Pupwən jwəŋə fwaŋʋ dɩɩn yoo
29
1 «Barpɛ nii cànà tə, təntən dɩɩn nə, á wá kun duən nə, á pa nə dun, á bá tʋn á tətə tʋtʋŋɩ mama. Kʋ wá ya pupwən cə̀rə́ mà dɩɩn. 2 Á wá ja nabala nədʋ, də pabɩʋ nədʋ, də bɩnɩ nədʋ pəbii barpɛ, kʋ nədʋ mama yɩra nə zurə, kʋ ga cé, á ma fwa jwəŋə tə ba nə sʋ̀rɩ́*, tə lwán ga ywán, á pa à mʋ̀ Ba-Yígúrə́-Jə-Tiu nə. 3 Zìlə́ won tə nə wá súrí nabala tə nə, yɩ munbʋa kilo nʋgʋ, ba nə ywɛ́ də nʋga. Á wá súrí munbʋa kilo bardʋ, ba nə ywɛ́ də nʋga, pabɩʋ tə yɩra, 4 də munbʋa kilo batwa, ba nə ywɛ́ də nʋga, pəbii barpɛ tə nədʋ mama yɩra. 5 Á tə wá súrí bʋtɩlʋ lá, á ma fwa cʋna kwɩan joŋi, á ma kwɛn á cʋna tə á lɩ. 6 Á tə wá súrí joŋi tə ba nə sʋ̀rɩ́ cànà mama, də kʋ zìlə́ won tə, də joŋi tə ba nə sʋ̀rɩ́ máŋá mama, də kʋ zìlə́ won tə, də kʋ divɛn joŋi tə jwəŋə təntə nə, ndə kʋ nə mɛ nətʋ. Tə yɩ jwəŋə ba nə sʋ̀rɩ́, tə lwán ga ywán tə pa à mʋ̀ Ba-Yígúrə́-Jə-Tiu nə.»Cʋna kwɩan joŋi fwaŋʋ dɩɩn yoo
7 «Barpɛ nii cànà tə dɩan fugə dɩɩn nə, á wá kun duən nə, á vwa á níə́, á pa nə dun. Á bá tʋn á tətə tʋtʋŋɩ mama. 8 Á wá fwa jwəŋə tə ba nə sʋ̀rɩ́, tə lwán ga ywán, á pa à mʋ̀ Ba-Yígúrə́-Jə-Tiu nə. Kʋ yɩ nabala nədʋ, də pabɩʋ nədʋ, də bɩnɩ nədʋ pəbii barpɛ. Á wá ja vàná tə yɩra nə zurə, tə ga cé. 9 Á wá súrí zìlə́ won, kʋ nə yɩ munbʋa kilo nʋgʋ, ba nə ywɛ́ də nʋga, nabala tə nə, də munbʋa kilo bardʋ, ba nə ywɛ́ də nʋga, pabɩʋ tə nə, 10 də munbʋa kilo batwa, ba nə ywɛ́ də nʋga, pəbii barpɛ tə nədʋ mama nə. 11 Á tə wá súrí bʋtɩlʋ lá, á ma fwa cʋna kwɩan joŋi, á ma kwɛn á cʋna tə á lɩ. Kʋ súrí joŋi tə nə, ba nə sʋ̀rɩ́ máŋá mama, də zìlə́ won tə, də divɛn jwəŋə tə nə.»
Vunən cànà diŋə yoo
12 «Barpɛ nii cànà tə dɩan fugə də bonu dɩɩn nə, á wá kun duən nə, á pa nə dun. Á bá tʋn á tətə tʋtʋŋɩ mama. Á wá də́ cànà dɩan barpɛ, á ma pa dun à mʋ̀ Ba-Yígúrə́-Jə-Tiu nə. 13 Á wá fwa jwəŋə ba nə sʋ̀rɩ́ mən wa, tə lwán ga ywán, á pa à mʋ̀ Ba-Yígúrə́-Jə-Tiu nə. Tə mʋ̀ nə yɩ nabalɩ fugə də batwa, də pabɩran bələ, də bɩnɩ nədʋ pəbii fugə də banɩa, kʋ nədʋ mama yɩra nə zurə, kʋ ga cé. 14 Á wá súrí zìlə́ won, kʋ nə yɩ munbʋa kilo nʋgʋ, ba nə ywɛ́ də nʋga, nabalɩ fugə də batwa tə nədʋ mama nə, də munbʋa kilo bardʋ, ba nə ywɛ́ də nʋga, pabɩran bələ tə nədʋ mama nə, 15 də munbʋa kilo batwa, ba nə ywɛ́ də nʋga, pəbii fugə də banɩa tə nədʋ mama nə. 16 Á tə wá súrí bʋtɩlʋ lá, á ma fwa cʋna kwɩan joŋi. Kʋ súrí joŋi tə nə, ba nə sʋ̀rɩ́ máŋá mama, də zìlə́ won tə, də kʋ divɛn joŋi tə.»
17 Bələ nii dɩɩn tə nə, kʋ yɩ nabalɩ fugə də bələ, də pabɩran bələ, də bɩnɩ nədʋ pəbii fugə də banɩa, kʋ nədʋ mama yɩra nə zurə, kʋ ga cé, 18 də zìlə́ won tə, də divɛn jwəŋə tə nə wá súrí nabalɩ tə, də pabɩran tə, də pəbii tə nə, ndə ba nə pɩn nii, sə tə dánɩ́ ya nətʋ. 19 Á tə wá súrí bʋtɩlʋ lá, á ma fwa cʋna kwɩan joŋi, á súrí joŋi tə nə, ba nə sʋ̀rɩ́ máŋá mama, də kʋ zìlə́ won tə, də kʋ divɛn jwəŋə tə. 20 Batwa nii dɩɩn tə nə, kʋ yɩ nabalɩ fugə də nədʋ, də pabɩran bələ, də bɩnɩ nədʋ pəbii fugə də banɩa, kʋ nədʋ mama yɩra nə zurə, kʋ ga cé, 21 də zìlə́ won tə, də divɛn jwəŋə tə nə wá súrí nabalɩ tə, də pabɩran tə, də pəbii tə nə, ndə ba nə pɩn nii, sə tə dánɩ́ ya nətʋ. 22 Á tə wá súrí bʋtɩlʋ lá, á ma fwa cʋna kwɩan joŋi, á súrí joŋi tə nə, ba nə sʋ̀rɩ́ máŋá mama, də kʋ zìlə́ won tə, də kʋ divɛn joŋi tə.
23 Banɩa nii dɩɩn tə nə, kʋ yɩ nabalɩ fugə də pabɩran bələ, də bɩnɩ nədʋ pəbii fugə də banɩa, kʋ nədʋ mama yɩra nə zurə, kʋ ga cé, 24 də zìlə́ won, də divɛn jwəŋə tə nə wá súrí nabalɩ tə, də pabɩran tə, də pəbii tə nə, ndə ba nə pɩn nii, sə tə dánɩ́ ya nətʋ. 25 Á tə wá súrí bʋtɩlʋ lá, á ma fwa cʋna kwɩan joŋi, á súrí joŋi tə nə, ba nə sʋ̀rɩ́ máŋá mama, də kʋ zìlə won tə, də kʋ divɛn joŋi tə.
26 Bonu nii dɩɩn tə nə, kʋ yɩ nabalɩ nʋgʋ, də pabɩran bələ, də bɩnɩ nədʋ pəbii fugə də banɩa, kʋ nədʋ mama yɩra nə zurə, kʋ ga cé, 27 də zìlə́ won tə, də divɛn jwəŋə tə nə wá súrí nabalɩ tə, də pabɩran tə, də pəbii tə nə, ndə ba nə pɩn nii, sə tə dánɩ́ ya nətʋ. 28 Á tə wá súrí bʋtɩlʋ lá, á ma fwa cʋna kwɩan joŋi, á súrí joŋi tə nə, ba nə sʋ̀rɩ́ máŋá mama, də kʋ zìlə́ won tə, də kʋ divɛn joŋi tə.
29 Bardʋ nii dɩɩn tə nə, kʋ yɩ nabalɩ nana də pabɩran bələ, də bɩnɩ nədʋ pəbii fugə də banɩa, kʋ nədʋ mama yɩra nə zurə, kʋ ga cé, 30 də zìlə́ won tə, də divɛn jwəŋə tə nə wá súrí nabalɩ tə, də pabɩran tə, də pəbii tə nə, ndə ba nə pɩn nii, sə tə dánɩ́ ya nətʋ. 31 Á tə wá súrí bʋtɩlʋ lá, á ma fwa cʋna kwɩan joŋi, á súrí joŋi tə nə, ba nə sʋ̀rɩ́ máŋá mama, də kʋ zìlə́ won tə, də kʋ divɛn jwəŋə tə.
32 Barpɛ nii dɩɩn tə nə, kʋ yɩ nabalɩ barpɛ də pabɩran bələ, də bɩnɩ nədʋ pəbii fugə də banɩa, kʋ nədʋ mama yɩra nə zurə, kʋ ga cé, 33 də zìlə́ won tə, də divɛn jwəŋə tə nə wá súrí nabalɩ tə, də pabɩran tə, də pəbii tə nə, ndə ba nə pɩn nii, sə tə dánɩ́ ya nətʋ. 34 Á tə wá súrí bʋtɩlʋ lá, á ma fwa cʋna kwɩan joŋi, á súrí joŋi tə nə, ba nə sʋ̀rɩ́ máŋá mama, də kʋ zìlə́ won tə, də kʋ divɛn joŋi tə.
35 Nana nii dɩɩn tə nə, á wá kun duən nə, á pa nə dun Á bá tʋn á tətə tʋtʋŋɩ mama. 36 Á wá ja nabala, də pabɩʋ, də bɩnɩ nədʋ pəbii barpɛ, kʋ nədʋ mama yɩra nə zurə, kʋ ga cé, á ma fwa jwəŋə ba nə sʋ̀rɩ́, tə lwán ga ywán tə pa à mʋ̀ Ba-Yígúrə́-Jə-Tiu nə, 37 də zìlə́ won tə, də divɛn jwəŋə tə nə wá súrí nabalɩ tə, də pabɩran tə, də pəbii tə nə, ndə ba nə pɩn nii, sə tə dánɩ́ ya nətʋ. 38 Á tə wá súrí bʋtɩlʋ lá, á ma fwa cʋna kwɩan joŋi, á súrí joŋi tə nə, ba nə sʋ̀rɩ́ máŋá mama, də kʋ zìlə́ won tə, də kʋ divɛn joŋi tə.
39 Mə jwəŋə nə, á nə mɛ sə á fwa á pa Ba-Yígúrə́-Jə-Tiu nə, á cànɩ̀ díŋə́ máŋá wa, á súrí á nipoli də á pupwən jwəŋə nə, də á jwəŋə tə nə, ba nə sʋ̀rɩ́, də á zìlə́ wiən tə, də á divɛn jwəŋə tə, də á nimarʋ jwəŋə tə nə.»