋʋ nii tə, à nə wá pa Yɩzərayɛlə lɩ̀à tə nə. 13 N wá ywàń kʋ, yá n də wá tɩ n va n nyɩna-ba con, ba nə dí yáá ba tɩ, ndə n nubiu Aron nə. 14 Cɩ́gá, á wà à nii zìlí máŋá tə wa, lalʋʋ tə nə pɩ̀à jara à nii nə, Sin kasɔɔ lanworu tə wa. Lalʋʋ tə nə lòrì nɩ́á tə, á wà ba bɩrɩ də à mʋ̀ nə yɩ cɩ́gá Yɩɩ.» Ba-Yígúrə́-Jə-Tiu yɩ Meriba nɩ́á tə yoo nə ʋ swɩ̀n. Nɩ́á tə, tə yoo nə zɩ̀n jara Kadwɛsə nə, Sin kasɔɔ lanworu tə wa.
15 Moyizə dàń swɩ̀n Ba-Yígúrə́-Jə-Tiu con, ʋ wʋ́: 16 «Ba-Yígúrə́-Jə-Tiu, n yɩ Yɩɩ tə, n nə pɩn mɩɩ won tə mama nə, kʋ nə nəŋə! À lòrì mʋ́ sə n kúrí bɛɛ, n kə lalʋʋ tə yáá, 17 ʋ nə wá ja ba ʋ naŋa, də pìí twi, sə Ba-Yígúrə́-Jə-Tiu lalʋʋ tə dàn ká ya ndə pee nə, tə nə ba payɩrʋ jə.» 18 Ba-Yígúrə́-Jə-Tiu swɩ̀n Moyizə con, ʋ wʋ́: «Ja Nun bìú Zozuwe, ʋ mʋ̀ bɛɛ tə Yɩɩ Siŋu tə nə wulə də wá, n ga tún n jɩɩn ʋ yuu wa. 19 N wá zɩgɩ wá Yɩɩ joŋwanʋ Eleyazarə də lalʋʋ tə mama yáá con, n ga pa wá nii, sə ʋ jon n yuu nə, ba yɩ́á yuu. 20 N wá pa wá n dɩ̀àn tə vàn don, sə kʋ pa Yɩzərayɛlə lalʋʋ tə mama cʋgʋ wá. 21 Ʋ wá zɩgɩ Yɩɩ joŋwanʋ Eleyazarə yáá con, yá Eleyazarə wá twá urimə* pwárʋ́ bɩ̀á tə nə, ʋ ma pwárɩ́ ʋ na Ba-Yígúrə́-Jə-Tiu fɩra, ʋ pa wá. Zozuwe də Yɩzərayɛlə lalʋʋ tə mama wá twá Eleyazarə nii təntə nə, ba ma vəli kʋ̀ʋ̀, də ba pìrí ba twi.»