Galʋ 30

1 Moyizə swɩ̀n kʋ tə mama Ba-Yígúrə́-Jə-Tiu yà nə pɩn wa nii kʋ yuu wa, Yɩzərayɛlə lɩ̀à tə con.

Nii tə Yɩɩ nə pɩn nipoli yuu wa

2 Moyizə swɩ̀n Yɩzərayɛlə dwíə́ yáá tìán tə con, ʋ wʋ́: « Nəŋə nii tə Ba-Yígúrə́-Jə-Tiu nə pɩn. 3 Lìù nə poli nii sə ʋ fwa won ʋ pa Ba-Yígúrə́-Jə-Tiu nə, nə à yə̀ə́ ʋ nə dùə̀ ʋ kə ʋ tɩ̀àn nə yoo wa, ʋ wà mɛ sə ʋ kwɩ̀án ʋ nii, ʋ mɛ sə ʋ tʋn kʋ tə ʋ nə swɩ̀n ʋ nii wa, ʋ pa kʋ nii sú.

4 Kan nə wulə ʋ zandʋan wa, də ʋ tə wulə ʋ nyɩna kàrá wa, ʋ nə poli nii sə ʋ fwa won ʋ pa Ba-Yígúrə́-Jə-Tiu nə, nə à yə̀ə́ ʋ nə dùə̀ ʋ kə ʋ tɩ̀àn nə yoo wa, 5 ʋ nyɩna nə nì ʋ nipoli tə, nə à yə̀ə́ ʋ durə tə yoo, ʋ nə dùə̀ ʋ kə ʋ tɩ̀àn nə, yá ʋ nyɩna tə wà yoo swɩ̀n ʋ con, kan tə mɛ sə ʋ tʋn ʋ nipoli tə də ʋ durə tə, ʋ pa tə nii sú. 6 Yá dɩɩn tə nə kan tə nyɩna nə nì kʋ, ʋ nə vɩga kʋ, nipoli tə də durə tə kan tə nə dùə̀ ʋ kə ʋ tɩ̀àn nə kʋ́ʋ̀ tà kálʋ́ sə ʋ tʋn tə, ʋ pa tə nii sú. Ba-Yígúrə́-Jə-Tiu wá kwɛn kan tə cʋna tə ʋ lɩ ʋ mʋ̀ də kan tə pwə́rə́ wa, ʋ nyɩna nə vɩga ʋ nipoli tə də ʋ durə tə yɩrɩ.

7 Ʋ nə twi ʋ swe ʋ nipoli tə kwa nə, nə à yə̀ə́ durə tə ʋ nə dùə̀ ʋ kə ʋ tɩ̀àn nə kwa nə, də ʋ wà bʋ́n, 8 ʋ barɩ tə nə nì tə, yá ʋ wà yoo swɩ̀n ʋ con, kʋ dɩɩn tə nə, kan tə mɛ sə ʋ tʋn ʋ nipoli tə də ʋ durə tə, ʋ pa tə nii sú. 9 Yá dɩɩn tə nə, ʋ barɩ tə nə nì kʋ, ʋ nə vɩga kʋ, ʋ wá kwɛ̀ kan tə nipoli tə də durə tə ʋ nə dùə̀ ʋ kə ʋ tɩ̀àn nə, də ʋ wà bʋ́n. Ba-Yígúrə́-Jə-Tiu wá kwɛn kan tə cʋna tə ʋ lɩ, ʋ mʋ̀ də kan tə pwə́rə́ wa.

10 Kadənu, nə à yə̀ə́ kan tə ʋ barɩ nə dʋgʋ wá nə poli nii sə ʋ ma tʋn yoo, ʋ mɛ sə ʋ tʋn ʋ nipoli tə ʋ pa kʋ nii sú. 11 Kan nə wulə ʋ barɩ dìə̀, ʋ nə poli nii, nə à yə̀ə́ ʋ nə dùə̀ ʋ kə ʋ tɩ̀àn nə yoo wa, 12 ʋ barɩ nə nì kʋ, yá ʋ wà yoo swɩ̀n ʋ con, ʋ nə wà kʋ vɩ, kan tə mɛ sə ʋ tʋn ʋ nipoli tə də ʋ durə tə, ʋ pa tə nii sú. 13 Yá ʋ barɩ nə kwɛ̀ ʋ nipoli tə, dɩɩn tə nə ʋ nə nì kʋ, kʋ tə mama nə nan kan tə nii wa ndə nipoli nə, nə à yə̀ə́ ndə durə nə, wá kwɛ̀. Ba-Yígúrə́-Jə-Tiu wá kwɛn kan tə cʋna tə ʋ lɩ, ʋ mʋ̀ də kan tə pwə́rə́ wa, ʋ barɩ tə nə kwɛ̀ ʋ nipoli tə də ʋ durə tə yɩrɩ. 14 Nipoli mama, nə à yə̀ə́ durə mama kan nə wá dù ʋ kə ʋ tɩ̀àn nə yoo wa, ʋ barɩ wàá tə ʋ sɛ̀, ʋ ma wàá tə ʋ kwɛ̀. 15 Ʋ barɩ nə nì yá ʋ wà yoo mama swɩ̀n kan tə con, kʋ va kʋ yí kʋ tɩpʋrɩ, kʋ yɩ ʋ sɛ̀ sə nipoli tə, nə à yə̀ə́ durə tə kan tə nə dùə̀ ʋ kə ʋ tɩ̀àn nə yoo tə wa nii sú. Ʋ barɩ tə sɛ̀ sə tə nii sú ʋ nə nì tə, yá ʋ wà yoo mama swɩ̀n yɩrɩ. 16 Yá dɩɩn tə ʋ nə nì tə nə kɛ̀ń, ʋ dàń ga zɩgɩ là ʋ kwɛ̀ tə, kan tə cʋna wá zɩn ʋ barɩ tə.» 17 Mə yìə̀n tə tə nə, Ba-Yígúrə́-Jə-Tiu pɩn tə pʋ́pʋ́nɩ́ tə pa Moyizə nə, tə nə swɩ̀n bɛɛ də ʋ kan pwə́rə́ wa yìə̀n yuu wa, nə à yə̀ə́ bɛɛ də ʋ bʋ̀á, ʋ nə yɩ kacɩɩn ʋ wulə ʋ nyɩna dìə̀ wa, pwə́rə́ wa yìə̀n yuu wa.