Galʋ 28

Nii tə Yɩɩ nə pɩn joŋi tə yɩrɩ ba nə sʋ̀rɩ́ máŋá mama

1 Ba-Yígúrə́-Jə-Tiu swɩ̀n Moyizə con, ʋ wʋ́: 2 «Pa nii kʋ tə Yɩzərayɛlə lɩ̀à tə nə. N wá swɩ̀n ba con, n wʋ́: “Á wá pa nə zìlə́ won joŋi tə, máŋá tə wa à nə lɩ à tún, sə á pa kʋ nə. Kʋ yɩ joŋi wodiu ba nə fwa də jwəŋə tə ba nə sʋ̀rɩ́ mən wa, tə lwán ga ywán tə pa nə”. 3 N wá swɩ̀n ba con, n wʋ́: “Á nəŋə zìlə́ won tə ba nə sʋ̀rɩ́, á nə wá pa Ba-Yígúrə́-Jə-Tiu nə dɩɩn mama . Kʋ yɩ bɩnɩ nədʋ pəbii bələ, tə yɩra nə zurə tə ga cé, nə á wá ma fwa joŋi ba nə sʋ̀rɩ́* máŋá mama wuuu. 4 N wá ja təntən pəbiə tə n ma fwa joŋi ba nə sʋ̀rɩ́ jɩjʋ nə, n ga ja bələ nii pəbiə tə n ma fwa joŋi ba nə sʋ̀rɩ́ didəni nə, 5 kʋ súrí munbʋa kilo batwa nə, ba nə ywɛ́ də olivə nʋga ka nə yɩ parɩ, litərə də faan. 6 Mə kʋ joŋi təntə nə ba yà sʋ̀rɩ́ dɩɩn mama, Sinayi paan tə yuu wa, kʋ nə yɩ zìlə́ won ba nə sʋ̀rɩ́ də mən, kʋ lwán ga ywán kʋ pa à mʋ̀ Ba-Yígúrə́-Jə-Tiu nə. 7 Divɛn joŋi tə nə wá súrí pəbiə nədʋ mama nə, yɩ divɛn litərə də faan. N wá lwá sana təntə nə dà, Yɩɩ wúlú bwálɩ́ tə wa, n pa à mʋ̀ Ba-Yígúrə́-Jə-Tiu nə. 8 N wá ja bələ nii pəbiə tə n ma fwa joŋi ba nə sʋ̀rɩ́ didəni nə. N wá súrí zìlə́ won tə də divɛn joŋi kʋ nə, ndə jɩjʋ nyiən tə nə. Kʋ yɩ zìlə́ won ba nə sʋ̀rɩ́ mən wa, kʋ lwán ga ywán kʋ pa à mʋ̀ Ba-Yígúrə́-Jə-Tiu nə.

Sìə́ dɩɩn joŋi yoo

9 Sìə́ dɩɩn nə, á wá ja bɩnɩ nədʋ pəbii bələ, tə yɩra nə zurə tə ga cé, á ma fwa joŋi á pa nə. Á wá súrí zìlə́ won kʋ nə yɩ munbʋa kilo bardʋ, ba nə ywɛ́ də nʋga, də divɛn joŋi kʋ nə.

10 Sìə́ dɩɩn mama joŋi tə ba nə sʋ̀rɩ́ wá súrí joŋi tə nə ba nə sʋ̀rɩ́ máŋá mama, də kʋ divɛn joŋi tə nə.

Cànà təntən dɩɩn yoo

11 Á cànà də̀ń laŋʋ mama wa, á wá ja nabalɩ bələ də pabɩʋ, də bɩnɩ nədʋ pəbii barpɛ, tə yɩra nə zurə tə ga cé á ma fwa joŋi ba nə sʋ̀rɩ́, á pa à mʋ̀ Ba-Yígúrə́-Jə-Tiu nə. 12 Á wá súrí zìlə́ won nabala mama yɩra, kʋ nə yɩ munbʋa kilo nʋgʋ, ba nə ywɛ́ də nʋga, də munbʋa kilo bardʋ, ba nə ywɛ́ də nʋga, pabɩʋ mama yɩra. 13 Zìlə won tə nə wá súrí pəbiə mama yɩra yɩ munbʋa kilo batwa, ba nə ywɛ́ də nʋga. Kʋ yɩ zìlə́ won ba nə sʋ̀rɩ́ mən wa, kʋ lwán ga ywán kʋ pa à mʋ̀ Ba-Yígúrə́-Jə-Tiu nə. 14 Á tə wá súrí divɛn litərə batwa nabɩʋ mama yɩra, á súrí divɛn litərə bələ pabɩʋ mama yɩra, á súrí divɛn litərə də faan pəbiə mama yɩra, á ma fwa joŋi tə. Mə joŋi tə ba nə sʋ̀rɩ́, á nə mɛ sə á fwa, á pa à mʋ̀ Ba-Yígúrə́-Jə-Tiu nə, cànà mama wa, mɛ sə kʋ ya nətʋ bɩnɩ tə cànɩ̀ tə mama wa. 15 Á tə wá súrí bʋtɩlʋ lá, á ma fwa á cʋna kwɩan joŋi, á pa à mʋ̀ Ba-Yígúrə́-Jə-Tiu nə, kʋ súrí joŋi tə nə ba nə sʋ̀rɩ́ máŋá mama, də divɛn joŋi tə nə.

Pakə* cànà diŋə yoo

16 Təntən cànà tə dɩan fugə də banɩa dɩɩn nə, kʋ yɩ Pakə cànà à mʋ̀ Ba-Yígúrə́-Jə-Tiu yɩrɩ.

17 Cànà tə dɩan fugə də bonu dɩɩn nə nə á wá sinti á də́ cànà təntə. Ba wá də́ cànà tə də dipɛn kʋ nə wà sabwarɩ ken, kʋ ja va dɩan barpɛ. 18 Ka təntən dɩɩn nə, á wá kun duən nə, á pa nə dun, á bá tʋn á tətə tʋtʋŋɩ mama. 19 Á wá fwa joŋi tə ba nə sʋ̀rɩ́ á pa nə, də nabalɩ bələ, də pabɩʋ, də bɩnɩ nədʋ pəbii barpɛ, tə mama yɩra nə zurə tə ga cé. 20 Á wá súrí zìlə́ won kʋ nə yɩ munbʋa kilo nʋgʋ, ba nə ywɛ́ də nʋga, nabala mama yɩra, də munbʋa kilo bardʋ, ba nə ywɛ́ də nʋga, pabɩʋ mama yɩra, 21 də munbʋa kilo batwa, ba nə ywɛ́ də nʋga pəbiə nədʋ mama yɩra. 22 Á tə wá súrí bʋtɩlʋ lá, á ma fwa cʋna kwɩan joŋi, á ma kwɛn á cʋna tə á lɩ. 23 Á wá fwa tə mʋ̀ jwəŋə tə, á súrí jɩjʋ mama joŋi tə nə sʋ̀rɩ́ tənə. Kʋ yɩ joŋi á nə mɛ sə á fwa máŋá mama wuuu. 24 Á wá fwa tə dɩɩn mama, kʋ ja va dɩan barpɛ, ndə joŋi wodiu nə, ba nə fwa də joŋi tə ba nə sʋ̀rɩ́ mən wa, kʋ lwán ga ywán kʋ pa à mʋ̀ Ba-Yígúrə́-Jə-Tiu nə. Á wá fwa tə á súrí joŋi tə nə ba nə sʋ̀rɩ́ máŋá mama wuuu, də divɛn joŋi tə nə. 25 Barpɛ nii dɩɩn tə nə, á wá kun duən nə, á pa nə dun, á bá tʋn á tətə tʋtʋŋɩ mama.

Woceri cànà diŋə yoo

26 Dɩɩn tə nə, á nə wá lɩ təntən wobɩa, á pa à mʋ̀ Ba-Yígúrə́-Jə-Tiu nə, ndə wodidʋn zìlə́ won nə, á woceri cànà* tə máŋá wa, á wá kun duən nə, á pa nə dun, á bá tʋn á tətə tʋtʋŋɩ mama. 27 Á wá fwa joŋi tə ba nə sʋ̀rɩ́, kʋ lwán ga ywán, á pa à mʋ̀ Ba-Yígúrə́-Jə-Tiu nə, də nabalɩ bələ, də pabɩʋ nədʋ, də bɩnɩ nədʋ pəbii barpɛ. 28 Á wá súrí zìlə́ won, kʋ nə yɩ munbʋa kilo nʋgʋ, ba nə ywɛ́ də nʋga, nabala mama yɩra, də munbʋa kilo bardʋ, ba nə ywɛ́ də nʋga, pabɩʋ yɩra, 29 də munbʋa kilo batwa, ba nə ywɛ́ də nʋga, pəbii barpɛ tə nədʋ mama yɩra. 30 Á tə wá súrí bʋtɩlʋ lá, á ma fwa cʋna kwɩan joŋi. 31 Á wá fwa tə mʋ̀ jwəŋə tə, á súrí á jɩjʋ mama joŋi tə nə, ba nə sʋ̀rɩ́, də kʋ zìlə́ won joŋi tə nə. Á wá ja vàná, tə yɩra nə zurə tə ga cé, á ma fwa jwəŋə tə, kʋ súrí divɛn jwəŋə tə nə.